Zak 1
1
Zakarii a sii-yɛn
(1–8)
Dɛnaa Lawa n Izirayeli nɛn bíi we mà ǹ nə ǹ giã ǹ gɔn bɔyaa
1 #
Ɛsid 4.24–5.1; 6.14 Pɛrsin kii Dariyusu#1.1 Dariyusu na á goã kii lɛa lɛ̀ 522 yǎa lɛ̀ 486 bɛ̀ Yezu tɔn yɛ wa. a kiibaa lɛ̀ paabaa ǹ wɔ a mui kiwisibaa ǹ wɔ li, Dɛnaa Lawa boo da ka Idoo a nɔ̀ɔn, Lawa a boo gii-dali, Berekia a nɛgiĩ Zakarii ni. 2-3Á pɛ nɛ mà a kɛ pɛ Izirayeli minin manɛ: – Á ke, masɛ Dɛnaa Lawa Pàãyiidɛnaa n kɛ pii: «Ma foo goã á yoo ka digolon ma li parsiini. Sɛnɛ, bɛ̀ ka wusoo ka daa masɛ Dɛnaa Lawa li, má á re wusii ma da ka li. Dɛnaa Lawa Pàãyiidɛnaa a da ǹ boo ne. 4Ka nyan ka digolon lɛn zɔɔ̃ wa. Lɛlɛ, maa boo gii-dalin nə́ boo da ǹ nɛ, mà ǹ nə ǹ giã ǹ gɔn baraa kɛ kaa, kɔnlɛ ka ǹ sii bɔnɛɛ zɛnaan kɛn nɛ. Sɛnɛ, ǹ nə n too kɔ ma lon wa, ǹ nə n yiri koa ma li wa. Dɛnaa Lawa a da ǹ boo ne. 5Ka digolon banban, Lawa a boo gii-dalin lɛn dɔn nə́ gã. 6A da yaa ma boo laanka gɔn waan mɛnɛn kɔ maa dí-nyalin, Lawa a boo gii-dalin la, máa ǹ pɛ ǹ nɛ, á dɔ ǹ li ǹ nə́ golee li. Ǹ nə́ ǹ giã ǹ gɔn bɔyaa, ǹ nə́ pɛ: Dɛnaa Lawa Pàãyiidɛnaa na á golee li mà a n die wɔ kuĩ wɔa giã ǹ gɔn li ka wɔa sii zɛnaan nɛ. A na á bɛ lɛ zɛnaa.»
Sii-yɛ bibinaa: Sùin
7Dariyusu a kiibaa lɛ̀ paabaa ǹ wɔ li, a mui fulugoonbaa ǹ wɔ, *Sebati mui a lɛawaa fuəweensiibaa ǹ wɔ li, Dɛnaa Lawa boo da ka Idoo a nɔ̀ɔn, Lawa a boo gii-dali, Berekia a nɛgiĩ Zakarii ni. Zakarii pɛ: 8#SNS 6.2-8 «Bɛa tèlò lɛ nɛ, má giĩ goon yɛ á dii sùi tã la. A n golee-n dan bii ni, ǹ luu n tì, nyankɔrɔ basa nɛ. Sùi kɔsɔn man a kio: A tãtãn nɛ, a pupurun ni, ka a fufun ni.» 9Má nɔ̀n da kɛnɛn: «Dɛnaa, sùin kɛn man wàa giala pii?» Lon a dia dí-a wole mɛn bɛ́ á kɔnbɔ a boo da ma nɛ, bɛ́ ma lɛ si kɛnɛn: «Ma á re a giala pii n ni.» 10Giĩ lɛ nə́ n toa dan lɛn gòã li ǹ luu n tì, á pɛ: «Dɛnaa Lawa na á ǹ dia mà ǹ da kɔ tán lɛ ǹ ga a ganaa.» 11Sùidɛnan lɛn nə́ n bɔlɔ saa ǹ nə́ pɛ Dɛnaa Lawa a lon a dia dí-a wole lɛ nɛ golee-n dan lɛn giulun ǹ luu n tì, ǹ nə́ pɛ: «Wɔ kɔ tán tumaa lɛ wɔ ga a ganaa. Wɔ bìn diɛ kɔn yɛ wa, a tumaa n kiĩ ni.» 12Dɛnaa Lawa a Lon a dia dí-a wole lɛ tɔn pɛ: «Dɛnaa Lawa Pàãyiidɛnaa, a lɛ̀ pɔsɔbaa n ke n foo n yoo ne Zeruzalɛmu li kɔnlɛ ka Zudaa kiwi tɛnɛn nɛ. Yǎa biĩ n tɔn makara bɔ ǹ ganaa?» 13Dɛnaa Lawa tɔ́n boo da ka foo-basiɛ̃ nɛ lon a dia dí-a wole lɛ nɛ boo diɛ ka ma nɛ. Foo taã ǹ boon manɛ, ǹ nə́ foo doɛ.
Dɛnaa Lawa á re makara boe Zeruzalɛmu ganaa
14Lona dia dí-a wole mɛn bɛ́ boo diɛ ka ma nɛ, á n toa ma ganaa mà ma boo kɛ pɛ: Dɛnaa Lawa Pàãyiidɛnaa n kɛ pii:
«Maa Zeruzalɛmu narɛ ǹ gɔn tá baraa,
ka *Siɔn kele sonbore kɛ nɛ.
15Sɛnɛ, tɔrɔn mɛnɛn bɛ́ ǹ nə́ waa
ǹ dinin la taãn-taãnɛ,
ma foo n yoo ne bɛn li parsiini.
A giala, maa foo-yoo bɛ́ a tɔn gole kɔ
Izirayeli li ǹ mɛn waáraa wa,
bɛa tɔrɔn kɛn lɛn ná a koe mìi saa lon.
16Bɛ lɛ nɛ masɛ Dɛnaa Lawa á ke pii:
Man die wusii man bɔyaa
ma wo Zeruzalɛmu li ka foo basiɛ̃ nɛ,
ma màn zɔɔ̃ ǹ biɛ da li.
Ka bɛ nɛ,
ǹ tá re wusii ǹ maa kion dɔ,
ǹ wusoo ǹ maa kiwi lɛ dɔ.»
Dɛnaa Lawa a da ǹ boo ne.
17Bɛ kio,
lon a dia dí-a wole lɛ wusoo á pɛ ma nɛ,
mà ma boo kɛ da ka
Dɛnaa Lawa Pàãyiidɛnaa tɔ nɛ:
«Maa kiwin lɛn tá re wusii doo
ǹ pã ka màn sonboren ne.
Man die wusii ma Zeruzalɛmu
bɔ ma koa doo,
ma Siɔn foo taã.»
اکنون انتخاب شده:
Zak 1: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.