Zak 2
2
Sii-nyaa paabaa ǹ wɔ: Bɛnən laanka fuũn
1Sii-nyaa gɔ́ɔ̃ nɛ, má n yii saa lon. Á ke, má bɛn màn sii yɛ. 2Lon a dia dí-a wole mɛn bɛ́ boo diɛ ka ma nɛ, má nɔ̀n da bɛ la kɛnɛn: «Bɛnən kɛn man wàa giala pii?» Á ma lɛ si: «Gánan mɛnɛn bɛ́ pàã nə́ ǹ lon, ǹ nə́ Zudaa minin loo, Izirayeli wɔn nɛ ka Zeruzalɛmu wɔn nɛ, ǹ nə ǹ sasawaa paǹ yii li, maǹ bɛ giala pii.» 3Bɛ kio, Dɛnaa Lawa fuũ màn sii nyaa ma nɛ. 4Má nɔ̀n da: «Maǹ nə́ daa wàa pɛ?» Á ma lɛ si kɛnɛn: «Maǹ nə́ daa nyɛ́ɛ da gána pàãdɛnan kɛn ganaa ǹ nə́ ǹ ziziɛ̃, ǹ mɛnɛn lɛn nə da Zudaa gána yu. Ǹ nə́ Zudaa a zaman loo paǹ yii li, min kɔn boo la á n gòãn doa ǹ nyɛɛn wa.»
Sii nyaa sɔɔbaa ǹ wɔ: Màn zɔɔ̃ ǹ biɛ
5Sii nyaa gɔ́ɔ̃ nɛ, masɛ Zakarii, má n yii saa lon, ma sii mɛn yɛ, á ke: Giĩ goon ne, ka màn zɔ́ɔ̃ ǹ biɛ ná a gɔn. 6Má nɔ̀n da la má a n woe maa. Á ma lɛ si mà asɛ n woe Zeruzalɛmu zoɛ̃, asɛ na a pəməbaa laanka a sasabaa dɔ̃. 7Lon a dia dí-a wole mɛn bɛ́ boo diɛ ma nɛ, a bɛ́ á n zɔ̃ á die, lon-a dia dí-a wole kɔsɔ daa n da lɛ, 8á pɛ-n kɛnɛn: – Baa si n wo pɛ tɔntɔraagiĩ kɛ nɛ biɛ ná a gɔn: «Zeruzalɛmu doamaa nɛ a goã kiwi lɛa kungɔn ná a ba a ganaa wa. A giala, minbuiin nɛn laanka tɔɔn mɛnɛn bɛ́ a nɛ, ǹ tá re mɔnɛɛ ǹ la yii ni. 9Dɛnaa Lawa a da ǹ boo á ke: Ma dinmaa á re goɛ̃ ma tan ka tɛ kungɔn bɛ́ lɔn kiwi lɛ lɛnpɛnɛ. Ma á re maa tɔ golebaa nyɛɛ kiwi lɛ bii.»
Dɛnaa Lawa n gùli-kɔlin bíi mà ǹ wusoo ǹ da Zeruzalɛmu
10Dɛnaa Lawa pɛ:
«Haya, ka baa si, ka baa si.
Ka soo ka n bɔ gɔsɛ a lɛ̀gɔn la gána kɛ nɛ,
Dɛnaa Lawa a da ǹ boo ne.
Kasɛn manɛ má ka pɛsɛ̃ kanaa
gùrù sii tumaa ganaa.
Dɛnaa Lawa a da ǹ boo ne.
11Ka soo, Zeruzalɛmu minin lɛn,
kasɛn mɛnɛn bɛ́ giã-n *Baabilonii,
ka soo ka wo fufuu!»
12Dɛnaa Lawa Pàãyiidɛnaa a da ǹ boo á ke, asɛ mɛn dí gole wɔ ma gɔn, mà ma pɛ tɔrɔn kɛn manɛ ǹ nə́ ka kokoo: «Min woo min yoo ka gialaa, ǹ dɛnaa na á n gɔn sã masɛ din yii ni. 13Sonbore, man die yui tɔrɔn kɛn gialaa. Min mɛnɛn nə goã ǹ bɛ̀rɛn lɛa, bɛn tá re ǹ dɔn kokoe.» Bɛ̀ bɛ nə́ n zɛnaa, ka á re doɛ̃ ka bɛ nɛ, mà Dɛnaa Lawa Pàãyiidɛnaa na á ma dia.
14«N lɛ dɛ ka foo kɔɔ̃n nɛ,
n nə n nyɛnyɛɛ, *Siɔn.
Ma á ke die.
Man die giɛ̃ ka bii.
Dɛnaa Lawa a da ǹ boo ne.
15Bɛa pinaa kɛ nɛ, tɔrɔ gigiã á re n kiɛ kun ka masɛ Dɛnaa Lawa nɛ. Ǹ tá re maa zaman biɛ. Sɛnɛ man die giɛ̃ kasɛn bii.» Bɛ̀ bɛ nə́ n zɛnaa ǹ mɛn waáraa, ka á re doɛ̃ ka bɛ nɛ mà Dɛnaa Lawa Pàãyiidɛnaa na á ma dia ka li Lawa a boo gii-dali lɛa.
16Zudaa n die wusii
a Dɛnaa Lawa wɔ baa
gána kɛ nɛ a din wɔ lɛa.
Zeruzalɛmu á re wusii doo
a n baa kiwi lɛa,
á bɔ á koa a din wɔ lɛa.
17Màn yiikoonaa tumaa nə n lɛ tã
Dɛnaa Lawa nyɛɛnɛ.
A giala, a yii kaa,
a n soe a kion sonbore kɛ nɛ.
اکنون انتخاب شده:
Zak 2: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.