Mat 8
8
Yezu giĩ goon a gɔ̀nɔn busu babaraa nya
(Mar 1.40-45; Luk 5.12-16)
1Yezu bɛ́ á gisĩ á n bɔ kele lɛ la, zaman gigiã kɔ a kio lɛ. 2Bɛa biikoo li, gɔ̀nɔn busu babaraa dɛnaa goon nə́ n zɔ̃ á dɔ, á kaa tán a yɔrɔ-a, á pɛ nɛ: «Mìinaa ganaa, bɛ̀ n tá li, n tá boe la n masɛ a busu nya.»
3Yezu nə́ n gɔn saa á da a ganaa, á pɛ: «Ma tá li, masɛ máa busu lɛ nə n bɔ n ganaa.»
A din bǎã-n gɔrɔ, busu lɛ nə́ n bɔ a ganaa, á kakabaa yɛ. 4#LWS 14.1-32 Bɛ kio, Yezu tɔ́n pɛ nɛ: «N too kɔ doɛ̃, n nyan toa n kɛ laakalaa min kɔ́n yii-n wa. Wo n din nya wúlu-bɔle ne, bɛ ga n ganaa bɔrɔ, bɛ kio, Lawa wúlu mɛn boo da Muizu ni, n bɛ lɛ bɔ n nyaa min din tumaa nɛ mà n busu nya.»
Yezu sii mɛn zɛnaa sɔraasin goledɛnaa a dí-nyali ni
(Luk 7.1-10)
5Yezu bɛ́ we Kafaranaamu kiwi ǹ mɛn waáraa, Rɔmu minin sɔraasi paabiɛ mìilandɛnaa goon nə́ n zɔ̃ á dɔ a li, 6a ná a nyankɔ: «Mìinaa ganaa, maa dí-nyali n waa-n tán piɛ, a boe yoo la wa, á nɔmaa-n parsiini.»
7Yezu tɔ́n pɛ nɛ: «Ma á die woe a busu lɛ nyɛɛ.»
8Sɛnɛ, sɔraasin goledɛnaa lɛ pɛ Yezu ni: «Mìinaa ganaa, masɛ doamaa bie ka n wɔ maa kion ne wa. Boo goon dinsɔɔ̃ pɛ, maa dí-nyali lɛ a busu á die nyɛɛ. 9Masɛ dɔ dinmaa kɛ lɛ n maa goledɛnan pàã giulun, sɔraasin tá ma dɔ a pàã giulun. Bɛ̀ má pɛ ǹ goon ne má a woo, a n woe, bɛ̀ ma pɛ kɔsɔ dɔ nɛ má a daa, a n die. Bɛ̀ má pɛ maa bɛ̀rɛgiĩ ni má a kɛ zɛnaa, a n zɛnɛɛ.»
10Yezu bɛ́ á bɛa boon lɛn ma lɔn, á n kaãbaa ǹ ganaa parsiini, á tɔ́n pɛ a kiodɛnan lɛn manɛ: «Masɛ n pii ka nɛ sonbore: ma bin kɛa golee Lawa li kɛ miã tɔrɔ yɛ min kɔ́n lon Izirayeli gána-n wa. 11#Luk 13.29 Man pii ka nɛ: Min gigiã tá re boe lɛ̀giala-n ka lɛ̀nyɛɛn nɛ, ǹ giã tán ǹ zɔ́n màn bii lon a kiibaa ǹ bǎã nɛ kun ka Zuifun digolo Abrahamu ni, ka Izaaki ni, ka Zakɔba nɛ. 12#Mat 22.13; 25.30; Luk 13.28 Sɛnɛ, *Lawa a kiibaa ǹ bǎã lɛ bɛ́ min mɛnɛn kíɛ̃ lɛa, ǹ tá re bɛa dɛnan lui ǹ nə ǹ kaa kanaa wɔlɔ tì biribiri li, ǹ wuu pɛ walan, ǹ sɔ kere bɔ.»
13Bɛ kio, Yezu tɔ́n pɛ sɔraasin goledɛnaa lɛ nɛ: «Wo piɛ, á die n zɛnɛɛ n nɛ a kɔnpɛ ka n golee Lawa li ni.»
A boo lɛ da biikoo mɛn li, a din biikoo lɛ nɛ sɔraasin goledɛnaa a dí-nyali lɛ a busu nya.
Yezu busulə gigiã mɛn a busu nya
(Mar 1.29-34; Luk 4.38-41)
14Yezu woo Piɛrɛ a piɛ. Á Piɛrɛ n dàãlɔ yɛ waa-n tán-a walan, gɔ̀nɔn wɛɛ̃ na á goã a ganaa. 15Yezu ná a gɔn kũ, a gɔ̀nɔn wɛɛ̃ lɛ nya. Bɛ kio á yoo, á màn-bii zɛnaa á kɔ Yezu la.
16Wasa bɛ́ á mɛ, minin nə́ daa nɔ̀ɔn babaraa dɛnaa gigiã kɔ Yezu la. Yezu bɛa nɔ̀ɔnɔn lɛn loo ka boo lɛ yii goon ne, á busulə din tumaa dɔ a busu nya. 17#Iza 53.4 A ná a zɛnaa màn mɛn bɛ́ toɛ Lawa a boo gii-dali Izayii boo mɛn da, bɛ lɛ lɛ pã: «Wɔ dinin busun man nə́ goã a mìi ni, a na á wɔa fuun si a din ganaa.»
Min mɛnɛn bɛ́ giɛ li mà ǹ kɔ Yezu lɛ
(Luk 9.57-62)
18Yezu bɛ́ á zaman gigiã yɛ a lɛnpɛnɛ, á pɛ ǹ nɛ gɔrɔ mà ǹ wo tà kio. 19A laan bɛ̀ a woo, landa sii-daraali goon nə́ n zɔ̃ á dɔ a li á pɛ nɛ: «Mìinaa, n bɛ́ re woe bǎã woo bǎã nɛ, masɛ n koe n lɛ.»
20Yezu tɔ́n pɛ nɛ: «Tolokan yalan tan, bàanan kii tan, sɛnɛ, bǎã kɔ́n ba Min a Nɛgiĩ lon á n mìi susui a-n wa.»
21Giĩ goon ne, a dɔ n Yezu a kialandɛnaa goon lɛa, bɛ dɔ́ pɛ nɛ: «Mìinaa, toa masɛ wo ma di gere bĩ bɔrɔ, ma tɔn daa.»
22Yezu tɔ́n pɛ nɛ: «Kɔ masɛ kio lɛ. A toa geren nə ǹ geren bĩ.»
Yezu n piɛ̃ gole lɛ kuĩ
(Mar 4.35-41; Luk 8.22-25)
23Yezu wɔ tà kuru ǹ goo ne, a kialandɛnan nə́ da zii. 24Boɛɛn gɔrɔ piɛ̃ gole nə́ n tonton baa á yoo tà lɛ la, tà mu lɛ n yui á n duwii goo lɛ la, a n giɛ li a mui. Bɛa zɛnɛɛ bɛ̀ Yezu n nyuù we. 25A kialandɛnan nə́ n zɔ̃ ǹ nə́ dɔ a li, ǹ nə́ bũ ǹ nə́ pɛ nɛ: «Dɛnaa, wɔ kirisibaa! Wɔsɛn man die giɛ̃!»
26Yezu tɔ́n pɛ ǹ nɛ: «Wàa na á baa ka tá nyɛ́ɛ biɛ miɛ̃, kaa golee Lawa li a kiɛɛrɛ dɛ!»
Bɛa bǎã-n gɔrɔ, Yezu yoo, á paraa piɛ̃ lɛ laanka tà mu lɛ li. Wɔlɔ nyɛɛ ka kiĩn. 27Ǹ tumaa nə́ n kaãbaa parsiini, ǹ nə́ goã pii: «Kɛ n wàa n min tɔrɔ lɛa, piɛ̃ laanka tà mu din tumaa ná a bɔlɔ sii?»
Yezu nɔ̀ɔndɛnaa min paa a busu nya
(Mar 5.1-20; Luk 8.26-39)
28Yezu bɛ́ á dɔ tà kio, Gadaaraa minin gána nɛ, giĩ min paa kɔ́n yoo geren bĩ ǹ bǎã nɛ, ǹ nə́ daa n da lɛ. Nɔ̀ɔnɔn man nə́ goã ǹ ganaa. Ǹ nə́ goã baraa á la yii ni, haalɛ min kɔ́n din yii ba we á boe ka bɛa zii lɛ-n wa. 29Ǹ nə́ yoo ǹ nə́ n lɛ dɛ: «Lawa a Nɛgiĩ ganaa, n wàa mɛn sii n wɔsɛn sii ni? Ma nə́ n daa dɔlɔ bɔ wɔsɛn ganaa kànaa bɛ̀ a biikoo ná a tɔn dɔ wa?»
30Birii gigiã goã tiãlɛa, giɛ ǹ màn-bii li. 31Nɔ̀ɔnɔn lɛn nə́ Yezu nyankɔ ǹ nə́ pɛ: «Bɛ̀ n tá li n wɔsɛn loo, n wɔ kaa bɛa biriin lɛn ganaa.»
32Yezu tɔ́n pɛ ǹ nɛ: «Ka soo ka n tan.»
Ǹ nə́ n bɔ giĩ min paa lɛ ganaa, ǹ nə́ woo kaa biriin lɛn ganaa. A din bǎã-n gɔrɔ, biriin lɛn nə́ n toa kele lɛ la ka baa nɛ, ǹ nə́ gisĩ ǹ nə́ kaa tà mu li, mu nə́ ǹ kũ.
33Biriin-lɛduə̃lin lɛn nə́ baa si, ǹ nə́ woo kiwi gɔ́ɔ̃ nɛ, ǹ nə́ sii lɛ din tumaa laakalaa walan. Sii mɛn bɛ́ á n zɛnaa nɔ̀ɔn babaraa dɛnan lɛn manɛ, ǹ nə́ bɛ dɔ laakalaa. 34Kiwi minin nə́ nɔmaa ǹ nə́ soo, ǹ nə́ woo ǹ da Yezu lɛ. Ǹ bɛ́ ǹ nə́ yɛ, ǹ ná a nyankɔ mà a woo a n bɔ ǹsɛn gána nɛ.
اکنون انتخاب شده:
Mat 8: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.
