Mat 7
7
Kɔn zɛ̀rɛbaa
(Luk 6.37-38,41-42)
1Ka baran ka miãn zɛ̀rɛbaa wa, màn mɛn bɛ́ toɛ, Lawa baran ka dɔn zɛ̀rɛ baa wa. 2#Mar 4.24 Ka bɛ́ ka miãn zɛ̀rɛ biɛ lɔn ke, Lawa n die ka dɔn zɛ̀rɛ biɛ miɛ̃. Ka bɛ́ ka miãn wɔ zoɛ̃ màn mɛn ganaa, Lawa n die ka dɔn wɔ zoɛ̃ bɛ lɛ ganaa. 3Wàa na á baa buun mɛn bɛ́ n dɔɔ̃n yii ni, n nə́ giɛ bɛ ganaa, a da yaa mɛn mɛn bɛ́ n din wɔ nɛ, n ba giɛ bɛ-a wa? 4Ma n boe la n pɛ n dɔɔ̃n nɛ lɔn, mà a daa nsɛ buun lɛ bɔ a yii ni, bɛ̀ mɛn nə́ n din wɔ nɛ? 5Din-koali ke! N mɛn lɛ bɔ n din yii lɛ-n bɔrɔ, bɛ kio, n yii á die wɔlɔ yii sɔnbɔraanɛ, n nə n dɔɔ̃n lɛ a buun lɛ bɔ a yii ni.
6Ka bɛ́ màn *yoreen mɛn koɛ Lawa nɛ, ka baran bɛ kɔ gin minbuiinin kɛn la, n kiɛ̃ n nə ǹ yaa n bɔyɛɛ ka dinin wɔ̃wɛ̃ wa. Ka baaran kaa bɔlɔ-a ǹ gii kaa tán birii minbuiinin kɛn giulun, n kiɛ̃ n nə ǹ yaa tɔtɔrɛ ǹ gòãn li wa.
Yezu a boo nyankɔ wɔ paǹ li
(Luk 11.9-13)
7Ka màn nyankɔ, Lawa á re màn koe ka la. Ka ga màn li, ka á re màn yii. Ka kiɛnlɛ dɛ, ǹ tá re kiɛnlɛ buĩ ka nɛ. 8A giala, min mɛn bɛ́ màn nyankoe Lawa la, Lawa á re màn koe bɛa dɛnaa la. Min mɛn bɛ́ giɛ màn li Lawa li, bɛa dɛnaa á die màn yii. Min mɛn dɔ bɛ́ kiɛnlɛ dii, Lawa á die kiɛnlɛ buĩ bɛa dɛnaa nɛ. 9Min tá ka bii, bɛ̀ a nɛ buuru nyankɔ la, a kɔlɔ saa a kɔ la? 10Hinlaa bɛ̀ á zɔ̀ nyankɔ la, a miɛ̃ saa a kɔ la? 11Ka laanka kaa baraabaa kɛ din tumaa nɛ, ka tá kaa nɛnyaanan foo dùũ mànan doɛ̃, bɛ̀ ka kɔ ǹ la, sanparɛ ka ka Di Lawa nɛ, bɛ̀ min mɛnɛn nə́ màn sonbore nyankɔ la, á die koe ǹ la!
12 #
Luk 6.31
Ka bɛ́ zoɛ̃ mà ka miãn nə màn mɛn zɛnaa ka nɛ, ka dɔn nə bɛ lɛ miã zɛnaa ǹ dɔn nɛ. Muizu a landa laanka Lawa a boo gii-dalin sɛ́wɔn man pii, yǎa a n zɛnɛɛ miɛ̃.
Yezu a boo, kiɛnlɛ boɛɛn wɔ paǹ li
(Luk 13.24)
13Ka wɔ ka kiɛnlɛ boɛɛn nɛ, a giala, kiɛnlɛ mɛn bɛ́ woe ka min ni bɔ̀nbaa ǹ bǎã nɛ, bɛ n gole, zii mɛn dɔ bɛ woe walan, a kɔmalɛ n kɔɔ̃nɛ. Min gigiã dɔ n bɛ lɛ siɛ. 14Sɛnɛ, kiɛnlɛ mɛn bɛ́ woe min ni yiikoonaabaa ǹ bǎã nɛ bɛ n boɛɛnɛ, zii mɛn dɔ bɛ́ woe walan, bɛa kɔmalɛ n kaka. Min gigiã ba koe bɛ lɛ lɛ wa.
Da laanka a nɛ
(Luk 6.43-44)
15Min mɛnɛn bɛ́ Lawa a boo gii-dali soɛ-bɔlen lɛa, ka n parabaa bɛn nɛ. Maǹ die ka li basiɛ̃-n ka sèren bɛ́ lɔn, a da yaa ǹ gɔ́ɔ̃ kɛ n baraa ka don gin basaã-kɔlen manɛ. 16Ka n die ǹ doɛ̃ ǹ nya ǹ dín ma li. Min ba too niɛ̃ nyan fuiĩ da la wa, min dɔ ba gɔ́rɔ nɛ niɛ̃ siã da la wa. 17Da sonbore n nɛ sonbore koe, da baraa dɔ n nɛ baraa koe. 18Da sonbore ba boe la a nɛ baraa kɔ wa, da baraa dɔ ba boe la a nɛ sonbore kɔ wa. 19#Mat 3.10; Luk 3.9 Da mɛn din tumaa bɛ́ a ba nɛ sonbore koe wa, bɛ lɛ nə n kukuri a n kaa tɛ-n. 20#Mat 12.33 Min mɛnɛn bɛ́ n dinin biɛ Lawa a boo gii-dalin lɛa, ka n die ǹ doɛ̃ ǹ nya ǹ dín ma li miɛ̃ lɛ-n.
Lawa a kiibaa
(Luk 13.25-27)
21Min mɛn din tumaa bɛ́ masɛ bíi: «Dɛnaa, Dɛnaa,» bɛ tumaa bie re we lon a kiibaa-n wa. Ma Di Lawa foo sii zɛnaalin dininsɔɔ̃nɔn man die we. 22Bɛ̀ kiri wɔ pinaa lɛ dɔ, min gigiã tá re pii masɛ nɛ: «Dɛnaa, Dɛnaa, wɔsɛn nə́ Lawa a boo pɛ ka n tɔ nɛ, wɔ́ nɔ̀ɔnɔn loo wɔ́ ǹ bɔ minin ganaa ka n tɔ nɛ, wɔ́ kaãbaa ǹ sii gigiã zɛnaa ka n tɔ nɛ!» 23#Loe 6.9 Ma á re pii ǹ ni: «Ma bin ka dɔ̃ wa. Ka n tan, ka n bɔ ma li, sii baraa-zɛnaalin kɛn!»
Yezu a boo kion màn paa wɔ paǹ li
(Luk 6.47-49)
24Ma boon mɛnɛn da, bɛ̀ min mɛn nə́ n too kɔ ǹ ganaa, á ǹ si, bɛa dɛnaa n kɔnboe ka yiridɛnaa mɛn bɛ́ a ná a kion dɔ tataã la. 25La kaa, pɛrɛn nə́ pã ǹ nə́ toɛ̃, piɛ̃ gole yoo, sɛnɛ, kion lɛ kaa wa, a giala a gòã na á n daa tataã la. 26Masɛ bɛ́ má boon mɛnɛn da, bɛ̀ min mɛn nə́ n too kɔ ǹ ganaa, á n piã a ǹ si wa, bɛa dɛnaa n kɔnboe ka yiribaãnaa mɛn bɛ́ a ná a kion dɔ nyɔɔsɔ̃ la. 27La kaa, pɛrɛn nə́ pã ǹ nə́ toɛ̃, piɛ̃ gole yoo, á nyanaa á kaa. A ziziɛ̃ ǹ gɔn nə baraa kɔ á la yii ni.
Yezu a pàã boo
28 #
Mat 1.22; Luk 4.32 Yezu bɛ́ á bɛa doreen kɛn lɛn kɔ á nya ǹ mɛn waáraa, zaman lɛ nə́ n kaãbaa a minin daraa ǹ gɔn ganaa parsiini. 29A giala a minin daraa ǹ gɔn laanka ǹ landa sii-daraalin wɔ a goon wa. Pàã tá asɛ a da ǹ boo lɛ nɛ.
اکنون انتخاب شده:
Mat 7: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.
