Mat 21
21
Yezu ná a kiibaa nyaa ka yɔrɔ mɛn nɛ
(Mar 11.1-11; Luk 19.28-40; Zaã 12.12-19)
1-2Ǹ bɛ́ ǹ nə́ diri Zeruzalɛmu la, ǹ bɛ́ Bɛtfazee kiwi, kunu *Olivie dan kele ganaa, Yezu ná a kialandɛnaa min paa dia a nyɛɛnɛ, á pɛ ǹ nɛ: «Kiwi mɛn bɛ́ ka nyɛɛnɛ, ka wo walan. Bɛ̀ ka dɔ lɔn gɔrɔ, ka tá re dundun dan yii doa nɛ, a nɛ banɛɛ n kun ni. Ka ǹ fore ka da ǹ kɔ ma la. 3Bɛ̀ min nɔ̀n da ka la, ka pɛ mà kasɛn Dɛnaa laadoo na a ganaa. Á die toɛ ka da sisia.»
4Bɛ na á n zɛnaa màn mɛn bɛ́ toɛ, Lawa a boo gii-dali boo mɛn da, bɛ lɛ lɛ pã:
5 #
Zak 9.9
«Ka pɛ *Siɔn kele minin manɛ Zeruzalɛmu kiwi:
Kaa kii á ke die ka li,
á n din boɛɛn kɔ,
á dii dundun dan la,
ka a nɛ banɛɛ nɛ,
dundun dan a nɛ lɛa.»
6Kialandɛnaa min paa lɛ woo, ǹ nə́ zɛnaa ka Yezu pɛ ǹ nɛ lɔn, 7ǹ nə́ daa ka dundun dan lɛ laanka a nɛ lɛ nɛ. Ǹ nə́ ǹ mɔnaan kaa ǹ la, Yezu dii á giã la. 8Zaman lɛ bii, min gigiã ná a mɔnaa naa tán zii la. Ǹ tɛn nə́ da luu buruu kuru, ǹ nə́ ǹ kaa tán-a zii la. 9#Loe 118.25-26 Min mɛnɛn bɛ́ Yezu nyɛɛnɛ, min mɛnɛn bɛ́ a kio, ǹ tumaa na á goã n lɛ dii ǹ nə́ pii: «Kii Davida tɔrɔ da ka n bǐɛ̃ nɛ! Min mɛn bɛ́ die ka wɔa Dɛnaa tɔ nɛ, Lawa die a barka wɔ a nɛ! Wɔsɛn tá fòo diɛ Lon a Lawa nɛ!»
10Yezu bɛ́ á wɔ Zeruzalɛmu, kiwi minin tumaa la n kakaɛ̃. Minin man nɔ̀n diɛ bǎã yii ni: «Die ne?»
11Zaman lɛ pɛ: «Nazarɛtin Yezu, Lawa a boo gii-dali ni, Galilee gána nɛ.»
Yezu sii mɛn zɛnaa pii-kɔlen manɛ Lawa a kion
(Mar 11.15-19; Luk 19.45-48; Zaã 2.13-22)
12Bɛ kio, Yezu wɔ Lawa a kion. Min mɛnɛn bɛ́ màn siɛ̃ walan, ǹ mɛnɛn bɛ́ màn pii, á ǹ tumaa loo á ǹ kaa kanaa. Á wɔrɔ lonkɔlen tabalan nyanaa á ǹ lɛ kuməə tán, á zɛrɛkantoan-sãlin dankanan lɛ kuməə tán. 13#Iza 56.7; Zer 7.11 Á tɔ́n pɛ ǹ nɛ:
– A tá kiɛ̃-n Lawa a boo ne: «Masɛ a kion lɛ n die n bíi Lawa nyankɔ ǹ kion.» Sɛnɛ, kasɛn nə́ ke ka baa wurumunun duru ǹ yala lɛa!
14Yii tere-an kɔnɔn laanka bɔlɔka tɔrɔ kɔsɔn nə́ n zɔ̃ ǹ nə́ dɔ Yezu li Lawa a kion, Yezu nə́ ǹ busu nya. 15Lawa a wúlu-bɔlen goledɛnan laanka landa sii-daraalin bɛ́ ǹ nə́ Yezu yɛ á kaãbaa ǹ siin zɛnaa, nɛnyaanan kɛn dɔn nə́ n lɛ dii Lawa a kion ka a tɔ nɛ mà "ǹsɛn kii Davida tɔrɔ, mà a da ka a bǐɛ̃ nɛ", ǹ foo busu Yezu li. 16#Loe 8.3 Ǹ nə́ tɔ́n pɛ nɛ: «Ǹ bɛ́ boo mɛn diɛ, táa n tá miɛ.»
Yezu tɔ́n pɛ ǹ nɛ:
– Ma á miɛ̃. Sɛnɛ, ka tɔn kɛ pɛ Lawa a boo sɛ́wɔ-n duduu wa? «A ná a din tɔ bɔ ǹ boo wɔ nɛnyaan bɔnboɛɛnɛn laanka nɛnyaan tiɛɛ̃nɛn lɛ-n.»
17Bɛ kio, Yezu kiɛ̃ á ǹ toa walan, á soo á n bɔ Zeruzalɛmu, á woo Betaanii kiwi, á waa walan.
Yezu Lawa bíi gɔ́rɔ da goon li
(Mar 11.12-14,20-24)
18A lɛawaa baayɛlɛ, Yezu bɛ́ wusii die kiwi gɔ́ɔ̃ nɛ, bòo kũ. 19Á gɔ́rɔ da kɔ́n yɛ zii para-a, á kanaa á ga ǹ dan la, a màn kɔ́n yɛ wa, bɛ̀ á n bɔ a luu ni. Yezu tɔ́n pɛ gɔ́rɔ da lɛ nɛ: «Nsɛ kɛ a nɛ koe doo duduu wa.»
A din bǎã-n gɔrɔ, gɔ́rɔ da lɛ laa. 20Yezu a kialandɛnan bɛ́ ǹ nə́ bɛ yɛ, á kaãbaa da ǹ ganaa parsiini. Ǹ nə́ tɔ́n nɔ̀n da Yezu la: «Wàa na á baa gɔ́rɔ da lɛ laa bǎã goon ne gɔrɔ kɛnɛn?»
21 #
Mat 17.20; Kor1 13.2 Yezu tɔ́n pɛ ǹ nɛ:
– Man pii ka nɛ, sonbore: Bɛ̀ golee Lawa li yɛ ka lon ǹ mɛn pinaa, bɛ̀ ka n gɔ́ɔ̃ baa paa wa, masɛ màn mɛn zɛnaa bɛa gɔ́rɔ da kɛ nɛ, ka a re goɛ̃ bɛ li wa. Haalɛ ta ka n ka pɛ kele kɛ nɛ: «Yoo n nə n bɔ kànaa, n wo n dɔ yìsi mu gole li», a nə n zɛnɛɛ. 22Bɛ̀ golee Lawa li tá ka lon, bɛ̀ ka màn woo màn nyankɔ Lawa lon, ka tá re bɛ yii.
Yezu a pàã lɛ n boe maa?
(Mar 11.27-33; Luk 20.1-8)
23Yezu bɛ́ á wɔ Lawa a kion, a n minin darɛɛ, Lawa a wúlu-bɔlen goledɛnan laanka Zuifun goledɛnan nə́ n zɔ̃ ǹ nə́ dɔ a li, ǹ nə́ nɔ̀n da la: «Ma n bɛa siin kɛn lɛn zɛnɛɛ ka wàa pàã nɛ? Die na á bɛa pàã lɛ kɔ n la?»
24Yezu tɔ́n pɛ ǹ nɛ: «Masɛ dɔ n die nɔ̀n goon diɛ ka dɔn la. Bɛ̀ ka a binyəə kɔ ma la, min mɛn bɛ́ á siin lɛn zɛnaa ǹ pàã kɔ ma la, ma dɔ á re bɛa dɛnaa pii ka nɛ. 25Die na á Zaã dia mà a da *batɛmu da minin ganaa? Lawa-n hinlaa minbuiinin manɛ?»
Ǹ dinin nə́ liere kɔ kɔn biin ni, ǹ nə́ pɛ kɔn nɛ: «Bɛ̀ wɔ́ pɛ mà Lawa ná á dia, a n die pii wɔsɛn manɛ mà wàa na á baa wɔ waa asɛ a boo la wa? 26Bɛ̀ wɔ́ pɛ mà minbuiinin man nə́ dia, wɔsɛn doamaa nɛ wɔ nyɛ́ɛ baa zaman lɛ nɛ, a giala min tumaa n giɛ Zaã ganaa Lawa a boo gii-dali lɛa.»
27Ǹ nə́ tɔ́n pɛ Yezu ni: «Wɔsɛn ba doɛ̃ wa.»
Yezu dɔ́ tɔ́n pɛ ǹ dɔn manɛ: «Bɛ̀ ka a doɛ̃ wa, min mɛn bɛ́ á siin kɛn lɛn zɛnaa ǹ pàã kɔ ma la, masɛ dɔ a bɛa dɛnaa pii ka-n wa.»
Yezu boo giməə mɛn da nɛgiĩ min paa wɔ paǹ li
28Yezu tɔ́n pɛ:
– Ka n wàa taasɛ kɛ gɔ́ɔ̃ nɛ? Nɛgiĩ paa na á goã giĩ kɔ́n lon. Á pɛ a goledɛnaa nɛ ǹ kɔ́n pinaa: «Maa nɛ, wo dí nya maa wuru-n pelo.» 29Bɛ́ pɛ nɛ: «Ma a woe wa.» Sɛnɛ, á wusoo á n taasɛ bɛ kio, á woo. 30Á n zɔ̃ á dɔ a kiɛɛrɛdɛnaa lɛ dɔ li á pɛ-n miɛ̃. Bɛ tɔ́n pɛ nɛ: «Ma á woe, díi.» Sɛnɛ, a woo wa. 31Ǹ mɛn na á ǹ díi lɛ foo sii zɛnaa?
Ǹ nə́ tɔ́n pɛ: «A bibinaa lɛ nɛ.»
Yezu tɔ́n pɛ ǹ nɛ:
– Masɛ n pii ka nɛ sonbore: Wusuru-silin laanka lɔ kɔrɔn tá re doe *Lawa a kiibaa ǹ bǎã nɛ ka nyɛɛnɛ. 32A giala, Zaã na á daa zii pepere nyaa ka nɛ, sɛnɛ, ka waa a boo la wa. Wusuru-silin laanka lɔ kɔrɔn sɛn nə́ waa la. Ka bɛ yɛ, haalɛ bɛ din tumaa kio, ka nə n taasɛ, ka wusoo ka kio ne, ka golee a boo li wa.
Yezu boo giməə mɛn da wuru-lɛduə̃li babaraan wɔ paǹ li
(Mar 12.1-12; Luk 20.9-19)
33Ka n too kɔ boo giməə kɔsɔ li. Giĩ goon na á wuru bɔ, á da nɛ-kɔle zumu a nɛ, a tɔ mà *rezɛ̃ da, á kungɔn dɔ, á ná a lɛnpɛnɛ nɛ, a ná a nɛ mu bɔɔ̃ ǹ yala fɔ̃, a ná a lɛduə̃lin kion dɔ. Bɛ kio, á dí-nyalin goa, á ǹ koa a li, á woo zii ni. 34Da nɛ ma waáraa bɛ́ á dɔ, a ná a dí-nyalin dia da wuru dí-nyalin lɛn li, maǹ na asɛ wɔ gii kɔ ǹ la ǹ da nɛ. 35Wuru-lɛduə̃lin lɛn ná a dí-nyalin lɛn kũ, ǹ nə́ goon məməə, ǹ nə́ goon dɛ á gã, ǹ nə́ goon dɛdɛ ka kɔlɔ nɛ. 36Wurudɛnaa lɛ wusoo a dí-nyali kɔsɔn dia, bɛn nə́ gigiã ǹ nə́ la bibinaa wɔn kɛn manɛ. Wuru-lɛduə̃lin lɛn nə́ bɛn dɔn baa miɛ̃. 37Nyɔɔbaa, a ná a din a nɛgiĩ dia. A na á goã taasɛ: «Bɛ bɛ́ n maa nɛ lɛa, ǹ tá re nyɛ́ɛ biɛ bɛ-n sɛn.» 38Sɛnɛ, wuru dí-nyalin lɛn bɛ́ ǹ nə́ yɛ die, ǹ nə́ pɛ kɔn nɛ: «Haya, a kíɛ̃-saali lɛ á ke. Ka daa, wɔ dɛ, wɔ wuru lɛ si.» 39Ǹ nə́ kũ ǹ nə́ zũ wuru lɛ kio, ǹ nə́ dɛ á gã.
40Yezu tɔ́n nɔ̀n da ǹ la: «Bɛ̀ wurudɛnaa lɛ daa ǹ mɛn waáraa, a n die wàa zɛnɛɛ dí-nyalin lɛn man kəni?»
41Ǹ nə́ tɔ́n pɛ Yezu ni: «A n die bɛa min baraan kɛn dii baraa, yǎa ǹ giɛ̃, a na a da wuru lɛ koa dí-nyali kɔsɔn li, bɛ̀ a tá a wɔ gii li ǹ mɛn waáraa, bɛ̀ ǹ kɔ la a biikoo li.»
42Yezu tɔ́n pɛ ǹ nɛ:
– Lawa a boo bɛ́ màn mɛn diɛ, ka tɔn bɛ pɛ wa?
«Kion-dɔlen bɛ́ ǹ nə́ n piã ka kɔlɔ mɛn nɛ,
bɛ lɛ na á kɛ gùrù dɔ ǹ kɔlɔ baa.
Dɛnaa Lawa na á bɛa kaãbaa ǹ dí kɛ nya,
wɔsɛn yii na á bɛ lɛ yɛ.»
43Bɛ lɛ nɛ, masɛ á pii ka nɛ, kaa tá Lawa wɔbaa-n ke, a kiibaa giulun, bɛ á die n sii ka la, a n kɔ tɔrɔ kɔsɔn la, ǹ mɛnɛn zɛnaa ǹ sii bɛ́ kɔnpii ni. [ 44Bɛ̀ min mɛn bɔ á mɛnaa bɛa kɔlɔ kɛ lɛ la, ǹ dɛnaa gù yii n yiyiɛ. Bɛ̀ á bɔ á mɛnaa min mɛn la, a n bɛa dɛnaa yɔyɔrɛ.]
45Lawa a wúlu-bɔlen goledɛnan laanka *Fariziɛ̃n bɛ́ ǹ nə́ bɛa a boo giməə kɛn lɛn ma, ǹ nə́ dɔ̃ mà Yezu na á ǹ da ǹsɛn dinin ganaa. 46Ǹ nə́ goã giɛ a kũ ǹ gɔn li, sɛnɛ, ǹ nə́ nyɛ́ɛ baa zaman nɛ, a giala minin man giɛ Yezu ganaa Lawa a boo gii-dali lɛa.
اکنون انتخاب شده:
Mat 21: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.
