Mat 22
22
Yezu boo giməə mɛn da kɔn wɔ ǹ màn-bii wɔ paǹ li
(Luk 14.15-24)
1Yezu wusoo á boo giməə da a kialandɛnan laanka zaman nɛ, á pɛ:
2– Lon a kiibaa lɛ a kɔnboe n ke: Kii goon ne, a ná a nɛgiĩ a kɔn wɔ ǹ màn-bii zɛnaa. 3A ná a dí-nyalin dia mà ǹ wo minin bíi ǹ da kɔn wɔ ǹ màn bii. Sɛnɛ, bɛn nə́ n piã mà ǹsɛn ba die wa. 4Á wusoo á dí-nyali kɔsɔn dia, mà ǹ wo pɛ ǹ nɛ: «Á ke, man má màn-bii gole zɛnaa, má maa dii gɔ̀lɔ̀n laanka maa tɔɔ nyɔɔnaan dɛ, sii din tumaa nə́ n yɔrɔ bɔ á nya. Ka da kɔn wɔ ǹ màn bii.» 5Sɛnɛ, ǹ wo min mɛnɛn bíi, bɛn nə da sii li wa, ǹ nə́ kiɛ̃ ǹ nə́ woo ǹ laadoo dín nya. Goon nə́ woo a wurun, goon nə́ woo a pii kɔ ǹ bǎã nɛ, 6gialakunun lɛn nə́ kii lɛ a dí-nyalin lɛn kũ, ǹ nə́ fuu nyaa ǹ yii ni, yǎa ǹ nə́ gã.
7Kii lɛ foo yoo. A ná a sɔraasin dia, mà ǹ wo bɛa gɛ̀-dɛlen kɛn lɛn dɛ, ǹ tɛ da ǹ kiwi ganaa. 8Bɛ kio, á tɔ́n pɛ a dí-nyalin lɛn manɛ: «Kɔn wɔ ǹ màn-bii lɛ yɔrɔ nə́ n bɔ á nya. Sɛnɛ, ka wo min mɛnɛn bíi a ganaa, bɛn doamaa bie wa. 9Bɛ̀ á miɛ̃, ka wo ziin sawaa kɔn-a ǹ bǎã nɛ, ka bɛ́ re min mɛn tumaa yii, ka ǹ bíi ǹ da kɔn wɔ ǹ màn bii.» 10Bɛa dí-nyalin lɛn nə́ woo golee ziin la, ǹ min mɛn tumaa yɛ, a baraan nɛ ka a bǐɛ̃n nɛ, ǹ nə́ ǹ tumaa kaa kun ǹ nə woo ǹ ne, yǎa kɔn wɔ ǹ kion lɛ pã ka minbuiin ni.
11Ǹ min mɛnɛn bíi, kii lɛ wɔ á ga ǹ ganaa. Á giĩ goon yɛ, wo kɔn wɔ ǹ bǎã nɛ ǹ mɔnaa ba a ganaa wa. 12Á tɔ́n pɛ nɛ: «Maa giaáragiĩ, a na á saa lɔn n wɔ kànaa, kɔn wɔ ǹ mɔnaa dɔ ná a ba n ganaa wa?» Giĩ lɛ nə n lɛ da boo-n wa. 13#Mat 8.12; 25.30; Luk 13.28 Kii lɛ tɔ́n pɛ a dí-nyalin manɛ: «Ka kũ ka a gòã laanka a gɔnɔn yii, ka saa ka zũ kanaa wɔlɔ tì li. Á die wuu pii walan, a sɔ kere bɔ.»
14Yezu tɔ́n pɛ: «Sonbore ne, Lawa min tumaa bíi, sɛnɛ, a min mɛnɛn bɔ, bɛn ba tɛ wa.»
Nyin giɔ̀mɔ saraa boo
(Mar 12.13-17; Luk 20.20-26)
15 *Fariziɛ̃n kɔnɔn nə́ woo kɔn yɛ màn mɛn bɛ́ toɛ, ǹ wo Yezu lɛ zulu, ǹ kũ ka a din lɛ gɔ́ɔ̃ ǹ boo ne. 16Ǹ nə́ ǹ kialandɛnan dia, kun ka min mɛnɛn bɛ́ kii Erɔdi a pàã li, mà ǹ wo pɛ Yezu ni: «Mìinaa, wɔsɛn tá doɛ̃, n tá sonbore pii, n tá minin darɛɛ Lawa a zii ganaa ka a peperebaa nɛ, n ba nyɛ́ɛ biɛ minbuiinin taasiɛ-n wa, a giala n ba minin bɔkɔnlɛ we wa. 17Á siĩni wɔ nyin giɔ̀mɔ saraa Rɔmun kii gole gole la hinlaa wɔ baran saraa la wa? N taasiɛ pɛ wɔsɛn manɛ bɛ wɔ paǹ li.»
18Sɛnɛ, Yezu bɛ́ á ǹ gɔ́ɔ̃ a baraabaa dɔ̃, á tɔ́n pɛ ǹ nɛ: «Gɔ́ɔ̃ tì-an kɛn! Wàa na á baa ka tá ǹ diɛ masɛ gɔ́ɔ̃ li? 19Ǹ bɛ́ nyin giɔ̀mɔ lɛ sarɛɛ ka wɔrɔ mɛn nɛ, ka nyaa masɛ nɛ ma ga a ganaa.»
Ǹ bɛ́ ǹ nə́ kɔ la, 20á tɔ́n nɔ̀n da ǹ la: «Die mìi nyin laanka die tɔ n ke kiɛ̃-n la?»
21Ǹ nə́ tɔ́n pɛ nɛ: «Kii Gole kɛ nɛ.»
Yezu tɔ́n pɛ ǹ nɛ: «Màn mɛn bɛ́ kii wɔ lɛa, ka bɛ kɔ kii la. Màn mɛn dɔ bɛ́ Lawa wɔ lɛa, ka bɛ kɔ Lawa la.»
22Ǹ bɛa boo lɛ ma lɔn, á kaãbaa da ǹ ganaa parsiini. Ǹ nə́ kiɛ̃ ǹ nə́ Yezu toa walan, ǹ nə́ woo.
Nɔ̀n mɛn nə n da geren yii kaa wɔ paǹ li
(Mar 12.18-27; Luk 20.27-40)
23 #
NDS 23.8
*Sadusɛɛ̃n mà geren yii a re kiɛ wa. A din pinaa lɛ nɛ, bɛn kɔnɔn nə́ woo Yezu li ǹ nə́ nɔ̀n da la: 24#TDP 25.5 «Mìinaa, Muizu na á pɛ Landa gɔ́ɔ̃ nɛ: bɛ̀ giĩ mɛn gã a ná a lɔ toa walan, a ná a nɛ yɛ a ganaa wa, ǹ dɔɔ̃n doamaa nɛ a lɔ giɔɔrɔ lɛ saa, a nɛnyaanan yɛ a ganaa, ǹ dɔɔ̃n papaã wole lɛ wɔn lɛa. 25A da yaa, dɔɔ̃ngiĩ sɔbaa kɔ́n na á goã wɔsɛn piɛ. Ǹ goledɛnaa mɛn nə lɔ saa, bɛ́ gã, a nɛ toa a kio wa. Min mɛn bɛ́ koɛ la, bɛ́ lɔ lɛ saa. 26Ǹ paabaa ǹ wɔ dɔ na á n baa miɛ̃, ka ǹ sɔɔbaa ǹ wɔ nɛ, yǎa a woo ǹ sɔbaamaa lɛ tumaa yaa. 27Ǹ dinin tumaa a gɛ̀ kio, lɔ lɛ dɔ́ gã. 28Haya! Geren yii kaa pinaa, lɔ lɛ n die ǹ sɔbaamaa lɛ goon mɛn wɔ biɛ? A da yaa, ǹ dinin tumaa dɔ́ saa lɔ lɛa.»
29Yezu tɔ́n pɛ ǹ nɛ:
– Ka sã á la yii ni. A giala ka a Lawa a boo giala miɛ wa, ka a doɛ̃ dɔn mà pàã tá Lawa lon wa. 30Ka dɔ̃, mà bɛ̀ geren yii kaa ǹ mɛn waáraa, mà giĩ a re lɔ siɛ wa, lɔ dɔ a re we giĩ li wa, sɛnɛ, ǹ tumaa n die goɛ̃ ka Lawa a piɛ a dia dí-a wolen bɛ́ lɔn. 31Màn mɛn bɛ́ kiɛ̃-n Lawa a boo-n geren yii kaa wɔ gɔn la, ka bɛ pɛ wa koɛ? 32#BBN 3.6 Lawa pɛ: «Man Abrahamu a Lawa lɛa, Izaaki a Lawa lɛa, Zakɔba a Lawa lɛa.»
Yezu tɔ́n pɛ: «Lawa lɛ bie geren Lawa lɛa wa, a n yiikoonaan Lawa lɛa. Bɛ n nyɛɛ, mà bɛa minin kɛn lɛn ǹ nə́ gã lɛlɛ, mà ǹ yii á koo sisia.»
33Zaman lɛ bɛa boo lɛ ma lɔn, á kaãbaa da ǹ ganaa parsiini.
Dí-pɛ mɛn a sii bɛ́ kaka á la ǹ miãn manɛ
(Mar 12.28-34; Luk 10.25-28)
34Fariziɛ̃n bɛ́ ǹ nə́ ma mà Yezu Sadusɛɛ̃n naa ka boo ne, ǹ dɔn nə́ woo n lɛ sɔkɔn. 35#Luk 10.25-28 Ǹ goon ne, a n landa sii-daraalin goledɛnaa lɛa, bɛ́ nɔ̀n goon da Yezu la, á n da a gɔ́ɔ̃ li ni: 36«Mìinaa, landa gɔ́ɔ̃ nɛ, dí-pɛ lɛ mɛn a sii n kaka á la ǹ miãn manɛ?»
37 #
TDP 6.5
Yezu tɔ́n pɛ nɛ: «N Dɛnaa Lawa narɛ ka n foo din tumaa nɛ, ka n gɔ́ɔ̃ din tumaa nɛ, ka n pàã din tumaa nɛ.» 38Dí-pɛ bibinaa lɛ n ka bɛ nɛ, a din lɛ a sii n kaka. 39#LWS 19.18 A paabaa ǹ wɔ mɛn a sii bɛ́ kaka ka bɛ bɛ́ lɔn, bɛ n ka kɛ nɛ: «N miã kɔsɔ narɛ ka n bɛ́ n din narɛ lɔn.» 40Muizu a Landa boon laanka Lawa a boo gii-dalin daraa nɛ, ǹ dinin tumaa mìi n doa-n bɛa dí màn paa kɛ lɛ ganaa.
Minin Nyin-sili lɛ laanka Davida a wàa n kɔn nɛ?
(Mar 12.35-37; Luk 20.41-44)
41Yezu bɛ́ á Fariziɛ̃n yɛ, ǹ nə́ ǹ lɛ sɔkɔn, á woo nɔ̀n da ǹ la: 42«Minin Nyin-sili lɛ, Lawa n die diɛ, kaa taasiɛ n ka wàa-n bɛ wɔ gɔn la? Die tɔrɔ nɛ?»
Ǹ nə́ tɔ́n pɛ nɛ: «Kii Davida tɔrɔ nɛ.»
43Yezu tɔ́n pɛ ǹ nɛ:
– Wàa na á baa, Davida dinmaa bíi, ka Lawa a Yiri Fu barka nɛ, mà asɛ a Dɛnaa? A na á pɛ kɛnɛn:
44 #
Loe 110.1
Dɛnaa Lawa pɛ maa Dɛnaa nɛ:
«Giã ma gusin,
yǎa ma gɔ̀lɔ̀baa lɛ piɛ̃ koe n la,
n zɔ́ɔn nə die kiɛ tán n gòãn giulun.»
45Bɛ̀ Davida dinmaa lɛ bíi, "maa Dɛnaa", a Davida tɔrɔ baa dinsɔɔ̃ giala na á saa lɔn?
46Min kɔ́n na a lɛ si ka boo kɔ́n nɛ wa. A kũ bɛ lɛ ganaa lɔn, min kɔ́n yii wɔ doo á nɔ̀n da la wa.
اکنون انتخاب شده:
Mat 22: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.
