Mat 18
18
Lon a kiibaa ǹ bǎã a goledɛnaabaa
(Mar 9.33-37; Luk 9.46-48)
1 #
Luk 22.24
Bɛa biikoo li, Yezu a kialandɛnan nə́ n zɔ̃ ǹ nə́ dɔ a li, ǹ nə́ nɔ̀n da la: «Lon a kiibaa ǹ bǎã nɛ, die n gole á la ǹ miãn manɛ?»
2Yezu tɔ́n nɛnyaan goon bíi á koa ǹ yɔrɔ-a, 3#Mar 10.15; Luk 18.17 á tɔ́n pɛ: «Man pii ka nɛ, sonbore ne: Bɛ̀ ka kaa tɔ wɔ ǹ gɔn bɔyaa ka n dinin kiɛɛrɛ kɔ ka nɛnyaanan bɛ́ lɔn wa, ka a re we lon a kiibaa-n wa. 4Min mɛn bɛ́ re n din kiɛɛrɛ koe ka nɛnyaan kɛ bɛ́ lɔn, bɛa dɛnaa lɛ n gole á la ǹ miãn manɛ lon a kiibaa ǹ bǎã nɛ. 5Bɛ̀ min mɛn lɛ kɔ á nɛnyaan kɛ miã kũ doɛ̃ masɛ tɔ taman yii, bɛa dɛnaa ná a lɛ kɔ masɛ ganaa.
Yezu gɔn-waa mɛn wɔ sii baraa wɔ paǹ li
(Mar 9.42-48; Luk 17.1-2)
6Nɛnyaanan kɛn golee-n masɛ li, bɛ̀ bɛn goon a mɛnaa ǹ giala bɔ min mɛn li, á soɛ bɛa dɛnaa ganaa ǹ gii dan kaara yii a bɔlɔ-a ǹ nyanaa ǹ da yìsi mu gole li. 7Bɔ̀n gole n ka kɛ nɛ kanaa minin mìi ni! A giala siin tan ǹ nə́ minin kiɛ sii baraa zɛnaa ganaa. Bɛ miã siin kɛn bie sàabiɛ wa, sɛnɛ, bɛ̀ a zɛnaa ǹ giala bɔ min mɛn li, bɔ̀n na á bɛa dɛnaa yɛ! 8#Mat 5.30 Bɛ̀ n gɔn hinlaa n gòã tá n diɛ sii baraa nɛ, ǹ kuru n nə ǹ bɔ n ganaa n nə ǹ zũ sɔsɔɔ. Bɛ̀ n goã n yii n koo ka n gɔn goon hinlaa ka n gòã goon ne Lawa a piɛ, bɛ á soɛ n nə n gɔnɔn paanan laanka n gòãn paanan toa n ganaa n wusoo n wo ǹ ne tɛ-n, tɛ mɛn bɛ́ a nimi wa! 9#Mat 5.29 Bɛ̀ n yii goon tá n diɛ sii baraa nɛ, n gɔsɛ n bɔ n yɔrɔ nɛ n zũ sɔsɔɔ. N goã n yii n koo Lawa a piɛ n yii n goon, bɛ á soɛ n nə n yiin paanan toa n ganaa, n wusoo n wo ǹ ne tɛ-n, tɛ mɛn bɛ́ a nimi wa.
Yezu boo giməə mɛn da sère papaã wole wɔ paǹ li
(Luk 15.3-7)
10Ka n dinin kũ, ka nyan toa ka golee masɛ li wole tiin kɛn kɔn yii puusə kɔ wa. A giala masɛ n pii ka nɛ, ǹ lon a dia dí-a wolen tá n toɛ̃ ka ǹ mìi gɔ́ɔ̃ ǹ sii ni baraabaraa masɛ Di lon a Lawa yɔrɔ-a.
[ 11#Luk 19.10 Min mɛnɛn bɛ́ ǹ nə́ papaã ka sèren bɛ́ lɔn, Min a Nɛgiĩ na á daa ga bɛn lɛn ma li a tá ǹ kirisibiɛ.]
12Ka n wàa taasɛ? Bɛ̀ sère paabiɛ n min lon kəni, yǎa a goon nə papaã, ǹ dɛnaa n die wàa zɛnɛɛ? A ba a gialakun pɔmanangɔrɔwenmanangɔrɔ kɛ lɛ toɛ walan kele lalan, a wo ga a papaã wole kɛ lɛ li wa? 13Bɛ̀ á yɛ, man pii ka nɛ, bɛa nyɛnyɛɛ á gole a ganaa á la pɔmanangɔrɔwenmanangɔrɔ kɛ lɛ wɔ nɛ, ǹsɛn mɛnɛn bɛ́ ǹ papaã wa. 14A n miɛ̃, kaa Díi Lawa ba li golee masɛ li wole tiin kɛn lɛn kɔ́n nə papaã wa.
Zɛ̀rɛ toa kɔn nɛ
15 #
Luk 17.3
Bɛ̀ n dɔɔ̃n nə́ wɔ n zɛ̀rɛ nɛ, wo dɔ a li, n dinsɔɔ̃ ka a dinsɔɔ̃, n na a sã pɛ nɛ. Bɛ̀ a ná a zɛ̀rɛ si, a na á wusoo á n dɔɔ̃n baa. 16#TDP 19.15 Sɛnɛ, bɛ̀ á n piã, wusoo n min paa hinlaa min sɔɔ kũ, n nə ǹ kaa kunun n ni, màn mɛn bɛ́ toɛ, "Sii lɛ din tumaa nə n yɔrɔ bɔ siére paa hinlaa sɔɔ yɔrɔ-a", ka Lawa a boo bɛ́ pii lɔn. 17Bɛ̀ á n piã a n too kɔ bɛn lon wa, n pɛ kaa Lawa a sɔmɔ minin manɛ. Bɛ̀ á n piã a n too kɔ Lawa a sɔmɔ minin dɔn dininmaan lon wa, ga a ganaa golee Lawa li baãnaa hinlaa wusuru-sili lɛa, n baran da sii li wa.
18 #
Mat 16.19; Zaã 20.23 Masɛ n pii ka nɛ, sonbore ne, bɛ̀ ka n piã ka sii mɛn tumaa-n tán, Lawa dɔ á die n piɛ̃ ka bɛ nɛ. Bɛ̀ ka lɛ kɔ sii mɛn tumaa ganaa tán, Lawa dɔ á die lɛ koe bɛ ganaa.
19Masɛ n pii ka-n dɔn, bɛ̀ min paa yɛ ka bii kanaa kɛ gɔ́ɔ̃ nɛ, ǹ nə́ n lɛ kaa kun ǹ nə́ màn mɛn nyankɔ masɛ Di Lawa lon, á die bɛ koe ǹ la. 20A giala bɛ̀ min paa hinlaa min sɔɔ nə́ n lɛ sɔkɔn bǎã mɛn nɛ ka masɛ tɔ nɛ, ma tá ǹ bii walan.»
Dí-nyali mɛn nə n piã mà asɛ ba ǹ miã a zɛ̀rɛ toɛ-n wa
21 #
Luk 17.3-4
Piɛrɛ tɔ́n nə n zɔ̃ á dɔ Yezu li, á nɔ̀n da la: «Dɛnaa, masɛ dɔɔ̃n mɛn bɛ́ a ba wɔ masɛ zɛ̀rɛ-n lɛ diɛ wa, ma doamaa nɛ ma bɛa zɛ̀rɛ toa nɛ yǎa gunyin gia? Yǎa gunyin sɔbaa?»
22Yezu tɔ́n pɛ nɛ:
– Masɛ a pii ni máa yǎa gunyin sɔbaa wa, sɛnɛ, yǎa gunyin pɔsɔbaa wɔlɔ sɔbaa. 23Bɛ gɔ́ɔ̃ nɛ, *Lawa a kiibaa lɛ a sii a kɔnboe n ka kɛ nɛ: Kii kɔ́n na á yoo ǹ kɔ́n pinaa, mà asɛ na a wɔrɔ sii yɔrɔ boe kun ka a dí-nyalin ni. 24A bɛ́ a ná a giala kɔ á nimii, minin ná a giɔ̀mɔdɛnaa goon kũ ǹ nə́ daa kɔ la, bɛ doamaa nɛ a duu damata damata saraa. 25Wɔrɔ bɛ́ a ba a gɔn a tá bɛa giɔ̀mɔ lɛ sarɛɛ-n wa, a mìinaa tɔ́n pɛ mà ǹ kũ ǹ sã ka bɛ̀rɛ bɛ́ lɔn, ǹ na a lɔ dɔ laanka a nɛnyaanan sã, ka a gɔn màn tumaa nɛ, giɔ̀mɔ lɛ nə n saraa nɛ. 26Dí-nyali lɛ na á kaa tán-a ǹ mìinaa lɛ giulun, a ná a nyankɔ parsiini á pɛ: «Sabarabaa n si n ganaa, n yii da ma la, ma á die a tumaa sarɛɛ.» 27A makara ná a mìinaa lɛ kũ, á nɔmaa a ná a giɔ̀mɔ lɛ toa nɛ, á da á woo. 28Dí-nyali lɛ bɛ́ á soo, á kaa ǹ miã dí nya kun wole kɔsɔ lɛ, a dɔ a wɔrɔ we paabiɛ n bɛ ganaa. Á kũ a bɔlɔ-a, á sɔɔ ka a daa a na a bɔlɔ yu, á pɛ nɛ: «Maa giɔ̀mɔ lɛ saraa!» 29Ǹ miã lɛ na á kaa tán-a a giulun, a ná a nyankɔ parsiini: «Sabarabaa n si n ganaa, n nə n yii da ma la, ma á die sarɛɛ!» 30Sɛnɛ, á n piã. Bɛ din tumaa kio, á kũ á woo da kòso-n, mà yǎa a na a giɔ̀mɔ lɛ sarɛɛ.
31Dí-nyali gialakunun lɛn bɛ́ ǹ nə́ bɛ yɛ, á yɔrɔ kɔsiɛ da ǹ ganaa parsiini, ǹ sii mɛn yɛ ka ǹ yii ni, ǹ nə́ woo a tumaa pɛ ǹ mìinaa lɛ nɛ. 32A mìinaa lɛ tɔ́n bíi, á pɛ nɛ: «Dí-nyali babaraa, masɛ n má giɔ̀mɔ kɛ lɛ din tumaa toa n nɛ, a giala n ma nyankɔ parsiini. 33Nsɛ a boe la n makara bɔ ǹ miã lɛ ganaa, ka masɛ bɛ́ ma makara bɔ n dɔ ganaa lɔn wa?» 34A mìinaa foo yoo parsiini, á kɔ dɔlɔ-bɔlen la, mà ǹ na a yii wɔ̃ parsiini, yǎa a na asɛ a giɔ̀mɔ lɛ tumaa sarɛɛ.
35Yezu tɔ́n pɛ ǹ nɛ: «Bɛ̀ min mɛn ba ǹ miã zɛ̀rɛ toɛ nɛ ka a foo din tumaa-n wa, maa Díi Lawa n die bɛa dɛnaa biɛ miɛ̃.»
اکنون انتخاب شده:
Mat 18: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.
