Mat 17
17
Yezu na a din a gugurubaa nyaa ka sii mɛn nɛ
(Mar 9.2-13; Luk 9.28-36)
1 #
Piɛ2 1.17-18
Lɛawaa sɔrɔ bɛ kio, Yezu Piɛrɛ laanka Zaaki kũ á woo ǹ ne tiãlɛa kele sasa goon la, kun ka Zaaki ǹ diɛ̃ Zaã nɛ. Ǹ dininsɔɔ̃nɔn bɛ́ walan, 2Yezu nə́ n bɔyaa ǹ yɔrɔ-a. A yɔrɔ n tɛ pii ka wasa bɛ́ lɔn, a mɔnaan nə́ n baa fu, kiɛ min yii-n ka tɛ fúlu bɛ́ lɔn. 3Bɛ kio boɛɛn gɔrɔ, kialandɛnaa sɔɔ lɛ min paa yɛ boo diɛ kun ka Yezu ni: Lawa a boo gii-dalin goledɛnaa Yilii laanka landa sii-daraalin goledɛnaa Muizu ni. 4Piɛrɛ tɔ́n pɛ Yezu ni: «Dɛnaa, a n siĩni wɔsɛn nə giã kànaa. Bɛ̀ n tá li, masɛ n die siã sɔɔ doe kànaa, n din wɔ goã ka goon ne, Muizu wɔ goã ka goon ne, Yilii wɔ goã ka goon ne.»
5 #
SGK 22.2; TDP 18.15; Loe 2.7; Iza 42.1; Mat 3.17; 12.18; Mar 1.11; Luk 3.22 A bɛ́ bɛa boo lɛ diɛ, labara tɛ-pɛle goon nə́ n kuməə ǹ ganaa. Boo-diɛ lɛ bɔ bɛa labara lɛ gɔ́ɔ̃ nɛ á pɛ: «Kɛ n maa Nɛgiĩ lɛa, ma á narɛ parsiini, ma din ni má bɔ. Ka n too kɔ a lon!»
6A kialandɛnan lɛn bɛ́ ǹ nə́ bɛa boo lɛ ma, nyɛ́ɛ nə́ ǹ kũ parsiini, ǹ nə́ bɔ ǹ nə́ kaa, ǹ nə́ n yɔrɔ kɔ tán lɛ. 7Yezu nə́ n zɔ̃ á dɔ ǹ li, á n gɔn dada ǹ ganaa, á pɛ ǹ nɛ: «Ka yoo lon! Ka baran nyɛ́ɛ baa wa!»
8Ǹ nə́ n yii saa lon, ǹ min kɔsɔ yɛ doo á kiɛ̃ Yezu dinsɔɔ̃ la wa.
9Ǹ bɛ́ gisĩ ǹ boe kele lɛ la ǹ mɛn waáraa, Yezu nə́ n gɔn waa ǹ nɛ: «Sii mɛn nə́ n nyaa ka-n ke, ka nyan toa ka a boo da min kɔ́n yii-n wa, yǎa Min a Nɛgiĩ yii kiɛ a n boe geren bii.»
10Bɛ kio, a kialandɛnan lɛn nə́ tɔ́n nɔ̀n da la: «Wàa na á baa landa sii-daraalin tá pii mà Yilii doamaa nɛ a da Minin Nyin-sili lɛ nyɛɛnɛ?»
11Yezu tɔ́n pɛ ǹ nɛ: «Sonbore ne, Yilii doamaa nɛ a daa bɔrɔ, a sii din tumaa yɔrɔ bɔ sɔnbɔraanɛ. 12#Mat 11.14 Bɛ din tumaa a kiɛ̃ kio, masɛ n pii ka nɛ, Yilii daa dinin, sɛnɛ, minbuiinin nə dɔ̃ wa, ǹ nə́ n foo sii zɛnaa a ganaa. Ǹ dinin lɛn man die Min a Nɛgiĩ dɔ nɔmiɛ miɛ̃.»
13Bɛ kio, a kialandɛnan lɛn nə́ tɔ́n dɔ̃, mà a na á goã boo diɛ Zaã wɔ gɔn la, min mɛn lɛ goã *batɛmu diɛ minin ganaa.
Yezu sii mɛn zɛnaa gigirisandɛnaa nɛ
(Mar 9.14-29; Luk 9.37-43a)
14Ǹ bɛ́ ǹ nə́ dɔ zaman lɛ li walan, giĩ goon nə́ n zɔ̃ á dɔ Yezu li, á kaa tán-a a giulun, 15á pɛ nɛ: «Dɛnaa, makara bɔ maa nɛgiĩ ganaa. Gigirisanan man a ganaa, á nɔmaa-n parsiini. Ǹ tɛn nɛ, a n boe bɛ̀ a mɛnaa tɛ-n, ǹ tɛn nɛ, a n boe bɛ̀ a n dɔ mu li. 16Má kũ má daa kɔ n kialandɛnan ma la, sɛnɛ, ǹ boo la ǹ na a busu lɛ nya wa.»
17Yezu tɔ́n pɛ: «Ka màn tɔrɔ golee Lawa li baãnaan kɛn, ka n màn tɔrɔ baraa dɔ lɛa. Masɛ n die goɛ̃ kun ka nɛ yǎa biĩ doo, ka tɔn golee Lawa li? Masɛ n die kaa sii sii ma ganaa miɛ̃ yǎa biĩ kəni? Ka nɛ lɛ kũ ka da kɔ ma la kànaa.»
18Yezu yoo nɔ̀ɔnɔn lɛn gialaa, ǹ nə́ n bɔ nɛ lɛ ganaa, a busu nya a din bǎã-n gɔrɔ.
19Bɛ kio, Yezu a kialandɛnan nə́ woo Yezu li ǹ dininsɔɔ̃nɔn, ǹ nə́ nɔ̀n da la: «Wàa na á baa wɔsɛn nə boo la wɔ́ nɔ̀ɔnɔn kɛn lɛn loo wa?»
20 #
Mat 21.21; Mar 11.23; Kor1 13.2 Yezu tɔ́n pɛ ǹ nɛ: «A giala, kaa golee Lawa li á kiɛɛrɛ á la yii ni. Masɛ n sonbore pii ka nɛ: Mutarde nàn mɛn din bɛ́ kiɛɛrɛ, bɛ̀ golee Lawa li yɛ ka lon a gole baa dɔ bɛ li, bɛ̀ ka pɛ kele kɛ nɛ mà a yoo a n bɔ kànaa a wo kɛnɛn li, a n yui a woo. Bɛ̀ ka ba re foɛ̃ sii kɔ́n baa lɛ wa. [ 21Sɛnɛ bɛ̀ á n bɔ Lawa nyankɔ laanka lɛ-sɔɔ nɛ, min ba boe la a nɔ̀ɔnɔn kɛn tɔrɔ loo ǹ woo wa.]»
Yezu na a gɛ̀ laanka a yii a kaa boo diɛ doo
(Mar 9.30-32; Luk 9.43b-45)
22Ǹ kɔ́n pinaa, kialandɛnan lɛn bɛ́ Galilee gána nɛ, Yezu pɛ ǹ nɛ: «Minin tá re Min a Nɛgiĩ we min baraan gɔn. 23Ǹ tá re ma dii, maa gɛ̀ lɛawaa sɔɔ, ma yii á die kiɛ.»
Bɛa boo lɛ yɔrɔ kɔsiɛ da a kialandɛnan lɛn ganaa parsiini.
Lawa a kion a nyin giɔ̀mɔ saraa
24 #
BBN 30.13; 38.26 Ǹ bɛ́ ǹ nə́ dɔ Kafaranaamu kiwi, min mɛnɛn bɛ́ Lawa a kion a nyin giɔ̀mɔ sii lɛ tunaa nɛ, bɛn nə́ nɔ̀n da Piɛrɛ la: «Kaa Mìinaa lɛ a Lawa a Kion a nyin giɔ̀mɔ sarɛɛ wa ya?»
25Piɛrɛ tɔ́n pɛ: «Ká a bɛ́ lɔn!»
Piɛrɛ bɛ́ á dɔ piɛ, Yezu tɔ́n saa lɛlɛ á pɛ nɛ: «Simɔn, n taasiɛ n ka wàa nɛ? Kanaa a gánandɛnan kɛn lɛn, maǹ wusuru hinlaa nyin giɔ̀mɔ sii dien ma la? Maǹ sii ǹ dinin gána minin ma la, hinlaa tiin ma la?»
26Piɛrɛ tɔ́n pɛ: «Maǹ sii tiin ma la.»
Yezu tɔ́n pɛ Piɛrɛ nɛ: «Bɛ̀ á miɛ̃, gána lɛ din a minin sii ba a-n wa. 27Sɛnɛ, màn mɛn bɛ́ toɛ, wɔ baran minin kɛn lɛn mìi ziziɛ̃ wa, wo tà lɛ-a, n koɛ̀ɛ̃n kɔ. A bɛ́ re zɔ̀ bibinaa mɛn kuĩ, bɛ lɛ bɔ n na a lɛ bũ. N tá re wɔrɔ we goon yii a nɛ màn mɛn tá wɔsɛn dinin min paa a nyin giɔ̀mɔ boe. A bɔ n wo wɔsɛn nyin giɔ̀mɔ lɛ saraa nɛ.»
اکنون انتخاب شده:
Mat 17: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.
