Luk 8
8
Min mɛnɛn nə goã koe Yezu lɛ
1Bɛ kio, Yezu woo kiwi dadaran laanka a bɔnboɛɛnɛn nɛ. A na á goã *Lawa a kiibaa ǹ Boo Tii Kɔɔ̃n pii. A min fulupaa mɛn bɔ, bɛn nə́ goã kun ni, 2#Mat 27.55-56; Mar 15.40,41; Luk 23.49 ka bɛ dɔ nɛ, a lɔn mɛnɛn si nɔ̀ɔn baraan la ka busun ni, bɛn dɔn nə́ goã kun ni. Ǹ tɔn man ke: Magadalaan Mariya nɛ, nɔ̀ɔn sɔbaa nə n bɔ min mɛn ganaa; 3Zaãnɛ nɛ, kii Erɔdi a sumu dí nyɛɛnaan-bɔle goon mɛn bɛ́ a tɔ n Kuuza, bɛa lɔ n bɛ nɛ; Suzaanɛ nɛ, ka lɔ gigiã kɔsɔn nɛ. Bɛn tumaa na á goã Yezu laanka a kialandɛnan toe ka ǹ gɔn màn nɛ.
Yezu a boo giməə màn tɔrɔ wɔ paǹ li
(Mat 13.1-9; Mar 4.1-9)
4Zaman gigiã bɛ́ boe kiwi din tumaa nɛ, ǹ nə́ die n lɛ soekɔn a li, Yezu boo saa á boo giməə kɛ da: 5«Giĩ goon na á soo á woo a màn tɔrɔ pɛsɛ̃. A bɛ́ màn tɔrɔ lɛ pɛsɛ̃, a nàn kɔ́n nə́ mɛnaa zii lɛkoro-a, minin nə́ tɔtɔrɔ la, bàanan nə́ mui. 6Màn tɔrɔ lɛ a kɔ́n dɔ́ mɛnaa bǎã kɔsɔ nɛ, bǎã mɛn a tataã bɛ́ a sɔsɔɔ wa, á bɔ, sɛnɛ, á wusoo á laa, a giala tán nyɛɛ ba-a wa. 7Màn tɔrɔ lɛ a kɔsɔ dɔ́ mɛnaa koronkoron nyandɛnaa bii. Ǹ bɛ́ boe kun, nyan lɛ yoo á màn bɔ tán wole lɛ kũ. 8Màn tɔrɔ lɛ mɛn bɛ́ á mɛnaa tán sonbore ne, bɛ́ bɔ, á nɛ kɔ, yǎa nɛ paabiɛ.»
Yezu tɔ́n pɛ: «Toon bɛ́ ka lon, ka n too kɔ koe!»
Boo giməə kɛ a da ǹ mìi
(Mat 13.10-17; Mar 4.10-12)
9Yezu a kialandɛnan lɛn nə́ nɔ̀n da la ka boo giməə kɛ giala nɛ. 10#Iza 6.9 Á n toa ǹ ganaa kɛnɛn: «Lawa bɛ́ a kiibaa ǹ dí mɛn nyɛɛ kanaa, bɛ n sii-durii lɛa á nyaa kasɛn manɛ. Sɛnɛ, a na á nyaa min gialakunun kɛn manɛ ka boo giməə ne, màn mɛn bɛ́ toɛ, ǹ ga, sɛnɛ, ǹ yii baran wɔlɔ yɛ wa, ǹ boo ma, sɛnɛ, ǹ baran a giala ma wa.»
Yezu boo giməə lɛ giala pɛ ǹ nɛ lɔn
(Mat 13.18-23; Mar 4.13-20)
11Yezu mà boo giməə lɛ giala n ka kɛ nɛ: «Màn tɔrɔ lɛ, Lawa a boo kɛ n ka bɛ nɛ. 12Min tɛnɛn man goon ka zii lɛkoro bǎã kɛ nɛ màn tɔrɔ mɛnaa a nɛ. Maǹ boo lɛ miɛ, sɛnɛ, *Sɛtaan nə die a boo lɛ bɔ a bɔ ǹ gɔ́ɔ̃ nɛ, màn mɛn bɛ́ toɛ, ǹ baran golee li ǹ kirisibaa wa. 13Min tɛnɛn dɔn man goon ka bǎã mɛn bɛ́, a tataã a sɔsɔɔ wa. Maǹ boo lɛ miɛ, ǹ si ka nyɛnyɛɛ nɛ. Sɛnɛ, ǹ ba toɛ boo lɛ giã ǹ wɔlɔ taãn yɛ ǹ foo-n wa. Ǹ golee Lawa li lɛ n biikoo boɛɛn kooro siɛ. Bɛa dɛnan lɛn, bɛ̀ sii kaka nə́ ǹ yɛ lɔn gɔrɔ, maǹ wusii ǹ golee Lawa li kio. 14Màn tɔrɔ mɛn bɛ́ á mɛnaa nyanɛn bii, bɛ n ka min mɛnɛn bɛ́ boo lɛ miɛ, sɛnɛ, ǹ ba woe nyɛɛnɛ wa, taasiɛn lɛa, gɔn mànan lɛa, ka kanaa a gɔ̀nɔn nyɛɛ ǹ siin lɛa nɛ. Bɛ lɛ n toɛ, ǹ ba nɛ koe a ma wa. 15Màn tɔrɔ mɛn bɛ́ á mɛnaa tán sonbore bǎã nɛ, bɛ n kɔnboe ka min mɛnɛn bɛ́ n too koe boo lɛ-a, ǹ si, ǹ kũ foo sonbore laanka a telee wole ne. Bɛa dɛnan lɛn man goɛ̃ bɔlɔgoondɛnaabaa la, yǎa ǹ nɛ koe.»
Yezu boo giməə mɛn da bólon wɔ gɔn la
(Mar 4.21-25)
16 #
Mat 5.15; Luk 11.33 Yezu pɛ: «Min kɔ́n ba bólon diɛ a tan kuməə-a hinlaa a da gə̀rə̀n giulun wa, sɛnɛ, a n diɛ bólon koa ǹ bǎã nɛ, màn mɛn bɛ́ toɛ, min mɛnɛn tumaa bɛ́ we kion, bɛn na a fúlu yɛ. 17#Mat 10.26; Luk 12.2 Sii-durii kɔ́n banban, mà bɛ ná a die boe kanaa wa. Boo giməə din tumaa á re n doɛ̃ a bɔ kanaa foaãnɛ.
18 #
Mat 25.29; Luk 19.26 Bɛ lɛ tɔ ganaa, ka yiri bɔ ka dinin too kɔ ǹ gɔn li. A giala màn bɛ́ min mɛn lon, kɔsɔ á re n diɛ bɛa dɛnaa wɔ li, màn boɛɛn bɛ́ min mɛn lon, a ná a ba giɛ a màn da li wa, bɛ lɛ dɔ á re n sii la.»
Yezu a kion minin taãn-taãnan man dien ne?
(Mat 12.46-50; Mar 3.31-35)
19Yezu ǹ dan laanka ǹ diɛ̃n man nə́ daa a li, sɛnɛ, ǹ goã boe la ǹ nə́ we a li wa zaman a lɛa. 20Minin nə́ pɛ Yezu ni mà ǹ dan laanka ǹ diɛ̃n tá golee-n kanaa, mà maǹ giɛ li ǹ yɛ.
21Yezu pɛ bɛa minin lɛn manɛ: «Masɛ dan laanka ma diɛ̃n man ka min mɛnɛn bɛ́ ǹ too koe Lawa a boo kɛ ganaa, ǹ nə́ sii, ǹ ná a siin zɛnɛɛ.»
Yezu n piɛ̃ gole lɛ kuĩ
(Mat 8.23-27; Mar 4.35-41)
22Ǹ kɔ́n pinaa Yezu wɔ tà kuru ǹ goo ne kun ka a kialandɛnan nɛ. Á pɛ ǹ nɛ: mà ǹ daa ǹsɛn nə mu kuru, ǹ wo tà lɛkoro goon kɛ ganaa.
Bɛa boo lɛ a diɛ kio, ǹ nə́ mɛ mu la. 23Ǹ bɛ́ mu kuri, nyuù Yezu saa. Piɛ̃ gole yoo tà lɛ la. Bɛ lɛ taman yii, mu n yui á kiɛ goo lɛ nɛ. Ǹ nə́ yɛ mà bɔ̀n nə die ǹsɛn ganaa. 24Yezu a kialandɛnan lɛn nə́ n zɔ̃ ǹ nə́ dɔ a li, ǹ nə́ bũ. Ǹ nə́ tɔ́n pɛ nɛ: «Mìinaa, Mìinaa, wɔ ǹ die bɔ̀n biɛ!»
Yezu yoo á paraa piɛ̃ lɛ li, ka tà mu yoo wole lɛ nɛ. Piɛ̃ lɛ-n woo, tà mu lɛ-n woo, ǹ tumaa golee, yǎa wɔlɔ golee ka kiĩni.
25Bɛ kio Yezu pɛ ǹ nɛ: «Kaa golee Lawa li lɛ a tɔn tɛ ka pelo yii-n wa?»
Nyɛ́ɛ bɛ́ Yezu a kialandɛnan lɛn-a, ǹ nə́ n kaãbaa bɛ̀ ǹ nə́ pii kɔn nɛ mà wàa mɛn min nə ka giĩ kɛ nɛ? A n boo diɛ ka piɛ̃ laanka mu ni, ǹ ná a bɔlɔ dɔ sii kɛnɛn!
Yezu n nɔ̀ɔnɔn lui giĩ goon ganaa
(Mat 8.28-34; Mar 5.1-20)
26Yezu laanka a kialandɛnan nə́ mu kuru ǹ nə́ woo dɔ Geraazaa minin gána nɛ, Galilee para li. 27Yezu bɛ́ gisĩ tán ǹ mɛn waáraa, giĩ goon nə́ bɔ kiwi goon ne, á daa n da lɛ. Nɔ̀ɔn baraan man bɛa giĩ lɛ ganaa. A kũ biikoo sɔsɔɔ ganaa a ba mɔnaa we wa. Á goã wɛɛ kiwi wa yǎa geren bĩ ǹ bǎã nɛ. 28A bɛ́ á Yezu yɛ, á kaa tán-a a giulun. Á n lɛ dɛ ka kɔsɛkɔsɛ, á tɔ́n pɛ ka lɛn gole ne kɛnɛn: «Yezu, Lawa Gole a Nɛ, n wàa mɛn sii n masɛ a sii ni? Masɛ nə n nyankoe n baran dɔlɔ bɔ masɛ ganaa wa.»
29Sonbore, Yezu na á goã pii nɔ̀ɔn babaraan lɛn manɛ, mà ǹ nə n bɔ giĩ kɛ ganaa. A giala gunyin gigiã nɔ̀ɔnɔn lɛn man nə́ goã giĩ lɛ kuĩ. Bɛ lɛ taman yii, minin man nə́ goã doɛ bɛ̀ ǹ kanan kaa a gòãn-a, ǹ fɔlɔ biɛn yii a gɔnɔn ganaa. Sɛnɛ, a na a gòã yii ǹ mànan lɛn niɛ̃. Nɔ̀ɔnɔn lɛn man nə́ goã nyanɛɛ bɛ̀ ǹ wo-n diə bǎãn nɛ, min bɛ́ a ba bǎãn mɛnɛn nɛ wa. 30Giĩ lɛ bɛ́ tán-a a giulun, Yezu nɔ̀n da la: «N tɔ n die?»
Á pɛ Yezu ni: «Ma tɔ n "Damata".»
Sonbore ne, nɔ̀ɔn baraa gigiã na á goã giĩ lɛ ganaa. 31Bɛa nɔ̀ɔnɔn lɛn man nə́ goã Yezu nyankoe mà a baran ǹsɛn kaa nɔmaa ǹ nyankɔrɔ zuzulu kɛ-n wa.
32Bɛa bǎã lɛ dɔ nɛ, birii gigiã na á goã màn bii tenten mìi ni. Nɔ̀ɔnɔn lɛn nə́ Yezu nyankɔ mà a toa ǹsɛn nə wɔ bɛa biriin lɛn nɛ. Yezu ná a lɛ kɔ ǹ la. 33Bɛ lɛ taman yii, nɔ̀ɔn baraan lɛn nə́ n bɔ giĩ lɛ ganaa ǹ nə́ wɔ biriin lɛn nɛ. Bɛ lɛ na á toa, bɛa tɔɔ damata kɛ lɛ baa si á n bɔ tenten mìi kɛ nɛ á daa kaa tà mu li. Mu nə́ ǹ kũ.
34Biriin-lɛduə̃lin lɛn bɛ́ ǹ nə́ sii kɛ yɛ á n zɛnaa, ǹ nə́ baa si ǹ nə́ woo a boo da kiwi gɔ́ɔ̃ laanka lalaa lɛ-a dɛnan manɛ.
35Minin nə́ soo ǹ nə́ daa ga bɛa sii kɛ lɛ ganaa. Ǹ nə́ dɔ Yezu li, ǹ nə́ yɛ nɔ̀ɔn baraan lɛn nə́ n bɔ giĩ lɛ ganaa. Ǹ nə́ giĩ lɛ yɛ giã-n tán-a Yezu li, mɔnaan ná a ganaa, á n minbuiin yii kɔɔ̃n-a dɔ lɛa tán. Nyɛ́ɛ minin lɛn kũ. 36Min mɛnɛn bɛ́ sii lɛ din tumaa nə́ n zɛnaa ǹ yii ni, nɔ̀ɔnɔn lɛn bɛ́ ǹ nə́ n bɔ giĩ lɛ-a lɔn, bɛn ná a laakalaa daa wolen lɛn manɛ. 37Bɛ lɛ a lɛa nɛ, nyɛ́ɛ bɛa gána lɛ a minin kũ parsiini. Ǹ ná a nyankɔ Yezu lon, mà a woo a n bɔ ǹsɛn bǎã nɛ. Yezu wɔ mu kuru ǹ goo ne á woo.
38Giĩ mɛn bɛ́ nɔ̀ɔnɔn nə́ n bɔ-a lɛn, bɛ na á goã Yezu nyankoe mà a toa asɛ wo giã kun ni.
Sɛnɛ, Yezu nə́ n piã, á zii kɔ la mà a woo, bɛ̀ á n pii ni 39mà a wusoo a wo piɛ. Lawa bɛ́ á bǐɛ̃ mɛn tumaa zɛnaa nɛ, a wo bɛ laakalaa.
Bɛ lɛ tamaa yii, giĩ lɛ woo. Yezu bɛ́ á sii mɛn zɛnaa nɛ, á bɛ laakalaa kiwi lɛ din tumaa nɛ.
Yezu Zayirusu a nɛlɔ a busu nya
(Mat 9.18-26; Mar 5.21-43)
40Yezu bɛ́ á bɔ tà lɛ lɛkoro goon kɛ ganaa, á daa yaa bɛ̀ min gigiã nə n yii diɛ la. Zaman lɛ nə́ n da lɛ. 41Giĩ goon ne, a tɔ n Zayirusu, bɛ dɔ́ daa. Bɛa giĩ lɛ na á goã kiwi lɛ a Zuifun lɛsɔkɔn kion a goledɛnaa lɛa. Á kaa tán Yezu giulun, a ná a nyankɔ mà a da asɛ a piɛ. 42A giala, mà nɛlɔ goon toto na asɛ lon, a lɛ̀ fulupaa miã nɛ, mà bɛ lɛ dɔ n giɛ li á giɛ̃.
Yezu bɛ́ mà a n woe, zaman lɛ ná a lɛ gɛwaa a paǹan tumaa ganaa. 43Lɔ goon dɔ na á goã bǎã lɛ nɛ, lɔn mà kaa ǹ busu na á goã a ganaa á dɔ lɛ̀ fulupaa. A na á goã á n gɔn màn yii ziziɛ̃ dagòã-dalin-a, a busu dɔ nya wa. 44Bɛa lɔ lɛ nə́ n zɔ̃ á dɔ Yezu li, á golee a kio á n gɔn da a mɔnaan lɛkoro ganaa. A din bǎã lɛ-n gɔrɔ, a mà kaa lɛ golee. 45Yezu nɔ̀n da mà die na á n gɔn da asɛ ganaa?
Min kɔ́n nə lɛ kɔ mà asɛ nə́ n gɔn da-a wa. Piɛrɛ sɛ ná a lɛ si kɛnɛn: «Mìinaa, n din yii tá zaman lɛ dɔ ganaa, ǹ nə́ n lɛnpɛnɛ, ǹ nə́ n lɛ gɛwaa, ma n tɔn nɔ̀n diɛ mà die na á n gɔn da nsɛ ganaa!»
46Sɛnɛ, Yezu pɛ nɛ: «Min nə́ n gɔn da ma-a, a giala má dɔ̃ máa pàã kɔ́n bɔ ma nɛ á n dɔ min lɛ.»
47Lɔ lɛ dɔ̃ mà á bɔ asɛ a sii lɛ siére-a, á daa kaa tán Yezu giulun, bɛ̀ a gɔ̀nɔn nə́ bìn diɛ. A n gɔn da Yezu-a mìi mɛn-a, ka bɛ dɔ nɛ, a busu lɛ nya bǎã goon ne ka yɔrɔ mɛn nɛ, á bɛ laakalaa min tumaa yɔrɔ-a. 48Yezu pɛ nɛ: «Maa nɛ, n din a goleemali na á n kirisibaa. Wo ka nyɛnyɛɛ nɛ.»
49Yezu bɛ́ boo diɛ ka lɔ lɛ-n miɛ̃, dia dí-a wole goon bɔ goledɛnaa Zayirusu lɛ a piɛ, á daa pɛ nɛ: mà a nɛlɔ lɛ gã, mà a baran Mìinaa lɛ nɔmaa wa.
50Sɛnɛ, Yezu bɛ́ á boo lɛ ma, á pɛ Zayirusu ni: «N baran nyɛ́ɛ baa wa, yǎa n goleemali wɔ, n nɛlɔ lɛ a re kirisibiɛ.»
51Yezu bɛ́ á dɔ Zayirusu a piɛ, a lɛ kɔ min kɔ́n wɔ kun ni kion wa, bɛ̀ á n bɔ Piɛrɛ nɛ, Zaã nɛ, Zaaki ni, ka nɛ lɛ di laanka ǹ dan nɛ. 52Min tumaa na á goã wuu pii ǹ nə́ n lala diɛ nɛ lɛ a lɛa. Yezu pɛ ǹ nɛ: «Ka baran wuu pɛ wa. Nɛ lɛ bie á gã wa, a n nyuù we.»
53Minin lɛn man nə́ goã yaa we Yezu ganaa, a giala ǹ nə́ goã doɛ̃ mà nɛ lɛ gã. 54Sɛnɛ, Yezu nɛ lɛ gɔn kũ, á pɛ nɛ ka lɛn gole ne kɛnɛn: «Nɛ lɛ, yoo lon.»
55Nɛ lɛ telenboen nə́ wusoo á daa wɔ a nɛ, á yoo lon bǎã goon ne. Yezu pɛ a minin manɛ mà ǹ màn-bii kɔ la a bii. 56Nɛ lɛ a yɛ wolen nə́ n kaãbaa parsiini, sɛnɛ, Yezu laa ǹ ganaa, mà sii mɛn bɛ́ á n zɛnaa, mà ǹ baran bɛ boo da min ni wa.
اکنون انتخاب شده:
Luk 8: SBPE2011
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.
