Luk 5
5
Yezu a kialandɛnan bibinaan bíi
(Mat 4.18-22; Mar 1.16-20)
1 #
Mat 13.1-2; Mar 3.9-10; 4.1 Ǹ kɔ́n pinaa, Yezu na á goã golee-n Zenezarɛti tà lɛ-a. Zaman na á goã a lɛ gɛwɛɛ, ǹ nə́ n too koe Lawa a boo ganaa. 2Yezu tà kuru ǹ goo màn paa yɛ tà lɛ lɛkoro-a, zɔ̀-kũlin mɛnɛn bɛ́ ǹ nə́ gisĩ ǹ nə́ n bɔ goon lɛn nɛ, bɛn man nə́ goã ǹ zɔ̀ɔn pii. 3Yezu wɔ goo lɛ goon ne, bɛa goo lɛ na á goã Simɔn wɔ lɛa. Á pɛ Simɔn nɛ, mà a n zɔ̃ a n bɔ tà lɛ lɛkoro-a, a wo mu bii boɛɛn nɛ. Bɛ kio mà asɛ á re n toɛ giã-n goo lɛ nɛ a zaman daraa.
4A bɛ́ á boo da á nya, á pɛ Simɔn nɛ mà a n zɔ̃ a dɔ mu lɛ a zuzulubaa ǹ bǎã nɛ, a laanka ǹ miãn nɛ, ǹ nə ǹ zɔ̀ɔn zũ mu li ǹ zɔ̀ kũ.
5 #
Zaã 21.3
Simɔn pɛ nɛ: «Mìinaa, wɔsɛn nə́ dí nya wɔ́ n dinin nɔmaa tèlò-n yǎa lɛ̀ waa, wɔ màn kɔ́n yɛ wa. Sɛnɛ, n din bɛ́ ń pɛ miɛ̃, ma á die maa zɔ̀ɔ lɛ zuĩ mu li.»
6 #
Zaã 21.6
Ǹ nə́ ǹ zɔ̀ɔn lɛn zũ, ǹ nə́ zɔ̀ gigiã kũ, yǎa ǹ zɔ̀ɔn ná a giala kɔ á toɛ̃. 7Ǹ miãn mɛnɛn bɛ́ goo lɛ a goon kɛ nɛ, ǹ nə́ gòon yiɛ bɛn ganaa, mà ǹ da n dɔ ǹsɛn lɛ. Ǹ nə́ daa n dɔ ǹ lɛ, ǹ nə́ zɔ̀ lɛ baã, ǹ nə́ goo màn paa lɛ tumaa pã nɛ, yǎa ǹ gugurubaa n giɛ li a wo ǹ ne mu giala-a. 8Simɔn Piɛrɛ bɛ́ á bɛ yɛ, á kaa tán Yezu giulun, á pɛ: «Dɛnaa, n zɔ̃ n nə n bɔ masɛ ganaa, a giala masɛ n sii baraa-zɛnaali lɛa.»
9Sonbore, nyɛ́ɛ na á goã á Simɔn kũ ka ǹ miãn tumaa nɛ ǹ zɔ̀ gigiã kɛ lɛ a kuĩ taman yii. 10Nyɛ́ɛ Zebedee a nɛnyaanan kɛn dɔn kũ, Zaaki laanka Zaã nɛ, bɛn mɛnɛn nə goã dí nyɛɛ kun ka Simɔn nɛ. Sɛnɛ, Yezu pɛ Simɔn nɛ: «N baran nyɛ́ɛ baa wa. A kũ sisia ganaa, n tá re giɛ minin li Lawa nɛ.»
11Bɛ kio, ǹ nə́ wusoo ǹ nə́ daa ǹ goon koa tà lɛ lɛkoro-a, ǹ nə́ màn din tumaa toa walan, ǹ nə́ kɔ Yezu kio lɛ.
Yezu n gɔ̀nɔn busu babaraa dɛnaa goon kaka koe
(Mat 8.1-4; Mar 1.40-45)
12Yezu bɛ́ kiwi goon ne Galilee gána nɛ, giĩ goon nə́ daa a li, gɔ̀nɔn busu babaraa ná a paǹ tumaa ganaa. A bɛ́ á Yezu yɛ, á kaa tán a giulun, á n yɔrɔ kɔ tán lɛ, a ná a nyankɔ parsiini á pɛ: «Mìinaa, bɛ̀ n tá li, n tá boe la n maa busu nya.»
13Yezu nə́ n gɔn saa á da a ganaa, á pɛ: «Ma tá li. Masɛ máa busu lɛ nə n bɔ n ganaa.»
A din bǎã-n gɔrɔ gɔ̀nɔn busu babaraa lɛ nə́ n bɔ giĩ lɛ ganaa. 14#LWS 14.1-32 Yezu pɛ nɛ doo: «N baran kɛ pɛ min kɔ́n nɛ wa. Sɛnɛ, wo Lawa a kion a wúlu-bɔle li, bɛ ga n ganaa. Bɛ kio, Muizu wúlu mɛn boo da, wo bɛ bɔ, n nyaa min tumaa nɛ mà n busu nya.»
15A laan Yezu nə́ n dan da nɛ, a tɔ sonbore na á goã n diɛ wɔlɔ la woe. Zaman gigiã na á goã n lɛ soekɔn-a a li, bɛ̀ ǹ nə n too kɔ a boo-a, bɛ̀ ǹ nə ǹ busun dɔn nyaa nɛ mà a ǹ nya. 16Sɛnɛ, Yezu na á goã soe, bɛ̀ a wo giã a dinsɔɔ̃, bǎãn kɔnɔn nɛ, bɛ̀ a Lawa nyankɔ walan.
Yezu n bɔlɔka goon a busu nyɛɛ
(Mat 9.1-8; Mar 2.1-12)
17N kɔ́n pinaa Yezu na á goã minin darɛɛ. *Fariziɛ̃n laanka landa sii-daraalin kɔnɔn nə́ goã giã-n tán-a a li, maǹ nə́ bɔ Galilee laanka Zudee kiwin ni, ka Zeruzalɛmu kiwi dɔ nɛ, ǹ nə́ daa. Dɛnaa din pàã na á goã dí nyɛɛ, á n busulən kaka koe. 18Minin kɔnɔn nə́ daa ka giĩ paǹ tumaa gere-a goon ne naa-n katara la. Maǹ nə́ goã giɛ li ǹ wɔ ka giĩ lɛ nɛ, ǹ da Yezu yɔrɔ-a. 19Sɛnɛ, zaman lɛ bɛ́ á zii tã, ǹ ba boe la ǹ nə́ we ka giĩ lɛ-n wa. Ǹ nə́ dii kala la ka bɔlɔka lɛ nɛ, ǹ nə́ kala lɛ paǹ kɔ́n bũ, ǹ nə́ giĩ lɛ gisĩ zaman lɛ bii kion lɛ nɛ Yezu yɔrɔ-a. 20Yezu bɛ́ á ǹ golee Lawa li yɛ, á pɛ bɔlɔka lɛ nɛ: «N sii baraan nə́ n toa n nɛ.»
21Landa sii-daraalin laanka Fariziɛ̃n nə́ yoo ǹ nə́ sɛ̀ binbisin pii mà wàa dɛnaa n ka giĩ kɛ nɛ, a n sɔ koe Lawa-a kɛnɛn? Mà bɛ̀ á n bɔ Lawa dinsɔɔ̃ nɛ, mà die kɔsɔ n boe la a sii baraa toa minin manɛ?
22Sɛnɛ, Yezu bɛ́ ǹ taasiɛn doɛ̃, á pɛ ǹ nɛ: – Wàa nɛ ka tá taasiɛn kɛn we ka gɔ́ɔ̃ nɛ? 23Boo màn paa kɛ bii, ǹ mɛn a pɛ n nanaa? Ma pɛ máa a sii baraan nə́ n toa, hinlaa ma pɛ máa a yoo lon a tɔ wɔ. 24Sonbore, màn mɛn bɛ́ toɛ, ka dɔ̃ mà pàã tá Min a Nɛgiĩ lon kanaa dɔ nɛ ma sii baraa toa minin manɛ, man pii bɔlɔka lɛ-n: «Yoo lon n nə n katara saa n wo piɛ.»
25A din bǎã nɛ, bɔlɔka lɛ yoo ǹ yɔrɔ-a, a ná a waa ǹ màn saa á woo piɛ, bɛ̀ á n loe loe á n Lawa tɔ boe ne. 26Ǹ tumaa nə́ n kaãbaa. Ǹ nə́ goã Lawa guguru koe. Nyɛ́ɛ bɛ́ ǹ ganaa, maǹ nə́ goã pii kɔn nɛ mà ǹsɛn nə́ siin yɛ pelo, màn mɛnɛn nə́ ǹ ba n zɛnɛɛ baraabaraa wa.
Zɔ́n mɛn nə n zɛnaa Levii a piɛ
(Mat 9.9-13; Mar 2.13-17)
27Bɛa siin lɛn kio, Yezu soo, á wusuru-sili goon yɛ a tɔ n Levii, á n giã-n tán wusuru si ǹ kion. Á pɛ nɛ: «Kɔ ma lɛ.»
28Á yoo, á màn din tumaa toa walan, á kɔ Yezu lɛ.
29Levii màn-bii gole zɛnaa, á lɛ dia Yezu la a piɛ. Wusuru-sili gigiã nɛ, ka min tɔrɔ kɔsɔ gigiã goã kunun ǹ ni màn bii ǹ bǎã lɛ nɛ. 30#Luk 15.1-2 Fariziɛ̃n lɛn, sanparɛ a landa sii-daraalin kɛn nə́ goã boo zuzuũ diɛ, bɛ̀ ǹ nə́ pii Yezu a kialandɛnan manɛ: «Wàa na á baa ka á màn bii, ka n màn mii kun ka wusuru-silin ni, ka sii baraa-zɛnaalin gialakunun kɛn nɛ?»
31Yezu nə́ ǹ boo lɛ si á pɛ: «Min kakan laadoo ba dagòã-dali ganaa wa, yǎa busulən. 32Min mɛnɛn bɛ́ giɛ ǹ dinin ganaa min peperen lɛa, masɛ bie má daa bɛn lɛa wa, sɛnɛ, min mɛnɛn bɛ́ n dinin doɛ̃ sii baraa-zɛnaalin lɛa, ma má daa bɛn lɛa, màn mɛn bɛ́ toɛ, ka wusoo kaa siin kio ka kɔ zii pepere lɛ.»
Nɔ̀n mɛn nə n da lɛ-sɔɔ wɔ paǹ li
(Mat 9.14-17; Mar 2.18-22)
33Fariziɛ̃n nə́ nɔ̀n da Yezu la ǹ nə́ pɛ: «Zaã a kialandɛnan tá nɛn bɛ̀ ǹ nə n lɛ sɔɔ, ǹ Lawa nyankɔ. Wɔsɛn dɔn wɔn tá zɛnɛɛ miɛ̃. Sɛnɛ, nsɛ wɔn man màn bii, ǹ nə́ màn mii.»
34Yezu tɔ́n boo giməə da ǹ nɛ a din wɔ gɔn la: «Ǹ tá boe la, ǹ lɔ tii ǹ zuũ a giaáran kaa lɛ sɔɔ ganaa, bɛ̀ lɔ tii ǹ zuũ dinmaa n kunun ǹ ni? 35Sɛnɛ, lɛawaan tá re die, ǹ tá re lɔ tii ǹ zuũ boe ǹ bii. Bɛa biikoo li ǹ tá re n lɛ soɛ.»
Màn zizi laanka màn dii
36Yezu boo giməə kɔsɔn da ǹ nɛ a din a daraa dii kɛ wɔ gɔn la, á pɛ: «Min kɔ́n ba mɔnaa dii lɛkoro toɛ̃ a dɔ mɔnaa zizi lɛ wa. A giala bɛa mɔnaa dii lɛ n die mɔnaa zizi lɛ nyɔsɛ̃, a na a ziziɛ̃ ǹ gòã baa, ka bɛ dɔ nɛ, bɛa mɔnaa dii lɛkoro dɔ mɔnaa zizi lɛ lɛ a bǐɛ̃ koe wa, a giala ǹ ba goon wa.
37Min kɔ́n ba duvɛ̃ dii kiɛ màn zizi-n wa. A giala duvɛ̃ dii lɛ n die màn lɛ diɛ yui ganaa, duvɛ̃ lɛ n die kiɛ, ka bɛ dɔ nɛ, màn lɛ n die kooro biɛ. 38Sonbore, duvɛ̃ dii n siĩni a n kaa màn dii ni.
39Sɛnɛ, lɛ-mui sii kɔ́n a kaa ba naanaa wa. Min woo min, a lɛ mui ka duvɛ̃ zizi mii ni, bɛa giɛ duvɛ̃ tɔrɔ dii li doo wa, a giala a n pii mà duvɛ̃ zizi lɛ á sóɛ.»
اکنون انتخاب شده:
Luk 5: SBPE2011
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.
