Luk 4
4
Sɛtaan nə n diɛ Yezu gɔ́ɔ̃ li
(Mat 4.1-11; Mar 1.12-13)
1Yezu bɔ Zurdɛ̃ tà lɛ-a, a bɛ́ piɛ zii la, Yiri Fu mɛn bɛ́ kun ni, bɛ ná a nyɛɛnaan sabɔ á woo-n diə gole ne. 2*Sɛtaan nə́ n da a gɔ́ɔ̃ li walan lɛawaa pusi gɔ́ɔ̃ nɛ. Bɛa biikoo kɛ lɛ din tumaa li, Yezu màn kɔ́n bii wa. Bɛa lɛawaan kɛn lɛn bɛ́ ǹ nə́ kiɛ̃, bòo kũ. 3Sɛtaan tɔ́n pɛ nɛ: «Bɛ̀ n tá Lawa a Nɛgiĩ lɛa, a pɛ kɔlɔ kɛ nɛ, mà a n bɔyaa a n baa màn-bii lɛa.»
4 #
TDP 8.3
Yezu Sɛtaan a boo lɛ si kɛnɛn: «A tá kiɛ̃ nɛ Lawa a boo ne mà minbuiin nɛ ba re n din toe ka màn-bii dinsɔɔ̃-n wa.»
5Sɛtaan nə́ dii lon ka Yezu ni bǎã kɔ́n nɛ, á biikoo boɛɛn saa á kanaa a gánan dinin tumaa nyaa nɛ. 6Á pɛ nɛ: «Masɛ n die pàã koe n la n giã gánan kɛn dinin tumaa mìi la, ǹ laanka ǹ siĩnbaa nɛ ka ǹ naforon ne. Bɛn man nə́ n kɔ masɛ la, bɛ̀ min mɛn dɔ masɛ din yii li, ma dɔ n koe bɛa dɛnaa la. 7Bɛ̀ n masɛ guguru kɔ, bɛ din tumaa á re n wɔ biɛ.»
8 #
TDP 6.13
Yezu pɛ nɛ: «A tá kiɛ̃ nɛ mà n kaa tán n Dɛnaa Lawa dinsɔɔ̃ yɔrɔ-a, n na a guguru kɔ.»
9Bɛ kio, Sɛtaan woo ka Yezu-n Zeruzalɛmu kiwi, á da Lawa a kion mìi ni, á pɛ nɛ: «Bɛ̀ n tá Lawa a Nɛ lɛa sonbore, n toa walan n furəə tán, 10#Loe 91.11-12 a giala, a tá kiɛ̃ nɛ mà Lawa á re pii a lon a dia dí-a wolen manɛ ǹ ga n walan, 11ka bɛ dɔ-n doo, ǹ tá re n yoe lon, màn mɛn bɛ́ toɛ, n baran n gòã na kɔlɔ ganaa wa.»
12 #
TDP 6.16
Yezu tɔ́n pɛ Sɛtaan nɛ: «A na á n pɛ mà n baran n da n Lawa, Dɛnaa Lawa gɔ́ɔ̃ li ka sii kɔ́n nɛ wa.»
13Sɛtaan nə́ n da Yezu gɔ́ɔ̃ li ka yɔrɔ din tumaa nɛ, sɛnɛ, a boo la á sã wa. Á nɔmaa á n zɔ̃ á n bɔ Yezu li, á n yii da biikoo kɔsɔ la.
Yezu a minin daraa giala koe Galilee gána nɛ
(Mat 4.12-17; Mar 1.14-15)
14Yezu bɛ́ ka Yiri Fu pàã lɛ ná a nɛ, á wusoo á daa Galilee gána nɛ. A tɔ bɔ bɛa bǎã lɛ a wɔlɔ yii ni. 15A na á goã minin darɛɛ ǹ Zuifun lɛsɔkɔn kionən ne. Min tumaa dɔ na á goã a gugurubaa boo diɛ.
Nazarɛti kiwi minin nə n piã ka Yezu-n lɔn
(Mat 13.53-58; Mar 6.1-6)
16Yezu bɛ́ á too Nazarɛti kiwi mɛn nɛ, á wusoo á daa walan. Zuifun *susu ǹ pii pinaa, a kɔnpɛ ka Yezu a lɛ mui sii ni, á wɔ lɛsɔkɔn kion. Á yoo a n die Lawa a boo sɛ́wɔ pii. 17Ǹ nə́ Lawa a boo gii-dali Izayii a sɛ́wɔ kɔ la. Á bɛa sɛ́wɔ lɛ lɛ bɔ á woo bǎã kɔ́n yaa, a n kiɛ̃-n bɛa bǎã lɛ-n kɛnɛn:
18 #
Iza 61.1-2
Dɛnaa Yiri n ma la.
Hiĩ, a na á ma bɔ á ma koa,
mà ma boo tii kɔɔ̃n pɛ doobaan manɛ,
19 min mɛnɛn bɛ kòso ne
mà ǹ tá re ǹ kiɛ,
min mɛnɛn bɛ́ yii tere-an lɛa
mà ǹ yii á re wusii a wɔlɔ yɛ,
ǹ bɛ́ mɛnɛɛ min mɛnɛn la,
mà ǹ tá re bɛn kiɛ.
A na á ma dia mà ma da pɛ
mà Dɛnaa a bǐɛ̃baa lɛ̀ nɛ.
20Yezu sɛ́wɔ lɛ lɛ tã, á kɔ a tamaali la, a din nə́ woo giã tán boo da ǹ bǎã nɛ. Min tumaa nə́ n yii saa á doa la lɛsɔkɔn kion lɛ nɛ. 21Á tɔ́n na a giala kɔ á pɛ ǹ nɛ kɛnɛn: «Pelo, kasɛn mɛnɛn bɛ́ ka sɛ́wɔ kɛ lɛ a pɛ ma ka ka too ne, bɛa sɛ́wɔ lɛ a boo lɛ pã kasɛn manɛ kɛnɛn gɔrɔ.»
22Min din tumaa na á goã Yezu laakalɛɛ. Bɛa Lawa a bǐɛ̃baa ǹ boo kɛ kaãbaa da min tumaa ganaa. Sɛnɛ, bɛa boo kɛ a bɔ asɛ lɛ-n kɛ lɛ na á ǹ tɔwaa. Maǹ nə́ goã pii kɔn nɛ mà Zozɛfu a nɛ kɛ lɛ bie wa?
23Yezu tɔ́n pɛ ǹ nɛ: «Ma á doɛ̃ máa ka ǹ die suusu kɛ lɛ diɛ masɛ ganaa: Dagòã-dali, n din a busu nya bɔrɔ. Siin mɛnɛn yii nə n zɛnaa Kafaranaamu kiwi, wɔ́ ǹ ma, bɛ lɛ miã dɔ zɛnaa n din a piɛ kəni.»
24 #
Zaã 4.44
Yezu wusoo á suusu kɔsɔ da:
– Masɛ n pii ka nɛ sonbore, «Lawa a boo gii-dali kɔ́n ba gugurubaa yii a din a kiwi wa.» 25#Kiin1 17.1 Man pii ka-n taãn-taãnɛ, Lawa a boo gii-dali Yilii a biikoo li, la bɛ́ n piɛ̃ lɛ̀ sɔɔ ka mui sɔrɔ a ná a kiɛ wa, bòo wɔ, lɔ giɔɔrɔ goã mɔnaa-n Izirayeli gána nɛ. 26#Kiin1 17.8-16 Sɛnɛ, Lawa Yilii dia bɛa lɔ kɛ lɛ kɔ́n li wa. A na á dia Sidɔn gána nɛ, Sarɛptaa kiwi lɔ giɔɔrɔ goon li. 27#Kiin2 5.1-14 Lawa a boo gii-dali Yiliizee a wasa nɛ, gɔ̀nɔn busu babaraa dɛnaa gigiã goã Izirayeli gána nɛ, sɛnɛ, bɛn kɔ́n a busu nya wa, yǎa Naaman mɛn bɛ́ Siirii gána min lɛa.
28Zaman mɛn tumaa bɛ́ lɛsɔkɔn kion lɛ nɛ, ǹ foo yoo bɛa boon kɛn lɛn ma gɔ́ɔ̃ nɛ. 29Ǹ nə́ parɛ ǹ nə́ yoo, ǹ nə́ Yezu loo ǹ nə́ bɔ ǹ kiwi. Ǹ kiwi lɛ bɛ́ tentelen mɛn la, ǹ nə́ woo ka Yezu-n bɛa wàã goon ganaa. A na á goã ǹ gɔ́ɔ̃ nɛ ǹ nyanaa ǹ zũ tán, 30sɛnɛ, Yezu bɔ ǹ gɔn yɛ ǹ bii, á woo.
Yezu na a din a pàãdɛnaabaa nyaa lɔn
(Mar 1.21-28)
31Yezu woo Kafaranaamu kiwi Galilee gána nɛ, á goã minin darɛɛ Zuifun susu ǹ pii pinaa. 32#Mat 7.28-29 Bɛn nə́ n kaãbaa parsiini a minin daraa lɛ ganaa, a giala pàã na á goã a boo lɛ nɛ. 33Giĩ goon na á goã lɛsɔkɔn kion lɛ nɛ, nɔ̀ɔn baraan man a ganaa. Bɛa giĩ lɛ nə́ n lɛ dɛ ka kɔsɛkɔsɛ á pɛ: 34«Nazarɛtin Yezu. N bɛ́ min mɛn lɛa, wɔsɛn tá doɛ̃, Lawa din a dia dí-a wole sonbore nə n ne! N wàa mɛn sii n wɔsɛn sii ni? Ma nə́ n daa wɔsɛn laadoo ziziɛ̃ gɔrɔ kən le?»
35Yezu paraa ǹ li á pɛ: «Ka n lɛ tã, ka n bɔ giĩ kɛ ganaa.»
Nɔ̀ɔnɔn lɛn nə́ giĩ lɛ zũ tán min tumaa yɔrɔ-a, bɛ kio, ǹ nə́ n bɔ a ganaa, ǹ baraa zɛnaa-n wa. 36Á kaãbaa da min tumaa ganaa, ǹ nə́ goã pii kɔn nɛ mà wàa boo n ka kɛ nɛ? Mà giĩ kɛ n sɛ̀ pii nɔ̀ɔn baraan ganaa ka pàã nɛ, maǹ ná a bɔlɔ sii dɔn!
37Yezu tɔ bɔ bɛa gána lɛ a bǎã yii ni.
Yezu busulə gigiã kaka kɔ
(Mat 8.14-17; Mar 1.29-34)
38Yezu soo á n bɔ lɛsɔkɔn kion, á woo Simɔn a piɛ. Gɔ̀nɔn wɛ̃ kaka kɔ́n na á goã Simɔn n dàãlɔ ganaa. Ǹ nə́ Yezu nyankɔ mà a na a busu nya. 39Yezu nə́ n zuməə á paraa lɔ lɛ mìi la, mà a gɔ̀nɔn wɛ̃ lɛ nya. A din bǎã nɛ gɔ̀nɔn wɛ̃ lɛ nya, yǎa á yoo gɔrɔ á màn-bii zɛnaa á kɔ ǹ la.
40Wasa a yii sã kio, busulən nə goã min mɛnɛn tumaa li, busu tɔrɔ gigiã nə́ ǹ ganaa, ǹ nə́ daa ǹ nɛ Yezu li. Á n gɔn da ǹ gogoonmaa la, á ǹ busu nya. 41Nɔ̀ɔnɔn dɔn nə́ goã n boe gigiã ganaa, bɛ̀ ǹ nə́ n lɛ dii Yezu ganaa: «Ma n Lawa a Nɛ lɛa!» Sɛnɛ, Yezu goã sɛ̀ pii ǹ-a, a goã toɛ ǹ boo kɔsɔ da wa, a giala nɔ̀ɔnɔn lɛn nə́ goã Yezu lɛ doɛ̃ Minin Nyin-sili lɛ lɛa.
Yezu n soe n boe Kafaranaamu
(Mar 1.35-39)
42Lɛ̀ bɛ́ á waa, Yezu soo á woo don, min bɛ́ a ba bǎã mɛn nɛ wa. Zaman lɛ na á goã giɛ li. Ǹ bɛ́ ǹ nə́ yɛ ǹ nə́ woo a li, a na á goã ǹ gɔ́ɔ̃ nɛ, ǹ kũ, ǹ na a sàabaa a baran n wɔlɔ lui ǹ-a doo wa. 43Sɛnɛ, Yezu nə́ n toa zaman lɛ ganaa mà asɛ doamaa nɛ a *Lawa a kiibaa ǹ Boo Tii Kɔɔ̃n kɛ pɛ kiwi gialakunun kɛn lɛn dɔn nɛ. A giala mà Lawa na á na asɛ dia bɛ lɛ a lɛa.
44Bɛ lɛ taman yii, á goã Lawa a boo pii lɛsɔkɔn kionən ne Zudee gána nɛ.
اکنون انتخاب شده:
Luk 4: SBPE2011
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.
