Luk 2
2
Yezu a yɛ ǹ gɔn
(Mat 1.18-25)
1Bɛa biikoo kɛ lɛ li, Rɔmu minin kii gole gole Oguti dí pɛ, mà min woo min tá asɛ a pàã giulun, mà ǹ bɛ tɔ kiɛ̃. 2Bɛa minin-nimii lɛ na a bibinaa lɛa, a na á n zɛnaa bɛ̀ Kirinusu n Siirii gána mìi la. 3Didie na á goã woe a din a kiwi, a n tɔ kiɛ̃ walan.
4Zozɛfu dɔ́ soo Nazarɛti kiwi Galilee gána nɛ, á woo Zudee gána nɛ Bɛtlehɛmu, ǹ digolo Davida a kiwi, a giala a dinmaa lɛ na á goã Davida tɔrɔ lɛa. 5A na á woo n tɔ kiɛ̃ walan, ka a lɔ wɔsiɛ Mariya nɛ, bɛ á zɛnɛɛ bɛ̀ a n min guguru lɛa. 6Ǹ bɛ́ Bɛtlehɛmu kiwi ǹ mɛn waáraa, Mariya a gisiĩ biikoo dɔ. 7A ná a gɔn binaa nɛ lɛ yɛ, nɛgiĩ lɛa. Á mɔnaa gɔnɔn pɛnɛ a ganaa. Ǹ bɛ́ tɔɔn kion mɛn nɛ, á naa bɛa tɔɔn lɛn màn bii ǹ goo ne, a giala, bǎã yɛ ǹsɛn wɔ lɛa, tiin yu ǹ kion kɔ́n nɛ wa.
Lon a dia dí-a wole goon woo bɔ tɔɔn-lɛduə̃lin li
8Bɛa kiwi kɛ lɛ a lɛkoro lɛ-a wurun ni, sèren-lɛduə̃lin kɔnɔn man nə́ goã wɛɛ don ǹ tɔɔn li. 9Dɛnaa a lon a dia dí-a wole goon nə́ daa bɔ ǹ li, Dɛnaa Lawa a tɛ-pɛ kaa ǹ la, nyɛ́ɛ nə́ ǹ kũ parsiini. 10Lon a dia dí-a wole lɛ mà ǹ ganaa: «Ka baran nyɛ́ɛ baa wa! Á ke, masɛ n má daa boo kɔɔ̃n pɛ ka nɛ, màn mɛn nə́ die gána kɛ a minin tumaa foo kɔɔ̃n koe parsiini. 11Pelo kɛ lɛ nɛ, Davida a kiwi, Kirisibaali na á yɛ kaa lɛa, Dɛnaa lɛ nɛ, Lawa bɛ́ á pɛ, mà asɛ á re Minin Nyin-sili mɛn lɛ diɛ. 12Ka bɛ́ re doɛ̃ màn mɛn li, bɛ n ka kɛ nɛ: Ka á die nɛnyaan tiɛɛ̃n yii, tɔɔn màn bii ǹ goo ne, mɔnaa gɔnɔn nə́ pɛnɛɛ nɛ a ganaa.»
13Bɛa bǎã-n gɔrɔ lon a dia dí-a wole gigiã bɔ Lawa li, ǹ nə́ daa goon kɛ lɛ li, bɛ̀ ǹ nə́ Lawa tɔ boe, ǹ nə́ pii:
14«Lon màn tumaa Lawa guguru kɔ!
A na a là nyantoro koe kanaa minin la,
a giala, a tá ǹ narɛ.»
Tɔɔn-lɛduə̃lin lɛn nə màn mɛn yɛ Bɛtlehɛmu kiwi
15Lon a dia dí-a wolen lɛn bɛ́ ǹ nə́ n bɔ ǹ li, ǹ nə́ wusoo ǹ nə́ woo lon ǹ mɛn waáraa, tɔɔn-lɛduə̃lin lɛn nə́ pɛ kɔn nɛ kɛnɛn: «Ka daa wɔ n ta yǎa Bɛtlehɛmu, sii mɛn nə n zɛnaa, Dɛnaa Lawa màn mɛn boo da wɔsɛn manɛ, á siĩni wɔ yii bɛ yɛ.»
16Ǹ nə́ yoo fufuu, ǹ nə́ woo kiwi lɛ nɛ, ǹ nə́ woo Zozɛfu laanka Mariya yaa, ka nɛnyaan boɛɛn lɛ dɔ nɛ naa-n tɔɔn màn bii ǹ goo ne. 17Ǹ bɛ́ ǹ nə́ yɛ, lon a dia dí-a wole bɛ́ á màn mɛn pɛ ǹ nɛ, bɛa nɛnyaan tiɛɛ̃n lɛ wɔ gɔn la, ǹ nə́ bɛ laakalaa. 18Min mɛnɛn dinin tumaa nə n too kɔ tɔɔn-lɛduə̃lin lɛn lon, bɛn nə́ n kaãbaa ǹ da ǹ boo ganaa. 19Sɛnɛ, Mariya sɛ na á goã bɛ tumaa tamaɛ a din yiri ni, bɛ̀ á n taasɛ a ganaa. 20Bɛ kio, tɔɔn-lɛduə̃lin lɛn nə́ wusoo ǹ nə́ woo ǹ bǎã nɛ. Ǹ màn mɛn ma, ǹ nə ǹ mɛn dɔ yɛ, ǹ nə́ goã Lawa a golebaa boo diɛ, ǹ ná a tɔ boe bɛa lɛa. Bɛ din tumaa na á n zɛnaa á kɔnpɛ ka lon a dia dí-a wole lɛ a boo pɛ nɛ.
Yezu tɔ
21 #
LWS 12.3; Luk 1.31 Lɛawaa kiwisi bɛ kio yǎa nɛ lɛ a kurii dɔ. Ǹ ná a tɔ kɔ mà Yezu, lon a dia dí-a wole bɛ́ á tɔ mɛn boo da, bɛ̀ nɛ lɛ dan din bɛ́ a tɔn na a nɔ̀ si wa.
Yezu kɔ Lawa la
22 #
LWS 12.6-8
Lɛawaa pusi, nɛ lɛ a yɛ kio, a kɔnpɛ ka Lawa a dí-pɛn lɛn nɛ Muizu ni, Mariya a *gɔ̀ bɔ ma ganaa pinaa dɔ. Zozɛfu laanka Mariya yoo, ǹ nə́ woo ka nɛ lɛ-n Zeruzalɛmu kiwi, màn mɛn bɛ́ toɛ, ǹ nə ǹ landa soɛ̃ siin bɔ ǹ ganaa, ǹ nɛ lɛ kɔ Dɛnaa Lawa la. 23#BBN 13.2,12 Maǹ nə́ zɛnaa miɛ̃, a giala a n kiɛ̃ nɛ Dɛnaa Lawa a dí-pɛn lɛn nɛ, mà bɛ̀ lɔ gɔn binaa nɛginin baa, mà bɛa nɛ lɛ n Lawa wɔ lɛa. 24Ka bɛ dɔ nɛ, Zozɛfu laanka Mariya doamaa nɛ ǹ nə ǹ *wúlu mànan bɔ, a kɔnpɛ ka Dɛnaa Lawa a dí-pɛn lɛn nɛ: «Wuruun màn paa, hinlaa zɛrɛkantoan bɔnboɛɛn màn paa.»
Giĩ gole Simiɔn boo mɛn da nɛ tiɛɛ̃n lɛ a paǹ li
25Á daa yaa giĩ goon tá Zeruzalɛmu kiwi, a tɔ n Simiɔn. Bɛa giĩ lɛ na á goã min pepere lɛa, a n nyɛ́ɛ biɛ Lawa yii ni, bɛ̀ á n yii diɛ Izirayeli minin nyin-sili lɛ la. Lawa a Yiri Fu na á goã la, 26a na á goã á nyaa nɛ mà Dɛnaa Lawa bɛ́ á nyin-sili mɛn boo da, mà a die giɛ̃ bɛ̀ a yii ná a bɛ yɛ wa. 27Lawa a Yiri Fu lɛ da a yiri-a, mà a wo Lawa a kion biikoo mɛn waáraa, bɛ̀ nɛnyaan tiɛɛ̃n Yezu lɛ di laanka ǹ dan daa kɔ Lawa la, a kɔnpɛ ka Lawa a dí-pɛn lɛn nɛ. 28Simiɔn lɛ nɛ lɛ saa a gɔn, á barka da Lawa nɛ ka loe ne:
29«Dɛnaa Lawa, sisia,
n lɛ kɔ ǹ boo lɛ lɛ pã kəni.
N tá boe la n toa
masɛ mɛn bɛ́ n din a bɛ̀rɛgiĩ lɛa,
ma wo geren piɛ sisia
ka nyɛnyɛɛ nɛ.
30A giala, ma yii yɛ,
n ná a giala kɔ
n tá n minin nyin si ǹ dí lɛ nyɛɛ kəni.
31Tɔrɔ din tumaa dɔ n die bɛ yii:
32 #
Iza 42.6; 49.6; 52.10 A n die wɔlɔ fúlu boe tɔrɔn tumaa nɛ,
a n gugurubaa koe
n din a tɔrɔ boe kɛ la,
bɛ mɛn bɛ́ ka Izirayeli ni.»
33Simiɔn goã boo mɛn yii diɛ nɛ lɛ wɔ gɔn la, bɛn man nə́ goã kaãbaa diɛ ǹ di laanka ǹ dan ganaa. 34Bɛ kio, Simiɔn ná a nyankɔ Lawa lon, mà á barka wɔ ǹ nɛ, á tɔ́n pɛ nɛ lɛ dan Mariya nɛ: «Lawa na á nɛ kɛ lɛ bɔ á dia, á n die Izirayeli min gigiã a mɛnaa a bɔ̀n baa ǹ gòã biɛ, a gigiã dɔ a yoo a kirisibaa ǹ gòã baa. Nɛ lɛ n die Lawa foo dí-nyaali biɛ, sɛnɛ, minin man die n piɛ̃ nɛ, ǹ boo baraa dɔ a ganaa. 35Bɛ lɛ gɔ́ɔ̃ nɛ, a n die min gigiã gɔ́ɔ̃gɔ́ɔ̃ ǹ taasiɛ duriin boe, a ǹ kaa wɔlɔ fúlu ganaa. Sɛnɛ nsɛ, busii á die n là paparɛɛ ka gɔya a min fɔ̃ ǹ bǎã bɛ́ lɔn.»
36Lɔ goon dɔ na á goã a din Zeruzalɛmu kiwi lɛ nɛ, Lawa a boo gii-dali lɛa, a tɔ n Anɛɛ, n di tɔ na á goã Fanoeli, Asɛɛrɛ tɔrɔ nɛ. Bɛa lɔ lɛ zizi kɔ parsiini. A na á giã kun ka ǹ zuũ ni lɛ̀ sɔbaa dinsɔɔ̃, yǎa ǹ zuũ gã. 37Bɛ kio, á goã lɔ giɔɔrɔbaa nɛ, yǎa á zizi kɔ á woo dɔ lɛ̀ pɔkiwisiwensii. A goã soe doo á n boe Lawa a kion wa, a na á goã Lawa guguru koe tèlò laanka penleen ne, bɛ̀ a nə́ n lɛ soɛ á n Lawa nyankoe. 38A dɔ bɛ́ á soo gɔrɔ á kɔnpɛ ka nɛnyaan lɛ a kɔ Lawa la nɛ, á yoo á n Lawa tɔ boe. Bɛ kio, á nɛ lɛ boo da Zeruzalɛmu kiwi minin manɛ, ǹsɛn mɛnɛn bɛ́ ǹ yii diɛ mà Lawa á die ǹsɛn gána nyin sii.
Nɛ lɛ laanka a yɛ wolen man wusii woe Nazarɛti
39 #
Mat 2.23
Mariya laanka Zozɛfu bɛ́ ǹ nə́ ǹ siin yii yɔrɔ bɔ, á kɔnpɛ ka Dɛnaa Lawa a dí-pɛn lɛn nɛ, ǹ nə́ wusoo ka Yezu ni, ǹ nə́ woo Galilee gána nɛ, ǹ kiwi Nazarɛti. 40Nɛ lɛ sɛ na á goã gole koe, bɛ̀ á n pàã yii, a na á goã woe nyɛɛnɛ parsiini Lawa foo sii doɛ̃ gɔ́ɔ̃ nɛ, a n foaã nɛ dɔn mà Lawa á narɛ.
Yezu a tá Lawa a kion bɛ̀ a lɛ̀ fulupaa bɛ́ nɛ
41 #
BBN 12.1-27; TDP 16.1-8 Lɛ̀ woo lɛ̀, Yezu a yɛ wolen man woe Zeruzalɛmu kiwi, ǹ Zuifun soo a *kiɛ̃mala ǹ zɔ́n zɛnaa. 42A kɔnpɛ ka ǹ landa sii ni, Yezu bɛ́ á dɔ lɛ̀ fulupaa, ǹ nə́ woo zɔ́n lɛ ganaa ka a dɔ nɛ. 43Zɔ́n lɛ bɛ́ á nya, ǹ nə́ wusoo ǹ nə́ woo piɛ, sɛnɛ, Yezu lɛ sɛ goã Zeruzalɛmu kiwi, ǹ di laanka ǹ dan nə bɔ a siére-a wa. 44Maǹ nə́ goã taasɛ, mà Yezu na á goã kun ka ǹ miã lɛ zii tɔ-wɔlen ne, ǹ nə́ zii tɔ wɔ yǎa wasa mɛ. Bɛ kio, ǹ nə́ yoo ǹ nə́ giɛ li ǹ tɔrɔn laanka ǹ giaáran bii. 45Ǹ nɛ lɛ yɛ wa, bɛ lɛ taman yii, ǹ nə́ wusoo ǹ nə́ ga li yǎa Zeruzalɛmu kiwi doo. 46A lɛawaa sɔɔbaa ǹ wɔ pinaa kəni, ǹ nə́ woo yaa Lawa a kion, á n giã-n tán landa sii-daraalin bii, a nə́ n too koe ǹ lon, bɛ̀ á n nɔ̀n diɛ ǹ la. 47Min mɛnɛn yii goã n too koe nɛ lɛ lon, bɛn tumaa goã n kaãbiɛ a sii-doɛ̃ ganaa ka a boon lɛ si ǹ gɔn nɛ.
48Ǹ di laanka ǹ dan bɛ́ ǹ nə́ yɛ, bɛa sii lɛ nə́ ǹ tɔwaa parsiini, ǹ dan nə́ tɔ́n pɛ nɛ: «Maa nɛ, wàa na á baa ń kɛ zɛnaa wɔsɛn manɛ? N di laanka masɛ gɔ́ɔ̃ biimaa nɛ, bɛ̀ wɔ á giɛ n li.»
49Yezu tɔ́n pɛ ǹ nɛ kɛnɛn: «Wàa na á baa ka á giɛ ma li? Ka a doɛ̃ mà masɛ doamaa nɛ ma goã ma Di a kion wa?»
50Sɛnɛ, ǹ bɛa boo kɛ lɛ giala ma a lon wa.
51Bɛ kio, Yezu yoo á woo kunun ǹ ni Nazarɛti kiwi, á goã ǹ di laanka n dan bɔlɔ sii. N dan Mariya na á goã bɛa siin kɛn lɛn tumaa tamaɛ a gɔ́ɔ̃ nɛ. 52#Sam1 2.26; Suu 3.4 Yezu dinmaa lɛ sɛ na á goã gole koe, bɛ̀ á n gɔ̀nɔn yii, a yiri dɔ n gole koe woe nyɛɛnɛ. A sii na á goã kɔɔ̃n Lawa ganaa ka minbuiinin ni.
اکنون انتخاب شده:
Luk 2: SBPE2011
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.
