Luk 1
1
Luku a boo giala koe n ka kɛ nɛ Tofili ni
1-2Ma dɔɔ̃n Tofili ganaa:
Lawa bɛ́ á siin mɛnɛn zɛnaa wɔ bii, man bɛn kiɛ̃ ǹ koe n la. Min tɛnɛn nə́ bɛa siin kɛn lɛn yɛ ǹ yii ni, a kũ a giala-koe li, ka bɛ dɔ nɛ, ǹ bɛ́ ǹ nə́ n baa boo kɛ lɛ a dalin lɛa, ǹ ná a laakalaa wɔ nɛ. Min gigiã nə́ n doa ǹ nə́ bɛa boon kɛn lɛn goa, ǹ nə́ ǹ kaa kun ǹ nə́ ǹ kiɛ̃. 3Bɛ lɛ nɛ, siin mɛnɛn dinin tumaa nə n zɛnaa a giala-koe li, má nɔ̀n da ka bɛn nɛ ka tɛtɛtɛ, má yɛ máa á siĩni, má kɔ bɛn lɛ, má kiɛ̃ kɔn kio, má ǹ nyaa n nɛ. 4Man bɛa sii lɛ zɛnɛɛ, màn mɛn bɛ́ toɛ, n dɔ̃, mà ǹ nə n daraa siin mɛnɛn-a, mà sonbore ne.
Zaã batɛmu-dali a yɛ ǹ gɔn
5 #
KZS1 24.10
Zuifun gána a kii Erɔdi a biikoo li, giĩ goon na á goã, a tɔ n Zakarii. A na á goã Lawa a kion wúlu-bɔle goon lɛa, a na á goã kun ka Abiya tɔrɔ a kuru wúlu-bɔlen ne. A lɔ dɔ na á goã wúlu-bɔlen tɔrɔ lɛa, a tɔ n Elizabɛti. 6Ǹ dinin min paa goã min peperen lɛa Lawa yɔrɔ-a, maǹ nə́ goã Dɛnaa a dí-pɛn lɛn tumaa bɔlɔ sii taãn-taãnɛ. 7Sɛnɛ, nɛ goã ǹ lon wa, a giala Elizabɛti na á goã lɔ nɛ-yɛle baãnaa lɛa, ǹ dinin min paa dɔ́ zizi kɔ á nya.
8Ǹ kɔ́n pinaa, Zakarii na á goã wúlu bɔ ǹ dí nyɛɛ Lawa a kion Zeruzalɛmu kiwi, kɔn boeboe na á dɔ ǹsɛn wúlu-bɔlen kuru ganaa. 9A kɔnpɛ wúlu-bɔlen lɛn sii zɛnaa nɛ, maǹ nə́ goã n piɛ̃ dí lɛ ganaa, bɛ̀ ǹ tatala kɔn. Bɛa pinaa kɛ lɛ nɛ, pã lɛ na á Zakarii kũ, nyɔɔ gìĩ kɔɔ̃n tiɛ̃ na á dɔ asɛ ganaa. Bɛ lɛ na á toa, á wɔ Lawa a kion nyɛɛnaan sonbore kɛ nɛ. 10A bɛ́ bɛa nyɔɔ gìĩ kɔɔ̃n kɛ lɛ tiɛ̃, zaman gole na á goã Lawa nyankoe kanaa.
11Bɛa biikoo kɛ lɛ li, Lawa a lon a dia dí-a wole goon nə́ n din nyaa nɛ, á golee nyɔɔ gìĩ kɔɔ̃n tã ǹ bǎã lɛ gusin. 12Zakarii bɛ́ á yɛ, a yiri nə́ n lɔlɔkɔn, nyɛ́ɛ dɔ́ kũ. 13Sɛnɛ, lon a dia dí-a wole lɛ pɛ nɛ: «N baran nyɛ́ɛ baa wa, a giala, Lawa nə́ n nyankɔ lɛ ma. N lɔ Elizabɛti á die nɛgiĩ yii, n tá re a tɔ koe Zaã. 14N foo á die kɔɔ̃n koe bɛ gɔ́ɔ̃ nɛ parsiini, ka bɛ dɔ nɛ, minbuiin gigiã á die n nyɛnyɛɛ nɛ lɛ a yɛ gɔ́ɔ̃ nɛ. 15#MNS 6.3 A giala, bɛa nɛ kɛ lɛ n die min barkadɛnaa biɛ Lawa gɔn. Duvɛ̃ baran wɔ a lɛ-n wa, màn woo màn, a n we min yii ni, bɛ kɔ́n baran wɔ a lɛ-n wa. Nɛ lɛ n die piɛ̃ ka Lawa a Yiri Fu ni, bɛ̀ á tɔn nə ǹ dan gɔ́ɔ̃ nɛ. 16A nya ǹ dí n die toɛ Zuifun gigiã wusoo, ǹ da ǹ Dɛnaa Lawa ganaa doo. 17#Mal 3.23-24 Á re die Dɛnaa nyɛɛnɛ, a na a daa boo pɛ. Á re die ka Lawa a Yiri Fu pàã-n a lon, ka Lawa a boo gii-dali Yilii bɛ́ á goã lɔn. Á die díin laanka nɛn kiɛ kun. Á die toɛ, min mɛnɛn nə n piã lɛlɛ ka Lawa nɛ, bɛn nə wusoo, ǹ da a ganaa, màn mɛn bɛ́ toɛ, Lawa din tɔrɔ mɛn bɔ, bɛ nə n yɔrɔ bɔ, a n yii da Dɛnaa lɛ la.»
18Bɛ kio, Zakarii pɛ lon a dia dí-a wole lɛ-n kɛnɛn: «Masɛ n die doɛ̃ wàa mɛn li, máa bɛa boo kɛ lɛ n sonbore lɛa? A giala, ma laanka maa lɔ nɛ, wɔ́ zizi kɔ á nya.»
19 #
Dan 8.16; 9.21 Lon a dia dí-a wole lɛ tɔ́n pɛ nɛ: «Masɛ tɔ n Gabarayeli, man lon a dia dí-a wolen goledɛnaa goon lɛa, ma bɛ́ dí nyɛɛ Lawa mɛn nɛ, bɛ lɛ na á masɛ dia, mà ma da boo tii kɔɔ̃n kɛ pɛ n nɛ. 20Ma bɛ́ má siin mɛnɛn pɛ n nɛ, bɛn man die n zɛnɛɛ ǹ kɔnpɛ ǹ biikoo ne. Sɛnɛ, n bɛ́ n lɛ kɔ ǹ-a wa, bɛ lɛ taman yii, n tá re lɛ tere-a biɛ, n ba re boe la n boo da wa, yǎa bɛa siin kɛn lɛn zɛnaa pinaa doe.»
21Bɛa biikoo kɛ lɛ din tumaa li, zaman lɛ nə n yii diɛ Zakarii la kanaa, ka bɛ dɔ nɛ, maǹ nə́ goã n kaãbiɛ a belebɔ kion gɔ́ɔ̃-n lɛ ganaa. 22Zakarii bɛ́ á soo ǹ mɛn waáraa, a boo la á boo da min ni wa, zaman lɛ dɔ̃, mà a yii na á màn yɛ Lawa a kion nyɛɛnaan sonbore lɛ nɛ. A goã boo diɛ min kɔ́n nɛ wa, a na á goã n gɔnɔn dininsɔɔ̃nɔn biĩ.
23Zakarii a wúlu bɔ ǹ dí biikoo bɛ́ á nya Lawa a kion, á wusoo á woo piɛ. 24Boɛɛn nɛ bɛ kio, yǎa a lɔ Elizabɛti nɔ̀ si. Sɛnɛ, mui sooro din tumaa gɔ́ɔ̃ nɛ, Elizabɛti goã soe á n boe kion wa.
25A na á goã pii a din gɔ́ɔ̃-n kɛnɛn: «E! Lawa a dí á siĩni, a na á kɔɔ̃n kɔ a din ni, a kɛa nɛ-yɛbaã sìi kɛ saa, a bɔ masɛ la minin yɔrɔ-a.»
Yezu bɛ re yii ka yɔrɔ mɛn nɛ
26Elizabɛti a nɔ̀ sii mui sɔrɔ, Lawa ná a lon a dia dí-a wole Gabarayeli dia Galilee gána kiwi goon ne, a tɔ n Nazarɛti. 27#Mat 1.18 A na á dia nɛniɛ goon li, a tɔ n Mariya, Mariya lɛ na á goã Zozɛfu a lɔ wɔsiɛ lɛa, bɛa Zozɛfu lɛ na á goã kii Davida tɔrɔ lɛa. 28Lon a dia dí-a wole lɛ woo a li, á pɛ-n kɛnɛn: «Mariya, ma á fòo diɛ n nɛ, Lawa tá kunun n ni, a na á n bɔ, á bǐɛ̃ gole baa nɛ.»
29Mariya yiri nə́ n lɔlɔkɔn bɛa boo kɛ lɛ a diɛ gɔ́ɔ̃ nɛ. A na á goã nɔ̀n diɛ a din la, mà fòo kɛ n wàa giala pii. 30Lon a dia dí-a wole lɛ tɔ́n pɛ nɛ: «Mariya, n baran nyɛ́ɛ baa wa, Lawa na á bǐɛ̃ gole baa n nɛ. 31#Mat 1.21 N tá re nɔ̀ sii, n nɛgiĩ yɛ, n tá re a tɔ koe Yezu. 32#Sam2 7.12,13,16; Iza 9.7 Bɛa nɛgiĩ kɛ lɛ n die min barkadɛnaa biɛ, maǹ die bíi "Lon a Lawa gole a nɛ". Dɛnaa Lawa n die ǹ digolo Davida a kii dankan koe la, a giã a nɛ. 33A n die giɛ̃ Izirayeli tɔrɔ minin mìi la yǎa duduu, a kiibaa a re nyɛɛ wa.»
34Bɛ kio, Mariya pɛ lon a dia dí-a wole lɛ nɛ: «Bɛa siin kɛn lɛn man die n zɛnɛɛ lɔn, a da yaa, masɛ n ma a giĩ doɛ̃ wa?»
35Lon a dia dí-a wole lɛ tɔ́n na a lɛ si á pɛ: «Lawa a Yiri Fu n die gisĩ n la, Lon a Lawa gole n die a din pàã gisĩ n la. Bɛ lɛ taman yii, n bɛ́ die nɛ mɛn yii, maǹ die bíi "Lawa wɔ", ka bɛ dɔ-n doo "Lawa a Nɛgiĩ". 36N dɔɔ̃nlɔ Elizabɛti dɔ á min guguru lɛa sisia. A laanka a zizi kɔ kɛ lɛ din tumaa nɛ, ka minin bíi lɔ gɛlaa kɛ lɛ dɔ nɛ, a na a nɔ̀ a mui sɔrɔbaa ǹ wɔ nɛ. 37#SGK 18.14 A dɔ̃ sonbore, mà sii kɔ́n ba piɛ̃ Lawa ganaa wa.»
38Bɛ kio, Mariya pɛ lon a dia dí-a wole lɛ nɛ: «Man Dɛnaa a bɛ̀rɛlɔ lɛa. A n zɛnaa ma nɛ, a kɔnpɛ ka n boo kɛ lɛ nɛ.»
A bɛ́ á bɛ da á nya, lon a dia dí-a wole lɛ woo á n bɔ a li.
Mariya n woe n yii koe Elizabɛti li
39Lɛawaa dan kɔ́n bɛ kio, Mariya yoo á zii saa fufuu, á woo kiwi goon ne, bɛa kiwi lɛ n Zudee gána a kelen bǎã nɛ. 40A bɛ́ á dɔ, á wɔ Zakarii a kion, á Elizabɛti yɛ, á fòo da nɛ. 41Elizabɛti bɛ́ á Mariya a fòo-diɛ lɛ ma, a din bǎã-n gɔrɔ, a nɛ bìn da a gɔ́ɔ̃ nɛ. Lawa a Yiri Fu gisĩ 42Elizabɛti la, á pɛ ka lɛn golen Mariya ganaa kɛnɛn: «Mariya, Lawa barka wɔ n nɛ á la lɔ din tumaa nɛ, n bɛ́ die nɛ mɛn yii, Lawa barka wɔ bɛa nɛ lɛ dɔ nɛ. 43A na á saa lɔn, min mɛn bɛ́ die maa Dɛnaa biɛ, bɛ dan daa n yii kɔ masɛ din doobaa kɛ li? 44Mariya, ma bɛ́ má n fòo-diɛ lɛ ma bǎã mɛn nɛ gɔrɔ, ma gɔ́ɔ̃gɔ́ɔ̃ ǹ nɛ lɛ na á bìn da nyɛnyɛɛ gɔn. 45Nsɛ wɔ bǐɛ̃ kɔ, nsɛ mɛn bɛ́ n lɛ kɔ a ganaa, Dɛnaa Lawa nə ǹ dia ǹ nə́ daa boo mɛn pɛ n nɛ, bɛ á die n zɛnɛɛ sonbore.»
Mariya loe mɛn lɔ
46 #
Sam1 2.1-10
Mariya tɔ́n pɛ:
«Man Dɛnaa Lawa a golebaa boo diɛ,
ma a tɔ bɔ.
47Ma foo piɛ̃maa-n ka nyɛnyɛɛ nɛ
maa Lawa taman yii,
a giala a n die ma nyin sii.
48 #
Sam1 1.11
Masɛ din doobaa kɛ lɛ,
ma na a din a bɛ̀rɛlɔ lɛa,
sɛnɛ, á lɛ kɔ á n yɔrɔ da ma la.
Bɛ lɛ nɛ,
a n giala kɔ sisia ganaa a wo nyɛɛnaan yaa,
minin tá re pii,
mà masɛ wɔ bǐɛ̃ kɔ.
49A giala
Lawa Pàãyiidɛnaa sii dadaran zɛnaa masɛ nɛ,
a tɔ á sonbore.
50Min mɛnɛn bɛ́ nyɛ́ɛ biɛ a yii ni,
a n makara boe bɛn ganaa yǎa duduu.
51Sɛnɛ, min mɛnɛn bɛ́ n dinin gole koe,
Lawa n die a din a pàãdɛnaabaa ǹ gɔn kɛ siɛ lon,
a da ǹ bii a ǹ sasawaa.
52 #
Zɔb 5.11; 12.19 A n die kiin nyanɛɛ a ǹ bɔ ǹ kii dankan la,
a din boɛɛn-kɔlen saa lon.
53A n die bòonaan gɔn piɛ̃ ka naforo ne,
a gɔn màndɛnan loo,
ǹ wo ka ǹ gɔn kooro ne.
54A n die n doe a dí-nyali Izirayeli lɛ,
a giala, á n yiri koa a din a bǐɛ̃baa kɛ nɛ.
55 #
SGK 17.7
A bɛ́ á n lɛ kɔ wɔ digolo Abrahamu la
ka siin mɛnɛn nɛ,
a n die bɛn zɛnɛɛ wɔsɛn kɛn lɛn manɛ
a nɛnyaanan lɛa,
a na a lɛ pã yǎa duduu.»
56Bɛ kio, Mariya goã kun ka Elizabɛti ni yǎa mui sɔɔ kɛ miã, á tɔ́n zii nyankɔ, á wusoo á woo piɛ.
Zaã batɛmu-dali a yɛ boo
57Elizabɛti a gisiĩ biikoo bɛ́ á dɔ, á nɛgiĩ yɛ. 58Elizabɛti miãkɛnɛn laanka ǹ tɔrɔn bɛ́ ǹ nə́ ma, mà Dɛnaa Lawa din na á bǐɛ̃baa ǹ sii zɛnaa nɛ, ǹ nə́ goã n nyɛnyɛɛ kun ni. 59#LWS 12.3 Nɛ lɛ bɛ́ á dɔ lɛawaa kiwisi, ǹ nə́ daa, màn mɛn bɛ́ toɛ, ǹ na a tɔ kɔ, ǹ kuru. Maǹ nə́ goã mà maǹ die bíi ka ǹ di tɔ nɛ, mà Zakarii. 60Sɛnɛ, nɛ lɛ dan mà haayii, mà a tɔ n Zaã.
61Ǹ miãkɛnɛn lɛn laanka ǹ tɔrɔn lɛn mà a ganaa mà wàa nɛ? Mà bɛa tɔ kɛ lɛ nə ǹ kion min mɛn ganaa?
62Zakarii lɛ lɛ bɛ́ tiɛ̃ nɛ, ǹ nə́ tɔ́n nɔ̀n da la ka ǹ gɔnɔn nɛ, mà ǹ nɛ lɛ tɔ kɔ mà die.
63Zakarii mà ǹ da ka gɔn-sɛlɛɛ nɛ, ǹ bɛ́ sɛ́wɔ kiɛ̃ màn mɛn-a, á tɔ́n boon kɛn kiɛ̃: «Nɛ lɛ tɔ n Zaã.» Min tumaa nə́ n kaãbaa. 64A din bǎã-n gɔrɔ Zakarii dɔ́ boo la á boo da, yǎa a yoo á n Lawa tɔ boe. 65Bɛ lɛ taman yii, ǹ miãkɛnɛn yii tumaa nə́ n kaãbaa, bɛ̀ nyɛ́ɛ dɔ́ nə́ ǹ ganaa. Ka bɛ dɔ-n doo, minin man nə́ goã bɛa siin kɛn lɛn laakalɛɛ kɔn nɛ, Zudee gána a kelen bǎã lɛ tumaa nɛ. 66Min mɛnɛn tumaa goã bɛa siin kɛn lɛn laakalaa miɛ ǹ too ne, bɛn nə́ goã n taasɛ ǹ ganaa, bɛ̀ ǹ nə́ pii mà nɛ kɛ á die màn biɛ dɛ!
A giala, a na á goã foaãnɛ min din tumaa yɔrɔ-a, mà Lawa din na á bɔ, á n die dí kɔ́n koe la.
Zakarii loe mɛn lɔ Zaã a biɛ̃ ǹ dí wɔ paǹ li
67Lawa a Yiri Fu daa nɛnyaan tiɛɛ̃n lɛ di Zakarii la, á boo saa á Lawa a boo gii da:
68«Min tumaa Dɛnaa,
Izirayeli a Lawa tɔ bɔ!
Á n yɔrɔ da wɔsɛn la,
á wɔ nyin si,
a giala, wɔ na a din a tɔrɔ lɛa.
69A na á nyin-sili kɔ wɔ la,
bɛ n nyin-sili pàãdɛnaa lɛa.
Bɛ na a din a dí-nyali Davida a nɔ̀ɔn lɛa,
Davida mɛn bɛ́ á goã wɔa kii gole lɛa.
70A na á bɛ lɛ wɔ
a boo gii-dalin sonboren lɛ-n,
haalɛ lɛlɛ-lɛlɛ ǹ nə́ da,
71mà asɛ á re wɔ boe wɔa zɔ́ɔn gɔn,
mà asɛ á re wɔ kirisibiɛ
wɔa zɔ́ɔn ganaa.
72Mà asɛ n die dí nyɛɛ,
a kɔnpɛ a din a lɛ-kɔ kɛ nɛ
wɔ digolon ne,
mà asɛ yiri a die boe
ka bɛa lɛ kɔ kɛ lɛ-n wa.
73Mà asɛ yiri a die boe
a din a liɛ kɛ nɛ
wɔ digolo Abrahamu-n wa,
mà asɛ á die bǐɛ̃ tɔrɔ tumaa zɛnɛɛ wɔ nɛ,
74mà asɛ á die wɔ sii
wɔa zɔ́ɔn pàã la,
mà asɛ á die nyɛ́ɛ lui
a bɔ wɔ ganaa,
wɔ a guguru kɔ,
75mà asɛ á die zii nyɛɛ wɔ nɛ,
wɔ tɔ wɔ peperebaa nɛ
ka sonborebaa nɛ,
wɔ dí nya a din ni
wɔa yiikoonaabaa din tumaa gɔ́ɔ̃ nɛ.
76 #
Mal 3.1
Nsɛ nɛnyaan tiɛɛ̃n lɛ dɔ ganaa,
maǹ die n bíi
lon a Lawa gole a boo gii-dali,
ma n die die wɔa Dɛnaa nyɛɛnɛ,
ma n die wɔa Dɛnaa a ziin zɛnɛɛ.
77Ma n die sii-doɛ̃ koe
wɔsɛn tɔrɔ minin kɛn la,
Lawa bɛ́ re minin nyin sii lɔn,
a bɛ́ re sii baraan toɛ ǹ nɛ lɔn,
ǹ bɛ dɔ̃.
78A giala, wɔa Lawa á wɔ narɛ,
a piɛ̃maa-n ka bǐɛ̃baa nɛ.
A bǐɛ̃baa n wɔlɔ fúlu lɛa,
kiɛ wɔ ganaa ka wasa bɛ́ lɔn.
79 #
Iza 9.2
Min mɛnɛn bɛ́ wɔlɔ tì li,
ǹ nə́ nyɛ́ɛ biɛ gɛ̀ nɛ,
a n wɔlɔ fúlu kiɛ bɛn ganaa.
A n là nyantoro zii nyɛɛ wɔ nɛ.»
80Nɛ lɛ sɛ na á goã gole koe, á n yiridɛnaa biɛ á woe nyɛɛnɛ. Biikoo kɔ́n waáraa á goã don bii, yǎa a din nyaa Izirayeli minin ni pinaa dɔ.
اکنون انتخاب شده:
Luk 1: SBPE2011
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.
