Zow 1
1
1Dɛnaa Lawa a boo n ka kɛ nɛ, á pɛ Petuweli a nɛgiĩ Zowɛli ni.
Boo mɛn nə n da Zudaa gána a min golen manɛ
2Min golen lɛn, ka n too kɔ kɛ li.
Gána minin lɛn,
ka tumaa nə n too da!
Ka bɛ́ ka tɔn sii mɛn yɛ
kaa tá kanaa gɔ́ɔ̃-n wa,
ka digolon dɔn dinin bɛ́
ǹ sii mɛn yɛ ǹ tá kanaa gɔ́ɔ̃-n wa,
bɛ lɛ n ke die.
3Ka a laakalaa
kaa nɛnyaanan manɛ,
kaa nɛnyaanan dɔn na a laakalaa
ǹ nɛnyaanan manɛ.
Kaa nɔ̀ɔnɔn na a laakalaa
ǹ kiodɛnan manɛ.
4Tangiəə̃ nə sɔ̃ á màn mɛn toa,
bisin nɛ muə bɛ goa
bisin nɛ muə sɔ̃ á màn mɛn toa,
bisin tenən nə́ bɛ goa
bisin tenən nə sɔ̃
ǹ nə́ màn mɛn toa,
bisin dadaran nə́ bɛ goa.
Bisinin basaã kɔ laanka lɛ̀ gere
5Yɔ-mili babaraan lɛn,
ka yoo ka n lɛ da wuu ni.
Duvɛ̃-milin lɛn,
ka tumaa nə n lɛ dɛ koe!
A giala,
ǹ nə́ duvɛ̃ dii kɛ nafɔ̃
ǹ nə́ bɔ ka lɛ-a.
6 #
SNS 9.8
Tɔrɔ kɔsɔn nə́ daa kɔ maa gána lɛ.
Maǹ kakaarɛ, min ba ǹ lɛ doɛ̃ wa,
mɔnaa nɛ ka bisin bɛ́ lɔn.
Ǹ sɔn kɛn man ka yàra sɔn bɛ́ lɔn,
ǹ pàã gɔnɔn kɛn man
ka yàra wɔn bɛ́ lɔn.
7Ǹ nə́ maa rezɛ̃ wuru ziziɛ̃,
maa gɔ́rɔ dan kɛn,
ǹ nə́ bɛn kakã.
Ǹ nə́ ǹ fɔrɔ tumaa gagasaã,
ǹ nə́ pɛpɛsɛ̃ tán.
Ǹ gùrù bibisinin kɛn tumaa
fufu kɔ.
8Ka wuu pɛ ka n lala da,
ka nɛniɛ mɛn nə ke,
á giɔɔrɔ mɔnaan wɔ,
a tá ǹ zuũ a gɛ̀ wuu pii.
9 *Belee laanka duvɛ̃ nɛ,
bɛ kɔn ba yii á die
Lawa a kion doo
Dɛnaa Lawa gɔ ǹ màn lɛa wa.
Wúlu-bɔlen mɛnɛn bɛ́
Dɛnaa Lawa a dí nyɛɛ,
bɛn foo ziziɛ̃ ka gɛ̀ na á gã ǹ la.
10Wurun nə́ ziziɛ̃
tán mànan foo ziziɛ̃.
A giala, belee ziziɛ̃,
duvɛ̃ banban doo wa,
nyɔɔ banban doo wa.
11Buu-Kɔsɔlin gù gã,
rezɛ̃ wuru-bɔlen tá n lɛ didii.
Belee banban,
*ɔrzi banban
wuru gɔ́ɔ̃ màn tumaa ziziɛ̃.
12 *Rezɛ̃ dan nə́ tutusi,
gɔ́rɔ dan nə́ bɛbɛnɛ.
Grenadie da nɛ, tamaran da nɛ,
da nɛ-kɔle tumaa don,
ǹ tumaa gã.
Min kɔn foo a kɔɔ̃n wa.
Lɛ-sɔɔ laanka Lawa nyankɔ
13Lawa a wúlu-bɔlen lɛn,
ka gɛ̀ koa ǹ mɔnaan wɔ,
ka wuu pɛ.
Kasɛn mɛnɛn bɛ́
*wúlu bɔ ǹ bǎã kɛa dí nyɛɛ,
ka n lɛ dɛ.
Kasɛn mɛnɛn bɛ́
dí nyɛɛ maa Lawa nɛ,
ka n yɔrɔ kɔsɛ, ka lɛ̀ waa nɛ.
A giala, minin ba die
ka belee laanka duvɛ̃ nɛ
Lawa gɔ ǹ wɔ lɛa,
Lawa a kion doo wa.
14Ka lɛawaa bɔ,
ka n lɛ sɔɔ bɛ li.
Ka zaman bii a tɔ-a,
ka min golen lɛ sɔkɔn,
ka gána lɛ a minin tumaa nɛ,
Dɛnaa, kaa Lawa a kion kɛ nɛ,
ka goã-kũ da Dɛnaa Lawa ganaa.
Dɛnaa Lawa a lɛawaa
15 #
Iza 13.6
Haya!
Lɛawaa lɛ a mɛn tɔrɔ-n ke!
Dɛnaa Lawa a lɛawaa lɛ diri.
A n die n biɛ ka basaã-kɔle
a basaã bɛ́ lɔn,
boe Pàãyiidɛnaa Lawa li.
16Màn-bii lɛ bie á nya
wɔ dinin yii-n wa ya?
Foo kɔɔ̃nbaa laanka nyɛnyɛɛ
lɛ bie á nya Lawa a kion
wɔ dinin yii-n wa ya?
17Màn tɔrɔn nə́ ke boɛ̃ tán tii li.
Dɔǹɔn gɔ́ɔ̃ kooro ne,
màn tamaa ǹ bǎãn lɛn nə́ kaa.
A giala, belee banban.
18Á ke, tɔɔn lɛ-baa ba nɛn wa!
Diin manə n binbirin boe,
buu sɔ̃ ǹ bǎã banban.
Bòen laanka sèren,
bɛn dɔn dinin nə́ pɛpɛrɛ.
Zowɛli a Lawa nyankɔ
19Dɛnaa Lawa,
ma nə n lɛ dii n din li.
Tɛ á ke
á tɔɔn buu sɔ̃ ǹ bǎã lɛ kũ don,
tɛ lɛ da tumaa kũ don.
20Haalɛ don mànan dɔn dinin
manə n yɔrɔ diɛ n din la.
A giala, mu piɛ̃ á n bɔ pɛrɛn nɛ,
tɛ tɔɔn buu sɔ̃ ǹ bǎã tumaa kũ don.
اکنون انتخاب شده:
Zow 1: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.