Zer 38
38
Zeremii n nyankɔrɔ zuzulu ni
1Matan a nɛgiĩ Sefatiya nɛ, Pasewuru a nɛgiĩ Gedalia nɛ, Selemia a nɛgiĩ Yukaali ni, ka Malkia a nɛgiĩ Pasewuru ni, ǹ nə́ Zeremii a boon kɛn ma á goã ǹ pii zaman tumaa nɛ: 2Dɛnaa Lawa n kɛ pii: «Min woo min giã kiwi kɛ nɛ, bɛa dɛnaa á re giɛ̃ zia taman yii, bòo ne, ka piɛ̃ busu ni. Sɛnɛ min mɛn bɛ́ re soe a wo n din wɔ *Baabilonii minin gɔn, bɛ yii á re goɛ̃ koo sɛn.» 3Dɛnaa Lawa n kɛ pii doo: «Ma á re kiwi kɛ we Baabiloniin kii a sɔraasin gɔn. Sàabaa ba la wa ǹ tá re kuĩ.» 4Bɛ kio, gána nyɛɛnaandɛnan nə́ pɛ kii Sedekiasi ni: «Zeremii dɛ a gã. A bɛ́ boo mɛn diɛ, bɛ n sɔraasin foo ziziɛ̃, ka zaman kɛ nɛ kiwi. A bie giɛ zaman lɛ a bǐɛ̃ li wa, a n giɛ a koe li.» 5Kii Sedekiasi tɔ́n nə ǹ lɛ si: «Bɛ̀ sii mɛn kɔɔ̃n kɔ ka ganaa, ka bɛ zɛnaa nɛ. Ma din ni kii lɛa, sɛnɛ ma a boe la ma ka kurəə sii kɔn ganaa wa.» 6Gána nyɛɛnaandɛnan lɛn nə́ Zeremii saa, ǹ nə́ zũ kii a nɛgiĩ Malkia a nyankɔrɔ zuzulu kɛ nɛ. Maǹ nə́ Zeremii gisĩ nyankɔrɔ lɛ nɛ ka biɛ nɛ. Bɛa nyankɔrɔ zuzulu lɛ n bǎã-lɛduə̃lin sumu-n. Mu goã a-n wa, yǎa bɛrɛɛ. Bɛa bɛrɛɛ lɛ Zeremii kũ. 7A da yaa, Etiopii min goon goã dí-nyali yii guguru-a lɛa kii a kion, a tɔ n Ebɛdi-Melɛki. Bɛ ma mà maǹ nə́ Zeremii da nyankɔrɔ zuzulu lɛ nɛ. Kii sɛ na á goã golee-n Bɛnzamɛn tɔrɔn kiɛnlɛ-a. 8Ebɛdi-Melɛki woo kii lɛ li á pɛ nɛ: 9«Dɛnaagiĩ kii ganaa, minin lɛn nə sii mɛn zɛnaa Lawa a boo gii-dali Zeremii ni, sii baraa nɛ. Maǹ nə́ zũ nyankɔrɔ zuzulu ni. A n die giɛ̃ bòo gɔn a giala, màn-bii ba kiwi lɛ-n wa.» 10Kii tɔn kɛa boo kɛ pɛ Etiopii min Ebɛdi-Melɛki ni: «Ga min sɔɔ#38.10 Lawa a Boo sɛ́wɔn tɛnɛn man pii mà min pɔsɔɔ. li ka wo Zeremii baã nyankɔrɔ lɛ nɛ ka soo ne bɛ̀ a ná a tɔn gã wa!» 11Ebɛdi-Melɛki daa ka min sɔɔ lɛ nɛ. Á kiɛ̃ á woo kii a kion, kion nɛ goon ne, naforon tamaa ǹ kion kɛ giulun, á mɔnaa kunun goa walan. Á bɛa mɔnaa kunun lɛn dia Zeremii la nyankɔrɔ lɛ nɛ kɔnlɛ ka biɛn nɛ. 12Etiopii min Ebɛdi-Melɛki tɔn pɛ Zeremii ni: «Mɔnaa kunun kɛn wɔ n nyàan giulun, n tɔn biɛn lɛn da la.» Zeremii dɔ zɛnaa miɛ̃. 13Bɛa minin lɛn nə́ tɔn Zeremii baã ǹ nə́ soo ne nyankɔrɔ zuzulu lɛ nɛ. Bɛ kio, Zeremii goã bǎã-lɛduə̃lin sumu lɛ nɛ.
Kɔn yɛ giala nyɔmɔɔ ka kii ni
14Kii Sedekiasi min dia mà a wo lɛ dia Lawa a boo gii-dali Zeremii la. Á daa nɛ Lawa a kion a kiɛnlɛ sɔɔbaa ǹ wɔ kɛ li. Á pɛ nɛ: «Man die nɔ̀n goon diɛ n la, n nyan boo kɔn duru ma la wa.»
15Zeremii Sedekiasi lɛ si kɛnɛn: «Bɛ̀ má sonbore pɛ n nɛ, n nə die ma nyin boe. Bɛ̀ ma doroo kɔ n la, n ba re koe lɛ wa!» 16Sɛnɛ, kii Sedekiasi lɛ kɔ wɔ ka durii ni Zeremii-n kɛnɛn: «Ká Dɛnaa Lawa Yiikoonaa tɔ nɛ, asɛ mɛn yiikoonaabaa kɔ wɔ la, ma a re n nyin boe wa. Min mɛnɛn dɔn bɛ́ zoɛ̃ n gɛ̀ li, ma a re n we bɛn gɔn wa.»
17Zeremii tɔ́n pɛ Sedekiasi ni: – Dɛnaa Lawa Pàãyiidɛnaa, Izirayeli a Lawa n kɛ pii: «Bɛ̀ n nə́ n din wɔ Baabiloniin kii a gána nyɛɛnaandɛnan gɔn, n yii á re goɛ̃ koo kɔnlɛ ka n sumu minin ni. Tɛ a re n diɛ Zeruzalɛmu ganaa dɔn wa. 18Sɛnɛ, bɛ̀ n nə n din wɔ Baabilonii gána nyɛɛnaandɛnan lɛn gɔn wa, Zeruzalɛmu n die n we ǹ gɔn, ǹ tɛ da a ganaa. N ba re liɛ ǹ la wa.» 19Kii Sedekiasi Zeremii lɛ si: «Zudaa minin mɛnɛn nə n dinin wɔ Baabilonii minin gɔn, man nyɛ́ɛ biɛ máa ǹ yaa kiɛ̃ ma we ǹ gɔn, ǹ baraa zɛnaa ma nɛ.» 20Sɛnɛ, Zeremii pɛ nɛ: «Haayii, ǹ ba re n we ǹ gɔn wa. N too kɔ Dɛnaa Lawa a boo kɛ li doɛ̃ ma á pii n ni. N sii tumaa á re bǐɛ̃ koe, n yii á re goɛ̃ koo.
21Sɛnɛ, bɛ̀ ń nə́ n piã, n nə n din wɔ ǹ gɔn wa, Dɛnaa Lawa sii mɛn nyaa ma nɛ, á ke: 22Lɔn mɛnɛn tumaa bɛ́ re goɛ̃ kii kion lɛ nɛ, ǹ tá re ǹ tumaa goɛ ǹ wo ǹ ne Baabilonii gána nyɛɛnaandɛnan yɔrɔ-a, ǹ loe lɔ bɛ̀ ǹ tá n tɔ pii:
Ǹ nə́ n sã taãn-taãnɛ,
n giaára sonboren lɛn!
Ń bɛ́ ń paraa bɛrɛɛ li ǹ mɛn waáraa,
ǹ nə́ n la bɔ n ganaa!»
23«Taãn nɛ, ǹ tá re woe n lɔn laanka n nɛnyaanan nɛ Baabilonii minin yɔrɔ-a. N dinmaa dɔ a re kanbiɛ ǹ ganaa wa. Baabiloniin kii á re n biɛ kòso nɛ lɛa, a tɛ da Zeruzalɛmu ganaa.»
24Sedekiasi tɔn Zeremii lɛ si: «Wɔ boo mɛn da sisia, n nyan toa min kɔn bɔ a siére-a wa. Ka bɛ-n kəni, n ba re giɛ̃ wa. 25Sàabaa ba la wa, gána nyɛɛnaandɛnan tá re boe a siére-a mà wɔ́ boo da. Ǹ tá re pii n ni: N boo mɛn pɛ kii ni, ka kii boo mɛn pɛ n nɛ, bɛ pɛ wɔ nɛ, ka bɛ nɛ wɔ a re n nyin boe wa. 26N die n nə ǹ lɛ si mà nsɛ nə n kii nyankɔ parsiini má a nyan wo n ne Zonaatan a kion kɛ-n doo wa. Bɛ bie wa, mà n nə ǹ die giɛ̃.»
27Sonbore, gána nyɛɛnaandɛnan lɛn tumaa daa Zeremii yaa, ǹ nə́ nɔ̀n dada la. Sɛnɛ, Zeremii nə́ ǹ lɛ si ka kii goã á pɛ-n lɔn. Ǹ nə́ tɔn Zeremii toa kiĩni, a giala min kɔn nə ǹ laanka kii a boo ma wa. 28#Eze 33.21 Zeremii na á goã wɔlɔ-lɛduə̃lin sumu lɛ nɛ yǎa Zeruzalɛmu a kuĩ pinaa.
Zeruzalɛmu a kuĩ
Ǹ Zeruzalɛmu kũ ka yɔrɔ mɛn nɛ á ke:
اکنون انتخاب شده:
Zer 38: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.