Zer 37
37
Zeremii n kòso ne
1 #
Kiin2 24.17; KZS2 36.10 Baabiloniin kii Nebukadenezɔɔrɔ na á Zoziasi a nɛgiĩ Sedekiasi koa kii lɛa Zudaa gána mìi la. Sedekiasi na á Zozakimu a nɛgiĩ Konia bǎã saa. 2Sɛnɛ, Dɛnaa Lawa a gɔn waa ǹ boon kɛn Zeremii goã ǹ diɛ, min kɔn goã ǹ too koe ǹ li wa, kii dinmaa nɛ, a gána nyɛɛnaandɛnan nɛ, ka Zudaa minin ni. 3A da yaa, kii Sedekiasi na á Selemia a nɛgiĩ Yukaali laanka Maseya a nɛgiĩ Lawa a wúlu-bɔle Sefania dia Zeremii li. Ǹ nə́ pɛ-n kɛnɛn: «Dɛnaa Lawa, wɔa Lawa nyankɔ wɔa lɛa!» 4Bɛa biikoo li, bɛ̀ ǹ tɔn Zeremii da kòso-n wa. Á goã boe la a n bibiə̃ a din dùũ li zaman bii. 5*Faarahɔn a zia kuru goã boe Ezipti gána-n die. *Baabilonii minin mɛnɛn nə goã ǹ nə́ yoo Zeruzalɛmu kiwin gialaa, ǹ bɛ́ ǹ nə́ bɛa boo lɛ ma, ǹ nə́ n wɔlɔ lui kiwi lɛ ganaa. 6Dɛnaa Lawa tɔn boo da Lawa a boo gii-dali Zeremii ni á pɛ nɛ: 7– Dɛnaa Lawa Pàãyiidɛnaa, Izirayeli a Lawa n kɛ pii: «Zudaan kii mɛn nə ka dia ma li, ka wo pɛ-n kɛnɛn: Faarahɔn a sɔraasin mɛnɛn nə soo mà man die n doe ka lɛ, ǹ nə́ n bɔyaa ǹ nə́ woo Ezipti gána nɛ. 8Baabilonii minin tá re wusii ǹ yoo Zeruzalɛmu gialaa. Ǹ tá re kuĩ, ǹ tɛ da a ganaa. 9Masɛ Dɛnaa Lawa n kɛ pii: Ka nyan ka dinin yiri sã ka pɛ mà Baabilonii minin lɛn nə́ woo ǹ nə n bɔ ka li wa. Haayii, ǹ ba re woe wa! 10Ta ka n boe Baabilonii gána a sɔraasin tumaa la, ǹ mɛnɛn yii bɛ́ re goɛ̃ koo ǹ bii busulən lɛa, bɛn tá re yui ǹ zìã kionən ne, ǹ tɛ da Zeruzalɛmu kiwi ganaa.»
11Baabilonii a sɔraasin nə́ n wɔlɔ sɔsɔɔ kɔ Zeruzalɛmu ganaa Ezipti gána a sɔraasin lɛn taman yii. 12Zeremii goã li a soo a kiwi lɛ nɛ a wo Bɛnzamɛn minin gána nɛ, sumu boo ganaa ǹ dɔɔ̃nɔn li. 13A bɛ́ á dɔ Bɛnzamɛn minin kiɛnlɛ-a, á n da wɔlɔ-lɛduə̃lin goledɛnaa Iriya lɛ, Anania a nɔ̀ɔn lɛa, Selemia a nɛgiĩ lɛa. Iriya Lawa a boo gii-dali Zeremii bíi á pɛ nɛ: «N nə n woe n kiɛ kun ka Baabilonii minin ni!» 14Zeremii ná a lɛ si kɛnɛn: «Haayii, ma bie woe n kiɛ kun ka Baabilonii minin ni wa!» Sɛnɛ, Iriya nə n too kɔ Zeremii lon wa. Á kũ, á woo ne a goledɛnan li. 15Ǹ foo goã yoo-n Lawa a boo gii-dali Zeremii li parsiini, yǎa ǹ nə́ dɛdɛ. Ǹ nə́ tɔn a lɛ tã sɛ́wɔ-kiɛ̃li Zonaatan a kion kɛ nɛ ǹ nə́ bɔyaa ǹ nə́ baa kòso kion lɛa. 16Ǹ Zeremii da bǎã mɛn nɛ, nyankɔrɔ zuzulu ni. Á goã walan á belebɔ.
17Ǹ kɔn pinaa, kii Sedekiasi min dia mà a wo lɛ dia la. A n li a nɔ̀n da la ka durii ni a kii kion lɛ nɛ. Kii lɛ nɔ̀n da la: «Dɛnaa Lawa boo da n nɛ masɛ a paǹ li?» Zeremii ná a lɛ si: «Hiĩ, Dɛnaa Lawa á re n we Baabiloniin kii gɔn.» 18Á tɔn pɛ kii lɛ nɛ: «Ma n má wàa la n la, n gána nyɛɛnaandɛnan nɛ ka Zeruzalɛmu minin ni ka n ma diɛ kòso ne? 19Kaa Lawa a boo gii-dalin mɛnɛn nə pɛ mà Baabiloniin kii ba re yui ka gialaa ka zia-n wa, mà a re yui kaa gána dɔ gialaa wa, bɛn maǹ maa pelo?» 20Zeremii tɔn kɛ ti a ganaa: «Kii, n too kɔ ma lon kanna. N too kɔ maa nyankɔ li. N nyan ma dia sɛ́wɔ-kiɛ̃li Zonaatan a kion doo wa, bɛ bie wa, man die giɛ̃.» 21Kii Sedekiasi tɔn pɛ mà ǹ Zeremii da bǎã-lɛduə̃lin sumu kɛ nɛ, ka buuru mɔ̀mɔ mìi goon kɔ la baraabaraa, buuru mɛn bɛ́ boe buuru-dalin bǎã kɛ nɛ yǎa bɛ̀ buuru nya kiwi lɛ nɛ. Bɛa yɔrɔ lɛ la, Zeremii goã bǎã-lɛduə̃lin sumu lɛ nɛ.
اکنون انتخاب شده:
Zer 37: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.