Zer 39
39
1Zudaan kii Sedekiasi a kiibaa lɛ̀ manangɔrɔbaa ǹ wɔ a mui fùbaa ǹ wɔ li, *Baabiloniin kii Nebukadenezɔɔrɔ laanka a sɔraasin tumaa daa Zeruzalɛmu lɛnpɛnɛ. 2Sedekiasi a kiibaa lɛ̀ fulugoonbaa ǹ wɔ a mui siibaa ǹ wɔ a lɛawaa manangɔrɔbaa ǹ wɔ li, Baabilonii minin nə́ Zeruzalɛmu lɛnpɛnɛ ǹ kungɔn kolo fɔ̃. 3Baabiloniin kii a gána nyɛɛnaandɛnan tumaa wɔ, ǹ nə́ giã kiwi lɛ a kiɛnlɛ kɛ lɛ-a bii. Min mɛnɛn nə goã ǹ tan, ǹ nə́ ke: Negali-Saresɛɛrɛ nɛ, Sangaara-Neboo ne, kii a dí-nyalin goledɛnaa Saaraa-Sekimu ni, sɔraasin goledɛnaa Negali-Saresɛɛrɛ nɛ ka Baabiloniin kii a sɔraasin nyɛɛnaandɛnan kɔsɔn dɔn nɛ.
4Zudaan kii Sedekiasi laanka a sɔraasin bɛ́ ǹ nə́ ǹ yɛ lɔn, ǹ nə́ baa si tèlò basa li ǹ nə́ soo kiwi lɛ nɛ, ǹ nə́ bɔ kii a dù gɔrɔ kɛ nɛ, ǹ nə́ woo soo kiɛnlɛ kɛ nɛ kungɔn màn paa bii n ni. Ǹ nə́ Arabaa zii saa. 5Sɛnɛ, Baabilonii sɔraasin nə́ ǹ kio loo, ǹ nə́ dɔ Sedekiasi ganaa Zerikoo nyankɔrɔ lɛ nɛ. Ǹ nə́ kũ, ǹ nə́ baa kòso nɛ lɛa, ǹ nə́ woo ne Ribla kiwi, Amaati gána nɛ, Baabiloniin kii Nebukadenezɔɔrɔ yɔrɔ-a. Nebukadenezɔɔrɔ kiri wɔ Sedekiasi ganaa walan. 6Ka bɛ-n doo Baabiloniin kii Sedekiasi a nɛgiĩn dɛ a dinmaa yii ni ka Zudaa gána a kiãn tumaa nɛ. 7Bɛ kio, ǹ nə́ Sedekiasi yii nanan fɔ̃fɔ̃, ǹ nə́ yii ka zan zɔrɔka màn paa nɛ, ǹ nə́ woo-n Baabilonii.
8Baabilonii minin nə́ tɛ da kii a kion gana Zeruzalɛmu ka Zeruzalɛmu minin kionən ne. Kungɔn mɛn bɛ́ Zeruzalɛmu kiwi tamaɛ, ǹ nə́ bɛ wuru. 9Min mɛnɛn nə goã kiwi lɛ nɛ, bǎã-lɛduə̃lin goledɛnaa Nebuzaradan bɛn goa á woo ǹ ne Baabilonii. Min mɛnɛn nə n dinin wɔ Baabiloniin kii gɔn ka gɔn dí-nyali gialakunun kɛn nɛ, á bɛn dɔn goa á woo ǹ ne Baabilonii. 10Sɛnɛ, min mɛnɛn bɛ́ doobaan lɛa màn kɔn ba ǹ lon wa, Nebuzaradan bɛn tɛnɛn toa Zudaa gána nɛ, á wurun gii ǹ ni ka rezɛ̃ wurun ni.
Ǹ nə́ Zeremii da
11Baabiloniin kii Nebukadenezɔɔrɔ dí-pɛ kɔ bǎã-lɛduə̃lin goledɛnaa Nebuzaradan la Zeremii a paǹ li, á pɛ: 12«Wo kũ n da nɛ, n ga a walan, min kɔn nyan baraa zɛnaa-n wa, n tamaa ka a bɛ li lɔn.» 13Bǎã-lɛduə̃lin goledɛnaa Nebuzaradan kɔn ma ka kii a dí-nyali goledɛnaa Nebukaziban nɛ, sɔraasin goledɛnaa Negali-Saresɛɛrɛ nɛ ka Baabiloniin kii a gána nyɛɛnaandɛnan tumaa nɛ. 14Ǹ nə́ minin dia maǹ wo Zeremii bɔ bǎã-lɛduə̃lin sumu kɛ nɛ, ǹ da kɔ Safan a nɔ̀ɔn, Ayikaamu a nɛgiĩ Gedalia la. Gedalia zii kɔ Zeremii la mà a wo piɛ. Bɛ na á n baa Zeremii a da kiwi minin bii lɛa kɛnɛn.
Ebɛdi-Melɛki a kirisibaa
15A Zeremii toa tɔn kòso-n bǎã-lɛduə̃lin sumu lɛ nɛ, Dɛnaa Lawa boo da nɛ á pɛ: 16«Wo pɛ Etiopii min Ebɛdi-Melɛki ni mà Dɛnaa Lawa Pàãyiidɛnaa Izirayeli a Lawa n kɛ pii: Ma bie má goã má bǐɛ̃ boo da Zeruzalɛmu minin man wa, sɛnɛ koe ne. Taãn nɛ, ma boo mɛn da, a n die yɔrɔ yii. Kànaa ka boɛɛn, n tá re yii. 17Sɛnɛ, bɛa biikoo lɛ li, ma á re n kanbiɛ, ma din Dɛnaa Lawa a da ǹ boo ne. N bɛ́ nyɛ́ɛ biɛ min mɛnɛn manɛ, ma a re n we ǹ gɔn wa. 18Sonbore, sàabaa ba la wa, ma á re n kirisibiɛ. N ba re gɔya sa gɛ̀ we wa, n yii á re goɛ̃ koo. N là á re goɛ̃ ka bɛ sɛ kɔn nɛ, a giala, n nə́ n foo doa masɛ ganaa. Dɛnaa Lawa a da ǹ boo ne.»
اکنون انتخاب شده:
Zer 39: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.