Zer 36
36
Kii n Zeremii a sɛ́wɔ munii tiɛ̃
1 #
Kiin2 24.1; KZS2 36.5-7; Dan 1.1-2 Zoziasi a nɛgiĩ Zozakimu a kiibaa lɛ̀ siibaa ǹ wɔ li Zudaa gána nɛ, Dɛnaa Lawa boo da Zeremii ni á pɛ nɛ: 2«Kanna kəni, sɛ́wɔ munii saa, ki lɛa. Ma boo mɛn tumaa da n nɛ Izirayeli gána a paǹ li, Zudaa gána nɛ ka gána kɔsɔn dɔn nɛ, a kũ Zoziasi a waáraa ganaa a da pelo yaa, n bɛn tumaa kiɛ̃ la. 3Kɔntan, Zudaa minin tá re a woo ǹ bǎã yii mà man die koe boe ǹ ganaa. Kɔntan, didie á re a giã ǹ gɔn baraa kiɛ, màn mɛn bɛ́ toɛ ma ǹ sii baraa laanka ǹ giã ǹ gɔn baraa toa ǹ nɛ.» 4Zeremii lɛ dia Neriya a nɛgiĩ Baruku la, Dɛnaa Lawa boo mɛn tumaa da nɛ, á ǹ pɛ, Baruku kiɛ̃ sɛ́wɔ munii lɛ la, ki lɛa.
5Zeremii tɔn zii kɔ Baruku la á pɛ kɛnɛn: «Ma dinmaa a boe la ma wo Lawa a kion wa. 6Sɛnɛ, lɛ sɔɔ kɛa pinaa, nsɛ wo Lawa a kion, ma Lawa a boon mɛnɛn pɛ n nɛ n nə́ ǹ kiɛ̃, n nə ǹ pɛ ka lɛn gole ne zaman yɔrɔ-a ka min mɛn tumaa bɛ́ re goɛ̃ Lawa a kion lɛ nɛ, ǹ nə́ bɔ Zudaa kiwin ni. 7Kɔntan, ǹ tumaa á re Dɛnaa Lawa nyankoe ka ǹ we ne, didie na a sii baraan kaa. A giala, Dɛnaa Lawa pɛ mà asɛ a foo yoo lɛ asɛ a zaman lɛ paǹ li, mà á gole á la yii ni.» 8Zeremii boo mɛn tumaa pɛ Neriya a nɛgiĩ Baruku ni, Baruku ná a tumaa zɛnaa á kɔnpɛ. Á woo Lawa a kion, màn mɛn bɛ́ toɛ, Dɛnaa Lawa a boo bɛ́ kiɛ̃ nɛ sɛ́wɔ munii mɛn lɛ la, a bɛ pɛ.
9Zoziasi a nɛgiĩ Zozakimu a kiibaa lɛ̀ soorobaa ǹ wɔ li Zudaa gána mìi la, a mui manangɔrɔbaa ǹ wɔ li, ǹ nə́ lɛawaa bɔ lɛ sɔɔ lɛawaa lɛa Dɛnaa Lawa yɔrɔ-a. Zeruzalɛmu minin tumaa goã ǹ tan ka min mɛn tumaa bɔ Zudaa kiwin ni ǹ nə́ daa Zeruzalɛmu. 10Baruku Zeremii a boon lɛn pɛ sɛ́wɔ munii lɛ la ka lɛn gole ne Lawa a kion lɛ nɛ zaman tumaa yɔrɔ-a. A na á n toa sɛ́wɔ-kiɛ̃li Safan a nɛgiĩ Gemariya a kion nɛ kɛ nɛ á sɛ́wɔ lɛ pɛ: Bɛa kion nɛ lɛ n Lawa a kion a sumu dii kɛ nɛ, kunu kiɛnlɛ dii kɛ ganaa.
11Gemariya a nɛgiĩ, Safan a nɔ̀ɔn Mikaa Dɛnaa Lawa a boo lɛ ma Baruku pɛ sɛ́wɔ minii lɛ la. 12Bɛ kio, á kiɛ̃ á woo kii a kion, yǎa sɛ́wɔ-kiɛ̃li li. Á woo yaa kii a dí-nyali dadaran tumaa nə́ n lɛ sɔkɔn. Sɛ́wɔ-kiɛ̃li Elisamaa goã a tan, Semayia a nɛgiĩ Delazaa nɛ, Akibɔɔrɔ a nɛgiĩ Ɛlnaatan nɛ, Safan a nɛgiĩ Gemariya nɛ, Anania a nɛgiĩ Sedekiasi ni ka kii a dí-nyali gialakun tumaa nɛ. 13Mikaa boo mɛn tumaa ma bɛ̀ Baruku bɛ́ sɛ́wɔ munii lɛ pii ka lɛn gole ne zaman tumaa yɔrɔ-a, á kɔ bɛn lɛ á pɛ ǹ nɛ. 14Kii a dí-nyali dadaran lɛn nə́ tɔn Yewudi dia, ke Kuusi a nɔ̀ɔn fulupaa lɛa, Selemia a nɔ̀ɔn lɛa, Netania a nɛgiĩ lɛa, mà a wo pɛ Baruku ni, a daa, mà a sɛ́wɔ munii mɛn lɛ pɛ zaman lɛ yɔrɔ-a, mà a da ka bɛ dɔ nɛ a gɔn. Neriya a nɛgiĩ Baruku sɛ́wɔ munii lɛ saa, á daa ǹ li. 15Ǹ nə́ pɛ nɛ: «Bǐɛ̃ kɔ n giã tán, n sɛ́wɔ munii lɛ pɛ wɔ nɛ!» Baruku bɔ á mɛ a pɛ la. 16A ǹ toa n too koe, nyɛ́ɛ kii a dí-nyali dadaran lɛn kũ. Ǹ nə́ ga kɔn ganaa, ǹ nə́ pɛ Baruku ni: «Yǎa wɔ kɛ tumaa kalɛɛ kii ni.» 17Ǹ nə́ tɔn nɔ̀n da Baruku la mà a na á saa lɔn á kɛ tumaa kiɛ̃, mà Zeremii na á ǹ pɛ nɛ? 18Baruku pɛ ǹ nɛ, mà hiĩ, mà Zeremii na á ǹ pɛ, asɛ nə́ ǹ kiɛ̃ ka kaã nɛ sɛ́wɔ munii la. 19Kii a dí-nyali dadaran lɛn nə́ tɔn pɛ Baruku ni, mà a wo n duru, a laanka Zeremii ni, ǹ nyan toa min nə ǹ duru ǹ bǎã yɛ wa. 20Kii a dí-nyali dadaran nə́ sɛ́wɔ munii lɛ toa sɛ́wɔ-kiɛ̃li Elisamaa a dí nya ǹ kion. Bɛ kio, ǹ nə́ kiɛ̃ ǹ nə́ woo kii li kii kion a sumu-n. Sii mɛn tumaa nə n zɛnaa, ǹ na a tumaa pɛ nɛ.
21Kii tɔn Yewudi dia mà a wo sɛ́wɔ munii lɛ saa. Á woo saa Elisamaa a dí nya ǹ kion, á bɔ á mɛ la á n pii ka lɛn gole ne kii yɔrɔ-a ka a dí-nyali dadaran nɛ, ǹ mɛnɛn bɛ kun ni walan. 22Lɛ̀ a mui manangɔrɔbaa ǹ wɔ nɛ, kion mɛn bɛ́ ǹ nə́ dɔ nyan waáraa wɔ lɛa, kii na á goã walan n gɔ̀nɔn wɛɛ̃ tɛ ganaa. 23Bɛ̀ Yewudi sɛ́wɔ lɛ a paǹ mɛn pɛ á nya, kii lɛ n bɛ kukuri ka gɔya boɛɛn nɛ a zũ tɛ-n. A zɛnaa miɛ̃ yǎa sɛ́wɔ munii lɛ nya lenlen. 24Sɛnɛ, kii laanka a gána nyɛɛnaandɛnan nə́ boo lɛ tumaa giala ma. Sɛnɛ a nyɛ́ɛ goon din da ǹ ganaa wa, ǹ foo ziziɛ̃ boɛɛn dinin wa. 25A da yaa, Ɛlnaatan nɛ, Delazaa nɛ, ka Gemariya nɛ, bɛn nə kii lɛ nyankɔ mà a nyan sɛ́wɔ munii lɛ tã wa. Sɛnɛ, a n too kɔ ǹ lon wa. 26Á zii kɔ a nɛgiĩ Zerameyeli la, Azireyeli a nɛgiĩ Seraya nɛ, ka Abdeyeli a nɛgiĩ Selemia nɛ mà ǹ sɛ́wɔ-kiɛ̃li Baruku kũ ka Lawa a boo gii-dali Zeremii ni. Sɛnɛ, Dɛnaa Lawa nə́ ǹ koa tamaa-n bǎã sonbore ne.
27Kii bɛa sɛ́wɔ munii lɛ tã ka Zeremii a boon lɛn nɛ Baruku kiɛ̃ ǹ la. Bɛ kio, Dɛnaa Lawa boo da Zeremii ni á pɛ: 28– Sɛ́wɔ munii kɔsɔ saa, n sɛ́wɔ munii bibinaa lɛ a boon kiɛ̃ la, Zudaan kii Zozakimu nə ǹ mɛn lɛ tã. 29N tá re pii Zudaan kii Zozakimu ni mà Dɛnaa Lawa n kɛ pii: «Zeremii goã á kiɛ̃ mà sàabaa ba la wa mà Baabiloniin kii á re die gána kɛ ziziɛ̃, a na a minbuiin nɛn laanka a tɔɔn dɛ. N nə́ n Zeremii zɛ̀rɛbaa ka bɛ lɛ nɛ, n tɛ da sɛ́wɔ munii lɛ ganaa.» 30Kanna kəni, Dɛnaa Lawa n kɛ pii Zudaan kii Zozakimu a paǹ li: «Davida a gána nɛ, Zozakimu a sumu min kɔn ba re yii a kio, a giã pàã la wa. Bɛ̀ á gã, a gere á re goɛ̃ tán sɛ̀fuu li, ka tèlò a nyan nɛ. 31Ma á re yui a gialaa, a nɛnyaanan nɛ, ka a nɔ̀ɔnɔn nɛ. Ma á re yui a gána nyɛɛnaandɛnan dɔn gialaa. Ma á re ǹ sãn lɛn dɔlɔ boe ǹ ganaa. Ma koen mɛnɛn boo da ǹ nɛ ǹ nə́ ǹ golee li wa, man die bɛn lɛn diɛ ǹ mìi ni, Zeruzalɛmu minin ni ka Zudaa minin ni.» 32Zeremii sɛ́wɔ munii kɔsɔ saa, á kɔ Neriya a nɛgiĩ sɛ́wɔ-kiɛ̃li Baruku la. Zeremii goã boon mɛnɛn pii ni, á bɛn kiɛ̃ la: Sɛ́wɔ munii bibinaa kɛa boon manɛ Zudaan kii Zozakimu nə́ ǹ tã, ka a kɔnboe kɔsɔn dɔn nɛ.
اکنون انتخاب شده:
Zer 36: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.