Zer 20
20
Zeremii n kòso ne
1Imɛɛrɛ a nɛgiĩ Pasewuru ke Lawa a wúlu-bɔle lɛa, bɛ na á goã goledɛnaa lɛa Lawa a kion. Á Zeremii lɛ ma bɛa boon lɛn diɛ ka Dɛnaa Lawa tɔ nɛ. 2Á Lawa a boo gii-dali Zeremii lɛ dɛ, ǹ nə́ kũ ǹ nə́ yii bìbì ganaa Lawa a kion a wɔ ǹ kiɛnlɛ-a, lon a lɛ̀gɔn la, ǹ bɛ́ ǹ mɛn bíi mà Bɛnzamɛn tɔrɔn kiɛnlɛ. 3A lɛawaa, Pasewuru Zeremii fore, á bɔ bìbì lɛ ganaa. Zeremii pɛ nɛ: «Dɛnaa Lawa ba re n bíi Pasewuru doo wa, bɛ giala mà "gɛ̀rɛsiɛdɛnaa n bǎã tumaa nɛ" sɛnɛ, a n die n bíi "nyɛ́ɛ n bǎã tumaa nɛ".» 4Bɛ lɛ nɛ, Dɛnaa Lawa a da ǹ boo á ke: «Ma á re nyɛ́ɛ kiɛ ka ganaa, n laanka n giaáran nɛ. Ǹ tá re mɛnɛɛ ǹ zɔ́ɔn gɔya sa nyɛɛnɛ, ǹ gã n din yɔrɔ-a. Man die Zudaa min tumaa we Baabiloniin kii gɔn. Á re ǹ goɛ a wo ǹ ne a gána nɛ, a ǹ dɛ ka gɔya sa nɛ. 5Zeruzalɛmu a naforon tumaa nɛ, a dí nya á màn mɛn tumaa yɛ, a màn giɔ̀mɔ kakan nɛ, ka Zudaan kiin naforon ne, man die bɛ yii we ǹ zɔ́ɔn gɔn, ǹ kokoo, ǹ goa ǹ wo ǹ ne *Baabilonii gána nɛ. 6Nsɛ Pasewuru, n laanka min mɛn tumaa bɛ́ kion kun, ǹ tá re ka goɛ. Bɛ̀ n dɔ Baabilonii, n tá re giɛ̃. Ǹ tá re n biĩ walan, kun ka n giaáran kɛn tumaa nɛ, ń Lawa a boo gii-dali soɛ-bɔle baa ǹ nɛ.»
Zeremii na a foo busii pii Lawa nɛ
7Dɛnaa Lawa, ń ma sã,
má toa ń ma sã.
N pàã zɛnaa ma nɛ,
ń boo ma la.
Lɛawaa tumaa gɔ́ɔ̃ nɛ,
minin man yaa we ma ganaa,
min tumaa n ma foo siɛ.
8Bɛ̀ ma á boo diɛ lɔn,
paraa nɛ,
man «dɔlɔ laanka ziziɛ̃» boo diɛ.
Hiĩ, lɛawaa tumaa gɔ̀ɔ̃ nɛ,
Dɛnaa Lawa a boo taman yii,
minin man sɔ kiɛ ma la,
ǹ nə́ ma foo siɛ.
9Má taasɛ ma gɔ́ɔ̃ nɛ,
máa ma a re n taasɛ Dɛnaa Lawa
n doo wa,
máa ma a re a boo diɛ ka a tɔ-n
doo wa.
Sɛnɛ, ma gɔ́ɔ̃ nɛ,
a boo lɛ n ka tɛ bɛ lɔn ma kuĩ.
Ma nə n din nɔmɛɛ máa ma pàã
yɛ ma la bɛa tɛ lɛ nɛ,
sɛnɛ ma a boe la wa.
10Má boo baraa gigiã ma minin lɛ-n.
Maǹ pii: «Nyɛ́ɛ n bǎã tumaa nɛ.»
Ǹ tɛnɛn dɔn man pii:
«Ka a giala da kanaa.»
Maa giaáran dinin man giɛ
maa mɛnaa li.
Maǹ pii: «Kɔntan, wɔ á re tɔwɛɛ,
wɔ pàã la nɛ,
wɔ wɔa gɛ̀ dòo bɔ a ganaa!»
11Sɛnɛ, Dɛnaa Lawa n kun ka ma nɛ.
A n zia biɛ ka pàã gole ne maa lɛa.
Min mɛnɛn bɛ́ boe ma yii ni,
bɛn tá re boe ǹ mɛnaa.
Ǹ ba re boe sii kɔn la ǹ zɛnaa
ma-n wa.
Sìi á re n koe ǹ lɛ,
a giala, ǹ pàã dɔ ma li wa.
Ǹ sìi lɛ n die goɛ̃ miɛ̃ yǎa duduu.
Ǹ kɔn yiri a re boe-n wa.
12Sɛnɛ, nsɛ Dɛnaa Lawa Pàãyiidɛnaa,
kiri pepere wɔle,
n nə n min tumaa gɔ́ɔ̃gɔ́ɔ̃ ǹ
taasiɛn doɛ̃.
N bɛ́ re maa gɛ̀ dòo boe lɔn,
ma á re bɛ yii,
a giala, man ma sii we n din gɔn.
13Ka loe lɔ ka Dɛnaa Lawa tɔ bɔ nɛ,
a giala, a n doobaa gɔsiɛ
a bɔ min baraan gɔn.
14 #
Zɔb 3.1-19
Áh! Lɛn baraa bíi maa yɛ pinaa kũ!
Maa náa ma yɛ á ma da kanaa
ǹ mɛn pinaa,
min kɔn nyan boo bǐɛ̃ da bɛa
lɛawaa lɛ a paǹ li wa!
15Min mɛn boo kɛ pɛ maa díi ni:
«n lɔ nɛginin yɛ,»
á a foo kɔɔ̃n kɔ,
lɛn baraa bíi bɛa dɛnaa kũ!
16Bɛa dɛnaa nə n baa ka kiwi mɛn
nə́ ke
Dɛnaa Lawa ziziɛ̃,
a makara ná a kũ wa.
Baayɛlɛ woo baayɛlɛ,
ginii lɛ n boe a nɛ,
penleen, ziabaa ǹ lɛ-dɛ nɛ!
17Bɛ̀ Dɛnaa Lawa na á toa dinin
má gã ma dan gɔ́ɔ̃ nɛ!
Ma dan gɔ́ɔ̃ maa yala baa goon lɛa.
Ma goã walan yǎa duduu.
18Bɛ̀ nɔmaa laanka foo ziziɛ̃
ka sìi á lɛa nɛ baraabaraa
maa yiikoonaabaa gɔ́ɔ̃ nɛ,
maa yɛ mìi-n ka wàa nɛ?
اکنون انتخاب شده:
Zer 20: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.