Zer 19
19
Donkolon yui
1Dɛnaa Lawa a da ǹ boo á ke á pɛ Zeremii ni: – Wo dɔn-bɔlin piɛ, n donkolon pii. Bɛ kio, n minin bɔ min golen laanka Lawa a wúlu-bɔlen bii. 2#Kiin2 23.10; Zer 7.30-32; 32.34-35 Bɔ kiɛnlɛ kɛ nɛ ǹ nə́ bíi "dɔnɔn kiɛnlɛ", n wo Inɔn nyankɔrɔ lɛ kɛ nɛ. Ma bɛ́ re boon mɛnɛn pii n ni, n lɛ dɛ ǹ nɛ walan. 3A pɛ kɛnɛn: «Zudaan kii laanka Zeruzalɛmu minin, ka n too kɔ Dɛnaa Lawa a boon li. Dɛnaa Lawa Pàãyiidɛnaa, Izirayeli a Lawa a boo á ke: Man die koe gole boe bǎã kɛ ganaa. Min mɛnɛn bɛ́ re a boo miɛ, nyɛ́ɛ gole á re bɛn kuĩ. 4A giala, Zudaa minin nə́ n la bɔ ma ganaa. Ǹ dinin lɛa nɛ, bǎã kɛ ba n doɛ̃ doo wa. Bɛa lawa tiin kɛn, ǹ nə́ ǹ ba ǹ doɛ̃ wa, ǹ dinin ni, ǹ digolon ne ka Zudaa kiin ni, maǹ nə́ *wúlu mànan kɔ bɛn la walan. Ǹ nə́ yii tì-an mà kaa walan. 5#LWS 18.21 Ǹ nə́ *wúlu bɔ ǹ bǎã dɔ dì *Baali wɔ lɛa. Maǹ nə ǹ nɛnyaanan tiɛ̃ wúlu màn lɛa walan. A da yaa, ma bɛa zii kɔ ǹ la wa, a taasiɛ dɔ bin da ma yiri-n wa.»
6Bɛ lɛ nɛ, ǹ kɔn pinaa, ǹ ba re bǎã kɛ bíi doo "Tofɛti hinlaa Inɔn" wa. Sɛnɛ maǹ die bíi "dɔlɔ bɔ ǹ nyankɔrɔ basa". Dɛnaa Lawa a da ǹ boo ne. 7Man die Zudaa laanka Zeruzalɛmu a sii yɔrɔ bɔn ziziɛ̃ bɛa nyankɔrɔ basa lɛ nɛ. Man die toɛ ǹ zɔ́ɔn nə ǹ minin dɛ zia la. Min mɛnɛn bɛ́ zoɛ̃ ǹ gɛ̀ li, man die yui ǹ gialaa ka bɛn lɛn nɛ. Man die ǹ geren koe Zèwon laanka tolokan la màn-bii lɛa. 8Man die Zeruzalɛmu biɛ nyɛ́ɛ da ǹ kiwi lɛa, yaa da ǹ màn lɛa. A ziziɛ̃ a la yii-n kɛ á die tɔwaa biɛ kiɛ̃ wolen tumaa ganaa. 9Zɔ́ɔn mɛnɛn bɛ́ zoɛ̃ ǹ gɛ̀ li, bɛn tá re kiwi lɛ lɛnpɛnɛ, ǹ yoo ǹ gialaa. Nɔmaa baraa taman yii, ǹ tá re ǹ nɛgiĩn laanka ǹ nɛlɔn siĩ soɛ̃, ǹ dinin dɔn nə kɔn siĩ sɔ̃.
10Bɛ kio, min mɛnɛn bɛ́ kunun n ni, n donkolon lɛ yu bɛn yɔrɔ-a. 11N pɛ ǹ nɛ: «Dɛnaa Lawa Pàãyiidɛnaa a da ǹ boo á ke: Man die zaman kɛ laanka kiwi kɛ yui ka ǹ bɛ́ gì-bɔle a donkolon yui lɔn, a ná a ba n zɛnɛɛ doɛ̃ doo wa.
Maǹ die ǹ geren biĩ Tofɛti dinin, a giala, bǎã ba re yii wɔlɔ kɔsɔ-n wa. 12Man die kiwi kɛ laanka a minin biɛ Tofɛti#19.12 Ka ga zii 7.31-33 ganaa. a kɔnboe lɛa, Dɛnaa Lawa a da ǹ boo ne. 13Ǹ tá re *gɔ̀ diɛ Zeruzalɛmu a kionən ganaa ka Zudaa a kii kionən ne ka Tofɛti bɛ́ lɔn. Sonbore, bɛa kionən lɛn kalan la, maǹ nə́ da yon gìĩ kɔɔ̃n tã lon a leere kurun wɔ lɛa, ǹ nə́ duvɛ̃ zumii wúlu màn lɛa lawa tiin la.»
14Bɛ kio, Zeremii nə́ n bɔyaa á daa Tofɛti, a goã á Dɛnaa Lawa a boo gii da bǎã mɛn lɛ nɛ. Á woo Lawa a kion a sumu-n, á boo da zaman lɛ nɛ á pɛ: 15– Dɛnaa Lawa Pàãyiidɛnaa, Izirayeli a Lawa a da ǹ boo á ke: «Ma dɔlɔn mɛnɛn boo da kiwi kɛ wɔ paǹ li ka a lɛkoro-a kiwin ni, man die yui ǹ gialaa ka bɛn nɛ. A giala, kiwi minin lɛn mìi n laa nɛ. Maǹ nə n piɛ̃ ǹ ba n too koe maa da ǹ boon li wa.»
اکنون انتخاب شده:
Zer 19: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.