Iza 19
19
Ezipti gána minin gɔn waa manɛ
1 #
Zer 46.2-26; Eze 29.1–32.32 Ezipti a boo gii.
Dɛnaa Lawa á ke die,
a n woe Ezipti gána nɛ,
labara yiifuunaan la.
Ezipti gána a dì kooron
kɛn man bìn diɛ a nyɛɛnɛ.
Ezipti minin foo ziziɛ̃maa nɛ.
2Dɛnaa Lawa pɛ:
«Man die Ezipti minin
yii soe kɔn ganaa,
ǹ kɔn dɛ,
dɔɔ̃n laanka dɔɔ̃n,
giaára laanka giaára,
kiwi laanka kiwi,
gána laanka gána.
3Ezipti minin foo á re ziziɛ̃.
Ǹ sii yɔrɔ bɔn kɛn,
ma á re bɛn lɔloɛkɔn.
Ǹ tá re woe n lɛ koɛ dìn li,
dagòãdɛnan nɛ,
nyín-biilin ni ka wɔ-kulin ni.
4Man die Ezipti we
mìinaa kakaarɛ gɔn.
Kii pàã-zɛnaali á re giɛ̃ a mìi la.»
Dɛnaa Lawa Pàãyiidɛnaa
a da ǹ boo ne.
5Yìsi mu á re damɛ
Niili tà mu á re piɛ̃,
a gɔ́ɔ̃ laa.
6Tà gòãn mɛnɛn bɛ́ n boe
a ganaa,
ǹ mu ba re n mii wa.
Ezipti a tà bɔnboɛɛnɛn
mu á re gisĩ, ǹ piɛ̃.
Tà gɔ́ɔ̃ buu laanka
bùruu á re bɛbɛnɛ.
7Niili tà bɛ n toe kɔnlɛ ka yìsi
mu gole-n bǎã mɛn nɛ,
ka a lɛkoro lɛ-a buu ni,
màn mɛn tumaa bɛ́ ǹ nə́ da
a lɛkoro lɛ-a
ǹ tumaa á re laɛ.
Piɛ̃ á re ǹ goɛ,
a ná a màn kɔn toɛ wa.
8Zɔ̀-kũli tumaa á re gini.
Min mɛn tumaa bɛ́ zɔ̀ kuĩ
Niili tà li,
bɛn tumaa á re wuu pii.
Min mɛnɛn tumaa bɛ́ zɔ̀ɔ zuĩ mu li,
bɛn tumaa pàã á re nyɛɛ.
9Min mɛnɛn bɛ́ gɛ̀sɛ sonbore tiɛ̃,
min mɛnɛn bɛ́ koara miɛ̃,
sìi á re bɛn kuĩ.
10Kɔ̀rɔ-tãlin pàã nya,
dí-nyali mɛn tumaa a màn-bii
bɛ́ boe bɛa dí lɛ nɛ,
bɛn foo ziziɛ̃.
11Soan kiwi a kiãn man
gàãnaan lɛa.
Min mɛnɛn bɛ́ yiri koe
Eziptin kii la,
baãnaan manɛ.
Maǹ pii-n kɛnɛn:
«Man yiridɛnaa goon a nɛ lɛa,
lɛlɛ kiin nɛ n ka ma nɛ.»
Wàa nə n diɛ bɛa pɛ ganaa?
12Eziptin kii,
n yiri kɔmala wolen lɛn maa?
Dɛnaa Lawa Pàãyiidɛnaa
sii mɛn yɔrɔ bɔ
n gána a paǹ li,
ǹ bɛ lɛ pɛ n nɛ.
Ǹ bɛ nyaa kəni.
13Gàãn na á yoo Soan kiwi a kiãn li.
Mɛmifisi kiwi a kiãn man siɛ̃.
Ǹ tanlɛn kiãn man Ezipti gána diɛ zii baraa la.
14Dɛnaa Lawa na á ǹ yiri lɔlɔkɔn.
Sonbore,
bɛa kiãn lɛn man Ezipti yiri siɛ̃
a zɛnaa ǹ sii tumaa nɛ.
Ezipti na á kɔnbɔ ka yɔdɛnaa nɛ
n lɔloɛ a pisəə ne.
15Min kɔn ba sii zɛnɛɛ Ezipti gána a wo nyɛɛnɛ taman yii wa: Kiãn hinlaa kialandɛnan bie wa, pàãman hinlaa doobaan bie wa.
Ezipti gána a biɛ̃ ǹ
16Ǹ kɔn pinaa, bɛ̀ Dɛnaa Lawa Pàãyiidɛnaa yoo Ezipti minin gialaa, maǹ die goɛ̃ ka lɔn bɛ́ lɔn, nyɛ́ɛ nə́ ǹ ganaa. Bɛ̀ á n gɔn pepere ǹ li ǹ mɛn pinaa, ǹ gɔ̀nɔn tá re bìn diɛ nyɛ́ɛ gɔn. 17Zudaa gána á re Ezipti minin sìi biɛ. Bɛ̀ min Zudaa gána boo da ǹ yɔrɔ-a, nyɛ́ɛ á re ǹ kuĩ sii kɛ taman yii Dɛnaa Lawa Pàãyiidɛnaa ná a yɔrɔ bɔ ǹ wɔ paǹ li.
18Ǹ kɔn pinaa, Ezipti gána nɛ, *Ebrəə bɔlɔ n die n pii kiwi sooro ne. Bɛa kiwin lɛn minin man die n liɛ mà ǹsɛn man Dɛnaa Lawa Pàãyiidɛnaa wɔn lɛa. Bɛa kiwin lɛn bii, ǹ goon tɔ n die goɛ̃ "Wasa a kiwi". 19Bɛa pinaa lɛ nɛ, Ezipti gána bii, *wúlu bɔ ǹ bǎã laanka kɔlɔ zumii n die yii Dɛnaa Lawa wɔ lɛa, kunu Ezipti gèlè ganaa. 20Bɛ n die sii a kɔnboe biɛ, a n siére lɛa, nyɛɛ mà Dɛnaa Lawa Pàãyiidɛnaa tan Ezipti gána nɛ. Bɛ̀ Ezipti minin nə́ n lɛ dɛ Dɛnaa Lawa ganaa mɛnaa ma la wolen kɛn taman yii, Dɛnaa Lawa á re kirisibaali diɛ ǹ la, a ǹ si a ǹ kaa. 21Bɛa pinaa Dɛnaa Lawa á re n din nyɛɛ Ezipti minin manɛ. Ezipti minin dɔn tá re Dɛnaa Lawa dɔ doɛ̃. Ǹ tá re dí nyɛɛ nɛ, ǹ wúlu mànan laanka gɔn mànan kɔ la. Ǹ tá re lɛ kɔ we Dɛnaa Lawa nɛ, ǹ nà a lɛ pã. 22Dɛnaa Lawa á re Ezipti minin dii. Á re ǹ dii a wusoo a ǹ kaka kɔ. Ǹ tá re wusii ǹ da Dɛnaa Lawa li. Á re ǹ nyankɔ sii, a wusoo a ǹ kaka kɔ. 23Bɛa pinaa kɛ lɛ nɛ, zii á re boe Ezipti gána nɛ a wo Asiirii. Asiirii minin tá re woe Ezipti gána nɛ, Ezipti minin dɔn nə wo Asiirii gána nɛ. Ǹ dinin tumaa á re dí nyɛɛ Dɛnaa Lawa nɛ. 24Bɛa pinaa lɛ nɛ, Dɛnaa Lawa á re barka diɛ gána sɔɔ kɛ ganaa: Izirayeli ni, Ezipti ni ka Asiirii gána nɛ. Barka á re n diɛ kanaa tumaa ganaa ǹsɛn taman yii. 25Dɛnaa Lawa Pàãyiidɛnaa n die barka diɛ ǹ ganaa a pɛ: «Man barka diɛ maa zaman Ezipti ganaa, ka Asiirii mɛn bɛ́ má zɛnaa ka ma gɔn nɛ, ka Izirayeli gána kɛ nɛ maa wɔ lɛa.»
اکنون انتخاب شده:
Iza 19: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.