SGK 37
37
Zozɛfu boo
(37.1–50.26)
Zozɛfu a narɛɛn
1Zakɔba giã Kanaan gána nɛ, ǹ di goã á woo giã gána mɛn lɛ nɛ. 2Zakɔba a nɛnyaanan boo n ka kɛ nɛ.
A nɛ Zozɛfu lɛ̀ fulusɔbaa nɛ, á goã sèren laanka bòen lɛduĩ, ka ǹ di a lɔ Biilaa laanka Zilpaa a nɛnyaanan nɛ. Bɛn nɛnyaanan lɛn nə́ goã ǹ piɛ̃ bɔ ǹ boon mɛnɛn diɛ, a n goɛ̃ bɛ̀ a da bɛn pɛ ǹ di Zakɔba nɛ.
3Zakɔba na á goã Zozɛfu narɛ á la a nɛnyaanan gialakunun kɛn manɛ, a giala, a zizi-kɔ gɔ́ɔ̃-n nɛ á yɛ. Á dɔnkɛ sɛsia sonbore nimi á kɔ la. 4Ǹ golon lɛn nə́ yɛ, mà Zozɛfu sii a kɔɔ̃nɛ ǹsɛn di lɛ ganaa, á la ǹsɛn tumaa nɛ. Ǹ golon lɛn nə́ da ǹ gɔ́ɔ̃ nɛ, ǹ boo la ǹ nə́ boo da-n doo ka bɔlɔ bǐɛ̃-n wa.
5Ǹ kɔn pinaa, Zozɛfu nə́ n narɛ, á bɛa narɛɛ lɛ laakalaa ǹ golon lɛn manɛ. Bɛ́ wusoo a ná a tìĩ bɔ ǹ nyin ni doo, á la lɛlɛ wɔ kɛ nɛ. 6Á pɛ ǹ nɛ. «Ma narɛɛ mɛn wɔ, ka n too kɔ li. 7Ma n má n narɛ, ka wɔ ǹ *belee kuri, wɔ́ n yii gɔn sara yii kiɛ tán. Bǎã goon ne gɔrɔ, masɛ a gɔn sara yii yoo, á n tele á golee lon. Kaa gɔn sara yiin lɛn nə́ daa masɛ wɔ lɛ lɛnpɛnɛ, ǹ nə́ kaa tán a giulun.»
8Ǹ golon lɛn nə́ tɔ́n a lɛ si ǹ nə́ pɛ: «A nə n yiri ni, mà n nə ǹ die giɛ̃ wɔsɛn mìi la kii lɛa kən le?»
Bɛa narɛɛn lɛn taman yii, ka a bɛ́ boon mɛnɛn dɔn diɛ, a tìĩ wusoo á bɔ ǹ golon lɛn nyin ni doo, á la lɛlɛ wɔ nɛ.
9Bɛ kio, Zozɛfu wusoo á narɛɛ kɔsɔ wɔ doo, á bɛ dɔ laakalaa ǹ golon lɛn manɛ. Á pɛ ǹ nɛ: «Á ke. Man má n narɛ doo, ka wasa nɛ, ka mui laanka leere fulugoon ne, ǹ nə́ daa kaa tán ma giulun.»
10Á bɛa narɛɛ lɛ dɔ laakalaa ǹ di ni, ka a bɛ́ á pɛ ǹ golon lɛn man lɔn. Ǹ di yoo a gialaa, á paparaa li: «Wàa-n narɛɛ tɔrɔ n ka bɛ nɛ ń wɔ? A nə n gɔ́ɔ̃-n kəni, mà masɛ laanka n dan ka n golon kɛn tá re die kiɛ tán n giulun ǹ kɔ́n pinaa?»
11 #
NDS 7.9
Ǹ golon lɛn nə́ baa zɔ́ɔ, sɛnɛ, ǹ di lɛ bɛa sii lɛ koa a yiri ni.
Zozɛfu siɛ̃
12Ǹ golon lɛn nə́ woo ǹ di lɛ a tɔɔn lɛduə̃ Sisɛmu kiwi. 13Ǹ kɔn pinaa, Zakɔba lɛ dia Zozɛfu la. Zozɛfu ná a lɛ si mà asɛ á ke.
Ǹ di lɛ tɔ́n pɛ nɛ: «Ń golon lɛn tá tɔɔn li Sisɛmu. 14Woo n nə ǹ yɛ, bɛ̀ ǹ giã ǹ gɔn tá siĩni, bɛ̀ tɔɔn lɛn dɔn tá yɔrɔ mɛn la, n da pɛ ma nɛ.»
Ǹ di lɛ na á n toa Ebrɔn a nyankɔrɔ basa kɛ nɛ, á dia. Zozɛfu bɛ́ á dɔ Sisɛmu, 15giĩ goon kaa lɛ, bɛ̀ a bɛ́ n bibiĩ don. Bɛ́ nɔ̀n da la mà a n giɛ wàa li?
16Zozɛfu ná a lɛ si mà asɛ n giɛ ǹ golon li. Ǹ bɛ́ ǹ tɔɔn lɛn lɛduĩ maa, mà a bǐɛ̃ kɔ, a bɛa bǎã lɛ nyaa asɛ nɛ.
17Giĩ lɛ tɔ́n pɛ nɛ: «Ǹ nə́ woo ǹ nə́ n bɔ kànaa. Má ǹ lɛ ma pii, mà ǹ daa ǹsɛn nə n ta Dotan kiwi.»
Zozɛfu nə́ ǹ golon lɛn basa bɔ, á woo ǹ yaa Dotan. 18Sɛnɛ, ǹ golon lɛn nə́ toa sɔsɔɔ, ǹ nə́ yɛ. A laan bɛ̀ a dɔ ǹ li, ǹ nə́ n lɛ kaa kun, mà ǹ daa ǹ dɛ a gã. 19Ǹ nə́ pɛ kɔn nɛ: «Haya! Narɛɛn-wɔle lɛ á ke die. 20Ka daa wɔ dɔ a ganaa wɔ dɛ, wɔ a gere saa, wɔ zũ nyankɔrɔ kɛ goon ne. Bɛ̀ wɔ dɔ piɛ, wɔ á re pii, wáa don màn babaraa na á kũ. Bɛ̀ a narɛɛn lɛn man die n biɛ lɔn kəni, wɔ á re yii.»
21Urubɛn nə́ ǹ boo lɛ ma, á ga Zozɛfu kanbaa ǹ gɔn li ǹ ganaa. Á tɔ́n pɛ ǹ nɛ: «Wɔ baran a nyin bɔ wa. 22Wɔ baran gɛ̀ dɛ wa. Ka kũ wɔ zũ nyankɔrɔ gole kɛ-n don, ka baran dɛ wa.»
Urubɛn na á bɛ pɛ, màn mɛn bɛ́ toɛ, a Zozɛfu kanbaa ǹ ganaa, a wo kɔ ǹ di la.
23Zozɛfu bɛ́ á dɔ ǹ golon lɛn li lɔn gɔrɔ, ǹ ná a mɔnaa sɛsia sonbore lɛ sɔlɔ, ǹ nə́ bɔ a ganaa, 24ǹ nə́ kũ ǹ nə́ zũ nyankɔrɔ zuzulu lɛ nɛ. Nyankɔrɔ lɛ gɔ́ɔ̃ kooromaa na á goã, mu goã a-n wa. 25Bɛ kio, ǹ nə́ giã tán, ǹ nə́ màn bii. Ǹ bɛ́ ǹ nə́ n mìi saa lon, ǹ nə́ nyɔɔmaadɛnan yɛ boe Galaati gána-n die. Isimayeli tɔrɔn manɛ. Da gón gìĩ kɔɔ̃n nə́ ǹ nyɔɔmaan lɛn la, ǹ tá woe-n Ezipti gána nɛ. 26Zudaa tɔ́n pɛ ǹ dinɛn lɛn manɛ: «A là n ka wàa nɛ wɔ ganaa, wɔ wɔ diɛ̃ lɛ dɛ, wɔ a gere duru? 27Ka daa wɔ sã Isimayeli tɔrɔn kɛn la. Wɔ baran dɛ wa, a giala, wɔ dinin diɛ̃ nɛ, wɔ n mà goon.»
Ǹ dinɛn lɛn ná a boo si. 28#NDS 7.9 Madiã minin pii-kɔlen bɛ́ kiɛ̃ walan, bɛn nə́ Zozɛfu bɔ, ǹ nə́ bɔ nyankɔrɔ zuzulu lɛ nɛ, ǹ nə́ sã Isimayeli tɔrɔn la, ǹ dinin wɔrɔ we fuə, bɛn nə́ woo-n Ezipti gána nɛ.
29Urubɛn bɛ́ á n bɔyaa, á daa nyankɔrɔ lɛ lɛ-a, a Zozɛfu yɛ a gɔ́ɔ̃-n doo wa. A foo busiimaa, a ná a din a mɔnaan kũ á ǹ toɛ̃. 30Á n bɔyaa á woo ǹ dinɛn lɛn li, á pɛ ǹ nɛ: «He, nɛ lɛ banban doo wa! Man die n doe maa kəni?»
31Ǹ nə́ Zozɛfu a dɔnkɛ lɛ saa, ǹ nə́ butumu goon bɔlɔ kuru, ǹ nə́ sã bɛa mà li. 32Bɛ kio, ǹ nə́ min dia ka dɔnkɛ lɛ nɛ ǹ díi lɛ li, mà a pɛ-n kɛnɛn: «Wɔ n wɔ kɛ yɛ. N nɛgiĩ lɛ a dɔnkɛ lɛ nɛ, hinlaa asɛ bie wa, ga a ganaa.»
33Zakɔba dɔ̃ mà a din ni, á tɔ́n pɛ: «He, masɛ a nɛgiĩ a dɔnkɛ n ke! Don màn babaraa na á Zozɛfu nana kɔn á sɔ̃.»
34Zakɔba ná a din a wɔ ǹ mɔnaa kũ á toɛ̃, á gɛ̀ koa ǹ mànan wɔ a din ganaa, a ná a nɛgiĩ lɛ a gɛ̀ wuu pɛ, lɛawaa damata gɔ́ɔ̃ nɛ. 35A nɛgiĩ gialakunun laanka a nɛlɔn bɛ́, ǹ nə́ daa ǹ mɛn waáraa, mà maǹ a lɛ tiɛ̃, á n piã. A na á goã pii: «Yǎa masɛ yɔrɔ kɔsiɛmaa woe, maa nɛgiĩ lɛ yiɛ geren piɛ.» Ǹ di lɛ na a gɛ̀ wuu pɛ miɛ̃.
36Madiã minin lɛn nə́ woo ka Zozɛfu-n Ezipti gána nɛ. Ǹ nə́ sã bɛn kii *Faarahɔn a sɔmɔ-lɛduə̃lin goledɛnaa Potifaara la, bɛ n pàãdɛnaa gole kɔ́n lɛa.
اکنون انتخاب شده:
SGK 37: SBPE2011
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.