Eze 43
43
Lawa a gugurubaa wusoo á daa
1Bɛ kio kəni, kiɛnlɛ mɛn bɛ́ dia-n lɛ̀giala gɔn la, giĩ lɛ ma kũ á woo ma-n walan. 2#Eze 10.3,4,18,19; 11.22,23; SNS 1.15 Á ke, ma bɛ́ giɛ, bɛ̀ Izirayeli a Lawa a gugurubaa á ke á n toa lɛ̀giala li, á n die. A wuu na á goã boe ka mu gole wuu bɛ́ lɔn, a tɛ-pɛ kanaa tumaa fúlu. 3Ma yii màn mɛn yɛ bɛa biikoo li, a n ka màn kɛ nɛ má goã má yɛ, bɛ̀ Lawa bɛ́ re die kiwi lɛ yui, a n ka màn kɛ dɔ nɛ má yɛ, bɛ̀ ma bɛ́ Kebaara tà kɛ lɛ-a. Bɛa biikoo li, má na má kaa tán ma lɛ la. 4Kiɛnlɛ mɛn yɔrɔ bɛ́ dia-n lɛ̀giala la, Dɛnaa Lawa a gugurubaa bɔ ka bɛ nɛ, á wusoo á wɔ kion lɛ nɛ. 5Lawa yiri tɔ́n ma saa á woo ka ma nɛ sumu gɔ́ɔ̃ kɛ nɛ. Má yɛ, bɛ̀ Dɛnaa Lawa a gugurubaa á ke á kion lɛ pã. 6Má tɔ́n min lɛ ma n toɛ kion lɛ gɔ́ɔ̃ li boo diɛ ma nɛ. Bɛ á zɛnɛɛ, bɛ̀ giĩ lɛ á golee-n ma li. 7Á tɔ́n n toa ma ganaa: «Minbuiin a nɛ ganaa, bǎã kɛ lɛ n masɛ a kii dankan laanka maa gòãn kaa ǹ bǎã lɛa. Man die giɛ̃ Izirayeli minin lɛn bii walan, yǎa duduu.
Izirayeli tɔrɔn lɛn ba re ma tɔ sonbore kɛ ziziɛ̃ doo ka ǹ dì wúlu bɔn laanka ǹ kiin kɛn gere bĩ walan nɛ wa. 8A giala, maǹ nə́ ǹ wɔ ǹ kiɛnlɛn bɔ masɛ a wɔ ǹ kiɛnlɛn genli. Kungɔn goon dinsɔɔ̃ n maa kion lɛ laanka ǹ wɔ lɛ bii. Ka bɛ nɛ ǹ nə́ sii bɔbɔnɛɛn zɛnaa, ǹ nə́ ma tɔ kɛ ziziɛ̃ nɛ. Bɛ lɛ na á toa ma foo yoo ǹ li, má ǹ dɛ lenlen. 9Sisia kəni, ǹ tá re ǹ dì guguru kɔ kɛ lɛ diɛ, ǹ ba re n mɔrɛ maa bǎã kɛ ganaa, ka ǹ kiin kɛn gere-n doo wa. Bɛ lɛ n die toɛ ma giã ǹ bii yǎa duduu.
10Minbuiin a nɛ, kion lɛ bɛ́ re n doe lɔn, bɛ yɔrɔ pɛ Izirayeli tɔrɔn lɛn manɛ, màn mɛn bɛ́ toɛ ǹ sii baraa zɛnaa kɛ lɛ sìi da ǹ ganaa, ǹ ga kion lɛ nyín ganaa. 11Bɛ̀ ǹ zɛnaa ǹ siin lɛn tumaa sìi da ǹ ganaa, bɛa biikoo li, n maa kion lɛ nyín nyaa ǹ nɛ, a gɔ́ɔ̃ nə n kukuru kɔn lɔn, wɔ ǹ bǎãn laanka soo ǹ bǎãn nɛ, kion lɛ a dɔ ǹ gɔn tumaa. Kion lɛ a kɔnboe kiɛ̃ nyín lɛa n nyaa ǹ nɛ, màn mɛn bɛ́ toɛ, landan laanka sii zɛnaa ǹ gɔnɔn mɛnɛn tumaa nə n koa kion lɛ wɔ paǹ li, ǹ boo la ǹ bɛn tamaa, ǹ kɔ ǹ lɛ. 12Dí mɛn nə n pɛ kion lɛ wɔ paǹ li, bɛ n ka kɛ nɛ: Bǎã mɛn tumaa bɛ́ kion lɛ lɛnpɛnɛ kele lɛ mìi ni, ǹ dɔ̃ mà bɛ tumaa n Lawa dinsɔɔ̃ wɔ lɛa.»
Wúlu bɔ ǹ bǎã
13 #
BBN 27.1-2; KZS2 4.1 Ǹ nə́ *wúlu bɔ ǹ bǎã kɛ zɔɔ̃. A zɔɔ̃ ǹ màn lɛ na á goã gùrù yii goon ka gɔn tìsì yii goon. Ǹ nyankɔrɔ mɛn fɔ̃ ǹ nə́ wúlu bɔ ǹ bǎã lɛ lɛnpɛnɛ nɛ, bɛa zuzulubaa na á goã gùrù yii goon. A gɔ́ɔ̃ a golebaa dɔ na á goã gùrù yii goon. Ǹ màn mɛn dɔ a lɛgon li ǹ ná a lɛnpɛnɛ nɛ, bɛ la a wo lon na á goã gùrù yii talɛɛ. Wúlu bɔ ǹ bǎã lɛ la a wo lon nə́ ke: 14A saa a giala ganaa tán, a wo dɔ kìri-diɛ kɛ ganaa bii, bɛ n gùrù yii paa. Bɛa kìri-diɛ lɛ a gɔ́ɔ̃ a golebaa n gùrù yii goon. A saa bii a wo dɔ lon wɔ kɛ ganaa, bɛ n gùrù yii sii. Lon wɔ a kìri-diɛ lɛ dɔ gɔ́ɔ̃ a golebaa n gùrù yii goon. 15Wúlu bɔ ǹ bǎã lɛ a lon bǎã ke kùsì ná a nɛ, bɛa la a wo lon nə gùrù yii sii, kara màn sii na a tan, kara goon gùrù gogoonmaa lalan. 16Wúlu bɔ ǹ bǎã lɛ a lon wɔlɔ a sasabaa na á goã gùrù yii fulupaa, a gɔ́ɔ̃ dɔ a golebaa na á goã gùrù yii fulupaa. A wàã sii lɛ tumaa a sasabaa na á goã goon. 17A kìri-diɛ paabaa ǹ wɔ kɛ dɔ na á goã wàã sii zɛnɛ kɔnlɛ lɛa. A gogoonmaa na á goã gùrù yii fulusii. Ǹ màn mɛn dɔ a lɛgon li ǹ ná a lɛnpɛnɛ nɛ, bɛ la a wo lon nə gùrù yii talɛɛ. Ǹ yala mɛn fɔ̃ ǹ ná a lɛnpɛnɛ nɛ, bɛa zuzulubaa n gùrù yii goon. A dii ǹ banbaranan kɛn man dia-n lɛ̀giala gɔn la.
18 #
BBN 29.35-37
Giĩ lɛ tɔ́n pɛ ma-n kɛnɛn: – Minbuiin a nɛ, masɛ Dɛnaa Lawa a da ǹ boo á ke: «Bɛ̀ ǹ nə́ wúlu bɔ ǹ bǎã lɛ dɔ ǹ nə́ nya ǹ mɛn pinaa, ǹ bɛ́ re *wúlu màn tiɛ̃ la ǹ tɔɔ mà kaa la, landan mɛnɛn bɛ́ ǹ tan wúlu bɔ ǹ bǎã lɛ wɔ paǹ li, bɛn man ka kɛn nɛ: 19Levii tɔrɔ wúlu-bɔlen kɛn Sadɔki tɔrɔn lɛa, ǹ mɛnɛn lɛn bɛ́ n mɔrɛ Dɛnaa Lawa ganaa bɛ̀ ǹ dí nya nɛ, n die n dii gɔ̀lɔ̀ goon kɔ bɛn la, ǹ dɛ sii baraa sawaa ǹ wúlu màn lɛa. Ma din Dɛnaa Lawa a da ǹ boo ne. 20N die n dii gɔ̀lɔ̀ lɛ mà saa, n lɔ wúlu bɔ ǹ bǎã lɛ a kara sii lɛ ganaa, n lɔ a kìri-diɛ paabaa ǹ wɔ kɛa gùrù sii ganaa, ka màn kɛ dɔ nɛ ǹ nə́ dɔ a lɛgon li, ǹ ná a lɛnpɛnɛ nɛ. A zɛnaa miɛ̃ n *gɔ̀ bɔ wúlu bɔ ǹ bǎã lɛ ganaa, n koa Lawa nɛ. 21Bɛ kio, n wúlu bɔ ka dii gɔ̀lɔ̀ mɛn lɛ nɛ, bǎã mɛn nə n koa a siĩ tã ǹ bǎã lɛa, n wo a siĩ lɛ tã walan, Lawa a kion lɛ kio.
22A lɛawaa paabaa ǹ wɔ pinaa, n die n ga butumu li, wɔ̀lɔ̀ ná a ba a ganaa wa. Ǹ die ǹ sii baraa sawaa ǹ wúlu bɔ ka bɛ nɛ wúlu bɔ ǹ bǎã lɛ lalan, ǹ na a *yoreen kɔ ka ǹ bɛ́ ǹ nə́ zɛnaa ka dii gɔ̀lɔ̀ lɛ-n lɔn. 23Bɛ̀ ń wúlu lɛ bɔ n nya, n wusoo n ga dii gɔ̀lɔ̀ goon li ka sère gɔ̀lɔ̀ goon ne tɔɔn bii, wɔ̀lɔ̀ ná a ba ǹ ganaa wa, 24n da bɛn kɔ masɛ Dɛnaa Lawa la. Ǹ wúlu-bɔlen lɛn die ǹ yìsi kaa bɛn ganaa, ǹ tɔn nə ǹ tã lenlen, Dɛnaa Lawa wɔ lɛa. 25N die n butumu goon dɛ baraabaraa sii baraa sawaa ǹ wúlu màn lɛa, yǎa lɛawaa sɔbaa, ka dii gɔ̀lɔ̀ goon laanka sère gɔ̀lɔ̀ goon mɛn dɔ bɛ́ wɔ̀lɔ̀ ná a ba ǹ ganaa tɔɔn bii wa. 26Lɛawaa sɔbaa gɔ́ɔ̃ nɛ, ǹ wúlu bɔ ǹ bǎã lɛ a gɔ̀ bɔma-a ǹ sii zɛnaa, ǹ na a yoreen kɔ, ǹ kɔ Lawa la. 27Bɛ̀ bɛa lɛawaan lɛn nə́ kiɛ̃, a saa a lɛawaa kiwisibaa ǹ wɔ ganaa a woo kəni, Lawa a wúlu-bɔlen lɛn tá boe la, ǹ wúlu màn tiɛ̃ laanka barka da Lawa nɛ ǹ wúlu mànan sii yɔrɔ bɔ wúlu bɔ ǹ bǎã lɛ lalan. Bɛa biikoo li kəni, ma á re n too koe ǹ lon. Ma din Dɛnaa Lawa a da ǹ boo ne.»
اکنون انتخاب شده:
Eze 43: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.