Eze 26
26
Boo mɛn nə n da Tiiri kiwi wɔ paǹ li
1 #
Iza 23.1-18; Zow 3.4-8; Amɔ 1.9-10; Zak 9.1-4; Mat 11.21-22; Luk 10.13-14 Izirayeli minin goa lɛ a lɛ̀ fulugoonbaa ǹ wɔ a lɛawaa bibinaa pinaa, Dɛnaa Lawa boo da ma nɛ á pɛ: 2– Minbuiin a nɛ, Tiiri minin kɛn man yaa we Zeruzalɛmu ganaa kaakaakaa! Ǹ nə́ pii: Kiwi kɛ lɛ, min tumaa goã die a nɛ, a wɔ sàabaa! Kiwi lɛ yu, wɔsɛn dɔn man die pàãma biɛ kɛ gòã wuu li. 3Bɛ lɛ na á toa, masɛ Dɛnaa Lawa á kɛ pii:
Nsɛ Tiiri kiwi lɛ,
ma á die n gialaa.
Man die tɔrɔ kɔsɔn yiɛ gigiã,
ma ǹ kaa n ganaa,
ka mu tii bɛ́ lɔn.
4Ǹ tá re Tiiri a kungɔnɔn kɛn ziziɛ̃,
ǹ tá re a sanabolon kɛn wurii.
Ma á re a tán tii gasiɛ̃,
yǎa a woe doe a gɛ̀fu ganaa.
5Tiiri kiwi á re goɛ̃ yìsi mu bii.
Á re zɔ̀-kùlin zɔ̀ɔ nyɔmaa ǹ bǎã biɛ.
Tɔrɔ kɔsɔn tá re a mànan goɛ,
ma din Dɛnaa Lawa n má pɛ,
ma din a da ǹ boo ne.
6A lɛkoro lɛ-a kiwin kɛn
yìsi mu lɛkoro-a,
ǹ tá re bɛn dii zia la.
Ǹ tá re doɛ̃ bɛa waáraa kəni,
mà ma din nə Dɛnaa Lawa lɛa.
7Masɛ Dɛnaa Lawa n kɛ pii: «Kii gole Nebukadenezɔɔrɔ ke Baabiloniin kii lɛa, ma á re boe ka bɛ nɛ gɔsɛ a lɛ̀gɔn la, ma da nɛ Tiiri kiwi kɛ gialaa. Ma á re die ka sùin ni, ziabaa ǹ wotoron ne, sùi da-baalin ni, ka zia-baali damata nɛ.
8N lɛkoro lɛ-a kiwin kɛn
yìsi mu lɛkoro-a,
kii lɛ á re bɛn dii lenlen.
Á re nyankɔrɔn fɔfoɛ̃,
á re bèlèn doe,
á re kungɔn doe,
a giã bɛ kio goóro lɛa,
bɛ̀ a kuu kɔ n ganaa.
9Á re n kungɔnɔn kɛn didii
ka a ziabaa ǹ mànan nɛ,
á re n sanabolon kɛn wurii
ka a sukunun ni.
10A sùin lɛn gigiãbaa taman yii,
á re gusuũ goɛ a kɔ n lɛ.
Zia-baalin kɛn laanka
ziabaa ǹ wotoron ne,
bɛn gòã wuu á re bìn diɛ
n kungɔnɔn kɛn ganaa,
a giala, maǹ die we n kiwi lɛ nɛ,
Ka zia-baalin bɛ́ kiɛ̃ ǹ bǎã
boe kungɔn ganaa lɔn,
bɛ̀ ǹ tɔn wɔ kiwi.
11Ǹ tá re boe n bǎãn tumaa nɛ
ka ǹ sùin kɛn nɛ,
ǹ tá re n minin kɛn dii ka gɔya sa nɛ,
n tíĩn mɛnɛn bɛ́ n pàã lɛa,
bɛn tá re kiɛ tán.
12Ǹ tá re n naforo kɛ goɛ,
ǹ tá re n pii mànan kɛn kokoe.
Ǹ tá re n kungɔnɔn kɛn dii
ǹ nə ǹ kaa,
ǹ tá re n kion sonboren kɛn wurii.
N dɔn kɔlɔn nɛ,
ǹ gɔnɔn nɛ ka a tii ni,
ǹ tá re bɛn zuĩ mu giala-n.
13 #
SNS 18.22
Ma á re n kurii n loen kɛn
lɔ ganaa,
n tùtun kɛn wuu á re boe doo wa.
14Ma á re n bɔyɛɛ ma n baa
gɛ̀fu kooro lɛa,
n tá re zɔ̀-kũlin zɔ̀ɔ nyɔmaa ǹ
bǎã biɛ,
kiwi lɛ a re n doe doo duduu wa.
A giala, ma din Dɛnaa Lawa-n
má pɛ,
ma din Dɛnaa Lawa a da ǹ boo ne.
15Masɛ Dɛnaa Lawa n kɛ pii
Tiiri kiwi kɛ nɛ:
Bɛ̀ ǹ tá n minin kɛn dii
ǹ mɛn waáraa,
tà lɛ-a minin kɛn ǹ wɔlɔ n sɔsɔɔ,
bɛn gɔ̀nɔn tá re bìn diɛ kiwi
lɛ a mɛnaa wuu
laanka a bɔlɔkan ginii taman yii.
16 #
SNS 18.9-10
Tɔrɔn mɛnɛn bɛ́ yìsi mu lɛ-a,
bɛn goledɛnan tumaa á re gisĩ
ǹ nə n bɔ ǹ kii dankanan la,
ǹ tá re ǹ dɔnkɛ dadaran wɛɛ,
ǹ nə ǹ mɔnaa sɛsian kɛn sɔlɔ,
ǹ nə ǹ bɔ ǹ dinin ganaa.
Nyɛ́ɛ á re ǹ kuĩ.
Ǹ tá re giɛ̃ tán-a,
ǹ gɔ̀nɔn nə́ bìn diɛ duduu.
N sii lɛ á re nyɛ́ɛ diɛ ǹ ganaa.
17Ǹ tá re gɛ̀ loe loe n la,
ǹ kɛ pɛ n wɔ paǹ li:
Yìsi mu lɛ-a minin kiwi lɛ,
kiwi sonbore lɛ,
a na á saa lɔn ń papaã?
N laanka n minin pàã na á goã
ka yìsi mu kɛ nɛ,
Ma nə n goã nyɛ́ɛ diɛ
min tumaa ganaa.
18Sisia kəni, tɔrɔn mɛnɛn bɛ́
yìsi mu lɛ-a,
bɛn gɔ̀nɔn nə́ ke bìn diɛ n mɛnaa
lɛ taman yii,
nyɛ́ɛ yìsi mu lɛ-a minin kɛn kũ
n papaã lɛ taman yii.
19A giala, masɛ Dɛnaa Lawa n kɛ pii:
Man die n biɛ kɛbɔlɔ lɛa,
goon ka kiwi-soen kɛn nɛ,
ma yìsi mu kɛ da yoo ganaa,
a da kɔ n lɛ.
20Bɛa biikoo li,
lɛlɛ minin kɛn yala-n,
ma á re n diɛ kun ka bɛn nɛ.
Ma á re tán giulun kɛ biɛ n giã ǹ
bǎã lɛa.
Min mɛnɛn bɛ́ yala-n,
n tá re goɛ̃ kun ka bɛn nɛ,
n nə n baa ka kɛbɔlɔ zizi á ke lɔn,
màn mɛn bɛ́ toɛ,
min din baran giã n nɛ doo wa,
n nyan bǎã yɛ yiikoonaan kanaa
kɛ-n doo wa.
21 #
SNS 18.21
Ma á re toɛ n sii nyɛ́ɛ da
minin ganaa,
n dinmaa dɔ wɔlɔ ná a banban.
Minin tá re giɛ n li ǹ fɔ̃,
ǹ nə́ ǹ ba re n yii doo duduu wa.
Ma din Dɛnaa Lawa a da ǹ boo ne.»
اکنون انتخاب شده:
Eze 26: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.