Eze 25
25
Boo mɛn nə n da Amɔn tɔrɔn wɔ paǹ li
1 #
Zer 49.1-6; Eze 21.28-32; Amɔ 1.13-15; Sof 2.8-11 Dɛnaa Lawa boo da ma nɛ á pɛ: 2– Minbuiin a nɛ, n yɔrɔ dia Amɔn tɔrɔn kɛn la, n maa boo kɛ da ǹ wɔ paǹ li. 3A pɛ Amɔn tɔrɔn lɛn manɛ, mà ǹ nə n too kɔ masɛ Dɛnaa Lawa a boo kɛ li. Masɛ Dɛnaa Lawa n kɛ pii: «Zɔ́ɔn bɛ́ ǹ nə́ maa kion sonbore lɛ ziziɛ̃ ǹ mɛn waáraa, ǹ nə́ basaã kɔ Izirayeli gána kɛ nɛ, ǹ nə́ ǹ goa ǹ nə́ woo ǹ ne gána kɔsɔ nɛ, táa ka n ka yaa wɔ? 4Bǐɛ̃ kɔ! Ma á re toɛ lɛ̀giala gána minin kɛn nə kaa bǎã lɛ si, ǹ baa ǹ wɔ lɛa. Ǹ tá re ǹ mɔnaa zìãn doɛ kaa bǎã kɛ lɛ nɛ, ǹ giã a nɛ. Ǹ dinin lɛn man die kaa tán-kɔsiɛ mànan bii, ǹ kaa tɔɔn nyɔ bɔɔ̃, ǹ mi. 5Kaa kiwi gole Rabaa ke, ma á re bɛ biɛ nyɔɔmaan buu sɔ̃ ǹ bǎã lɛa, ma kaa Amɔn tɔrɔn gána lɛ din baa sèren kaa ǹ bǎã lɛa. Ka á re doɛ̃ bɛa waáraa kəni, mà masɛ din nə Dɛnaa Lawa lɛa.»
6Masɛ Dɛnaa Lawa gole a da ǹ boo á ke: «Sii mɛn Izirayeli gána yɛ, ka n ká foo kɔɔ̃nbaa gole yɛ bɛ gɔ́ɔ̃ nɛ, ká n gɔn dɛ, ká bɛ̀ baa, ká ǹ puusə kɔ á la yii ni. 7Ka bɛ mɛn zɛnaa ke, ma á re yui ka gialaa, ma ka wɔ tɔrɔ kɔsɔn gɔn, bɛn nə ka gɔn mànan kũ ǹ nə ǹ si ka la. Ma á re ka wɛɛ ma ka bɔ tɔrɔn bii, ma ka dɛ lenlen, ma kaa gána kɛ papaã. Ka á re doɛ̃ ka bɛ-n kəni, mà masɛ din nə Dɛnaa Lawa lɛa.»
Boo mɛn nə n da Moabu tɔrɔn wɔ paǹ li
8 #
Iza 15.1–16.14; 25.10-12; Zer 48.1-47; Amɔ 2.1-3; Sof 2.8-11 Masɛ Dɛnaa Lawa gole a da ǹ boo á ke: Moabu minin laanka Seyiiri minin man pii: «Zudaa minin dɔn nə́ ke, ǹ nə́ n baa ka tɔrɔ kɔsɔn kɛn tumaa bɛ́ lɔn.» 9Bɛa boo kɛ lɛ taman yii, kiwin mɛnɛn lɛn nə́ ke zɔ́ɔn kurii Moabu kiwi a wɔ ganaa, ma á re bɛa kiwin lɛn tumaa wɛɛ ma ǹ bɔ ǹ nyɛɛnɛ, haalɛ gána lɛ a kiwi sonboren dɔn dinin: Bɛti Yesimɔti ni, Baali-Mewɔn nɛ ka Kiriyatimu ni. 10Bɛa kiwin lɛn tá re lɛ̀giala gána minin kɛn wɔ biɛ, ka Amɔn tɔrɔn gána kɛ bɛ́ á ǹ wɔ baa lɔn. Ma din ni má kɔ ǹ la ǹ wɔ lɛa, min din yiri á die gisĩ Amɔn tɔrɔn gána kɛ nɛ tɔrɔn bii wa. 11Ma á re dɔlɔ diɛ Moabu minin kɛn mìi ni. Ǹ tá re doɛ̃ bɛa biikoo li kəni, mà masɛ din nə Dɛnaa Lawa lɛa.
Boo mɛn nə n da Edɔmu minin wɔ paǹ li
12 #
Iza 34.5-17; 63.1-6; Zer 49.7-22; Eze 35.1-15; Amɔ 1.11-12; Abd 1-14; Mal 1.2-5 Masɛ Dɛnaa Lawa gole a da ǹ boo á ke: – Edɔmu minin nə́ gɛ̀ dòo babaraa bɔ Zudaa minin ganaa. Bɛa gɛ̀ dòo kɛ lɛ ǹ nə́ bɔ ǹ ganaa, maǹ nə́ zɛ̀rɛ da ǹ dinin mìi ni. Ǹ sii mɛn zɛnaa, 13bɛ lɛ taman yii ni masɛ Dɛnaa Lawa á kɛ pii: «Man die yui Edɔmu gána kɛ gialaa. Ma á re a minin laanka a tɔɔn dii lenlen, ma ǹ bɔ a nɛ. Ma á re bɛa bǎã lɛ biɛ kɛbɔlɔ lɛa, a saa Teman kiwi ganaa, a wo yǎa Dedan kiwi, ǹ tá re ǹ minin dii zia la. 14Ma á re a gɛ̀ dòo bɔ sii we ma din a minin Izirayeli tɔrɔn kɛn gɔn, ǹ maa gɛ̀ dòo bɔ Edɔmu minin kɛn ganaa. Ma bɛ́ sii mɛn zɛnɛɛ maa foo-yoo laanka maa foo-busii gɔ́ɔ̃ nɛ, ǹ tá re bɛ miã zɛnɛɛ, Edɔmu minin lɛn manɛ. Bɛa biikoo li kəni, ǹ tá re ma gɔn lɛ yii. Ma din Dɛnaa Lawa a da ǹ boo ne.»
Boo mɛn nə n da Filisiti minin wɔ paǹ li
15 #
Iza 14.29-31; Zer 47.1-7; Zow 4.4-8; Amɔ 1.6-8; Sof 2.4-7; Zak 9.5-7 Masɛ Dɛnaa Lawa bɛ́ màn mɛn pii, bɛ n ka kɛ nɛ: – Filisiti minin man nə́ sii zɛnaa, ǹ nə́ ǹ gɛ̀ dòo bɔ nɛ. Ǹ min puusə kɔ ǹ sii gole mɛn zɛnaa ǹ nə́ ǹ gɛ̀ dòo bɔ nɛ, basaã-kɔ dinsɔɔ̃ a lɛa, lɛlɛ a zɔ́ɔbaa taman yii, 16masɛ Dɛnaa Lawa gole n kɛ pii: «Ma á re yui Filisiti minin lɛn gialaa. Ma min mɛnɛn tumaa bɔ Kafutɔɔrɔ ǹ nə́ daa giã yìsi mu kɛ lɛkoro-a, ma á re bɛn tumaa dii lenlen. 17Ma á re gɛ̀ dòo baraa boe ǹ ganaa, ma dɔlɔ gole da ǹ mìi ni. Bɛ̀ má maa gɛ̀ dòo lɛ bɔ ǹ ganaa ǹ mɛn waáraa, ǹ tá re doɛ̃ bɛa biikoo li kəni, mà ma din nə Dɛnaa Lawa lɛa.»
اکنون انتخاب شده:
Eze 25: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.