BLS 9
9
Sii a min yɛ boo
1Ma màn mɛn tumaa yɛ,
má tɔ́n nə n yii wɔ bɛ nɛ,
má ga a ganaa.
Má yɛ, máa min peperen ne,
sii-dɔ̃lin ni, ǹ nya ǹ dín ni,
maǹ Lawa gɔn.
Lawa n die n yɔrɔ bǐɛ̃ diɛ minbuiin nɛ la,
hinlaa a na a die n yɔrɔ bǐɛ̃ diɛ la wa,
min ba bɛ doɛ̃ wa.
Min ba boe la a bɛ kɔn toa nyɛɛnɛ a dɔ̃ wa.
2A din sii goon nə min tumaa yii.
A din sii goon nə min pepere laanka min baraa yii.
Min mɛn bɛ́ wúlu boe,
a n bɛ yii,
min mɛn bɛ́ a wúlu boe wa,
a n bɛ dɔ yii.
A n min bǐɛ̃ yii,
ka sii baraa-zɛnaali dɔ nɛ.
Min mɛn bɛ́ n liɛ,
a n bɛ yii,
min mɛn bɛ́ a n liɛ wa,
a n bɛ dɔ yii.
3A din sii goon a min tumaa yɛ ke,
ǹ nə́ giɛ̃,
bɛ n sii kaka lɛa, siin kɛn bii,
n zɛnɛɛ kanaa.
Bɛ lɛ dɔ nɛ,
minbuiin nɛn foo pã ka sii baraa nɛ.
A ǹ toa ǹ yii n koo,
gàãnaabaa nə ǹ ganaa.
Bɛ kio,
ǹ gɔn nyɔmɔɔ ǹ bǎã n geren li.
4Sɛnɛ, min mɛnɛn tumaa yii bɛ́ koo,
foo-doa tá bɛn lon.
A giala,
doobaa yiikoonaa á soɛ pàãma gere ne.
5Sonbore,
yiikoonaan tá doɛ̃ mà ǹsɛn tá re giɛ̃.
Sɛnɛ, geren ba màn kɔn doɛ̃ duduu wa.
Ǹ ba n yii diɛ màn kɔn la doo wa.
A giala, yiri bɔ ǹ nɛ.
6Ǹ kɔn-narɛɛ nɛ,
ǹ baa zɔ́ɔbaa nɛ,
ǹ foo a wuu pɛ nɛ,
bɛn nə́ nya gɔrɔ.
Màn mɛn din tumaa bɛ́ n zɛnɛɛ kanaa kɛ nɛ,
ǹ ba re,
ǹ wɔ gii yii bɛ-n doo duduu wa.
Nyɛnyɛɛ kanaa boo
7Bɛ lɛ n kaa, màn bii ka nyɛnyɛɛ nɛ.
N duvɛ̃ mi ka foo kɔɔ̃nbaa nɛ,
a giala Lawa lɛ kɔ n nya ǹ dín ganaa gɔrɔ.
8Nyaǹ bɔ ǹ mɔnaan wɔ biikoo yii li,
n nə n nyɛnyɛɛ sɔnbɔraanɛ.
9N yiikoonaabaa lɛawaan kɛn lɛn mìi ná a ba la wa,
Lawa nə́ ǹ kɔ n la kanaa,
bɛn tumaa gɔ́ɔ̃ nɛ,
n bɛ́ lɔ mɛn narɛ,
toa n nə n dùũ bɔ kanaa kun ka bɛ nɛ.
A giala,
n wɔ gii n ka bɛ lɛ nɛ,
dí kɛ gɔ́ɔ̃ nɛ n tá nyɛɛ kanaa.
10N bɛ́ re dí mɛn tumaa nyɛɛ,
bɛ kũ ka n foo ne.
A giala,
n bɛ́ re woe bǎã mɛn nɛ,
geren piɛ lɛ,
dí ba walan wa,
taasiɛ banban wa,
doɛ̃ laanka sii-doɛ̃ banban wa.
11Má yɛ doo kanaa kɛ nɛ:
min mɛnɛn bɛ́ ǹ baa si miã banban wa,
baa-si a gɔ̀lɔ̀baa bie bɛn wɔ lɛa,
biikoo tumaa li wa.
Min mɛnɛn bɛ́ ǹ kakabaa miã banban wa,
zia a gɔ̀lɔ̀baa bie bɛn wɔ lɛa,
biikoo tumaa li wa.
Min mɛnɛn bɛ́ ǹ sii-doɛ̃ miã banban wa,
lɛ-a ǹ bii yɛ bie bɛn wɔ lɛa,
biikoo tumaa li wa.
Min mɛnɛn bɛ́ ǹ yiri miã banban wa,
naforo bie bɛn wɔ lɛa,
biikoo tumaa li wa.
Min mɛnɛn bɛ́ ǹ doɛ̃ miã banban wa,
sii lɛ bie koo bɛn gɔn biikoo tumaa li wa.
A giala,
biikoo laanka sii tá parɛɛ ǹ tumaa ganaa.
12Sonbore,
minbuiin nɛ ba gɛ̀ a daa biikoo doɛ̃ wa.
Zɔ̀ kũ ǹ zɔ̀ɔ bɛ́ zɔ̀ kuĩ lɔn,
biɛ bɛ́ bàan kuĩ lɔn,
gɛ̀ lɛ dɔ n die minbuiin nɛ tɔwɛɛ miɛ̃.
A n die n diɛ la bǎã goon ne,
a yiri ná a ba li wa.
Doobaa a sii-doɛ̃ boo
13Sii-doɛ̃ wɔ paǹ li,
má n yiri kɔ sii kɔn li kanaa kɛ nɛ,
á sii gole lɛa ma yii li.
14Kiwi boɛɛn goon na á goã,
a zaman ba tɛ wa.
Kii gole goon na á daa kɔ lɛ á kũ,
á bǎãn tã a ganaa.
15Sɛnɛ, giĩ goon goã kiwi lɛ nɛ,
doobaa nɛ, sii-doɛ̃ ná a lon.
Bɛa giĩ lɛ kiwi lɛ si á da,
ka a sii-doɛ̃ nɛ.
Sɛnɛ, min kɔn nə n yiri koa ka bɛa giĩ doobaa kɛ lɛ-n wa.
16Má tɔ́n pɛ,
máa sii-doɛ̃ tá soɛ pàã nɛ.
Sɛnɛ, maǹ pàã boe doobaa a sii-doɛ̃ nɛ,
ǹ ba n too koe a lon wa.
17Ǹ tá n too koe sii-dɔ̃lin boo basiɛ̃n ganaa,
á la baãnaan nyɛɛnaandɛnaa a lɛ-dɛn manɛ.
18Sii-doɛ̃ tá soɛ ziabaa ǹ mànan manɛ.
Sɛnɛ baãnaa goon nə sii bǐɛ̃ gigiã ziziɛ̃.
اکنون انتخاب شده:
BLS 9: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.