आमोस 7
7
विनाशो रे तीन दर्शण टिड्डिया
1परमेशर यहोवा ए माखे एक दर्शण दखाया। मैं देखेया कि से देशो पाँदे टिड्डिया रा एक बड़ा चूण्ड पेजणे री त्यारी करने लगी रा था। ये तेबे ऊआ जेबे राजे रा इस्सा डोरूआ ते कटी चूकी रा था ओर खास फसल आऊणे वाल़ी थी। 2मेरे दर्शणो दे टिड्डिये काआ खाई ला। तेबे मैं बोलेया, “ओ परमेशर यहोवा, आसा खे माफ करी दे, नई तो आसे बची नि सकणे, कऊँकि इस्राएल बऊत छोटा ए।” 3इजी रे बारे दे परमेशर पछताया ओर तेसखे बोलेया, “ये जो तैं देखेया से पूरा नि ऊणा।”
आग
4फेर परमेशर यहोवा माखे एक ओर दर्शण दखाया। मैं देखेया कि से आपणे लोका खे आगी ते सजा देणे री त्यारी करने लगी रा। तेसे आगी समुद्र सुकाईते थे ओर सारे देशो खे राख करने लगी री थी। 5तेबे मैं बोलेया, “ओ परमेशर यहोवा, रूकी जा! नई तो याकूब#7:5 याकूब इस्राएली लोक बची नि सकणा, कऊँकि से बऊत छोटा ए।” 6इजी रे बारे दे परमेशर पछताया ओर तेसखे बोलेया, “ये जो तैं देखेया से पूरा नि ऊणा।”
साल़
7फेर परमेशरे माखे एक ओर दर्शण दखाया। से एकी दवाला गे खड़ी रा था। ये दवाल बिल्कुल सीदी बणी री थी, ऊबा ते लई की थालो तक। तिने एक साल़ पकड़ी राखी थी। 8तेबे परमेशरे माखे बोलेया, “ओ आमोस, ताखे क्या दिशणे लगी रा?” मैं बोलेया, “एक साल़।” तेबे परमेशरे बोलेया, “देख, मां आपणी इस्राएल प्रजा बीचे साल़ लगाणी। 9मां एबे सेयो नि छाडणे, इसहाको रिया ऊच्ची जगा उजाड़ ओर इस्राएलो रिया पवित्र जगा सुनसाण ऊई जाणिया ओर मां यारोबामो रे कराने पाँदे तलवार लई की अमला करना।”
आमोस ओर अमस्याह
10तेबे बेतेलो रे पुरोईत अमस्याहे इस्राएलो रे राजा यारोबामो गे सन्देसा पेजेया, “आमोसे इस्राएलो रे कराने बीचे तां साथे राजद्रोह करने री साजिश करी राखी, तेसरे सबी वचना देश नाश करी देणा।” 11आमोस ईंयाँ बोलोआ, “यारोबाम तलवारी साथे कायी देणा। ओर इस्राएलो रे लोक बन्दी बणाई की लई जाणे। सेयो तिना रिया जमीना ते दूर लई जाणे।” 12तेबे अमस्याहे आमोसो ते बोलेया, “ओ नबी, इस्राएलो तो निकल़ी जा! यहूदा देशो खे वापस चली जा। तेथी आपणा जीवन बिता। तेथी भविष्यबाणी करेया कर, 13पर बेतेल शईरो दे फेर कदी भविष्यबाणी नि करनी, कऊँकि ये राजे री पवित्र जगा ओर राजे रा शईर ए।”
14आमोसे अमस्याह खे बोलेया, “आऊँ ना तो भविष्यबक्ता था ओर ना भविष्यबक्ते रा पाऊ, आऊँ तो गायी-बल़दा खे चराणे वाल़ा ओर खजूरा रे डाल़ा री देखपाल़ करने वाल़ा ए।” 15पर परमेशरे माखे पेडा-बाकरिया ते पीछे-पीछे फिरने ते बुलाया ओर बोलेया, “जा मेरी इस्राएली प्रजा ते भविष्यबाणी कर।” 16इजी री खातर एबे तूँ परमेशरो रा वचन सुण, तूँ बोलेया, “इस्राएलो रे खलाफ भविष्यबाणी नि कर ओर इसहाको रे लोका रे खलाफ बार-बार उपदेश देणा बन्द कर।” 17इजी बजा ते परमेशर ईंयाँ बोलोआ कि तेरी लाड़ी शईरो दे वेश्या ऊई जाणी ओर तेरे माठे-बेटिया तलवारी साथे काई देणे ओर तेरी जमीन डोरी लगाई की बांडी देणी ओर तूँ आपू अशुद्ध देशो दे मरना। ओर इस्राएलो रे लोक बी आपणी जमीना ते दूर गुलामिया दे चली जाणे।
اکنون انتخاب شده:
आमोस 7: BGH
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
This work is licensed under Creative Commons Attribution-ShareAlike 4.0 License.