आमोस 6
6
इस्राएलो खे सजा मिलणा
1तुसा लोका खे लाणत ए! जो सिय्योनो रे पाह्ड़ो पाँदे इतणे निश्चिंत ए! तुसा लोका खे ये कितणा खतरनाक ऊणा जो सामरिया री पाह्ड़िया पाँदे बचे दे महसूस करोए! कऊँकि तुसा रा परोसा तिना पाँदे आ। तुसे सबी ते महान देशो रे जाणे-माणे दे लोक ए। इस्राएलो रे लोक मताद ओर सलाई रिया तँईं तुसा गे आओए। 2कलने शईरो खे जाई की देखो ओर तेथा ते हमात नाओं रे बड़े शईरो खे जाओ, तेबे पलिश्तिया रे गत शईरो खे जाओ। क्या सेयो इना राज्या ते खरे ए? क्या तिना रा देश तुसा रे देशो ते कुछ बड़ा ए? 3तुसे आऊणे वाल़ी मुसीबता रे हर बिचारो खे दूर करी देओए, पर तुसा रे काम सिर्फ न्याय रे दिनो खे नेड़े ल्याओए। 4तुसे आथी दाँदो रे माँजे पाँदे लेटोए ओर आपणे-आपणे बछौणे पाँदे पैर फैलायी की सओए ओर पेडा-बाकरिया बीचा ते मिन्टू ओर गवाईणी ते बाच्छू खाओए।
5तुसे आपणियां सारंगिया साथे गाणे गाओए। राजा दाऊदो जेड़े आपणे बजाणे वाल़े बाजेया खे बजांदे रओए। 6तुसे शराबो रे कटोरेया पाँदे कटोरे पियोए; ओर सबी ते बड़िया तेले की आपणे सिरो री माल़श कराओए! पर तुसा खे यूसुफो रे वंशो रे नाशो रा कोई दु:ख नि आ, 7इजी बजा ते एबे सेयो पईले गुलामिया दे जाणे। तुसे अच्छे खाणे रा मजा नि लई सकणे। तुसे एबे माँजे पाँदे नि लेटी सकणे।
8परमेशर यहोवा सख्ताईया साथे कसम खाई की ये बोलेया, “आऊँ इस्राएलो रे लोका ते नफरत करूँआ कऊँकि से बऊत कमण्डी ए; आऊँ तिना रे किलेया ते नफरत करूँआ। मां ये शईर सब किजी साथे जो इदे आ, तिना रे दुश्मणा रे कब्जे दे करी देणा।” 9जे केसी कअरो दे दस मर्द बचे दे रओगे, तेबे बी सेयो मरी जाणे। 10रिश्तेदार लाशा खे फूकणे खे आई सकोए। जे सेयो एड़ा करोए, तिना खे पईले सेयो लाशा कअरो ते बारे लई जाणिया पड़निया। सेयो तेती लूके दे केसी माणूंए ते पूछो, “क्या तुसा साथे कोई ओर बी आ?” जे ज्वाब आया, ना, तो रिश्तेदारो बोलणा, “चुप रओ! आसा खे यहोवे रे नाओं नि लणा चाईयो।” 11देखो, परमेशर यहोवे आज्ञा देणी ओर बड़े-बड़े मईल टुकड़े-टुकड़े कित्ते जाणे ओर छोटे कअरा रे छोटे-छोटे टुकड़ेया दे तोड़ी देणे। 12कोड़े पात्थरा वाल़ी जमीना पाँदे नि दौड़दे। लोक बल़दे की समुद्रो दे अल़ नि चलांदे। पर तुसे न्याय वाल़े बर्ताओ खे जईरो दे बदली ता दा ए। तुसे सई जीवनो रे नतीजे खे बुराईया दे बदली ता दा ए। 13तुसे एड़ी चीजा ते खुशी मनाओए जो बेकार ए ओर बोलोए, “आसे आपणी तागती ते करनईम शईर जीती राखेया ए।” 14इजी बजा ते सेना रे परमेशर यहोवे री ये बाणी ए, “ओ इस्राएलो रे लोको, देखो, मां तुसा रे खलाफ एक एड़ी जाति खड़ी करनी, जेसा तुसे हमातो री काट्टिया ते लई की अराबा री नदिया तक दबाणे।”
اکنون انتخاب شده:
आमोस 6: BGH
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
This work is licensed under Creative Commons Attribution-ShareAlike 4.0 License.