Galatia 6
6
“His-his let-let togu lomup o,” oluk mo’gulentesi wene
1Narilak norokhwi. At mesik wiak tagoma henil haguptik holuk e, at ai togolik ebabut heberlemagoluk, his Allah Arogun demat honogola oruak a’ge en heniak sakhosogoat esa’go werip o. Esa’go asogo worogwiam, his asogoat henebam ema no oluk, honu’gwarek henebabut heberlogo wolomup o. 2His-his henebam e’gin mesik oruak holuk, henebe lo’bok agaikhen en agaikhen let-let togu lomup o. Asogo togu lorogup ai pam en, wene Kristus en nenesa’go wusogo mo’gulnentesi a’ge anoat hegitsogo togu lorogup ai o. 3A’ge re, hat mesik honuk erlak welarat de,
“An ’gain o,” oluk, hede en epasu legen holuk e, hu’gwarek en lalise legen ai o. 4-5Henebe lo’bok honu’gwarek enat,
“An op taga legi a? Wiak taga legi a,” oluk, henebabut ’balhorlogulat e,
“Op taga legi o,” oluk, epagup holuk e, elit erlikhorlomubat o. Asogo a’geat de, nis togu lege a’ge ai, hundomok nonu’gwarek en u ai en e,
“Is logon togwi eba re, wiak. Ye, an taga legi nak e, logo yo,” oluk ogup no yo.
6Ye, at mesik en op wene mo’gulhentasuam, his henesa’go hologu legep a’ge en hena’ge op a’ge logon lerontogu lomubat o. 7At Allah lal-’balsogo mo’gulom no? Modok erlak o. A’ge re,
“Asogo mo’gulom elirat o,” oluk epagup holuk, honu’gwarek en lalhwerlagup o. Aphwami en di owi yu owi yorogwi a’ge, e’gen ai a’ge arat hurle agoam e, ebe daganogwi ai ’gela’ge, 8at sa en ebabut otogat welat tago holuk, ebabut ai pamat alemathorlouwa aiat o. A’ge re, at mesik sa en, Allah Arogun e’birek hwedik welat, at en a’ge tago a’ge holuk, Allah Arogun ai enat, elaluk modok welemagoluk obap pouwa ai o. 9Holuk e, nenanni erlak om erlakma enat op a’ge togu lomul holuk e, di a’ge yu a’ge yakhorloluk elit agoam, ebe daganogwi ai ’gela’ge, pobuk ologun pam ebe op a’ge horlul ai en e, nenebit om erlakma enat togu lomok o. 10Holuk e, nis o yogodak op wene tu elirat welege ya pam e, aphwami logon enebe ’berlegat lerontogularat de, logo ’gela’ge re, nenarilak nonorokhwi enede Kristus ebam he’berik oruak a’ge opsogo lerontogu lomok o.
Wene ologun ’balogo enesa’go weriselat,
hau warenebiselat, tegei wene
11Yogodak an nu’gwarek ne’gik enat pelal lok a’ge wokho hene’bek perakpou wegi ai, henil enak a’ge homup o! 12Is aphwami logon en e,
“Henagap hene’gerlimu a’ge ’balit o,” oluk, ningsogo mo’gulhontogwi a’ge ai, is aphwami logon en enil ontoluk e,
“Op togwi o,” oluk opou wagoluk togwi ai o. Yesus ebe e pam edikpoluk werigisa wene ano mo’gulontogwiam e, aphwami Yahudi a’ge en wiagabonobuano oluk, wene mu a’ge ningsogo mo’gulhontogwi ai o. 13Is ai wene Allah en nenesa’go weregei a’ge ano opsogo hologo wolom erlakma en e, onu’gwarek enagap ene’gerlimu a’ge ’balhorlogulat,
“His logon asogoat ’balhorlomup o,” oluk, onu’gwarek en erlikhorlogu lomogoluk ogwi ai. 14A’ge re, an di paget yu paget erlikhorlo modok nebit o. We, nonue ’gain Onuk Logo a’ge Yesus Kristus e pam edikpoluk werigisa a’ge ano paget nak erlikhorloma re, elit o. At ebe werigisa ai en, aphwami ’gwiangma a’ge enebabut onotogat welat togwi a’ge ai arat mabenap pesi ani o. Holuk e, aphwami warotluk, di a’ge yu a’ge tu a’ge meme oso ’gela’ge, aphwami enebabut onotogat welat togwi a’ge ano memerak pegi ai o. 15Nenagap nene’gerlimu a’ge ’belak holuk emin, ’belak erlak holuk emin, ebe ai a’ge logo puk. At e, Allah en nenebe ’get muat taknenebasu ai a’ge logo yo. 16An wene henesa’go wusogo mo’gulhentegis a’ge yu, hegitsogo togu lorogup a’ge, Allah en e,
“An neiyagai Israel a’geat o,” oluk, at enat henede ha’buktak henebasulat, henebe edeaphenebiselat, taga lemak o.
17Pobuk e, an Yesus eragam a’ge oluk, nebetne sogomerli enak a’ge oruak ai en e, is logon en an nede wik-wiaksogo taknobo mia o. Modok nebit o.
18Narilak norokhwi. Nonue ’gain Onuk Logo a’ge Yesus Kristus ebabut op ano en henedemu welat demat ’gwelakhentarok welemak u ’gela’ge,
“Amin,” egi ai.
اکنون انتخاب شده:
Galatia 6: Wul
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید