Efesus 1
1
Hau warenebegei wene
1 #
Per. 18:19-21; 19:1 His Allah eiyagai o Efesus odoktugu legep a’ge henede Kristus Yesus ebam he’berik poluk emin hwedik welegep a’ge, narilak norokhwi. An Paulus, Allah ede epesi ano pam, at Kristus Yesus en yo’go noboluk peraknobou waga a’ge ano en wene yu pelal wokho hene’bek perakpou wegi ai o. 2Nenaik Allah nonue ’gain Onuk Logo a’ge Yesus Kristus e’birek enebabut op ano en, op a’ge wokhontogulat, henede ha’bugaphonobogulat, togu lemak o.
“Nis Kristus emin hwedik oruakma obapnenebasu,” oluk mo’gulentesi wene
3Nonue ’gain Onuk Logo a’ge Yesus Kristus aik Allah aiat erliktogu lomok o. Nis Kristus emin hwedik oruakma, at Allah enat op a’ge ’berlegat nenede paget ’bogorl pam en woknentesimu welege o. 4At Allah enat nenebe at u’gwarek paget pagathorloluk, at ilem degelak welemagoluk, ’bogorl ’gwiang owan walho erlak welat, pulnenebegei ai ebe at Kristus enat pulnenebegei o. 5At Allah nenebe ede en, u’gwarek ede enat,
“Yesus Kristus en, is wogonobogwiam an neiyagai emak o,” oluk, page enat nenebe poliknonoboluk woknenebegei ai o. 6At ebabut op en omlogo ede hwedik a’ge edeap po erlakma enat, woknentesi ai paget, nis en e,
“Eige. Nogorlok o,” oluk, erliktogu lomok o. 7-8#Kol. 1:14Asogo woknentesimu, ebe emep enamogo werigisa ai pam, nono’go ’balogo delnenebiselat, nis wiak togu lege a’ge erlagap pasulat, tegei ai o. At Allah ede ’gagalak welat nenebe pobirak nonoboluk e, ebabut modok op ano en, nenebe at ede e’ginsogoat edeapnenebegei ai o. 9At u’gwarek asogo taknonobo agai en,
“Disogo tagenebaik ai ebe at Kristus en tagonobouwak o,” oluk, wene at ogola epesi a’ge hisakho welagarik ’baksogo mo’gulnentesi ai o. 10Wene at ogola hisakho welaga ai ebe re, pobuk om hegit lai lasuam, at en di a’ge yu a’ge ’bogorl pam welago a’ge emin, ’gwiangma welago a’ge emin, ’berlegat la’bulogo Kristus ematek eragam onobua a’ge paget obok mo’gulnentesi aiat o. 11At Allah en e,
“Disogo emak, asogo emak o,” oluk ede epasu a’ge hegitsogoat di a’ge yu a’ge ’berlegat tisoam ago ai en e,
“Is enebe an nu’gwarek neiyagai emak o,” oluk pulogo woknenebegeimu re, eiye ege ai o. 12At ebe erliktogwi modok welagai a’ge ano, nis en erliktogu lemagoluk, nenede naduk nadugat Kristus ebam he’berik pege a’ge pulogo woknenebegei ai o.
13Ai ’gela’ge re, his en wene dem wene, obapnenebiso wene ano henesa’go hweligeptik e, henede Kristus ebam he’berik pegeptikmu re, at Allah en e,
“Narogun wokhentaik o,” oluk, obok mo’gulnentesi hegitsogoat,
“Is an nu’gwarek neiyagai o,” oluk Arogun wokhentesi ai o. 14Allah en e,
“An en disogo wokhentaik, oluk obok mo’gulhentegis a’ge ai, pobuk wokhentaigoluk, Narogun naduk wokhentegitik henebe delogo wokhenebigat o,” oluk mo’gulnentesi. Asogo mo’gulnentesi ai en, Allah erliktogwi modok welagai a’ge aiat erliktogu lomok o.
At Paulus en Allah eiyagai o Efesus a’ge enebaget se’ban egei wene
15Ai en e, his henede nonue ’gain Onuk Logo a’ge Yesus ebam he’berik poluk, Allah eiyagai logon ’berlegat henedesogo togu legep a’ge ai, aphwami logon en honobok ogukhwe nesa’go hwelegis o. 16Asogo hwelegeitik e, his henebabut togu legep ai paget, nin hwedik nan hwedigat mo u erlakma en hononuk il-il Allah hau weriso modok welago yo. 17His henebaget e, nonue ’gain Onuk Logo a’ge Yesus Kristus aik Allah erliktogwi modok welagai a’ge ano en, henede modok ’gagalak a’ge wokhentasulat, at ebe dokhumsogo pobi togup en mo’gulhentasulat, taga lemagoluk, Arogun wokhontouwagoluk yo’go pasu legi o. 18At enat honogola dakharak henebasuam, his en e,
“Yo’go nenebesi a’ge ano en pobuk obapnonobua o,” oluk, honogola henagaisogo ebam eberak welegep a’ge ano henaluk agalat, di a’ge yu a’ge op a’ge erliktogwi modok welema a’ge at eiyagai woknentaigoluk loksogoat odoksogo nenebesi a’ge ai, henaluk agalat, 19-20#Mzm. 110:1at anni modok a’bik a’ge ano en, nis nenede at ebam he’berik pege a’ge, annisogo loksogoat letnentasu a’ge henaluk agalat, togup en Allah yo’go pasu legi o. At anni ai pam e, Kristus ebe waragama elalugap poluk ’bogorl pam woluk ligagarik, at eragam e’gik ’bekhit akhit ’gain Onuk Logo at welemagoluk edikpesi ’gela’geat, annisogo letnentasu ai o. 21Asogo edikpesi ai re, is pemerintah ’gain a’ge logon ’berlegat emin, ononuk logo a’ge logon ’berlegat emin, onuelak ’gain a’ge logon ’berlegat emin, ’gain a’ge is logon eneragam tenentarok welagai a’ge ’berlegat emin, yogodak ya ononuk oruak a’ge emin, pobuk welema a’ge emin, ’berlek e, ononuk erlak a’geat de, at Kristus nak e, logo modok welemagoluk, edikpesi ai o. 22#Mzm. 8:6#Kol. 1:18At ’gain Allah en di a’ge yu a’ge ’bogorl pam welago a’ge emin, ’gwiangma welago a’ge emin, ’berlegat wokho at ematek e’gik pam poluk, Allah eiyagai odoktugu lege a’ge di paget yu paget ’gain e, Kristus at woknentesi ai o. 23Nis Allah eiyagai nenebe at Kristus ebeat o. Ai en, di a’ge yu a’ge, ’bogorl pam welago a’ge emin, ’gwiangma welago a’ge emin, ’berlek ogola Kristus ebe ’betesogo welat, nis Allah eiyagai at ebe ’gela’ge oruakma, nonogola ’betesogo welago ai o.
اکنون انتخاب شده:
Efesus 1: Wul
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید