Galatia 5
5
“Kristus en herle hebilogo nenematekma nenebesimu welege ai en, ningsogoat edik wolomup o,” oluk mo’gulentesi wene
1Nis Kristus en herle hebilogo nenematekma nenebesimu yogodak nenematekma welege. Ai en e, di a’ge yu a’ge e’gin wiak a’ge is aphwami eneragam a’ge en e ’belak ’gogosogo woluk louwagoluk enemarlo pam pogwi ’gela’ge, pobuk e’gin a’ge ano henebam pou wano oluk e, ningsogo edik welemis o. 2An Paulus nu’gwarek en wene demat mo’gulhentaik. His honu’gwarek en henagap hene’gerlimu a’ge is logon en ’balhonobuagoluk yo’go onobogu lorogup holuk e, at Kristus en obaphonobua erlak o. Almathorlouwogoluk togu lorogup ai. 3His logon henagap hene’gerlimu a’ge ’balhonobuagoluk, is logon yo’go enebagup holuk e, henebe lo’bok pobuk henesa’go werik o. Asogo ’balhonobogwi holuk, wene Allah en nenesa’go weregei wene ano ukpo erlakma en ’berlegat hegitsogo tugulom o. 4His logon en e,
“Wene Allah en nenesa’go weregei wene ai pam nenede he’berik poluk, at en e, wene nenebam a’ge no’gorlogo wokholuk, emin pobuk togolik hwedik taknonobouwak o,” oluk togu legep holuk e, Kristus emin daktigeptik e, at Allah ebabut op en woknentasu a’ge ano ukpoluk libegep ai o. 5A’ge re, nis en, nenede Kristus ebam he’berik pegerik,
“Allah Arogun en disogo letnentasukhwe, Allah en wene nenebam a’ge no’gorlogo wokholuk, at emin pobuk togolik hwedik taknonobouwa a’ge oruak o,” oluk ebam eberak welege ai o. 6Ai en e, nis Kristus Yesus emin hwedik welat, nenagap nene’gerlimu a’ge ’belak a’ge et, is logon ’belak erlak a’ge et, nenemin hegit welege o. Holuk, ai paget heberlonobu mia o. We, logo re, nenede Kristus ebam he’berik welat, aphwami logon nenedeabonobogu lege ai pam enagat ago yo.
7Aphwami en sa omut oruak, sa omut erlak oluk pungtak lagai ’gela’ge, his naduk e, dem wene ai paget henebabut a’goluksogo togu legep a’geat de, pobuk sa en henede ’gagalegeimu en, dem wene ai hwelakpoluk hegitsogo togwi erlak welat henede ’buk welegep no. 8Ai re, nonue ’gain Onuk Logo a’ge en yo’go henebesi a’ge ano en,
“Enede disogo ’gagalin o,” oluk egeimu en henede ’gagalogwi puk. Erlak o. 9#1Kor. 5:6Roti poruagoluk e’gen periso a’ge weiyat ogola ’gwelabogwiam ’berlegat petil libago ’gela’ge, wene wiak a’ge ai en henebe ’berlegat wiagap henebil louwano oluk egi ai o. 10Asogo a’geat de, nonue ’gain Onuk Logo a’ge emin mesigat egerik hwedik welege ai en, an nede en e,
“Is enebabut e, wene mu a’ge mesik ebam eberua erlagat o,” oluk, pobi henebise legiat o. Sa en his wiagap henebigoluk henede ’gagaliso a’ge ai, Allah en wene ebam pouwa a’ge oruak o.
11Narilak norokhwi. An en enagap ene’gerlimu a’ge ’balogwi wene ai op o, oluk mo’gulentasullema re, nebam di obotut yu obotut taknobogwi ai taknobogullep epegep a? Modok erlak o. An wene ai wene mo’gulentasullema re, wene Kristus ebe e pam edikpoluk werigisa wene ai mo’gulentasuam aphwami enesa’go holholuk e, onoyuk a’gul dungsogo wathorlogwi ’gela’ge, enede ’buk agalat wene ukpelep erlagat o. 12His wiagaphonobuogoluk henagap hene’gerlimu a’ge ’balhonobuogoluk henede ningsogo ’gagalogwi a’ge ai, his Allah eiyagai honogola en ’garoksogo modok ’bok lebemak o!
13-14 #
Ima. 19:18
Narilak norokhwi. His henematekma welemagoluk Allah en yo’go henebesimu welegep o. Asogo a’geat de, henede en e,
“An nematekma ’gektak welegi o,” oluk, aphwami enebabut onotogat welat togwi a’ge enebabut wokho yogunat togu lorogup o. At e, wene Allah en nenesa’go weregei a’ge ano ’berlegat la’buksogo wene mesigat yu nak e, logo ’gela’ge oluk egei ai o,
“His honu’gwarek henebe henede hwedik welegep ai ’gela’ge,
is aphwami muon henemin welegep a’ge eba ogo henede hwedigat wolomup o,”
oluk egeimu pelal wokho pegesa ai en e, aphwami logon enebe henede hwedik welat his-hisat let-let togu lomup o. 15Asogo a’geat de, wam mesik en e, wam mesik werak poluk lebeliselat, werak poluk haumsogo nasulat, tiso ’gela’ge, his honu’gwarek-honu’gwarek en asogo togu lorogup holuk e, henebe alemaretil lagup no oluk henepe he’berlogo wolomup o.
Aphwami enebabut onotogat welat togwi a’ge emin, Allah Arogun agai epasu a’ge emin,
emin hwerlirak welat togwi wene
16-17 #
Rom. 7:15-23
An nede disogo epegirik en ik o. Nenebabut nonotogat welat togwi a’ge ai en, Allah Arogun ogola agai epasu a’ge ai wusogo lebikpaigoluk tagalat, ye, at Allah Arogun en, nis nenebabut ai a’ge wusogo lebikpaigoluk tagalat, togulat e, emin hwerlirak modok togwi o. Emin asogo togu lotluk, his en,
“Disogo tolu e,” oluk, nin hwedik nan hwedik, opogu legep a’geat de, ebe demat togu legep erlak ai o. Ai en e, Allah Arogun emin hwedik welat op nak togu lomup o. Asogo togu lorogup holuk, henebabut honotogat welat, di nagai yu nagai oluk togu legep a’ge ai, pobuk asogo togu lorogup erlak o. 18Allah Arogun en,
“Disogo tip o,” oluk, mo’gulhentasuam togu lorogup holuk, wene Allah en nenesa’go weregei a’ge ano pam pobuk wene henebam pouwa erlak o.
19Aphwami ’gwiangma yema enebabut onotogat welat togwi a’ge ebe enagat yu i o. ’Babi tenontogulat, enemelmel a’ge togulat, enaganhan wiak togulat, 20dogwi asua pam he’berik poluk togulat, aphwami logon enebe wiak emagoluk emene onobogulat, aphwami logon enemin il ’balagalat, wene sorok ogulat, ’bou togulat, onolot het modok welat, onu’gwarek enebaget nak logo pagathorlogulat, aphwami enebe mesigat a’ge enemin hwerli ’bal-’bal ’bogulat, ’gek-’gek lagalat, 21onogola en e, is agaikhen ena’ge-a’ge,
“Nagai o,” opogulat, ik enede ’balago a’ge noluk enede ’balagalat, seni sakho noluk wiak togulat, togwi ai emin, logon asogo togwi a’ge ’berlegat enemin, paget egi ai o. Is aphwami logon asogo togwi a’ge, Allah eragam enebasumu eba eiye ema modok erlak o, oluk, wene ai paget nadugat mo’gulhentegis ’gela’ge, pobuk henesa’go wusogo mo’gulhentegisat ai o.
22Ye, e e’gen egesiso ’gela’ge, Allah Arogun aphwami onogola welat enebabut togwi re, ebe yu. Aphwami logon enebe enede hwedik welat, onogola enagai hogulat, aphwami logon enemin op lioksogo welat, enebabut mosogo welat, enebabut enago welat, enebabut op welat, enebabut he’bisogo welat, 23enede sebelak welat, onu’gwarek en enesa’go werak welat, togwi aiat o. Enebabut asogo togukhwe re, wene mesik enebam pogwi no? Modok erlak o. 24Nenebe Kristus Yesus osi a’ge, nenebabut nonotogat welat e, di nagai yu nagai opogu lege a’ge ai, Kristus Yesus ebe e pam edikpoluk werigisa a’ge ai pam wusogo pege o. 25Ai en, yogodak Allah Arogun enat nenebabut ’get a’ge heli’gogo nenebesimu nenelaluk welat e, at en mo’gulnentasu a’ge nak hegitsogo togulom o. 26Asogo togulat, nonu’gwarek en erlikhorlo erlakma enat, nis-nis mesik en mesik onogola wiak emagoluk tu erlakma en, nis-nis ’bousogo mesik en mesik nenebit onto erlakma en, togu lomok o.
اکنون انتخاب شده:
Galatia 5: Wul
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید