Galatia 4
4
“Henebe Allah eiyagai eiye a’geat welegep ai o,” oluk mo’gulentesi wene
1Narilak norokhwi. Wene mesik yu mo’gulhentaik. Enaiklak waragaiam enemening di a’ge yu a’ge ’berlegat e, eneiyagai eiye a’geat de, malik enebe owan enarlue agai erlak holuk e, ap mesik en eselat e,
“Malik enebe enarlue agaiam en de, pobuk wogentaik o,” oluk e, eneragam a’ge oluk is enebe eneragam ’gela’geat welagai ai o. 2Asogo oruakma, enaiklak enebe enelaluk welat e,
“Ai hwerli lai lasu holuk e, wogomup,” oluk nonugwene ogwi a’ge ano pam hegit lai lasu erlak oruakhwe re, enemening ebano is muon en tenentarok welat, enebe enemin tenentarok welagai ai o. 3Ai ’gela’ge re, nis nenede owan oruakma, mu’gat ebabut wiak a’ge ’gwiangma yema e’gik pam welago a’ge en eragam nonoboluk welaga ai o. 4Oruakma re, at Allah en omlogo yo’go poluk ’gwiangma perakpou wom a’ge arat horok lau wagama re, perakpou wagama, hwe ’gwiangma a’ge enat deregei o. Asogo deregeimu, wene Allah en nenesa’go weregei wene ano eragam welat esa’go hologo nak taga laga. 5#Rom. 8:15-17Asogo perakpou waga ai re, nis Allah eiyagai emagoluk, wene nenesa’go weregei wene ano en eragam tennentarok oruakma, herle hebilnonobumagoluk perakpou waga ai o. 6Asogo herle hebilogo nenebegeimu, nenebe Allah eiyagai welege ai en e, at omlogo Arogun nenedemu nonobou wagama welat, at Allah paget e, nis e,
“Naik o, naik o,” ogu lemagoluk oso ai o. 7Ai en e, is logon eneragam a’ge welegep ai ’gela’ge, welegep puk. At Allah eiyagaiat egeptik welegep o. Asogo egeptik welegep ai en, at Allah en e,
“His an nebe neiyagai egep ai en e, an neiyagai wogentaigoluk henebegi a’ge re, his eiye orogup o,” oluk oso ai o.
“His henebaget nogorlok ago yo,”
oluk mo’gulentesi wene
8His nadugat Allah ebe heneperlak welegep ai en, is mu a’ge ebe Allah ’gela’ge erlakhweat de, eneragam welegep ani o. 9A’ge re, an en e,
“At Allah henebe aluk welago yo,” oluk u a’ge re,
“His yogodak Allah ebe henaluk egep o,” oluk egi ai o. Holuk e, his honu’gwarek en mu’gat ebabut wiak anni erlak a’ge, ilmu erlak a’ge, ai pam pobuk togolik eragam ’guogoluk togu legep ai, nopaget. 10His en ogulat e,
“Agauwa ai pam disogo tuok. Dugwi ai pam disogo tuok. Mo ai pam ligago holuk, ai pam ’biso holuk, disogo tuok o. Tahun ai pam disogo tuok o,” oluk, ai a’ge logo poluk ogu legep ai o. 11An his henebaget ningsogo mep lagak-pagaksogo til denaga legi ano we ’burlat ema hwi a, oluk nogorlok ago en egi o.
12Narilak norokhwi. An nebe naduk e, his ’gela’geat egirik welegi yu ’gela’ge, his ogo re, an ’gela’geat oroguptik nebabut womup o. Naduk e, his en mesik wiagapnobo erlagat o. 13Naduk naduk an nebe ou wegi ai en op wene mo’gulhentegis ano henalugat o. 14Mo’gulhentasukhwe an nebe ou hasu legi ano pam henebit nio hegit a’geat de, henebit nio erlak, henemelmel nio erlak, malaikat Allah en perakpou wom a’ge en wo ’gela’ge de a? At e, Kristus Yesus ebe wo ’gela’ge de a, woknebigep ai o. 15His nadugat henebabut a’goluksogo togu legep a’ge ano, yogodak henebabut no’gosogo takpegeptik welegep. Enil hwelilogo wogontogwi a’ge wellepma re, his henebabut e, henil hwelilogo woknetlibat o, oluk, honobok ’baksogoat u a’ge welegi o. 16Yogodak wene demat mo’gulhentegis ai en, nemin il ’belak a’ge ’gela’ge niegep hwi a.
17Is aphwami logon eba henebe wokhonobuogoluk honogola ningsogo ’gagalogwi ai, enede hegitsogo welat togwi puk. An nemin op welege a’ge uknoboluk lisogo wokhonoboluk lebagalat, is oruak o’gweat ningsogo togu lemagoluk henede ’gagalogwi ai o. 18Asogo togwi ai re, an nebe nemin oruakma de a? Erlakma de a, his op togu lemagoluk henede ningsogo ’gagalogulomma re, op nak. 19A’ge re, neiyagai henebe nede o. Hwami en malik dagonobuogoluk ono’borl nonouk togwi ’gela’ge, an en pobuk dakhonobumu, his henebabut Kristus ebabut ’gela’ge takpelep e! oluk, his henebaget an wiaksogo nonouk taga legi o. 20An his henebaget no’gosogo tik logwe, oluk an neperlak ago ai en, an nede en e, yogodak ya hene’bek weiktik henemin welat niak mu a’ge ’gela’ge mesik mo’gulhentele o, oluk, nede epasu legi ai o.
Hwe Hagar o, Sara o, enebam elitsogo mo’gulentesi wene
21His en e,
“Wene Allah en nenesa’go weregei wene ano eragam ’gogulat hologo togu lomul o,” oluk ogu legep a’ge yu, an wene Allah en nenesa’go weregei a’ge ano pam pelal wogo oruak a’ge mo’gulhentaik a’ge yu, henesa’go opsogo hwelip o. 22#Kej. 16:15; 21:2Wene pelal wokho pegesa ai pam disogo wogo oruak. At Abraham en eiyagai ’biren dagenebegei ai o. Mesik e, hwe eragam a’ge wesirik deregei. Ye, mesik e, ugwe ebe edip hwe en deregei. 23A’ge re, hwe eragam a’ge en deregei a’ge ai re, aphwami en dagonobogwi ’gela’ge deregei ai o. Ye, ugwe edip hwe en deregei ai re, Allah en obok mo’gulesi ano hegitsogoat deregei ai o. 24Allah en nis aphwami nenemin wene naduk mesik werak pesirik e, pobuk mesik weregei ai, hwami enebe ’biren, Hagar o, Sara o, eria enebam elitsogo mo’gulhentaik o. Allah en dom Sinai pam eba en wene weregei ai ebe re, hwe Hagar emalik eneragam a’ge dagenebegei oluk, ebam elitsogo egi ai o. 25Hwe Hagar ai, dom Sinai aphwami Arab a’ge onowi pam welago a’ge ai paget egi ai o. At Hagar ebe emin, emalik emin, eneragam welegesa ai ’gela’ge, yogodak aphwami o Yerusalem a’ge asogoat welagai ai o. 26A’ge re, hwe u’gwarek ugwe edip hwe a’ge ’gela’ge, o Yerusalem ’bogorl pam a’ge ai, nis neniayat o. 27#Yes. 54:1Ai paget e, Allah iak pam wene disogo oluk pelal wogo oruak,
“Hwe ogun oruak a’ge en emalik enebe wei nak dagenebisokhweat de,
mesik ogun en lologo ukpesi a’ge en,
emalik a’bigat dagenebiso ai en e,
hat hebe abeli welat malik doru erlakma en welegen a’ge ai, hogola hagai hemen o.
Malik dakhwerlaigoluk ho’borl serlem tu erlak a’ge welegen ai, hogola hagai hasulat,
hiak loksogoat oso lomup o,”
oluk egeimu pelal wokho pegesa ai o. 28Narilak norokhwi. His e, Allah en Abraham obok mo’gulesi a’ge ano, ebe at Isak deregei ’gela’ge, his dakhenebegeimu welegep o. 29#Kej. 21:9A’ge re, at Abraham omlogo mesik aphwami en dagonobogwi ’gela’ge deregei a’ge ai en e, omlogo mesik Allah Arogun pam deregei a’ge ai di e’gin yu e’gin pasu laga ’gela’ge, nis yogodak asogoat taknonobogwi ai o. 30#Kej. 21:10A’ge re, Allah iak pelal wogo ai pam wene no egei no. Disogo egei epegi,
“Hat hugwe edip hwe malik ai en hat hemening a’ge eiye om ’gela’ge,
at hwe heragam a’ge emalik ai en, hemening a’ge eiye ema erlak o.
Holuk e, hwe heragam a’ge ai emalik eminat mukho lebigonobomup o!”
oluk mo’gulesimu pelal wokho pegesa. 31A’ge re, narilak norokhwi. Nis e, hwe eragam a’ge ai eiyagai welege puk. Erlak o. We, hwe edip hwe ai eiyagaiat welege o.
اکنون انتخاب شده:
Galatia 4: Wul
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید