Galatia 2
2
Petrus lak en e, “Paulus ebe Kristus en
yo’go poluk perakpou wagama o,”
oluk mo’gulegisa wene
1 #
Per. 11:30; 15:2 Asogo tigisema, mo ligom ’bugom osokhwe 14 tahun welagarik en pobuk Barnabas e’birek en at Titus ebe woluk e, o Yerusalem lege. 2Asogo lege ai re, Allah en,
“Hat o Yerusalem at ligom o,” oluk nede ’gagalegei ai en ligegirik e, op wene ai is aphwami o’borl o’gwe a’ge mo’gulentil neselegi ai,
“Wene ebe disogo yo,” oluk se’geksogo mo’gulentaigoluk e, an page emin, yogodak ya emin, ningsogo taga legi a’ge ai, we ’burl almasogo ema no oluk, is onuelak ’gain a’ge enebe enematekma onoboluk e, mo’gulentegis o. 3At Titus ai re, ebe Yunani a’ge nenemin lege a’geat de, is onuelak ’gain ebano en,
“Hagap he’gerlimu a’ge ’balu o,” oluk ningsogo mo’gulom erlak. 4Asogo a’geat de, is logon mu a’ge re, nenarilak Allah eiyagai a’ge ’gela’ge takpoluk hisakho ’gwigisarik e, agap e’gerlimu a’ge ’baluagoluk tigisayat. Asogo hisakho ’gwigisarik e, nis Kristus emin mesigat otluk nenematekma welat nenebabut togu lege a’ge ai, is en e,
“Edip no’gosogo agama en togwi o,” oluk edip heratuogoluk ling-long ’gu egesa ai o. Asogo hwi-hwiak eneragamma onoboluk e, is togwi a’ge ai togu lemagoluk enil nenta ’gu egesa ai o. 5A’ge re, wene op wene ai his henebaget opsogo erlele wokho tenhentarok wolomogoluk, is en asogo ogwiam, nis en is eniak hwelakpoluk agauwa mesigat pam nak ogo,
“I o,” oluk, u erlak. 6#Ula. 10:17Is logon onogola en e,
“Ononuk oruak a’ge re, is eriayat o,” ogwi a’ge ai en wene an mo’gulentil neselegi a’ge ano pobuk muat mo’gulentil nese lemagoluk mo’gulnum erlagat o. Allah en aphwami enagap nak il ontoluk e,
“Yu wiak. Yu op,” oluk oso erlak ai en, an is enebaget nadugat ononuk oruak welegesa a’ge de a? Erlak a’ge de a, oluk, wenemennei eberise legi erlak ai o. 7-8At Allah en, at Petrus en aphwami Yahudi enagap ene’gerlimu a’ge ’belak a’ge ene’bek elirat louwagoluk yo’go poluk perakpasulat, ye, an e, aphwami o’borl o’gwe a’ge ene’bek elit louwagoluk yo’go noboluk peraknebasulat, tegei ai en e, is ap ononuk oruak ai enede en e,
“Allah en, at Petrus en op wene nis aphwami nenagap nene’gerlimu a’ge ’belak a’ge mo’gulontouwagoluk yo’go pesi ’gela’ge, at Paulus en op wene is aphwami enagap ene’gerlimu a’ge asogo ’belak erlak a’ge mo’gulontouwagoluk yo’go pesimu hege o,” oluk enak a’ge pobirak nenebegesa ai o. 9Asogo pobirak nenebegesarik e, is Yakobus emin, Petrus emin, Yohanes emin, Allah eiyagai en e,
“Nis nonuelak e, is oruak o,” oluk ogwi a’ge en e,
“His en e, wene aphwami o’borl o’gwe a’ge mo’gulentil lit o. Ye, nis en e, aphwami enagap ene’gerlimu a’ge ’belak a’ge paget mo’gulentil lul o. Nenemin hwedigat togu lomok o,” oluk e, Barnabas e’birek nene’gik ten-tenhau watnenebigisa. 10Hau watnenebigisarik e, nenesa’go wusogo ’gela’ge wene disogo nak mo’gulnentigisa,
“Aphwami nis a’ge logon enerlagaik a’ge yema enebam eberak welat, lerontogu lomup o,” oluk, mo’gulnentigisa ai, an en asogo nogola nagai hasulat taga legi a’geat de, mo’gulnentigisa ai o.
At Paulus en Petrus taga laga a’ge paget ’baksogo wene yagesi wene
11A’ge re, at Petrus o Antiokhia wagarik dagan taga lagama, an en e,
“Hat taga legen ai wiak o,” oluk, ’baksogoat wene yagegis o. 12Ai re, disogo taga lagama wene yagegis. Naduk at Yakobus en osi peragonobou waga a’ge owan wom erlak oruakhwe, at Petrus ano is aphwami o’borl o’gwe a’ge enemin so’boru la’bulogo no’gu legesa. A’ge re, is wegesa ’gal e, at Petrus ogola en e,
“Nis nenagap nene’gerlimu a’ge ’belak a’ge logon en no’gosogo mo’gulnema o,” oluk, ogorlok en, is enemin so’boru no erlakma en, mo oluk heksogo lebaga ai o. 13At iak ’biren welat heksogo lebaga ’gal, is aphwami Yahudi a’ge ado pema enebe ’berlegat enemin lebagalat e, at Barnabas ano ede ’gagalogo pobuk is eniak ’biren a’ge ai lo’bok egesarik e, libagayat o. 14Asogo lebegesema re, an nede en e,
“Wene demat, op wene yu a’geat de, is enebabut e, op wene mo’gulontogulat tu a’ge togwi erlak hegi o,” oluk, aphwami ’berlegat enilem Petrus wene disogo oluk mo’gulegis o,
“Hat hebe Yahudi a’geat de, aphwami Yahudi a’ge en togwi ’gela’ge taga legen erlak, aphwami o’borl o’gwe a’ge en togwi ’gela’ge tagalarat de, is o’borl o’gwe a’ge mo’gulentasulat e,
His henebabut Yahudi a’ge en togwi ’gela’ge, enebabut wokho togu lomup, oluk ningsogo mo’gulentasu legen ai nopaget o,” oluk, ’baksogo wene yagesi.
“Aphwami Yahudi a’ge et, o’borl o’gwe a’ge et, enede Kristus ebam he’berik pogwiam e, delonobu nak o,” oluk mo’gulentesi wene
15Nis nenebe Yahudi a’geat dagege. Is o’borl o’gwe a’ge wiak togwi a’ge ai ’gela’ge dagege puk. 16#Mzm. 143:2; Rom. 3:20,22A’ge re, aphwami wene Allah en nenesa’go weregei wene ano hegitsogo togwiam e, Allah en wene enebam a’ge no’gorlogo wokholuk enemin pobuk togolik hwedik tagenebasu erlak o. We, enede Yesus Kristus ebam he’berik pogwiam nak, hwedik tagenebasu ano re, henalugat o. Wene ai paget, Allah iak pam pelal disogo wogo oruak, “Aphwami logon hegitsogo togwiam, wene enebam a’ge no’gorlogo wokholuk, enemin pobuk togolik hwedik tagenebasu erlak o,” oluk pelal wokho pegesa ai en, nis en wene Allah en nenesa’go weregei a’ge ano hegitsogo togwiam puk. We, nenede Kristus ebam he’berik pogwiam wene nenebam a’ge no’gorlogo wokholuk, at emin togolik hwedik taknonobouwagoluk, nenede Kristus Yesus ebam he’berik pege ai o. 17Nis Kristus emin hwedik takpogwiam, Allah en wene nenebam a’ge nogorlogo wokholuk, emin pobuk togolik hwedik taknonobouwagoluk, nenannisogo walhogulat e, nenebabut aphwami o’borl o’gwe a’ge enebabut togwi ’gela’ge enemin hegirat welege, oluk enagat ago ai en, nis wiak togu lege a’ge ai, edip at Kristus at o, oluk u no? Modok erlak o. 18O moluktak poluk pobuk worogwi ’gela’ge, an en nis aphwami Yahudi togwi a’ge arat ukpegi a’ge pobuk tagallema re, Allah iak ukpoluk sagalogo taga legi a’ge oluk enagat elep o. 19A’ge re, wene Allah en nenesa’go weregei a’ge ai en nebe werak a’ge ’gela’ge taknebesimu re, an nebe nelaluk welat Allah paget taga leigoluk, wene ai paget nebe werak a’ge ’gela’ge welegi o. Ai re, Kristus ebe e pam edikpoluk werigisa ai eminat watnenebigisa o. 20Ye, yogodak nebe nelaluk welegi yu re, nu’gwarek nanni pam welegi puk. We, at Kristus at nogola welat elaluk welago yo. At ebe Allah omlogoat welat, nebe ede en an nebagerat,
“Watnobuak,” oluk epesi ano pam ebe waraga ai o. Ye, an nede at ebam he’berik oruakma re, at ebe nogola oruak en e, nelaluk welegi ai o. 21Allah ebabut op en obapnenebiso wene ai an en sagalogo ukpasu legi erlak o. Wene Allah en nenesa’go weregei a’ge ano pam, wene nenebam a’ge no’gorlogo wokholuk emin togolik hwedik taknenebelepma re, Kristus waraga ai we ’burlat almasogo warelep o.
اکنون انتخاب شده:
Galatia 2: Wul
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید