Galatia 1
1
Hau warenebegei wene
1-2His Allah eiyagai o Galatia odoktugu legep a’ge narilak norokhwi. An Paulus en narilak norokhwi Allah eiyagai ado pema o yema nenemin welege a’ge enebe ’berlegat nenemin en wene yu pelal wokho hene’bek perakpou wege ai o. An yo’go noboluk peraknobou wagama wegi ai re, edip aphwami en puk. Ap mesik wene ebam wusogo poluk peraknobou waga pugat o. We, at Yesus Kristus ebe waragama aik Allah en elalugap pesi a’ge ano emin enat yo’go noboluk peraknobou wegesema wegi ai o. 3Nenaik Allah emin, nonue ’gain Onuk Logo a’ge Yesus Kristus emin, e’birek enebabut op ano en op a’ge wokhontogulat, henede ha’buksogo tenhentarok welat, togu lemak o. 4Nis wiak togu lege ai en nenaik Allah ede en e,
“Disogo tuak o,” oluk ede epesi ano pam, at Yesus Kristus en nis aphwami ’gwiangma a’ge delnenebiogoluk, ede enat nis nenebabut wiak modok togu lege a’ge ai wene at u’gwarek en ebam poluk waraga ai o. 5Ai en e, at Allah at erliktogwi modok wolomok o. Asogo egi ai,
“Demat emak o,” oluk u ’gela’ge re,
“Amin,” egi ai o.
“Op wene ’biren erlak. Mesigarat o,”
oluk mo’gulentesi wene
6At Allah en e, his Kristus ebabut op a’ge ano emin hwedik welemagoluk yo’go henebesi a’geat de, ukpoluk perleneat ’gwi-’gwani op wene oluk mu a’ge ebam ebesi laga legep ai, an nogorlok ago yo. 7Ebe re, wene op wene mu a’ge mesik welago erlagat o. A’geat de, is aphwami logon en op wene Kristus en tegei wene ai a’ge mu a’ge ebelesogo takpoluk lalhonobuogoluk mo’gulhontogwi ai enat egi o. 8A’ge re, ap sa en, is ap ai en de a? Nis en de a, malaikat ’bogorl pam a’ge en de a, op wene nis en mo’gulhentige a’ge ai, ukpoluk mu a’ge mo’gulhontogwi holuk e, Allah en heman onobouwagat o. 9Ai re, wene pageat mo’gulhentegis a’ge, pobuk mesik togolik mo’gulhentaik o. Aphwami salak en wene his wegep a’ge ano ukpoluk mu a’ge mo’gulhentau wagai holuk e, Allah en heman onobouwagat o. 10An niak egi ai re, aphwami en,
“Hat op egen,” oluk mo’gulnemagoluk eselegi a? At e, Allah en,
“Hat op egen,” oluk, mo’gulnemagoluk eselegi a. Aphwami onogola opsogo eselegi holuk e, an nebe Kristus eragam a’ge u re, miayat o. A’ge re, an Allah ogola opsogo eselegi o.
“An Kristus en disogo yo’go noboluk peraknebesi o,” oluk mo’gulentesi wene
11Narilak norokhwi. An en op wene mo’gulentil neselegi ai re, aphwami eniak a’ge mo’gulentil denaga legi erlak ai, his henaluk omat o. 12Wene ai, aphwami en woknogulat, mo’gulnogulat, tigisema wegi puk. We, wene ai, at Yesus Kristus ogola hisogo welaga a’ge, at enat ’baksogo mo’gulnesimu wegi o.
13 #
Per. 8:3; 22:4,5; 26:9-11 An naduk nis Yahudi a’ge nonowene ningsogo tenak welat, aphwami Allah eiyagai a’ge di obotut yu obotut tagenebasulat, enebe modok erlagabenebaigoluk ningsogo tagalat, taga legi a’ge ano, nobok his henesa’go hologu legebat ani o. 14#Per. 22:3Wene nis Yahudi a’ge nene’balak en mo’gulnentigisa a’ge ano tenak welat e, is an narilak nemin hegit a’ge en wene onogola seramsogo togukhweat de, an nak e, nede ningsogoat taga legi ani o. 15#Per. 9:3-6; 22:6-10; 26:13-18Asogo a’geat de, Allah ebabut op ano en pageat nia ogola en owan daknobu erlak oruakhwe re, nebe poliknebesi o. 16Poliknebesirik e, op wene omlogo Yesus tegei wene ano aphwami o’borl o’gwe a’ge mo’gulentil denaga lemagoluk omlogo ebe norogolema inlau wagama re, wene aphwami logon enebam hin wokho erlagat o. 17Ye, is logon Yesus en yo’go onoboluk peragenebesi a’ge ebano, o Yerusalem oruakma ene’bek ligom erlagat o. A’geat de, o aphwami Arab a’ge onowi pam etleba ligegirik e, pobuk togolik o Damsyik wegi o.
18 #
Per. 9:26-30
Wegirik e, mo ligom ’bugom osokhwe 3 tahun welegirik e, pobuk Petrus ano ebe naluksogo oluk, e’bek o Yerusalem ligegi. Ligegirik e, at owi pam agauwa 15 e’birek eba welege. 19Welat, is Yesus en yo’go onoboluk peragenebesi a’ge ebano enebe pema enemin sarlok tu erlak. We, nonue ’gain Onuk Logo a’ge ot Yakobus ano nak e’birek sarlok tige o. 20Wene an en pelal wokho hene’bek perakpou wegi ai re, Allah il pam demat egi o. Niak esei egi erlak o. 21Eba welegirik e, pobuk o Siria emin, Kilikia emin, wegi ai o. 22Ai erlige re, is Allah eiyagai Kristus emin hwedik welat, o Yudea odoktugu legesa a’ge en e, an nebe eneperlak welegesa. 23Asogo nebe eneperlak welat e, we is aphwami logon en nobok nak disogo ogwiam enesa’go hologu legesa,
“Ap naduk nis di obotut yu obotut taknenebasulat, op wene erlagap paigoluk tagalat, taga laga a’ge ano, yogodak aphwami op wene ano demat oluk wouwagoluk mo’gulentil denago yo,” oluk ogukhwe nobok enesa’go hologu legesa. 24Asogo hologulat, an nebaget e, Allah erliktogu legesa.
اکنون انتخاب شده:
Galatia 1: Wul
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید