Peragenebesi 27
27
At Paulus ik so pam ik olo’gwe toluk o Roma womogoluk woluk wegesa wene
1Is en nis ik so pam ik olo’gwe toluk o Italia peraknonobumogoluk, wene arat ’baligisarik e, ap tentara a’bik Kaisar ot esan logolhogu legesa a’ge onue ’gain onuk Yulius en Paulus emin, aphwami ene’gik herle werak a’ge logon enemin, wogonoboluk wemagoluk e’gikmu pegesa. 2Asogo enebe at e’gikmu pegesema, ik so ebe o Adramitium en woluk wegesarik oruakma, aphwami o propinsi Asia ik so ’gwiso’gwe lo’bok ’belabil womogoluk togumu, ap Aristarkhus, owi o propinsi Makedonia kota onuk Tesalonika a’ge emin, ik so ai ogola ’gwigerik wege. 3’Gwigerik wagalat, loruk o’gwe re, o Sidon wege. Wegerik e, at Yulius ano en, Paulus ebe edeaptegeitik e, disogo mo’gulesi,
“Hat di a’ge yu a’ge logon erlak holuk e, harilak en wokhemagoluk ene’bek ’gwelagentil entil lak o,” oluk mo’gulesimu laga. 4Loluk wagarik e, o eba en, ik so pam ik olo’gwe toluk wagalat, yasobu nonorogole ’balik punhai lagama re, ik e’gen onuk Siprus ai abel pema akhit yasobu ’gwe ’belakma re, op en e, ’gwe ai wege. 5Eba en wegerik e, o propinsi Kilikia en ’bekhit propinsi Pamfilia hegit eba ik lok ai esa’go yu akhit liplau wegerik e, o propinsi Likia kota onuk Miria ai wege. 6Eba en ap tentara a’ge onue ’gain ano en e, ik so mesik o Aleksandria a’ge o Italia womogoluk togumu, hwiaregeitik e, ik so nis wege a’ge ano pam en, ik so ai pam woknonoboluk ’gwegei.
7Woknonoboluk ’goluk, agauwa mesik nogil, mesik nogil, orogat waga legerik, wom mia ’gela’ge aga a’geat de, o onuk Knidus hegit wege. Wegerik, yasobu en ebela hegitsogo wom mia agama re, ’gwi-’gwani ik e’gen onuk Kreta ai abel pema akhit yasobu ’gwe ’belakma re, op oluk, Salmone e’biang ai ukpoluk ’goboksogo ’bekhit wege. 8Nenebam wik-wiaksogo waga legerik, o kota Lasea horok eba o mesik onuk,
“Ik so op delogo pogumu,” oluk ogumu eba wege.
9Eba wegerik e, agauwa esanat welege. Welat, aphwami Yahudi a’ge en e,
“Nis wiak togu lege a’ge Allah en erlagapsogo ukpoluk pobuk nenemin op ege o,” oluk enede ebesogo so’boru no erlakma en weat welagai hegitsogo welegerik enat, so pam ik olo’gwe opsogo wom mia en, ik olomu lo ’gela’ge agama, at Paulus en e,
10“Narilak o. An nede en e,
Nis so pam ’bekhit lul holuk, modogat alemat omul o. Ai en e, di a’ge yu a’ge so ogola yagarak a’ge nak wiak agalat, so ebe wiak agalat, tua puk. At e, aphwami nenebe neneminat ik olomu lagalat, tul epasu legi o,” oluk mo’gulentesi. 11Asogo mo’gulentesi a’geat de, ap tentara onue ’gain ano en Paulus iak sagalogo ukpoluk, is ap ik so pam yabuk togu legesa a’ge onue ’gain ai o, ik so aluk welat woluk noso a’ge ai o, e’birek eniak hwelegei. 12O wiak pam ik so agosogo eba e daintak poluk modok wolom mia ai en, is ap ik so yabuk togu legesa a’ge enebe lok akhit en e,
“O kota onuk Feniks lo holuk e, lorik, o wiak pam e, eba re, op wolom o,” oluk wene ’baligisa. Wene asogo ’baligisa ai re, ik e’gen onuk Kreta eba, o Feniks ik o’gutmu eba o mo ’goboksogo ’biso hegit abel o’borl akhit emde ’belagat, ogodima akhit ogo emde ’belagat oruakma re, ik so ago daintak poluk op welagai ai en egesa.
Yasobu lok mesik ik laut ogum pam waga wene
13Nis eba oruakma, sogwei ik laut hegit en weisogo punhau wagama, is ap ik so yabuk togu legesa a’ge en e,
“Nis louwogoluk ege ano arat lo hegit aga o,” oluk ik so agosogo daintak a’ge henokho wik-wok e, ik e’gen onuk Kreta eragam o’gwe wege. 14A’ge re, horoksogo wege ’gal e, o yasobu iak lok a’ge o mo orlu ago hegit abel o’borl akhit ik esa’go hegit en annisogo modok punhau waga. 15Punhau wagama re, ik so a’gul yasobu lok wagokhwe hegitsogo woluk wom mia agama re, ’gwe ai hegit woluk wom erlakma en ukpoluk oruakma, yasobu en ’gwi-’gwani woknonoboluk waga. 16Woknonoboluk wagama re, ik so wei a’ge so lok a’ge yen lisogo woluk lasu a’ge ai ningsogo no’gosogo herle hettu ’gela’geat agama re, ik e’gen wei a’ge onuk Kauda ai yasobu ’gwe ’belakma abel olukhwe akhit ’gwi-’gwani wagalat, so wei a’ge ano herle lisogo elirat hettigisa. 17Asogo hettigisarik, ik so lok a’ge pam pegesa. Ebam poluk e, ik so lok a’ge ano ebe ningsogo oluk ’go’bi so abel opma’gwe lekho herle hettigisa. Hettigisarik, o Libia hegit eba ik ogum horokma re, yasobu en ik al onuk Sirtis pam dung i louwano oluk, onogorlok en, sum sogwei en wogonoboluk louwagoluk lagabogwi a’ge ano ’belakpou wegesema re, yasobu en yogunat woknonoboluk waga. 18Asogo wagoam, yasobu en modok punak le’gaksogo woknonoboluk wagoma, loruk o’gwe so ebe se emagoluk di a’ge yu a’ge ogola yagarak welaga a’ge logon na’gogo ik olomu hwikha ’bigisa. 19Hwikha ’bigisarik, loruk o’gwe re, is ap ik so yabuk togu legesa a’ge en, so o’go’bi emin, di a’ge yu a’ge logon emin, onu’gwarek ene’gik en na’gogo ’belakpegesayat. 20Asogo ’belakpegesarik, agauwa esanat yasobu anni wiak punak le’gaksogo punhau wago modogat mo egeimu, mo emin, hwesagal emin, nenil likho erlak welat, nenede en e,
“Nis naduk en e, opsogo woknonoboluk louwa opogu lege a’ge anoat de, yogodak e, ik olomu lul hegi o,” oluk nenede wiak agama mo ege.
21Asogo nenede wiak agama so’boru page enat, no erlakma en, weat oruakma re, at Paulus ebe ene’gerlakma inagarik e, disogo mo’gulentesi,
“Nue nari. O ik e’gen Kreta en,
Lul erlak, oluk henesa’go weregis ano, an niak hwellipmu re, di a’ge yu a’ge wiak agalat, nal agalat, tige ai, tolu erlagat o. 22-24A’ge re, narilak. An nebe eiye re, Allah atma, an at erliktiso a’ge en, malaikat mesik yogo hup ne’bek perakpou wagama re, neragam inlau waga. Inlau wagarik, disogo mo’gulnesi,
Paulus. Hogorlok erlaksogo wolomup o. Hat pobuk ’gain Kaisar e’bek lagun ai en, aphwami eba ’berlegat henemin ik so pam laga legep a’ge, at Allah ebabut op en hat edesogo eneminat delhenebik o, oluk mo’gulnesi ai en, narilak. Henede ha’buksogo welemagoluk, wene yu mo’gulhentaik. Nenebe logon ik olomu lul erlak. We, ik so ebe nak alemat ema o. 25Ai en e, narilak. Allah en mo’gulnesi ai ’gela’ge demat ema ani o, oluk, nede at ebam he’berik welegi ai en, his henede ha’buksogo wolomup o. 26A’ge re, ik e’gen mesik esa’goma dungsogo nenebei louwa o,” oluk mo’gulnentesi.
27Ik Adria ye’gelak ogum petne yasobu en woknonoboluk wagokhwe, agauwa 13 nogoigerik, agauwa mesik pam o hup ede ’burl ’gela’ge is ap ik so yabuk togu legesa a’ge ebano onogola en e,
“Ik esa’go horogat lau wege hegi o,” oluk epegesa. 28Asogo epegesarik e,
“Ik il yat a? Horok a,” oluk elit a’ge helep erlilogo ’belakpegesema re, 40 meter ’gela’ge yarat welaga. Asogo ’belakpoluk, horok eba wegerik en, elit a’ge pobuk ’belakpegesa a’ge re, 30 meter horok wei ’gela’ge welaga. 29Asogo welaga ai en e, is en,
“Ik so helep pam dungtak pou wano,” oluk e, mo uarik welemagoluk, so e’gin a’ge ugan so alo’gwe ’gwe yen herle erlilogo ik ogola ik alma ’belakpegesa. ’Belakpoluk e,
“O perlene dakha uak da,” oluk enagai yen ogu legesa. 30Asogo ogulat, is ap ik so yabuk togu legesa a’ge ebano so pam en hweiye louwogoluk e, is logon disogo mo’gulentigisa,
“Nis en so e’gin a’ge so a’gul akhit en herle erlilogo ’belakpul o,” oluk eniak eseiyat egesarik, so wei a’ge ano herle erlilogo ik olomu ’belakpegesa. 31Ik olomu ’belakpegesema at Paulus en e, ap tentara a’ge onue ’gain ano emin, osi ebano enemin, mo’gulentasulat e,
“Is ap yema ik so lok a’ge yu pam welema erlak holuk e, his henebe ’berlegat delhwerlagup erlak hegi o,” oluk mo’gulentesi. 32Asogo mo’gulentesimu, is en e, ik so wei a’ge ’go’bi erlelik welaga a’ge daktak pegesema ik olomu laga.
33O dakha iogoluk tisokhwe, Paulus en is ’berlegat so’boru nouwagoluk disogo mo’gulentesi,
“His honogola en e,
Nis no’gosogo tul, oluk his henede mennei eberogulat agauwa 14 so’boru no erlakma en weat welegep ai o. 34A’ge re, his henebe logon ik olomu lagalat, weiyat logon henebam wiak agalat, tua modok erlak o. Holuk e, op delogup en e, so’boru logon nagup en mo’gulhentegis o,” oluk mo’gulentesi. 35Asogo mo’gulentesirik e, so’boru roti a’ge mesik e’gikmu wesirik e, is ’berlegat enilem Allah hau wusogo, at naduk ’gusogo ne’gei. 36At naduk ne’geimu re, is enede siok oluk e, enebe ’berlegat so’boru nil legesa. 37So ai pam nenebe ’berlek e, 276 wege. 38Nonogumsogo ne’gerik e, ik so ebe se emagoluk gandum e’gen so ogola yagarak welaga a’ge na’gogo ik olomu ’belakpegesa.
Ik so ik iak pam dungsogo wiak aga wene
39O dakha egeimu re, is ap so yabuk togu legesa a’ge ebano en, ik esa’goma enil yethegesa a’geat de, o ’geba ’gela’geat enede nalaga. Enede nalagarik enil yethegesa ’gal e, ik o’gutmu ik al delak oruakma yethegesarik, disogo egesa,
“So ebe eba yogo pei lo elit a? Mia ya. Walhouwok o,” oluk egesa. 40Asogo egesarik, so ebe eria louwagoluk so e’gin a’ge ’belakpegesa a’ge ano, ’go’bi daksogo ik olomu ’belakpegesa. ’Belakpegesarik so ago a’ge mesik, so a’gul eden-peden hogu legesa a’ge ano hebilogo re, sogwei en so a’gul hegitsogo ik iak akhit woluk louwagoluk, sum so a’gul akhit a’ge lagabak pegesa. 41Lagabak pegesema, sogwei en woluk e, ik al horogat herlektakma eba so ano yesi laga. Yesi lagama, so a’gul akhit ningsogo dung tegeimu re, alo’gwe ’gwe, ik hererimtak wagalat wei wiagap til, wei wiagap til, til-til modok wiagat aga. 42Asogo tegeimu re, is ap tentara ebano en, is ene’gik herle werak a’ge ebano hweiye ik ebi lebema no oluk e, enebe waronobuogoluk tigisa. 43Asogo waronobuogoluk tigisa a’geat de, is onue ’gain ano en Paulus deligoluk e,
“Asogo togup o,” oluk wene ’balegei. Wene ’balegeitik e,
“Ebi henaluk a’ge naduk ik olomu ’golokho ’boluk ik iak pam liplai lit o. 44Ye, his ado e ’gagalak a’ge yema emin, so moluktak a’ge yema emin, hene’gik tenhegeik, woluk, ene’berlik liplai lit o,” oluk mo’gulnentesi. Mo’gulnentesimu, asogoat nenebe ’berlegat delogo nak ik iak pam op libege.
اکنون انتخاب شده:
Peragenebesi 27: Wul
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
