Peragenebesi 28
28
At Paulus ik e’gen onuk Malta welat taga laga wene
1Nenebe delogo ik iak pam libegerik oruakma, is aphwami eba a’ge en e,
“O ik e’gen yu onuk Malta o,” oluk mo’gulnentigisa. 2Mo’gulnentigisarik, onogola enagaisogo a’goluksogoat woknenebigisarik, o moru wagama re, horl en sogwei ere’guagoluk odouk mu’gwalogo nenebegesa. 3Odouk mu’gwalogo nenebegesema welat, at Paulus en eterle loksogo wik-wok e, odoukmu narlikpou wagoam, herlegetie mesik odouk en putsogo liplau wagarik e, Paulus e’gik pam sarluktak poluk, erlelik modok welat mo egei. 4E’gik pam sarluktak modok oruakma, aphwami onowirak a’ge ebano enil holuk, is-is nak ogulat e,
“Ap yu re, ap ware a’ge o. Ik olomu en delogo liplau waga a’geat de, asua sum aphwami wiak togwiam enebe warenebiso a’ge ano en,
At ebe elaluk welema no oluk, weregei ai o,” oluk egesa. 5Asogo ogukhwe re, Paulus ebe wiak agalat, waragalat, tu erlak welat, herlegetie ano e’gik en woroksogo odouk olomu ’gwelebak pesi. 6Asogo tegeimu, is aphwami ebano en e,
“Ebe porua hwi a? At e, mesik erligeat lebeksogo warema hwi a,” oluk epegesarik, enil welegesa-welegesa, ebe asogo warago erlak en e,
“Ebe abedak hwi a,” oluk egesa.
7Asogo tigerikmu en, o horok eba, ap ’gain mesik onuk Publius ’gwiang eiye a’ge, nis ap ’bok ’gela’ge e’bek legema, at en e, nenebe opsogo woknenebegeimu, agauwa henagan at emin welege. 8O at oruakma eba re, at aik ebam aganhan agarik, al ’bisok ’bo pasulat e, ’bourak modok welaga. ’Bourak oruakma, at Paulus e’bek ’gwegeitik e, e’gik tenak poluk, Allah yo’go pesimu, ebe op aga. 9Asogo op agama re, is aphwami o ik e’genma eba a’ge ou wogu legesa a’ge logon Paulus e’bek wegesema, obabenebisoam enebe obat egesa. 10Asogo obabenebise lagama, is aphwami ebano en, di a’ge yu a’ge a’bik woknentigisarik e, pobuk nis o eba ukpoluk womogoluk togumu, di a’ge yu a’ge ebela pam no a’ge woknentigisayat.
At Paulus o Malta en o Roma waga wene
11O eba welat, dugwi henagan werigerik e, ik so mesik a’gul o’gwe hun ’go’bu holup a’ge ogut heli’gogo pegesa a’ge, o Aleksandria en page enat woluk wegesarik, o wiak oruak en ik e’genma eba welegesarik, yema womogoluk togumu ogola ’gwige. 12’Gwi legerik o eba en o Sirakusa wegerik e, agauwa henagan welege. 13Welegerik, o eba en, so pam ik esa’go’gwe en o kota onuk Regium wege. Wegerik oruakma, loruk o’gwe yasobu ik laut hegit en waga lagama re, o ua ’gela’ge, o kota onuk Putioli wegerik ’gwiangma libege. 14O Putioli eba Allah eiyagai a’ge logon oruakma nenemin sarlok tigisarik, is en e,
“Nenemin wolomok o,” oluk yo’go nenebegesema, agauwa sabiren enemin welege. Welegerik e, o eba en o kota Roma womogoluk wege ai. 15Wagaimu, is aphwami logon en,
“Is wagai o,” oluk egesema, Allah eiyagai o Roma a’ge en enesa’go hweligisarik e, nonlogotma, is logon Pasar Apius, lagaihwe, logon o hotel ap ’bok wagalat, nogogumu o ebe henagan werikmu eba legesema, at Paulus il ontoluk e, Allah hau werak poluk ede yamuk egei.
At Paulus o Roma wagarik welat tegei wene
16Eba en o kota Roma arat wegema, is ap ’gaindek en e,
“Paulus ematekma welemak. Oruakhwe, ap tentara a’ge mesigat en tenak welemak o,” oluk egesa.
17Asogo egesema, agauwa henagan welegerik en e, at Paulus en, is aphwami Yahudi a’ge onuelak ’gaindek odoktumagoluk yo’go enebesi. Yo’go enebesimu, enebe arat odoktu egesema, at en e, disogo mo’gulentesi,
“Narilak. An en, aphwami nis a’ge wiak logon tagonobo erlak ani o. Ye, nis en nene’balak togu legesa ai ’gela’ge togu lege a’ge ai ukpoluk wiak tu erlagat o. Asogo a’geat de, o Yerusalem eba en nebe tenak nebegesarik, ne’gik herle wusogo, aphwami Roma a’ge ene’gikmu nebegesa. 18Asogo nebegesema, is ap ’gaindek en wene edip heratogulat e,
Ap yu re, ebe woru ’gela’ge mesik tu erlak hegi, oluk herle hebilnobuogoluk tigisa. 19#Per. 25:11Asogo tigisa a’geat de, is ap Yahudi a’ge en e,
Erlak o, oluk eniak ningsogo egesa ai en, an en e,
Wene nebam pegesa a’ge yu, ’gain Kaisar en edip herasogo ologun woruak o, oluk mo’gulentegis o. Asogo egi ai re, an en wene mesik is narilak enebam paigoluk egi erlak o. 20Nis aphwami Israel a’ge en e,
Ap mesik wema o, oluk nenede at ebam welege ano pagerat, ne’gik herle wusogo nebegesema welegi o. Ai en e, his henebe ne’bek wagaiam wene mo’gulhentaigoluk yo’go henebegi ai o,” oluk mo’gulentesi. 21Asogo mo’gulentesimu, is en e,
“Aphwami o Yudea eba en surat hat hebaget nene’bek perakpou wom erlak o. Ye, nis nenarilak logon o eba en wegesarik, wene hat hebaget mo’gulnontogulat, hobok wiak ’balogulat, u wom modok erlagat o. 22A’ge re, wene hat en wegentik taga legen ai paget, aphwami o di owi yu owi a’ge en,
Wene ai wiak, ogwiam en nak e, nenesa’go hologu lege ai en, wene hat en demat epasu legen a’ge ai hu’gwarek en nis mo’gulnentasukhwe nenesa’go holu nenagai yo,” oluk mo’gulegisa.
23Asogo mo’gulegisarik,
“Nis agauwa ai pam en pobuk he’bek womul ani o,” oluk wene werak pegesa. Wene werak poluk e, agauwa ai pam enebe lok o’gwe, o Paulus welagama eba wegesa. Wegesema, hubet en ’bekhit huba’go wene Allah eragam enebasu wene ano mo’gulentasu modok welaga. Mo’gulentasu modok welat, is en Yesus tegei wene ano demat oluk pobi tuagoluk, wene Allah en nenesa’go weregei wene Musa en pelal wokho pesi ano pam emin, ap logon Allah iak mo’gulontogu legesa a’ge en pelal wokho pegesa ano pam emin, enesa’go werise laga. 24Asogo mo’gulentasukhwe re, is pema akhit en wene ai demat oluk pobi tigisarik e, wegesa a’geat de, is ado pema en pobitu erlak. 25Asogo tigisarik, is-is eniak hundomok sagal-sagal ’bogoluogoluk togumu re, at Paulus en wene mesigat nak agaikhen yu mo’gulentesi,
“Wene Allah Arogun en Yesaya en nene’balak mo’gulontouwagoluk mo’gulesimu, mo’gulentasu laga ai, hegirat mo’gulentesimu hegi. 26#Yes. 6:9-10Allah en e,
Aphwami eba ene’bek loluk e,
wene yu mo’gulontomup.
Henesa’go hwelak wolorogup a’geat de,
dokhumsogo pobi togu lorogup erlak o.
Ye, henil pusogo ’gwelakhogu lorogup a’geat de, dokhumsogo hogu lorogup erlagat o.
27Is aphwami yema, enil hogulat, enesa’go hologulat, onogola eberogulat, toluk en,
enebabut heberlumu pobuk an en obabenebikno oluk e, is en onogola ’buk agalat, enesa’go lathogulat, enil wiak uagoluk enepenenat enil hopnik pogulat, tigisa o,
oluk Allah Arogun en egeimu, Yesaya en pelal wesi ai o,” oluk mo’gulentesi. 28Asogo mo’gulentesirik, wene ologun wusogo re, disogo mo’gulentesi,
“Asogo egei ai en, wene yu henaluk emagoluk mo’gulhentaik,
Allah en e, aphwami logon, at en delenebiso wene ai, is aphwami o’borl o’gwe a’ge mo’gulentai louwagoluk yo’go enebesimu mo’gulontogwi o. Is asogo mo’gulontogwiam, enesa’go hologo tua o, oluk henaluk emagoluk mo’gulhentegis ai o,” oluk Paulus en mo’gulentesi.
[ 29Asogo mo’gulentesimu, is ap Yahudi a’ge ebano ’bogologulat e, is-is eniak logat sagal-sagal ’bogoligisa.]
30At Paulus o Roma eba welat, o mesik lodu nak weleigoluk o’go ’balegeitik, 2 tahun eba oruakma re, aphwami esan at ebe houwogoluk e’bek waga legesa. Wagaiam e, at en enebe ’berlek opsogo nak wogenebise laga. 31Asogo wogenebisoam, is pema en wene yagoum erlakma en oruakhwe, at ogorlok erlak ’baksogoat wene Allah en eragam enebasu wene ano mo’gulentasulat, nonue ’gain Onuk Logo a’ge Yesus Kristus taga laga wene ano mo’gulentasulat, taga laga.
اکنون انتخاب شده:
Peragenebesi 28: Wul
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
