Peragenebesi 17
17
O Tesalonika en eniak logat sagaligisa wene
1At Paulus Silas e’birek o eba en e, o Amfipolis en Apolonia en ’bekhit o kota Tesalonika wegesa. O Tesalonika eba re, o aphwami Yahudi a’ge se’ban ogu legesema mesik werik welaga. 2Asogo werik oruakma, at Paulus o se’ban ogumu eba werik oruak holuk ’gwise laga ’gela’geat ene’bek ’gwegei. ’Gwegeirik e, se’ban henaganak a’ge pam se’ban eba ogulat, wene Allah iak pelal wogo a’ge ano pam onogola ’gagalogo hin wogentasuam e, is en o’go mo’gulogulat, togu legesa. 3Allah iak pelal wogo a’ge ano pam se’geksogo mo’gulentasulat e, disogo mo’gulentasu laga,
“At Kristus Allah en perakpou wema oluk egesa ano re, di obotut yu obotut hil-hil warotluk en, elaluk ema ani o, oluk egesa. Is egesa ai ’gela’geat, at Yesus tegei wene obok mo’gulhentasu legi a’ge yu, tu hegitsogoat tegeimu o. Allah en perakpouma oluk egesa ai, ebe re, Yesus aiat o,” oluk mo’gulentesi. 4Asogo mo’gulentesimu re, is aphwami ado pema en,
“Demat o,” oluk wene ai wegesarik, is Paulus Silas oruak o’gwe lai legesa. Ai ’gela’geat, is aphwami Yunani a’ge Allah iak wegesarik enebe Yahudi a’ge ’gela’ge welegesa a’ge esanat is oruak o’gwe lai lagalat, hwami ’gaindek a’ge enebe a’bigat is oruak o’gwe lai lagalat, tigisa.
5Enebe esanat is Paulus Silas e’birek oruak o’gwe asogo lai legesema, is aphwami Yahudi a’ge ’bousogo, is ap enebabut wiak a’ge weat o selimu oruakma enebe wogonoboluk e, esan pulogo aphwami o kota Tesalonika eba a’ge enede edikpil legesema, wene logat aga. Asogo agama, at Paulus Silas e’birek ene’gik lisogo aphwami esanat ene’bek wogonoboluk louwogoluk, heraenebil, esan pulogo o ap Yason oruakma o lasi legesa. 6O larugulat, Paulus lak enebe erlak en e, Yason emin, Allah eiyagai pema akhit emin, ene’gik lisogo ap ’gaindek pemerintah a’ge ene’bek wogonoboluk wegesa. Wogonoboluk wegesarik e, eniak loksogoat disogo mo’gulentigisa,
“Ap o di owi yu owi orogole wiagetil no’gwi a’ge ebano yema wegesarikmu re, 7at Yason yu en wogenebegeimu. Is ap ai en e,
Nonue ’gain Onuk Logo a’ge muat Yesus oruak o, oluk nonue ’gain Kaisar iak ukpogwi o,” oluk mo’gulentigisa. 8Asogo mo’gulentigisema, is ap ’gaindek pemerintah a’ge emin, aphwami enebe esan ebano emin, onolot het aga. 9Onolot het agama re, is ap ’gaindek pemerintah a’ge ebano en Yason lak en o’go wogontouwagoluk mo’gulontogwiam wogentigisema re, enebe ene’gik herle hebilogo lebigenebegesa.
At Paulus lak o Berea wegesarik tigisa wene
10Asogo lebigenebegesema, o hik egeimu re, is Allah eiyagai en Paulus Silas e’birek o Berea peragonobou wegesa. Peragonobou wegesema wegesarik e, o aphwami Yahudi a’ge se’ban ogu legesema ’gwigisa. 11Is aphwami Yahudi o Berea a’ge enebabut e, aphwami o Tesalonika a’ge enede ’buk welegesa ai ’gela’ge re, erlak. We, is e, wene a’goluksogo wogulat,
“Wene Paulus egei ai demat a? Erlak a,” oluk, Allah iak pelal wokho pegesa a’ge ano nin hwedik nan hwedigat onuk tualogulat dokhumsogo ’gwelakhogu legesa. 12Asogo ’gwelakhogulat e, aphwami Yunani a’ge, hwami ’gaindek emin, ap esan emin, enebe logat enede Yesus ebam he’berigisa. 13Asogo he’berik pegesema re, aphwami en onobok ogulat e,
“Paulus en e, Allah iak o Berea mo’gulentasu o,” oluk ogwiam e, is aphwami Yahudi a’ge o Tesalonika welegesa a’ge ebano enesa’go hweligisarik e, wegesa. Wegesarik e, aphwami a’bik ebano wiak tuagoluk enede lopungtak pogulat, enede edikpogulat, tigisa. 14Asogo tigisema, Silas Timotius e’birek, o eba mo ogukhwe, is Allah eiyagai ebano en, Paulus nak,
“Perlene lak o,” oluk wik-wok ik laut lok ye’gelak esa’goma wegesa. 15Asogo wegesarik ik olo’gwe woluk o kota Atena wegesa. Wegesarik togolik o Berea louwogoluk togumu, at Paulus en e,
“Silas Timotius e’birek perleneat ne’bek wemak o,” oluk wene wusogo peragenebesimu legesa.
At Paulus o Atena welat tegei wene
16At Paulus en, Silas Timotius e’birek yerentarok o kota Atena eba welat e, o eba dogwi asua owi modok a’bik werik oruakma il holuk, ogola modok wiak aga. 17Ogola wiak agarik e, nin hwedik nan hwedik o aphwami Yahudi a’ge se’ban ogu legesema eba ’gwegeirik, is Yahudi a’ge emin, we a’ge en Allah iak wegesarik Yahudi a’ge ’gela’ge welegesa a’ge emin, at en wene onogola ’gagalogo mo’gulentasuam, is en at o’go mo’gulogu legesa. Asogo ogulat e, aphwami pasar o’go wogumu loluk, aphwami enemin sarlok togulat, at en wene onogola ’gagalisoam, is en o’go mo’gulogulat togu legesayat. 18Asogo togulat e, at en is aphwami wene Epikuros wene tenak welat is logon mo’gulontogu legesa a’ge emin, wene Stoa wene tenak welat, is nin pema en mo’gulontogu legesa a’ge emin, wene onogola ’gagalogo mo’gulontogwiam, is en o’go mo’gulogulat, is en at mo’gulogwiam, at en o’go mo’gulentasulat, togu legesa. Asogo togu legesa a’ge logon en e, at Paulus paget disogo egesa,
“At e, wene aluk no? Eferlak o. We, wei nak aluk welat e, iak nak modok a’bik mo’gulnentasu o,” oluk egesa. Asogo egesema, is logon en e, at Paulus en op wene mo’gulentasulat e, Yesus en tegei wene mo’gulentasulat, aphwami warotlukmu en Allah en enelalugabenebiso wene mo’gulentasulat, ese laga ai en e, disogo egesa,
“Aphwami mu a’ge onodogwi enasua wene paget mo’gulnentasu hwi a,” oluk egesa. 19-21Asogo egesarik, is aphwami o Atena a’ge eba onowirak a’ge ’berlek emin, ap ’bok eba welegesa a’ge emin, enebabut e, mu a’ge tu erlakma en, we, wene ’get woluk wagaiam enesa’go hologulat, wene ebe ’belo’gogulat, togwi modok wolom enagai welagai ai en, Paulus ebe woluk e, aphwami o Areopagus wene ologun worogumu eba odoktogwiam ene’bek woluk legesarik e, disogo mo’gulegisa,
“Hat wene ’get woluk wegentik mo’gulnentasu legen ai re, nis nenesa’go hologulat, mu a’ge opogu lege ai en, nis wene ai ebe no’gwe a’ge, oluk dokhumsogo nenaluk om nenagai o,” oluk mo’gulegisa
22Asogo mo’gulegisema, at Paulus ebe ap ’gaindek o Areopagus eba odoktigisa a’ge ebano, ene’gerlakma en inagarik e, disogo mo’gulentesi,
“Ap Atena a’ge yu logwe. Narilak norokhwi. His e, di a’ge yu a’ge paget tuogoluk e, dogwi asua aiat henede hwedik henebabut ’balise legi o. 23An o his honowi seli’gwe yema denagalat, o asua togu legep o’gwe nil hil denagalat, dogwi asua mesik owi werikmu uam wusogo pogu legepma eba pelal disogo oluk ebam wogo oruakma nil hegi o,
Yu walhebak neneperlak a’ge paget o, oluk pelal wogo oruakma hegi. His heneperlak welat erliktogu legep ai, ebe re, an en se’geksogo mo’gulhentaik. 24#1Raj. 8:27; Yes. 42:5; Per. 7:48Allah enat e, o ’gwiang yema walhasulat, di a’ge yu a’ge ’berlek walhasulat, tegeirik e, ’bogorl ’gwiang eiye ’gainat welago ai o. Holuk e, dogwi asua owi aphwami ene’gik en worogwi a’ge eba ogola at Allah wolom e, mia o. 25Nis aphwami ’berlek e, at enat nenebe nenelalugapnenebasulat, nenemde a’ge woknentasulat, di a’ge yu a’ge woknentasulat, tiso ai en, di a’ge yu a’ge at erlagaik oluk nis aphwami en wogoum mia o. 26At Allah enat, di aphwami yu aphwami o onowi lo’bok welemagoluk, o hwerli pasulat,
Tahun yu pam wolomtik, yu pam erlak emak, oluk hwerli pasulat, ede naduk epesirik en, di aphwami yu aphwami ena’gul onuk lo’bok ’berlegat wiyaletil louwagoluk, edip pam e, ap mesigat walhesi. 27Asogo walnentesi ai re, aphwami enil hopnik a’ge en di a’ge yu a’ge palo togwi ai ’gela’ge, aphwami nena’gul onuk lo’bok en at Allah ebe heratogulat, nenaluk agalat, tuagoluk walnentesi ai o. A’ge re, at ebe walek welago puk. We, nenebe lo’bok neneragam horok yayat welago yo. 28Is ap pema en naduk asogoat oluk disogo egesa,
At Allah anni pam ebe nenemin hwedik nenelaluk welat, ebela lagalat, di a’ge yu a’ge togulat, togwiat welege, oluk egesa. Asogo weni ap his a’ge en ogo disogo oluk,
Nis ’berlek e, at eiyagai welege, oluk egesa ai. 29Nis asogo at eiyagai welege holuk e, at ebe ’gela’ge nis aphwami en nenede opoluk, nene’gik en dogwi asua emas a’ge, perak a’ge, helep a’ge, ogut walsogo woru erlak hegi, oluk pobitu o. 30-31Is naduk Allah ebe eneperlak welat, enebabut wiak togukhweat de, at en epe mosogo ugenebasu laga. Asogo a’geat de, yogodak ya re, at en e,
Di aphwami yu aphwami ’berlek agauwa mesik erlige enemdema wokho wene enebam pasulat, no’gorliselat, ’bekhitsogoat tuak, oluk ap mesik pulogo poluk yo’go pesimu oruak ai en, nis aphwami wiak togu lege a’ge ukpoluk nenebabut heberlemagoluk mo’gulnentasu ai o. Holuk, nis en e,
“Wene asogo tua ai, demat, oluk, nis ’berlek pobi tuagoluk, ap ai ebe waragoam e, aik en togolik elalugap pesimu oruak o,” oluk mo’gulentesi.
32“At waragoam e, elalugap pesimu oruak o,” oluk mo’gulentasuam, enesa’go hweligisarik, is pema en e, Paulus eidarak pegesa. Ye, is ado pema en e,
“Wene e’gen ai, nis pobuk nenesa’go holuagoluk nin erlige holuk mo’gulnontoat o,” oluk mo’gulegisa. 33Asogo mo’gulegisema, at Paulus is o eba ukpoluk libaga. 34Asogo ukpoluk libaga a’geat de, is aphwami ado pema at e’bek la’buli legesarik e,
“Wene ai demat o,” oluk enede Yesus ebam he’berik pegesa. Is ai mesik onuk Dionisius, is ap ’gaindek o Areopagus ai emin odoktogu legesa a’ge. Ye, hwe mesik onuk Damaris, ye, is logon eneminat asogo enede Yesus ebam he’berik pegesa.
اکنون انتخاب شده:
Peragenebesi 17: Wul
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
