Peragenebesi 18
18
At Paulus o Korintus wagarik welat taga laga wene
1Asogo toluk e, at Paulus o kota Atena eba ukpoluk o kota Korintus waga. 2Ebe owan wom erlak oruakhwe, ap ’gain Klaudius en e,
“Aphwami Yahudi a’ge enebe o kota Roma welema erlak. Modogat ’bok lebemak o,” oluk wene ’balegeimu re, ap Yahudi a’ge mesik onuk Akwila. Ebe o Pontus eba en dagaga a’ge. Ugwe onuk Priskila e’biregat, o Italia en is naduk o Korintus ’gerat legesarik oruakma, at Paulus pobuk wagarik entau waga ai o. 3Is Akwila Priskila e’biregat ene’gik o’go paget e, o sum owi a’ge egesogu legesa. At Paulus e’gik o’go paget asogoat egesise laga ai en e, is ene’bek wagarik welat, eneminat egesogu legesa. 4Asogo enemin egesiso welat, nin hwedik nan hwedik Allah paget agauwa weat welat se’ban uogoluk tugumu, o aphwami Yahudi a’ge se’ban ogu legesema eba ’gwegeirik e, is aphwami Yahudi a’ge et, Yunani a’ge et, Yesus iak wouwagoluk enede ’gagalise laga.
5Enede ’gagalisokhwe re, is Silas Timotius e’birek o Makedonia en wegesema re, at Paulus mu a’ge mesik tu erlak, we, wene aiat mo’gulentasu modok welaga. Is aphwami Yahudi a’ge disogo mo’gulentesi,
“Allah en e, Kristus perakpou weigoluk obok mo’gulnentesi ano ebe re, ebe Yesus waga aiat o. An naluk o,” oluk ’baksogo mo’gulentasu laga. 6Asogo mo’gulentasukhwe re, is en e,
“Wiagat ese legen o,” oluk obok wiak ’balogu legesema re, at Paulus en e,
“An wene nebam erlak o,” oluk u ’gela’ge, osum o’borl o’gwe a’ge ollong hosogo ’belakpasulat e, disogo mo’gulentesi,
“His honu’gwarek en nalorogup holuk e, heneba lo’bogat o. An nebam erlak o. Hwerli yogodak hwerli en, an aphwami o’borl o’gwe a’ge wene mo’gulentai laik o,” oluk mo’gulentesirik e, 7is o eba ukpoluk libegesarik e, ap o’borl o’gwe a’ge Allah iak wesi a’ge onuk Titius Yustus ai owi pam laga. At owi ai re, o is aphwami Yahudi a’ge se’ban ogu legesema eba eragamat werik welaga. 8Ap Krispus, o aphwami Yahudi a’ge se’ban ogu legesema eba ’gain eiye welaga a’ge ebe emin, eiyagai emin,
“Wene ai demat o,” oluk enede nonue ’gain Onuk Logo a’ge ebam he’berik pegesa. He’berik pegesema re, is aphwami o kota Korintus a’ge logon enebe esanat wene holholuk e,
“Demat o,” oluk wogu legesema re, enemin ik olomu ’belabenebigisa.
9-10Asogo tigisema re, agauwa mesik o huba’go nonue ’gain Onuk Logo a’ge en Paulus abi ’gela’ge pam wene disogo mo’gulesi,
“Hogorlok hagun o. An pekhiarok modogat welegi o. O yema an neiyagai enebe a’bigat oruakma re, aphwami logon en wiagaphobuogoluk disogo yusogo logon takhobouwa erlak o. Holuk e, mo u erlakma en wene mo’gulentasu modogat wolomup o,” oluk mo’gulesi. 11Asogo mo’gulesi ai, 1 tahun welagarik en, dugwi hebarlik pam enemin Paulus ebe o eba mo egeitik welat, Allah iak mo’gulentasu welaga.
12O propinsi Akhaya eba ap ’gain Galio gubernur welemagoluk edikpogwiam oruakma re, is aphwami Yahudi a’ge enebe odoktak poluk, Paulus ebe woruogoluk tenak pegesarik e, emdema wouwagoluk ap wene enebam pogulat, no’gorlogulat, togwi a’ge ene’bek woluk legesa. 13Ebe woluk legesarik, wene ebam pogulat e, disogo egesa,
“Ap yu en e, wene Allah en nenesa’go weregei wene ano ukpoluk, Allah ebe nak erliktogulat e, mu a’ge togu lemagoluk enede ’gagaliso a’ge woluk wege o,” oluk mo’gulentigisa. 14Asogo egesema, at Paulus en wene o’go ik ’galma re, at Galio en aphwami Yahudi a’ge mo’gulentasulat e,
“His aphwami Yahudi a’ge yu logwe. Wene ebam pegeptik woluk wegep yu re, nis pemerintah Roma a’ge neniak sagalogo poluk wiak logat telipmu en woluk welepma re.
Obat mo’gulnosu egep, oluk, his en ogukhwe nesa’go hwelak welle o. 15A’ge re, wene yu his heniak paget, ononuk paget, his togu legep a’ge paget, ebam poluk woluk wegeptikmu re, his heneba lo’bok en hegirap tip o. Wene ategenik a’ge, an en hegirap tu re, erlak o. Nebit o,” oluk mo’gulentesi. 16Asogo mo’gulentesirik e, owene enebam pogulat, no’gorlogulat, tugumu eba en mukho lebigenebesi. 17Lebigenebasuam e, is aphwami logon ’berlegat en e, ap onuk Sostenes, o aphwami Yahudi a’ge se’ban ogumu eba eiye ’gain welaga a’ge ano, ebe tenak poluk e, owene enebam pogulat, no’gorlogulat, togu legesema eba ebe ’go’bu werigisa. Asogo worogukhweat de, at Galio ano en e, erlele wo erlak ebakhenneat mo egei.
At Paulus togolik o Antiokhia laga wene
18 #
Bil. 6:18
At Paulus agauwa esanat Allah eiyagai o kota Korintus a’ge enemin eba welegesarik en e, pobuk is o eba hau wusogo onoboluk, hwe Priskila ogun Akwila e’birek eneminat wogonoboluk e, ik olo’gwe ik so pam toluk o Siria louwogoluk tigisa. Tigisarik, o kota Kengkrea legesarik eba welat,
“An Allah emin hwedik welege, oluk nasu yit-yat hwerli ai hwerli welemagoluk ukpaik o,” oluk ukpesirik welaga a’ge,
“Hwerli yu hwerli arat o,” oluk perlengsogo ’balegei. 19Asu asogo ’balegeitik, o eba en o Efesus legesa. Legesarik e, is Akwila Priskila e’birek eba onoboluk e, o aphwami Yahudi a’ge se’ban ogumu eba ’gwegeitik e, is Yahudi a’ge eba welegesa a’ge, wene at en enede ’gagalogo mo’gulentasuam e, is en o’go mo’gulogulat, is en at mo’gulogwiam, at en o’go mo’gulentasulat, togu legesa. 20Asogo togu legesarik, is en e,
“Hat yema agauwa esanat nenemin wolomultik en de, lanok o,” oluk tenak pouwogoluk tigisa a’geat de, at en e,
“Nebit o,” egei. 21Asogo egeitigat de, laiogoluk tagalat, disogo mo’gulentesi,
“His egep ai Allah en op oluk epasu holuk e, an pobuk hene’bek weik o,” oluk o Efesus eba en ik olo’gwe ik so pam o Kaisarea laga. 22O Kaisarea lagarik e, Allah eiyagai o Yerusalem a’ge hau warenebi lagarik e, pobuk togolik o Antiokhia waga. 23O Antiokhia wagarik welagarik en e, pobuk o propinsi Galatia emin, Frigia emin, wagalat e, eba is aphwami Yesus iak wegesa a’ge enede ago warenebil nese laga.
At Apolos o Efesus welat wene mo’gulentasu lagarik, pobuk o Korintus wagarik taga laga wene
24Ap Yahudi a’ge mesik onuk Apolos. Ebe o Aleksandria dagaga a’ge, o Efesus wagarik welaga. Iak ya’gorak welat e, Allah iak pelal wogo a’ge ano aluk modok welaga. 25Oruakma re, is pema en e, nonue ’gain Onuk Logo a’ge e’berlik lagai wene ai mo’gulegisema wik-wok e, ik olomu ’belabonobogwi wene ai, Yohanes en ik olomu ’belabenebise laga wene ai nak aluk welaga. Asogo a’geat de, Yesus iak annisogo mo’gulentasulat, hegitsogo mo’gulentasulat e, taga laga. 26Yesus iak wesirik e, o is aphwami Yahudi a’ge se’ban ogu legesema ebano ’goluk, ogorlok erlak welat, wene ’baksogo mo’gulentasu laga. Mo’gulentasuam e, is hwe Priskila ogun Akwila e’birek enesa’go hweligisarik e, ebe woluk onowi pam legesarik e, Allah en at e’berlik laga lemagoluk ogola epasu a’ge wene ai dokhumsogo mo’gulogu legesa. 27Mo’gulogu legesema re, o Akhaya weigoluk egeimu, Allah eiyagai o Efesus a’ge en, wene pelal wokho is o Akhaya a’ge Yesus iak wegesa a’ge ene’bek perakpogulat e, disogo egesa,
“Apolos hene’bek waga ai opsogo wemit o,” oluk pelal wokho wogigisema woluk laga. Lagarik e, is aphwami o Akhaya a’ge Allah ebabut op en wene demat oluk wegesa a’ge logat lerentasu laga. 28Lerentasulat e, is Yahudi a’ge enemin aphwami enilem wene ’balogulat e, at iak ya’gorak ai en e, is eniak mabenap poluk, at iak anni agarik e, Allah iak pelal wogo a’ge ano pam mo’gulentasulat e,
“Allah en e, Kristus perakpou weigoluk obok mo’gulnentesi ano, ebe Yesus perakpou waga aiat o,” oluk ’baksogo mo’gulentasu laga.
اکنون انتخاب شده:
Peragenebesi 18: Wul
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
