1 Korintus 3
3
“Nenebe Allah eragam a’ge welege o,”
oluk mo’gulentesi wene
1Narilak norokhwi. An en naduk e, wene aphwami Allah Arogun onogola oruak a’ge mo’gulontogwi ’gela’ge re, mo’gulhonto erlak o. Asogo mo’gulhonto erlak ai re, his Kristus emin hwedik tigeptigat de, henebabut honotogat welat, malik ’get dogo a’ge ’gela’ge welegep ai en e, aphwami enebabut asogo oruakma mo’gulontogwi ’gela’ge mo’gulhentegis ai o. 2#Ibr. 5:12,13An en e, aphwami enarlue a’ge so’boru erik a’ge wogontogwi ’gela’ge, his wene hurle a’ge wo mia ai en e, wene hurle a’ge mo’gulhonto erlak o. We, malik ’get dogo a’ge agamu wogontogwi ’gela’ge, wene selakma a’ge nak mo’gulhentegis ai o. A’ge re, yogodak e, asogoat wene hurle a’ge mo’gulhonto a’geat de, miayat welegep ai o. 3His-hisat ’bou togulat, wene ’balogulat, togu legep holuk e, henebabut e, aphwami enebaburat welegep o. Aphwami enebabut onotogat welat togwi ’gela’ge togu legep ai en mo’gulhentegis o.
4 #
1Kor. 1:12
Asogo togulat, his pema en e,
“Nis Paulus akhit a’ge,” ogulat, ye, his nin pema en e,
“Nis Apolos akhit a’ge,” ogulat, ogu legep holuk e, henebabut e, aphwami enebaburat welegep o. 5At Apolos ai sa no. Ye, an Paulus sa no. Nis ai nonue ’gain Onuk Logo a’ge enat ede opoluk neniabuk lo’bok togu lemagoluk yo’go nenebesimu re, at eragam a’ge welege o. Asogo welat, wene mo’gulhentigema re, henede Yesus ebam he’berik pegep ai o. 6#Per. 18:4-11; Per. 18:24-28Wene ai, so’boru owi yorogwi ’gela’ge, an en yeregis o. Ye, at Apolos en e, ik herlelil laga o. Ye, ebe re, at Allah enat logap pesi o. 7Ebe logo onuk oruak e, owi yeriso a’ge ai puk. Ik herleliso a’ge ai pugat o. We, logo onuk oruak e, Allah en ebe logap pasu aiat onuk logo oruak o. 8An owi yeriso a’ge ai emin, at ik herleliso a’ge ai emin, nemin hegit a’geat de, nene’gik o’go re, nenebe lo’bok yabuk togu lomul a’ge hegitsogoat woknontouwa o. 9His henebe ai Allah iabuk ’gela’ge oruakma re, nis ne’birek en Allah paget wokho pogu lege o. Mesik e, henebe Allah owi ’gela’ge oruakma re, nis ne’birek en e, Allah owi wusogo honobogu legeat o.
10At Allah ebabut op en yo’go nebesimu re, o ai wa’gi re, an o nede we’gerlak a’ge en weregismu re, is muon en ebam louksogo worogwi ai o. A’ge re, aphwami enebe lo’bok, o wa’gi ai pam louksogo woruogoluk holuk e, pobirak poluk en enede we’gerlogo woru o. 11At Allah en e,
“O wa’gi ai re, Yesus Kristus ebeat welemak o,” oluk dalegei ai en e, at ap mesik en e, o wa’gi mu a’ge dalu modok mia o. 12O wa’gi ai delak oruakma, ebam louksogo re, is pema en o’go e’gin a’ge ’balogo, emas a’ge pam worogulat, perak a’ge pam worogulat, helebe’gen permata a’ge pam worogulat, worogwi o. Asogo worogukhwe re, is pema en e, e a’ge pam worogulat, e e’gela herle’gela un a’ge pam worogulat, ’buk a’ge pam worogulat, worogwi ai o. 13Asogo worogumu, at Kristus pobuk wema ai erlige re, aphwami en o werigisa a’ge lo’bok op a? Wiak a, oluk odouk pam walhasuam, ’baksogo enagat agokhwe enil houwa o. 14Asogo walhasuam e, at mesik en o wa’gi ano pam weregei a’ge odouk nasu erlak welema holuk e, e’gik o’go wogemayat o. 15Asogo a’geat de, at mesik en o weregei a’ge, odouk nasu holuk e, owi nasumu enebe degelogo enebei lagai ’gela’ge, at o weregei a’ge ai ebe nak e, degelogo pei louwa a’geat de, o’go nalema o. 16#1Kor. 6:19; 2Kor. 6:16Nis nenebe Allah owi werigat, oluk e, heneperlak no? Allah Arogun nonogola owi wusogo welago, oluk e, heneperlak no? 17His henebe, at Allah owi werigat welegep ai, at en a’geat welegep o. Holuk, his en Allah owi werik ai wiagap poma re, at en his wiagaphonobuayat o.
18Honu’gwarek en henebe lalogup no o. Hat ap mesik en e,
“An aphwami yema onowene a’ge nede ’gagalak o,” oluk epasu legen holuk e, hedemu dem wene ai ’gagaluagoluk e, aphwami onowene ai hede ebis emak o. 19#Ayu. 5:13Aphwami ’gwiangma a’ge en e,
“Nis aphwami nonowene nenede modok ’gagalak o,” oluk opogwi holuk e, Allah en e,
“Enede ebis oruak o,” oluk epasu. Is ap Allah iak pelal wokho pogu legesa a’ge en e,
“’Baik herle pogwiam ’gotnoksogo wathasu ’gela’ge,
is aphwami ’gwiangma a’ge yema enede ’gagalak ’gela’ge welat lalonobogwi ai pam, ’gotnok osoam e,
Allah en wiagabonobua a’ge oruak o,”
oluk pelal wokho pegesa. 20#Mzm. 94:11Ye, wene mesik e, yuat,
“Is aphwami enede ’gagalak a’ge en enede eberogwi ai re,
we ’burlat eberogwi o, oluk Nenaik ’gain Onuk Logo a’ge enaluk o,”
oluk pelal wokho pegesema oruagat. 21-22Holuk e, an Paulus nebe emin, at Apolos ebe emin, Kefas ebe emin, o ’gwiangma yema ’berlegat emin, enelaluk welagai ai emin, waragai ai emin, o yogodak ya welago a’ge emin, pobuk ema a’ge emin, eba ’berlegat e, his eiye ai en e, his en e,
“An nue ai o,” oluk aphwami a’ge paget erlikhwerlagup o. 23His henebe ai, eiye re, Kristus o. Ye, Kristus ebe eiye re, Allah at o.
اکنون انتخاب شده:
1 Korintus 3: Wul
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید