1 Korintus 4
4
“Nis Kristus eragam a’ge welat disogo togu lege o,” oluk mo’gulentesi wene
1His en nis nenebaget e,
“Is enebe Kristus eragam a’ge, wene Allah ede epasu wene aphwami ’gwiangma a’ge eneperlak a’ge mo’gulentil no’gwi a’ge o,” oluk pobirak nonobogu lomup o. 2Is ap ’gain ena’ge di a’ge yu a’ge is eneragam a’ge ene’gikmu welemagoluk enebabut ’balogo re, enebabut ha’buktak a’ge holugat onobogwi. 3A’ge re, an en asogo tagoam e, his en de a? Is logon en de a, ogulat e,
“At hegit tago de a? Wiak tago de a,” oluk nemdema woknio re, mia epasu legi o. Ye, an nu’gwarek en u ogo re, miayat o. 4An nu’gwarek en,
“Wiak mesik tu erlakma,” oluk epasu legi ai pam, wene nebam a’ge no’gorlik erlagat o. We, at nonue ’gain Onuk Logo a’ge en wene nebam pasulat, no’gorliselat, tu o. 5Ai en e, at en wene aphwami enebam pasulat, no’gorliselat, tua ai erlige owan lau wom erlak oruakhwe, his en is logon wene enebam pogulat, no’gorlogulat, tu modok erlak o. We, at nonue ’gain Onuk Logo a’ge ebe wemarik en de, aphwami en huba’go hisakho togwi a’ge selakma pasulat,
Disogo tul, oluk opoluk onogola sebelak oruak a’ge ebano ’baksogo pasulat, tuma ai yetharok wolom o. Asogo ’baksogo pasuam e, Allah en e, op tigisa a’ge enebe lo’bok erligonobu a’geat erligonobua o.
6Narilak norokhwi. An wene mo’gulhentegis ai re, his pema en e,
“His honue ai mia a’ge re, nis nonue yu nak e, logo yo,” oluk erlikhwerlagupno oluk mo’gulhentegis o. Asogo erlikhorlo mia oluk e, disogo ogwi epegi,
“Wene Allah iak pelal wogo oruakhwe ebam louksogo mesik ogup no yo,” oluk ogwi ano pobi tuagoluk, nis Apolos e’birek nenebam elitsogo mo’gulhentegis ai o.
7“Is pema eba mia a’ge re, an nak e, logo modok, oluk ogu lomup,” oluk sa en mo’gulhentesimu ogu legep. His hena’ge di a’ge yu a’ge hwerlogu legep ai, Allah enat wokhentasu erlak no? At enat wokhentasu o. Asogo wokhentasuam horlogu legep a’geat de, his en walhegep a’ge ’gela’ge honu’gwarek en erlikhorlogu legep ai nopaget. 8His di a’ge yu a’ge arat hwerlegep hegi. Arat ’gain egep hegi. Nis uo ’gela’ge oruakhwe, his nak e, ’gain hononuk logo a’ge arat egep hegi. His asogo ’gain hononuk logo a’ge elepma re, nis neneminat ’gain nononuk logo a’ge wollo yo. A’geat de, erlak o.
9Nis ai re, aphwami enapseri a’ge aphwami enilem selakma enebe mi-miarak onoboluk ene’gerli wusogo waronobogwi ai ’gela’ge, nis Allah en yo’go nonoboluk peraknonobou wagama wege a’ge ai, aphwami emin, malaikat emin, enil pam asogoat taknonobogwi o. 10Nis e, Kristus paget nenebe uo a’ge ’gela’ge oruakhweat de, his nak e, Kristus emin hwedik welat henede ’gagalak welegep hegi o. Nis maben ’gela’ge oruakhwe, his nak e, henannisogo welegep hegi. Nis onogola en mi-miarak nonobogukhweat de, his nak e, erlikhonobogwi hegi o. 11Nis o page eba en yogodak hwerli, so’boru emin, ik emin, neleat welege ani. Asogo welat, nonosum erlak a’geat oruakma ’go’bu watnonobogukhwe, nonowi erlakma, o di owi yu owi denaga lege. 12#Per. 18:3Asogo denagalat, di a’ge yu a’ge horlouwogoluk, yabuk nonu’gwarek en, nenannisogo wokho horlogu lege. Aphwami en heman nonobogwiam, nis en nenede aganhan enebam pogulat, di obotut yu obotut taknonobogwiam, nenepe mosogo welat, 13nonobok wiak ’balogwiam, neniak sakhosogo mo’gulontogulat, togu lege. Asogo togukhwe, o page en yogodak hwerli aphwami yema ’berlek en e, ollong hosogo lebikpogwi ’gela’ge, nis asogo taknonobogwiat oruak o.
14An en pelal wasu legi yu re, his hene’gerli werigoluk wasu legi puk. We, his henebe an neiyagai demat a’ge ’gela’ge nede hwedik welat henesa’go werise legi o. 15His Kristus emin hwedik oruakma re, ap wene mo’gulhontogwi a’ge enebe 10.000 a’bigat oruak a’geat de, henaik e, a’bik puk. We, eneiyagai dagonobogwi ’gela’ge, an enat wene op wene ai mo’gulhentau wegirik Kristus Yesus emin hwedigaphenebegimu welegep ai pam, henaik nemategat egirik welegi o. 16#1Kor. 11:1; Fil. 3:17Ai enat,
“An nebabut wemit o,” oluk niak ningsogo henesa’go werise legi o. 17His an nebabut wagup ani oluk, nomlogo Timotius, nu’gwarek en deregis a’ge ’gela’ge ebe nede hwedik a’ge hene’bek perakpou wegi ai o. At en e, nonue ’gain Onuk Logo a’ge e’birek hwedik welat, at ebaget ebabut ha’buksogo tago a’ge hene’bek wemarik e, disogo mo’gulhontouwa o,
“At Paulus Kristus emin hwedik welat, is Allah eiyagai o di owi yu owi odoktogwi a’ge at u’gwarek tago a’ge ebabut wouwagoluk, disogo mo’gulentasu o,” oluk honogola ebesogo mo’gulhentauma o. 18An his hene’bek weik erlak oluk e, his logon honu’gwarek en erlikhwerlegep ai o. 19Asogo a’geat de, nonue ’gain Onuk Logo a’ge en ede opoluk e,
“Obat, lak o,” oluk mo’gulnoso holuk e, an perleneat hene’bek weik o. Weiktik e, is logon erlikhorlogwi a’ge ai, eniak ua a’ge nesa’go hwelik puk. We, enanni oruak a? Erlak a, oluk enebabut ’balik o. 20Ai re,
“Allah eragam welege o,” oluk, eniak pam ua holuk e, enak ago puk. We, enannisogo togu lema holuk, enagat ago yo. 21A’ge re, an his hene’bek ’go’bu woluk wom ’gela’ge, weiktik e, niak ningsogo mo’gulhentau wom henagai a? At e, niak sakhorak poluk henebe nedesogo mo’gulhentau wom henagai a. His en ’ge ’gela’ge henagai epegep.
اکنون انتخاب شده:
1 Korintus 4: Wul
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید