1 Korintus 2
2
At Yesus ebe e pam edikpoluk werigisa wene
1Narilak norokhwi. Allah iak ai ogola hisogo oruakma, aphwami ’gwiangma a’ge en eneperlak a’ge ai, an en selakma ’baksogo mo’gulhentau wegi ai re, an en niak opsogo nede ’gagalak en, mo’gulhentau wegi erlak. 2An his henemin welat e, nogola en wene we a’ge eberu erlakma en, we, at Yesus Kristus paget eberiselat, logo re, at ebe e pam edikpoluk werigisa wene aiat eberik o, oluk nede epegi. 3#Per. 18:9Nede asogo eberegistik eberiselat e, an nu’gwarek nebe mabenatma nogorlok en nuak erlik-erligat hene’bek wegirik welegi ai o. 4Asogo welat e, aphwami onowene an nede ’gagalak en, niak op en, ningsogo mo’gulhentegis erlak o. We, at Allah Arogun anni pam, mo’gulhentegismu, demat agama re, henil hegep ai o. 5Asogo mo’gulhentegis ai re, his henede aphwami enede ’gagalak a’ge ai enebam eberak poluk wolom erlakma en, we, Allah anni oruak oluk, at ebam eberak poluk henede at ebam he’berik pou wagoluk mo’gulhentegis ai o.
“At Allah ede ’gagalak welaga a’ge ai, ’baksogo mo’gulnentasu o,” oluk mo’gulentesi wene
6Is aphwami enede hurle a’ge holugat, wene hurle a’ge ai enede ’gagalogo mo’gulontogu lege o. Asogo mo’gulontogu lege ai re, is aphwami ’gwiangma a’ge yema, onowene a’ge puk. Erlak o. Onuelak ’gain enebe pobuk erlak ema a’ge o yogodak oruak a’ge yema, onowene ’gagalak wene erlagat o. 7Wene ai Allah ede ’gagalak wene hisogo welaga a’ge selakma ’baksogo mo’gulontogu lege o. Wene ai aphwami ’gwiangma a’ge eneperlak a’geat de, naduk Allah en di a’ge yu a’ge walho erlakma en welat e, at enat nis obapnenebisoam nonogola nenagai houwagoluk ede epesi a’ge hisakhoat sebelak welaga. 8Aphwami ’gwiangma a’ge onuelak ’gaindek o yogodak oruak a’ge yema, wene ai enaluk om erlakma en modok eneperlagat oruak o. Enaluk wellepma re, nonue ’gain Onuk Logo a’ge erliktogwi a’ge ano, ebe e pam edikpoluk wetlip erlagat o. 9#Yes. 64:4Wene ai paget e, Allah iak disogo pelal wogo oruak,
“At Allah en e, di a’ge yu a’ge aphwami en enil hogwi erlak.
Enesa’go hologwi erlak.
Enede en ’gagalhogwi erlak.
A’ge re, ’berlegat nis aphwami at ebe nenede welege a’ge nenebesimu oruak o,”
oluk pelal wokho pegesema oruak. 10Nenebesi a’ge ai, at Allah Arogun en di a’ge yu a’ge ’beneriso ai en, Allah ede hisogo welago a’ge ai eminat ’beneriselat, selakmayat ’baksogo mo’gulnentesi o. 11Nis aphwami nonogola re, sa aluk. Nonu’gwarek nonogola lo’bok nenaluk welege ani o. Ai ’gela’geat, Allah ogola re, is logon eneperlak nak. We, u’gwarek Arogun emategat aluk welago yo. 12Nis en e, aphwami ’gwiangma a’ge yema enarogun wege puk o. We, at Allah ebabut op en woknentesi a’ge nenaluk emagoluk e, at Arogun ’belakpou wagama hwerlege o. 13At Arogun hwerlegerik e, Allah ebabut op en woknentasu wene ai, aphwami Allah Arogun onogola oruak a’ge mo’gulontouwogoluk e, aphwami enede ’gagalak a’ge en mo’gulnontogwiam mo’gulontogu lege puk. We, Allah Arogun en mo’gulnentasuam mo’gulontogu lege o. 14Wene Allah Arogun en woknentasu wene ai, is aphwami Allah Arogun onogola oruak a’ge nak pobi togwi ai en, is aphwami enebabut onotogat welat, pobi togwi erlak o. Asogo pobi togwi erlak ai re, is en e,
“Wene ai aphwami uo a’ge en ogwi ’gela’ge ogwi o,” oluk ogwi ai en, wene ai pobitu erlakma en oruak o. 15Asogo a’geat de, nis Allah Arogun nonogola oruak a’ge re, di wene yu wene pobi togu lege o. Asogo pobi togwiam e, is pema en e, nis nenebabut pobi nonobogwi erlak o. 16#Yes. 40:13Wene ai paget, Allah iak pam pelal disogo oluk wokho pegesa,
“Nenaik ’gain Onuk Logo a’ge ede eberiso ai, sa ’gela’ge enaluk.
At e, sa ’gela’ge en esa’go woru no,”
oluk is ap Allah iak mo’gulontogu legesa a’ge en, pelal wokho pegesa. Asogo a’geat de, nis Kristus ede eberiso wene ai tenak welege o.
اکنون انتخاب شده:
1 Korintus 2: Wul
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید