1 Korintus 1
1
Hau warenebegei wene
1-2 #
Per. 18:1
His Allah eiyagai o Korintus odoktugu legep a’ge, narilak norokhwi. An Paulus Allah ede epesi ano pam, Kristus Yesus en yo’go noboluk peraknobou waga a’ge ano, nenare Sostenes ne’birek en, wene yu pelal wokho hene’bek perakpou wege ai o. His o Korintus a’ge Allah en yo’go henebesimu nonue Kristus Yesus emin hwedik oruakma, Allah en,
“Is yu an neiyagai o,” oluk henebe at u’gwarek ebaget pagathwerlesimu welegep o. Asogo welat e, aphwami o di owi yu owi eba en, is emin, nis emin, nonue ’gain Onuk Logo a’ge Yesus Kristus onuk ’balogwi a’ge henemin ’berlegat wene yu pelal wokho hene’bek perakpou wege ai o. 3Nenaik Allah, nonue ’gain Onuk Logo a’ge Yesus Kristus e’birek enebabut op ano en, op a’ge wokhontogulat, henede ha’bugaphonobogulat, togu lemak o.
Allah en Yesus ebam pegilsogo
obapnenebiso wene
4Allah ebabut op en, Kristus Yesus ebam pegilsogo, op a’ge wokhentasu ai en, nin hwedik nan hwedik hau weriso modok welago yo. 5His Kristus emin hwedik oruakma Allah en henebe ’gainaphenebesimu welegep. Asogo welat, di wene yu wene Allah iak ai edip henaluk modok egeptik e, wene op modok mo’gulontogu legep ai o. 6Wene ai re, Kristus tegei wene mo’gulhentegis a’ge, honogola wegeptik e, henede hurleap pegep o. 7Henede asogo hurleap poluk, nonue ’gain Onuk Logo a’ge Yesus Kristus selakmayat wema oluk, yetharok welat e, Allah en woknentasu a’ge ai, mesik wo erlakma en welegep puk. We, ’berlegat wegeptik welegep o. 8Pobuk e, o ologun pam nonue ’gain Onuk Logo a’ge Yesus Kristus wema ai erlige, his wiak oruakma hentauma no oluk, at Kristus enat henede hurleaphenebasu lema o. 9At Allah en omlogo nonue ’gain Onuk Logo a’ge Yesus Kristus emin hwedik wolorogup en yo’go henebesi ai o. Asogo, at ebabut he’berik a’ge en yo’go henebesi ai en e, demat ema oluk henede mennei daksogoat wolom o.
“Allah eiyagai a’ge enebe me’gerogup no yo,”
oluk mo’gulentesi wene
10Asogo a’geat de, narilak norokhwi. Nonue ’gain Onuk Logo a’ge Yesus Kristus onuk pam, wene mesik henesa’go werik o. His ’berlek henebe me’geru erlakma en, hau werak welat e, heniak mesigat nak ogulat, henede mesigat welat, honogola en wene mesigat eberogulat, togu lomup o. 11Narilak norokhwi. Wene asogo egi ai re, aphwami hwe Kloe oruakma en wegesarik e, disogo egesema en,
“Is-isat wene ’balogwi o,” oluk ’baksogoat mo’gulnosu wegesema en mo’gulhentegis o. 12#Per. 18:24Wene ebe re, disogo ogu legep ai paget egi o. Hat mesik en e,
“An Paulus akhit a’ge o,” eselat e, hat mesik en e,
“An Apolos akhit a’ge o,” eselat, hat mesik en e,
“An Kefas akhit a’ge o,” eselat, hat mesik en e,
“An Kristus akhit a’ge o,” eselat, heniak hundomok ogu legep ai en egi o. 13At Kristus ai ebe me’gisogo mumu agama en a? Ye, at e, his henebaget an Paulus nebe e pam ediknoboluk watnebigisema en a? Ye, at e, an Paulus nonuk ’balogo ik olomu ’belaphenebigisema en a. 14#Per. 18:8; 19:29; Rom. 16:23Erlak o. An en e, his logon ik olomu ’belaphenebegis erlak ebano re. We, at Krispus emin, Gayus emin, e’birek eria nak e, ik olomu ’belabenebegis ebano yo, oluk, Allah hau werise legi o. 15Aphwami en e,
“Paulus u’gwarek onuk ’balogo ik olomu ’belabenebegei,” oluk uano oluk e, enebe eria nagat ’belabenebegis ai o. 16#1Kor. 16:15I! Yekha! An en Stefanus eiyagai enemin ik olomu ’belabenebegismuat hegi o. Asogo a’geat de, is ado ’belabenebegis de a? Erlak a. An neperlak o. 17At Kristus en e, an en aphwami ik olomu ’belabenebise lemagoluk peraknobou waga puk. Erlak o. We, Allah iak op wene ai mo’gulentil denaga lemagoluk peraknobou waga o. At ebe e pam edikpoluk werigisa ano alemat ema no oluk e, an aphwami onowene a’ge ’gagalogo ogwi ai ’gela’ge ese lemagoluk peraknobou waga erlak o.
“Allah owene ’gagalak wene re, Yesus ebe aiat o,” oluk mo’gulentesi wene
18-19 #
Yes. 29:14
Is aphwami nalema a’ge en e, disogo ogwi,
“Yesus e pam edikpoluk werigisa wene ai re, aphwami uo a’ge en ogwi ’gela’ge ogwi o,” oluk ogwi ai o. Asogo a’geat de, at Allah en e,
“Aphwami enede ’gagalak a’ge en wene ’gagalogo ogwi ai, an en ing-dingtak paik o.
Ye, aphwami wene edip enaluk a’ge ai, eneperlagapsogo nelakpaik o,”
oluk egeimu re, pelal wokho pegesema oruak ai en e, nis delnenebiso a’ge en e,
“Wene ai re, Allah anni aiat o,” oluk ogu lege o. 20#Ayu. 12:17; Yes. 19:12; 33:18; Yes. 44:25Aphwami enede ’gagalak a’ge ai emin, aphwami di wene yu wene edip enaluk a’ge ai emin, aphwami wene sorok ogulat eniak anni agai a’ge ai emin, we, ’burlat oruak o. At Allah en e,
“Aphwami onowene enede ’gagalogo ogwi a’ge ai re, aphwami enede ebis a’ge en ogwi ’gela’ge ogwi o,” oluk egei erlak no? 21At Allah ede modok ’gagalak ai en e, disogo egei,
“Aphwami ’gwiangma a’ge en, onu’gwarek onowene ’gagalogo ogwi ai en e, an nebe enaluk om mia o. We, is logon en e, wene dem wene mo’gulentil no’gwiam e, is aphwami ’gwiangma a’ge en opogulat e,
Wene ai aphwami uo a’ge en ogwi ’gela’ge ogwi, oluk ogukhweat de, is nin pema en e,
Wene ai demat o, oluk opouwa a’ge holuk e, an en delenebigat o,” oluk ebam liok egeitik u’gwarek enat egei. 22Is aphwami Yahudi a’ge en ogulat e,
“Wene pobi tul en, elalin a’ge mesik tin da,” ogulat, is aphwami Yunani a’ge en e,
“Wene henede ’gagalogo mesik mo’gulnentemit da,” ogulat, ogwi a’geat de, 23nis nak e, Kristus e pam edikpoluk werigisa wene anoat mo’gulontogu lege. Mo’gulontogwiam e, is aphwami Yahudi a’ge en,
“Wene ai wiak,” oluk ’goboksogo ukpogulat, ye, is aphwami o’borl o’gwe a’ge en e,
“Wene ai, aphwami uo a’ge en ogwi ’gela’ge ogwi o,” oluk ukpogulat, ogwi ai o. 24Asogo a’geat de, is aphwami Yahudi a’ge et, Yunani a’ge et, Allah en yo’go enebesi a’ge en e,
“Allah anni Kristus ebe aiat o. Ye, Allah owene ’gagalak wene, Kristus ebe aiat o,” oluk pobi togwi o. 25At Allah owene a’geat de, is aphwami ’gwiangma a’ge en e,
“Wene ai, aphwami uo a’ge en ogwi ’gela’ge o,” oluk ogwi a’geat de, at Allah ede modok ’gagalak o. Nis aphwami nonowene a’ge nonogola ’gagalak ogu lege ai, nenede ebis a’ge en ogu lege o. Is aphwami ’gwiangma a’ge en e,
“At Allah maben,” opogwi a’geat de, at anni a’bik o. Ye, nis aphwami en e,
“Nenanni a’bik o,” opogu lege a’geat de, maben o.
26Narilak norokhwi. Henebe no’gosogo oruakma Allah en yo’go henebesi no. Henede eberit o. Aphwami his a’ge onogola ’gagalak a’ge emin, enanni oruak a’ge emin, ’gaindek ononuk oruak a’ge emin, enebe a’bigat yo’go enebesi puk. Erlak o. 27At Allah ede enat e, is aphwami ’gwiangma a’ge enede ’gagalak a’ge ai, ene’gerli werigoluk e, aphwami enebabut ing-dingtak a’geat pulogo yo’go enebesi. Aphwami enanni oruak a’ge ai, ene’gerli werigoluk e, is maben a’ge pulogo yo’go enebesi ai o. 28At Allah ede enat e, aphwami ’gwiangma a’ge en erliktogulat logo pogwi a’ge ai, erlagap paigoluk e, is aphwami ’gwiangma a’ge enede en e,
“Is ai enebe re, uo a’ge, enebit a’ge, ononuk erlak a’ge,” oluk opogwi a’ge ai, Allah en pulogo yo’go enebesi o. 29Ai en e, nis aphwami nonu’gwarek en Allah ilem erlikhorlo mia o. 30At Allah enat his Kristus Yesus emin hwedik welemagoluk henebesimu welegep ai. Wene nenede ’gagalogo wolom ’gela’ge re, Yesus ebeat woknentesi. Asogo woknentesimu, at en e, Allah emin pobuk togolik la’bulogo nenebasulat, nenebe Allah paget nenebasulat, delnenebiselat, tago yo. 31#Yer. 9:24Ai enat e, Allah iak pelal wokho pogulat e,
“Aphwami en di paget yu paget erliktuogoluk holuk e,
nonue ’gain Onuk Logo a’ge tegei ai paget erliktu o,”
oluk egesema pelal wokho pegesa.
اکنون انتخاب شده:
1 Korintus 1: Wul
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید