MATIUS 25
25
Kwami ndugum sepulu enpem nden karuk yidnak wene
25:1-13
1”Iri tarem-e Mbal Pem Nagawan-nen tenagaidnak wi-ge yu nggal-et ma-o. Kwami ndugum sepulu iri-ge it ental wanogoluk, it wok unpurak nap imin lid pid yuwokluk mbiriga-o. 2Mborogolar-e, it lima-ge inndi lak woraiga-o. Nde, it lima-ge inndi nggat ponok tak woraiga-o. 3It inndi lak kwami na-ge ental owag-e waniga-t nde, abok pil nggurak yi kandug-e we mbiriga-o. 4Alat nde, it inndi nggat ponok tak kwami na-ge ental owak wanurug-et nde, yi kanduk mbi ondomok tak inidmbe arem kenangguruk mbiriga-o. 5Nde, it wok unpurak nap iri na lobok yigit lag-et lag-et worala-ge, it kwami ereba-ge enlengen lambu lambu luk, nene yiga-o.
6Nene yik tenak worakmu, nggiringgendumu-ge enne ngguloksa yogolar-e: ’Wok kunpurak nap na lobok yij-o! Imin lid pid yobokluk mberer-o!’ luk yiga-o. 7Yogolikma-ge, kwami ereba na oboksa men yigarik, ental paiga-o. 8Pakolar-e, it inndi lak kwami na-nen it inndi nggat ponok tak kwami na yak ondogolar-e: ’Nit nental-e nigi yusu me, kit kinid kanduk mbi menggasa wok nender-o’ luk yiga-o. 9Yiga-t nde, in inndi nggat ponok tak kwami ereba-nen wene erep nggarogolar-e: ’Mondok lag-o. Yi kandug-e kit min nit min nenmanggim-e ndag-e lag-o. Kir-e mburugupndik, kondomok kenmanggim onggo pil mberer-o’ luk yiga-o. 10Nde, it inndi lak kwami na-ge yi kanduk onggo pil mborogola ereya na-net wok unpurak nap na lobok yij-o. Lobok yosolar-e, it lid lud tak woraiga kwami-nen at imin luk kwe wanugwi ma nggogolar-e, tu lerak pij-o.
11Iri rak puruk, abok nggwe-ge kwami erep ya na lobok luk-nen yogolar-e: ’Nap wa-e. Nap wa-e. Tu kuwarak ninpi-o!’ luk yiga-o. 12Yogolikma-ge, it wok unpurak nap iri-nen yosolar-e: ’An-nen yak kendeyeg-o: Kit yu-ge an-e naru bug-o’ luk yak indij-o. 13Iri bem-e iri tarem min jam min-e kenaru buk me, kwara-t yik karok wolmer-o.”
Ap kenan tol wok indidnak pem nden karuk yidnak wene
25:14-30
(Lk 19:11-27)
14”Mbal Pem Nagawan-nen tenagaidnak wi-ge ap misig-e o nin sa mbereyekluk yosolar-e, ndegel ubugwi nap wene mbo unpuruk at arengge na at amanggim tena wolmakluk ininggem pid iri nggal-nen yusu-o. 15It-nen kwarugwi bem enmawi ndak ndag-et ondomok tak tembesa wok ondosolar-e, misik tol-e lima wok tosolat, misik tol-e mberen wok tosolat, misik tol-e misiget nak wok tosolat yij-o. Iri rak puruk nagawan na mbirij-o. 16Mborosola karuk, at tol lima wanid nap na ndaget nak wene worosola, orol iri na konogolar-e, tol-e lima nde nambena wanij-o. 17Iri nggal-et at tol mberen wanid nap na wene worosola-ge, orol na konogolar-e, tol mberen mbi nambena wanij-o. 18Alat nde, tol misiget wanid nap na mborosolar-e, nggweyak yala at eid orol na-ge kura bij-o.
19Kwarat nggal woraruk, ndegel pugwi nap na ineid nagawan na tuguruk lobok yosolar-e, at orol wok indid na bem it inmin wene mbenareyekluk yij-o. 20Iri mbenarosola-ge, tol lima wanid nap na lobok yosolar-e, tol lima nambena wanid na pil lobok luk-nen yosolar-e: ’Nap wa-e. Kar-e tol lima wok nirigen-et nde, tol na bem-e lima yu nambena wanigi yu ki-o’ luk yij-o. 21Yosoloma-ge, at eid-nen at yak tosolar-e: ’Ndegel noboso nap konak mot mot nak kwaroso wa-e. Ob-et kwarigen-o. Kat-nen-e tol marik iri na bem mot mot nak kwarigendik me, nggulok mende nde kinggem pimin-o. Kat keid an nalen pem woraso yu me ngguwasug-o’ luk yak tij-o. 22Iri luk, tol mberen wanid nap na lobok luk-nen yosolar-e: ’Nap wa-e. Kar-e tol mberen wok nirigen-et nde, tol na mberen yu nambena wanigi yu ki-o’ luk yij-o. 23Yosoloma-ge, at eid na-nen at yak tosolar-e: ’Ndegel noboso nap konak mot mot nak kwaroso wa-e. Ob-et kwarigen-o. Kat-nen-e tol marik iri na bem mot mot nak kwarigendik me, nggulok mende nde kinggem pimin-o. Kat keid an nalen pem woraso yu me ngguwasug-o’ luk yak tij-o. 24Iri luk, at tol misiget wanid nap na lobok yarik at yak tosolar-e: ’Nap wa-e. Kat kisilepma yoso iri-ge an-e naru-o. Kat-nen uwi yakit lak sa-t nde, engen mbarosolat, kat-nen uwi pil kagit lak sa-t nde, engen wanosolat yoso iri-ge an-e naru me, 25an mbirigirig-e kat kaye-nen kat korol na nggweyak arem kura bigi-o. Kat kangge yu-o. Tuguruk winde yi-o’ luk yak tij-o. 26Yak tosoloma-ge, at eid iri-nen at yak tosolar-e: ’Ndegel noboso nap meya keberari worak yu-ge wa-e. An-e an-nen yakit lak sa-t nde, engen mbarosolat, an-nen uwi pil kagit lak sa-t nde, engen wanosolat yoso iri-ge kar-e karu bug-a? 27Iri karu nde ala-ge, an norol iri-ge uwang erep lesa wanugwi nap endam pigen nggal-e, an norol min eralu pidnak uwang min iri na nde lesa waneleb-o. 28Iri bem-e, tol iri na at eram-nen waga tol sepulu wanid nap na wok ter-o. 29Nde, arengge worak nab-e arengge erep min nambena wok tosola-ge, at arengge-ge kwarat lombok ma-o. Alat nde, arengge lak nab-e at eram marig-et nak woraidnak na oboksa mengga wanuwa-o. 30Nde, ndegel noboso nap meya ebe lak mende yu-ge ndamuk nak woraso sa mbo ber-o. Iri me-ge yip tosolat, eneyak nggirit marosolat wolma-o.’ ”
Woroksiyem-nen ap enpem mbaruwa wene
25:31-46
31”Ap Ambara na at unu kek tak pem lobok yosolar-e, aid nap oboksa na at imin lobok yogola-ge, at-nen-e nagawan koreyak woraso sa abinal worak iri na me kore yuwa-o. 32Iri luk, ap enlem oboksa-ge at eram ndok wuruwama-ge, lomba wam yik karok woraso nap-nen lomba wam min kambing wam min lena arik tak pugwi nggal, iri nggal-et Ap Ambara-nen-e ap enlem oboksa na lena enarik tak onposolar-e, 33lomba wam-e at inggi kigit ambigit nggwe onposolat, kambing wam-e at inggi kware ambigit nggwe onposolat ma-o. 34Iri luk, Nagawan na-nen at inggi kigit nggwe wolma nap na yak ondosolar-e: ’An Neid-nen imbiringgat tak kinpid nap wa-e. Lobok yer-o. Nggweyak ma yu me ndak wirid kuri-nen kit kenmanggim lid lud tak pidnak nagawan-nen tenagaidnak wi yu winde yil lobok yer-o. 35An nere kasoma-ge, kit-nen-e nunggwi mende mak nirigeb-o. An yi nere ala-ge, yi mak nirigeb-o. An ap sal worasola-ge, kit kenma rak nibigeb-o. 36An nusum lak worasola-ge, sum wok nirigeb-o. An kugi worak worasola-ge, yongga niril lobok yigeb-o. O kubu me worasola-ge, neram lobok yigeb-o’ luk yak unduwa-o. 37Yak ondosoloma, it lud tak nak kwarugwi nap-nen yak togolar-e: ’Nagawan Indo wa-e. Nir-e mepme-nen kat nere kasola keyaruk, nunggwi mende mak korogolat, kat yi nere ala keyaruk, yi mak korogolat yige-o? 38Nde, nir-e mepme-nen kat ap sal worasola keyaruk, nit nenma rak kobogolat, kat kusum lak ala keyaruk, sum wok korogolat, 39kat kugi worak worala, o kubu me worala keyaruk, mepme-nen kiyil mbirige-o?’ luk yak tuwa-o. 40Yak togolikma-ge, Nagawan na-nen wene erep nggarosolar-e: ’An-nen yak kendeyeg-o: An nowot-tak marik komosa meya misik iri na iri nggal kwat ibigep iri-ge an-et kwat nibigeb-o!’ luk yuwa-o.
41Iri luk, Nagawan na-nen-e at inggi kware nggwe wolma nap na yak ondosolar-e: ’Kit imbiri lamut tak kinpidnak nap yu-ge wa-e. Mberer-o. Sere min at-nen idnak aid nap min enmanggim lid lud tak pidnak nigi momtak puk kanduk arem iri me mberer-o. 42An nere worala, nunggwi mende mak nirigit lak yigeb-o. Yi nere worala, yi mak nirigit lak yigeb-o. 43Ap sal worala, kit kenma rak nibigit lak yigeb-o. Sum lak worala, sum wok nirigit lak yigeb-o. Kugi worak worasola, o kubu me worasola, niyil lobok yigit lak yigeb-o’ luk yak unduwa-o. 44Yak ondosoloma-ge, it-nen wene na erep nggarogolar-e: ’Nagawan Indo wa-e. Nir-e mepme-nen kat nere worala nde, yi nere worala nde, ap sal worala nde, kusum lak worala nde, kugi worak worala nde, o kubu me worala keyaruk, yongga kirigit lak yige-o?’ luk yak tuwa-o. 45Yak togolikma-ge, at-nen wene erep nggarosolar-e: ’An-nen yak kendeyeg-o: It ennggendumu marik komosa meya yu na kwat ibigit lak yigep iri-ge, an-et kwat nibigit lak yigeb-o’ luk yak unduwa-o. 46Iri ala-ge, it iri na-ge pempa andi bandi kagolat woragwi sa inpil ngguwa-o. Nde, lud tak nak kwarugwi nap na-ge pempa unlug-et woragwi sa iri me ngguwa-o” luk yij-o.
اکنون انتخاب شده:
MATIUS 25: inondx
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
@LAI 1992, 1994
