MATIUS 24
24
Yesus-nen Mbal Pem Nagawan ama mijarak purak wene yij-o
24:1-2
(Mk 13:1-2; Lk 21:5-6)
1Yesus na-ge Mbal Pem Nagawan ama-nen mborosola-ge, at owosirak lobok yigarik, Mbal Pem Nagawan uwi wiridnak abage na mirik piga-o. 2Alama-ge, at-nen it yak ondosolar-e: ”Ye. Kir-e o yu pidsa kwara ker-o. An-nen yak kendeyeg-o: O yu worogolat kona mendagil laidnak kerep yeba-ge ebem lud lud misiget tet iniksa wolma-ge lag-o. Pidsa mijarak puwa-o” luk yij-o.
Andi bandi kudtak tarem tel kururak wene
24:3-14
(Mk 13:3-13; Lk 21:7-19)
3Yesus na-ge Saitun ndobo bem koreyak worasoma-ge, at owosirak ereba na enarikmu-nen wene yuwokluk, at eram lobok luk-nen at kin wok obogolar-e: ”Kat yigen iri na-ge mepme tarem-nen kwat ma-o? Nde, no mende karuk-nen kat lobok yurak min i worok yurak tarem min-e panggo yusu-o luk yenggerak pul-o? Yak nindi-o” luk yiga-o.
4Iri yogolikma-ge, Yesus-nen wene erep nggarosolar-e: ”Ap-nen konmbol pem lujwa naru, kwil kwalsa wolmer-o. 5Ap kwarar-e an nggal kwasa lobok yuwarig-e: ’Kerisut na-ge an-er-o’ luk yogolar-e, ap kwarat onmbol pem lujwa-o. 6Kit-nen-e wim pogolat san ene tup min kologolat-e, wim obok kologolat yugub-et nde, kwiye kudtak pug-o. Iri nggal kwat ma-t nde, i worok tak posolat-nen kwat ma-ge lag-o. 7Ap enlem misik-nen-e ap enlem misik inmin wim mbarogolat, nagawan misik-nen tenagaidnak wi woragwi-nen-e nagawan misik-nen tenagaidnak wi woragwi inmin wim mbarogolat ma-o. O nin me nan me nogoro mbud yosolat, o lele yosolat ma-o. 8Alat nde, kwami-nen li ndaguwokluk yane witli iri nggal iri kwaruwa iri oboksa-ge tel korosolar-net kwat yuwa-o.
9Iri tarem-e andi bandi rak kunpuwakluk ap ininggem wesera konpogolat, mondok kondogolat ma-o. An nunu bem ala, ap enlem oboksa-nen insili rak kunpuwa-o. 10Nde, iri tarem-e ap kwarat-nen it inndi angin tubu yidnak na keya buwa-o. It na it-net enare pegerak mbogolat, it na it-net nisili kisili yogolat ma-o. 11Nde, enesiget Mbal Pem Nagawan ene lomboksa yugwi nap kwarat men yogolar-e, ap kwarat onmbol pem lujwa-o. 12Nde, wene kuruk tugwi na mondok wigak yil mborosolar-e, ap kwarat-nen ap enabuwa kagwi na inndi kol ma-o. 13Alat nde, ta-nen nde irit momak puruk worasoma, woroksiyem wok yuwa nab-e imiri yuwa-o. 14Nde, Mbal Pem Nagawan-nen tenagaidnak wi wene, aid wene iri-ge ap pidsa-nen enaru makluk, yi wi ndi wi oboksa yak indil nuwa-o. Iri rak puruk-net woroksiyem-e wok ma-o.”
Andi bandi rak unpuwa tarem
24:15-28
(Mk 13:14-23; Lk 21:20-24)
15”(Engga yu wonarusu nab-e no yosolat-nen yij-o luk kwara yebet kudtag-o.) Nde, kit-nen yik kagolar-e, Mbal Pem Nagawan ene lomboksa yoso nap Ndaniel-nen: ’Iri nggal ma-o’ luk yidnak na ndak ndak tak posolar-e, lak tak onposo mondok meya mende iri-ge o marak ma iri me mendak worala yik kagupndig-e, 16o Yurea woragwi nab-e kwiye-nen ndobo bem ereba mbururag-o. 17Ab-e erema worasoma, at arengge silabaga wolma na-ge wil ludtak pug-o. 18Yapmu wolma nap-nen na at usum wil ijok lem lobok yurak pug-o. 19Iri tarem-e kwami enabila wolma min li kamo mak undugwi min-e enabuwa-o! 20Nde, kwiye mburugup tarem iri-ge o sumbat yosolat, we woragwi tarem nde kwat yosolat ma naru, tepan yogolat wolmer-o. 21Iri tarem andi bandi mondok nggulok kujwa iri-ge ndak worak pid kuri-nen yawo kuri-ge andi bandi iri mende-ge mondok kagwi bug-o. Abok na iri nggal tuguruk kujwa bug-o. 22Nde, Mbal Pem Nagawan-nen iri kwarurak tarem-e poro rak pigit lak yid nggal-e, ap misiger-o luk tet imiri yigit lak yeleb-o. Alat nde, at-nen len inpidnak nap enmanggim-e iri kwarurak tarem-e poro rak puwa-o.
23Iri ala-ge, ap misik-nen kit yak kondosolar-e: ’Yu ker-o. Kerisut-e yeba worasu-o. Are, Kerisut-e ereba worasu-o’ luk yak kondosola-ge, ndemerer-o luk yebet kudtak pug-o. 24Enesiget siget Kerisut min enesiget siget Mbal Pem Nagawan ene lomboksa yugwi nap min nam marig-e, it-nen-e wi yurak mende min kwiye worak mende min kwarat kwarogolar-e, Mbal Pem Nagawan-nen len inpidnak nap ereba na onmbol pem ludtag-e ndak nggal-e, irit kwatleb-o. 25Kwara kinndi yebet ker-o. Awo kwarigit lak ma-net yak kindigi nar-o.
26Nde, ap-nen yak kodogolar-e: ’Yu ker-o. At iri-ge karu me worasu-o’ luk yogola-ge, iri nggwe mbururak pug-o. Are, ’Yu ker-o. Iri me kura worasu-o’ luk yak kondogola-ge, ndemerer-o luk purak pug-o. 27Nde, o pinel-e mo luwaso sa-nen yebek yidnak pem mo mboso sa yebek yil mburusu nggal, iri nggal-et Ap Ambara na lobok yuwa-o. 28Ontogwak woraso sage ontogwak naso towe-nen nil ndok woroso-o.”
Ap Ambara lobok yurak wene
24:29-31
(Mk 13:24-27; Lk 21:25-28)
29”Andi bandi rak unpuwa tarem iri na lak yosoluk ereya na-net molengen ndamuk yosolat, waneya na eyaya pil wagit lak yosolat, wonaru na mbal pem-nen mbuwasolat, teram amawi rak poso mende na nari wari mbosolat ma-o. 30Iri rak puruk, mbal pem-nen Ap Ambara lobok yusu-o. Yenggerak purak mende iri-ge nam ma-o. Iri ala-ge, nggweyak ma woragwi nap enlem pidsa-ge yip togolat-nen yik kujwa nggal-e, Ap Ambara-ge mbal pem woraso nggan nggan pem amawi min abinal kwarat min lobok yosola, yik kujwa-o. 31Nde, posid poba nggulok na ene yosola-ge, at-nen-e at-nen idnak aid nap ereba wirik unpuwama-ge, at-nen len inpidnak nab-e nggweyak unggut empat nggwe-nen na, o nggweyak erep worok siyem min mbal erep woroksiyem min-nen na ndok worak unpuwa-o.”
E ara bem mirik inpid wene
24:32-36
(Mk 13:28-31; Lk 21:29-33)
32”E ara-nen kwaroso yu kenaru mer-o: At ambarok puluruk, angga lebarosola-ge, o kibi yurak tarem-e panggo yij-o luk kenaru yili-o. 33Nde, iri nggal-et an-nen yak kindigi mende na ndak ndak kwaril mborosola kagolug-e, yawo tumende bem panggorak worasu-o luk kenaru yugub-o. 34An-nen yak kendeyeg-o: Yawo worali nap yeba na awo wat yigit lak ma-net an-nen yigi mende na pidsa ndak ndak kwat ma-o. 35Mbal min nggweyak min-e lak ma-t nde, an-nen yidnak wene-ge lag-e ma bug-o. 36Alat nde, iri kwarurak tarem min jam min ap misiger-o luk tet aru bug-o. Aid arem woragwi aid nap-nen na, Ambara-nen na enaru bug-o. Eid ariget nak aru-o.”
”Kinndi kwara-t wolmer-o” luk yid wene
24:37-44
(Mk 13:32-37; Lk 17:26-30,34-36)
37”Nde, Nu worala kwariga nggal, Ap Ambara lobok yuwa tarem na iri nggal-et kwaruwa-o. 38Yi na awo kobong yigit lak ma-ge ap ereba-nen-e nunggwi mende min yi min nonggolat, ap min kwami min wok kerak mbogolat kwat tenak worakmu, Nu na e koma arem nggwid tarem wok yij-o. 39Nde, iri tarem-e it enaru buk worakmu, yi na lobok yosolat ereya na-net it oboksa lak tak inpij-o. Nde, Ap Ambara na lobok yuwa tarem-e iri nggal-et kwat ma-o. 40Iri na tarem-e ap mberen nde yapmu worakmu-ge misig-e wok uburuk mborosolat, misig-e keya bosolat ma-o. 41Nde, kwami mberen nde enmberek mburu marukmu, misig-e wok uburuk mborosolat, misig-e keya bosolat ma-o. 42Iri bem-e kit Nagawan Indo lobok yuwa tarem-e kenaru buk me, kwara-t yik karok wolmer-o. 43Wene yu nde kenaru wolmer-o: O winde iri-nen-e yariya wanurak nap lobok yurak jam aru woragaid nggal-e, at ama ngguwa naru, nene yigit lak, yik karok nak woraleb-o. 44Iri bem-e, Ap Ambara na mimo kir-e peragit lak ma lobok yuwa me, kit-nen na irit mondok lid lud tak puruk wolmer-o.”
Ndegel poso nap mot mot kwaroso min ndegel poso nap mot mot kwaroso buk min enpem nden karuk yid wene
24:45-51
(Lk 12:41-48)
45”Iri ala-ge, mot mot kwaroso indi kwid pidnak ndegel poso nab-e ta-o? At eid iri-nen-e at ama woragwi ndegel ubugwi nap ereb-e at iri na inggem onposolar-e, norak tarem ndak ndak yosola mak unduwakluk at ebem-et poso nap iri-nen yusu-o. 46Nde, ndegel poso nap iri-nen nde at eyabu wok tenak worasoma, eid wok yuwarig-e, ndegel poso nap na-ge alen kwarat kujwa-o. 47An-nen yak kendeyeg-o: At eid iri-nen at arengge oboksa-ge ndegel poso nap na inggem puwa-o. 48Alat nde, ndegel poso nap meya kwaroso iri-nen-e at indi arem-nen perasolar-e: ’An neid iri-ge ndaget lobok yuwa bug-o’ luk, 49at-nen-e yabu misiget erep wanugwi anggamirak ereba na linggamburok ondosolat, anggut engen amburu ndonggosa nunggwi nap inmin-e nasolat, yi nasolat worasoma-ge, 50’Jam iri bem wok ma-o’ peragit lak ma, at eid iri na mimo wok marig-e, 51eid na-nen-e ndegel poso nap iri na mbarep parepsa keya buruk, enesiget siget kwarugwi nap ennggendumu lesa wirik puwa-o. Iri me-ge sa nggwa mbogolat, eneyak nggirit marogolat wolma-o” luk yij-o.
اکنون انتخاب شده:
MATIUS 24: inondx
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
@LAI 1992, 1994
