AEMAWIRISAS 25
25
Paulus atakam Festus aotawef
1Barewen. Festus e propinsi ajarapefen. Bar mamincop aemapef masirin, ar kota Kaisarea bakan ajiosef, wunam Yerusalem ajisosefen. 2Erasan ara, e Allah atakam mamtaw tugas ow awutam, e Yahudi kepala owam, Paulus salah ara, inim atakam e Festus aotawfesen. 3Aram janim fak e Festus aanimfesen. “Or ow e Paulus e Yerusalem batowotnaw jirmec mamjirimey.” Inim aefesen. Bap ara, ar e Paulus e bowsec bacatiw at aefesen. 4Festus nat, atep ajitefen. “Paulus e Kaisarea penjara cem awap. Doram erasan sarimnakap aojisoscimin. 5Inimas ara, e carownucur ow, dor akac bajarcenes. E ipic salah aemefnew, e ow e salah atakam arma baotawces.” Inim aeefen.
6Barewen. Festus, bar delapan ajiwarnew, bar sepuluh ajiwarnew, erasan aemapef, wunam Kaisarea ajisosefen. Ajofay ara masirin, ar e ow boworpor asan afiwapefen. Aram ow Paulus batowomiw jirmec ajirimefen. 7Paulusam erasan ajaremef ara, e Yerusalem ewenawfes Yahudi ow, Paulus fumi aamcirimemfesen. Aram Paulus salah arke atakam atawfesen. E atakam nat, fwe opoken. 8Bare, e Paulus atep arma ajitefen. “Dor e Yahudi jirmecam, e Kaisar jirmecam, bopow opok. Doram e Allah cem pwicak bwem opok.” Inim aeefen. 9Festus nak, jak akat e Yahudi ow bemapom aemefen. Inimas ar jonow Paulus atowporefen. “Or Yerusalem baysos, wunam dor erasan, e atakam atawmes salah or boworpor, akat open?” Inim aeefen. 10Paulus nat, “Dor, Kaisar, ow boworpor asan aememamin. Ar do boworpor asan anakat arara. Dor salah e Yahudi ow bwem opok. Oram inimas omsom. 11Dor pemerintah atakam aopowofnew, wunam pemerintah do bacatiw aememamesnew, bare doram e pemerintah do bacatiw arapok, inim janim manim opok. E nat, awapes ow do salah atakam aotawmenes. E atakam, suw atakam aranew, ow, dor awapes ow ban ton bwemotasimtam asan opok. Bare, dor Kaisar arma do boworpor janim aanimamin.” Inim aeefen. 12E Festus masirin, aratakam mamsakam ow, atakam aamtawfesen. Atakam aamtawfes masirin, e Festus atep ajitefen. “Or Kaisar aramat ipic, or boworpor, janim aanimamem. Bare. Oram Kaisarpu ajisoscemem.” Inim aeefen.
Paulus, Agripaam, Bernikeam, bipu aememef
13Barewen. Bar mamincop aemapfes ara, raja Agripaam, Bernikeam, kota Kaisarea ajarapfesen. Aram Festus atakam akat mamtaw jaki ajitfesen. 14Ar erasan bar arke aemapfes, Festus, Paulus atakam, e raja aotawefen. “Feliks jipic cowok arasan penjara cem aman bakan ajiosef. 15Doram Yerusalem aemapof, e Allah atakam mamtaw tugas ow awutam, e Yahudi ownucur owam, e ipic salah atakam aotawfenes. Aram dor e ipic siksa atakam basakamtiw janim aanimfenes. 16Dor masirin, atakam e ow aotawof. ‘Ow, jipic cowok salah atakam aotawcesnew, Roma pemerinth e ipic e ow basarimotasimemtam opok aemcomom. Salah atakam botaw owam, e salah ipicam, biamnuk batakamemamtewces. Inimas e salah ipic, e salah atakam botaw ow, atep ajitcema. Dar Roma pemerintah inim cowok ara.’ Inim aeof. 17E owam arasan ajarewsiapfes. Ajarewsiapfes masirin, kamor opok aemof. Dor e ow boworpor asan afiwapof, wunam e ipic batowomiw jirmec ajirimof. 18E ipic salah atakam aotawfes owam asitfes. E atakam aotawfes salah nat, e dobi binip aceceremofas awcawor opok. 19Ar aragama atakam aamtawfes. Aram damir aafef ipic juwas Yesus atakam aamtawfes. Paulus atakam, ‘E Yesus, bare aojaworsitef,’ inim aeef. 20Do nat, inimas boworpor nomsom opok. Inimas ara, dor e ipic jonow atowof. ‘Or Yerusalem baysos, wunam erasan dor or boworpor, aket open?’ Inim aeof. 21E Paulus nat, janim aanimfan. ‘Pemerintah manmok do batiwcan. E Kaisar, e dosalahnew, atakam arma basakamtiwcow.’ Inim aeef. Dor masirin, ow jirmec ajirimof. ‘Car awamec ipic manmok mamtiwey. Dor e ipic Kaisarpu atiwirimcey jofay ajiwara.’ Ini aeof.” Festus inim atakam e Agripa aotawefen. 22E Agripa masirin, atakam Festus aotawefen. “Dor aramat ipic atakam botaw, jen dorma baji akat ara.” Inim aeefen. Festus masirin, “Bare, or to aramat ipic atakam botaw, jen ajicemem.” Inim aeefen.
23Barewen. Ajofay ara, Agripaam, Bernikeam, e ow barewsiap cem afiwapfesen. Ar raja aturan epcom afiwapfesen. E tentara kepala owam, e kota ownucur owam, akac afiwapfesen. E Festus masirin, jirmec ajirimef, wunam ow Paulus atowomiwfesen. 24Festusam atakam aotawefen. “Raja Agripa. Awapokom owa. Car awamec ipic apormokom ara. E arasan Yahudi ow takasam, e Yerusalem Yahudi ow takasam, e ipic salah, inim atakam dor aotawfenes. ‘E ipic damir baafcow.’ Inim atakam afakaytawfenes. 25Do nat, e ipic, damir baf salah bwem opok aporof. Aram Kaisar, ar salahnew arma boworpor, janim aanimfan. Inimas dor e ipic, Kaisarpu batiwirim, atakam asakamtiwof. 26Do nat, e ipic atakam fwe bapor opok. Inimas dor e ipic atakam fwe surat e Kaisar bwemetam asan opok. Bare, dor e ipic awapokom ow takas bipu atowotnawmin. Raja Agripa. Doram e ipic e obipu a takam towotnawmin. Or e ipic aoworporcem, doram e atakam fwe jen ajicimin. Dor masirin, e atakam surat Kaisar aetamcimin. 27Dor penjara bemap ipic batiwirim, wunam asalah atakam fwe opok, bare pwicak ara.” E Festus inim aeefen.
اکنون انتخاب شده:
AEMAWIRISAS 25: LAICNS
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
