AEMAWIRISAS 24
24
Yahudi ow, Paulus salah ara, inim atakam aotawfes
1Bare. Bar lima ajiwar masirin, e Allah atakam mamtaw ipic awut juwas Ananiasam, wun ownucur owam, pemerintah jirmec cescuw ipic juwas Tertulusam, erasan ajisosfesen. Ar e gubernur bipu aememfes, wunam Paulus salah atakam aotawfesen. 2Ow Paulus ajatefes, wunam e Tertulus, e Paulus salah, inim atakam aotawef. “Feliks akatnakutenem. Or jirmec akat ajirimawirim. Inimas dacapinmi ow asan akat aemapawirum. Oram bi binip epcom ipic ara. Inimas e wun asan pwicak aemapfomas, asan akat aomfarowem. 3Daram e dacapinmi asanin asanin inimas aporawirum. Dar masirin, terima kasih atakam or aotawmenom. 4Dor or a atawmin atakamnakap, asan akat jen bajipor, janim or aanimpormin. A atakam jipinnakap ara. Or dam jipi bemapasin. 5Bare, dar awamec ipic, ow bajurusum ipic aporfom. Aram e capinmiin capinmiin Yahudi ow, jokmen memem, atakam ajomtamawiri. Aram Nasaret atakam mamkawi ow akepala ipic ara. 6Aram e Allah cem pwicak bemapom aemporef. Dar masirin, aramat ipic ban akimomfom, wunam e darop agama Jirmec jipu boworpor, aemfom. 7E tentara kepala ipic juwas Lisias nat, awamec ipic, e daban acakemtewef. 8Aram, awamec ipic salah atakam aotawfes ow, e obipu bwenaw, jirmec ajirimef. Bare, oram e ipic orma aoworporcem, e aotawmom salah takas atakamnak aporcemem.” Tertulus inim aeefen. 9E Yahudi ow takasam, “Paulus salah ara. E atawmom atakam, bare atakamnak ara.” Inim aefesen.
Paulus e Yahudi ow e gubernur bipu atep ajitef
10Bare. E gubernur ipic, atakam Paulus aotawefen. “Bare, oram atakam patawey.” Inim aeefen. Paulus masirin, atakam aotawefen. “Or tahun arke, jirmec a capinmi ow ajirimawirim. Dor eras apormin ara. Inimas e aemenes salah, e obipu atep bajit, akat aemamin. 11Bar dua belas ajiwar aenawef, dor Allah basicim Yerusalem ajisosof. Oram inim atakam, atakamnak aporcemem. 12E Allah cem amanam, e sembahyang cem takas amanam, e kota wun asanam, dor ow atakam mamtaw opok. Doram ow jokmen memem, atakam bajomtam opok. Awapes ow dor inim pok bwem manmok batiw opok. 13E do salah atakam aotawmenes, aram fwe atakam bwemotaw asan opok. 14Do nat, inim atakam or aotawmin. Awamces ow, a ajamkawiminas suw agama arawen. Do nat, e darafas arAllah asicimamin. Bare, dor e Tuhan Bokot ajarmin. Dor e Musa Jirmec buku atakam takasam, e Allah atakam botaw ow tulis aefes buku atakam takasam, asicimamin. 15Awamces ow, e Allah aemcowas, manmok afemes. Doram eras manmok afemin. Bare, e damir aaffes ow tarowat takasam aojaworsitcemes. E damir aaffes ow fasi takasam aojaworsitcemes. Dar inimas manmok akac afemom. 16Inimas ara, dor e Allah bipu aemaminasam, e asmat bipu aemaminasam, tarowatnak bwem aatamempormin. Dor e aemaminas takas, jak bini opok aatamempormin.”
17“Dor tahun mamincop ajiwar ajisosawiru. Dor masirin, uang dosamat ow mami batetam aofasiof. Doram pok Allah bacatitam aofasiof. 18Dor inimas aemof ara, awapes ow, dor Allah cem aman aporfenes. Bap ara, doram e orom mememas upacara aemkurumof. Bare, doram ow arke aman opok. Jisuwanam opok. 19E nat, wun Asia capinmi ewenawfes Yahudi ow erasan aememfes. E ow e obipu arma batipem, bare akat ara. Aram e dosalah atakam atawmesas, atakam arma botaw, bare akat ara. 20Wunam dor e atakam mamsakam ow bipu aememof, awapes ow, dosalah aporfenesnew, aram atakam baotawces. 21Bare, dor atakam cowoknakap aotawof. ‘Dor, e damir ow aojaworsitcemes, inim atakam asicimamin. Inimas a ow dor aoworporman.’ Inim aeof.” Paulus inim atakam aotawefen.
22E Feliks nat, e Tuhan Bokot atakam amsomnakut arawen. Aramat ipicam, “Dar wow a atakam ajiwar cowok ara. E tentara kepala ipic juwas Lisia aenawcow, dor e osalah, atakam asakamtiwcimin.” Inim aeefen. 23Aramat ipic masirin, jirmec, e komandan ipic ajirimef. “Or awamec ipic manmok mamtiwey. E nat, aramat ipic e cesen bajarnakap acuw arapok. Ajowow, pok a bafafaytam, acuw arapok.” Inim aeefen.
24Barewen. Asep jofay ara, Feliks aremcin aenawfesen. Arem juwas Drusila arawen. Ar Yahudi samat cowoc arawen. Bare, e Feliks e Paulus ajateefen. Ar masirin, e Paulus e Kristus Yesus basicim atakam atawefas, jen ajiefen. 25Paulus, ow tarowat memem atakamam, jak fak memem atakamam, Allah e aenawcow dosa atakam basakamtiw jofay atakamam, inim aotawefen. Feliks masirin, omar aeefen. “Oram baysosey. Asan akat aporcey, dor or aojatecimin.” Inim aeefen. 26Aram, Paulus, uang, a batetam, akaten. Inimas ar Paulus bar arke ajatea aeefen. Aram atakam Paulus aamtawa aeefen.
27Bare tahun jamnuk aemapfesen. Tahun jamnuk aemapfes masirin, Perkius Festus e Feliks, e gubernur tugas juw auwuemefen. Feliks nat, e Yahudi ow jak akat bomapom aememefen. Inimas ar Paulus, penjara cem aman, bakan ajiapomefen.
اکنون انتخاب شده:
AEMAWIRISAS 24: LAICNS
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
