Iohane 21
21
Iesu mopatongawaꞌ wátáNa i topeguruNa to pitu
1Roo onoꞌ, hangkani mani Iesu mopatongawaꞌ wátáNa i topegurunaheꞌ. Iti mewaliꞌ i wiwi rano Galilea.#21:1 Rano Galilea rauliꞌ woꞌo rano Tiberia. Node daritakáná: 2Bahangapaheꞌ topeguruNa hirámpu ionoꞌ, iamoheꞌ: Simoꞌ Peturuꞌ, Tómá to rauliꞌ woꞌo Didimu, lempóna Toporopaꞌ, Natanaeli hangko i wánuá Kana i tampoꞌ Galilea, ánáꞌna Sebedeu to rodua,#21:2 ánáꞌna Sebedeu to rodua: iamoheꞌ Andaria hai Iohane. hai rodua topeguruna Iesu to ntániꞌna. 3Nauliꞌ Simoꞌ Peturuꞌ, “Ina laoaꞌ modálá.”
Rauliꞌ, “Ina meuláꞌangkaiꞌ woꞌo.” Lao mpuꞌumoheꞌ mengkaheꞌ i duanga hai modálá i rano. Agáiáná i lalu hambengiá iti, tiꞌaraheꞌ morasiꞌ haweꞌ hambaꞌa to kana dáláraꞌ.
4Hungkuꞌ miꞌi mabaa, Iesu meángkáꞌ i wiwi rano, agáiáná tiꞌara raisá kaꞌIesuna. 5Nahángáꞌáheꞌ, “HalaluNgkuꞌ, tiꞌara paꞌi ara bouꞌmi?”
Rahániki, “Tiꞌara ara haweꞌ hambaꞌa.”
6Nahángáꞌáꞌáheꞌ Iesu, “Nitende dálámi tándáꞌ i kuánána duangami, bona morasiꞌkou.” Mewaliꞌ ratende mpuꞌu miꞌi dáláraꞌ, hai tiꞌara piꞌi rabuku moángkáꞌ i lalu duanga, láwiꞌ handaꞌ ntepuꞌu bouꞌ to ara i laluna.
7Hangko ionoꞌ, topeguruna Iesu to Napokaꞌahiꞌ mohángáꞌá Peturuꞌ, “Doꞌo Pueꞌ!” Kanahádina Peturuꞌ laluitana iti, napusaꞌ miꞌi baduna láwiꞌ ia tiꞌara mebadu,#21:7 napusaꞌ miꞌi baduna láwiꞌ ia tiꞌara mebadu: Mouláꞌ ádáraꞌ toIahudiꞌ, tiꞌaraheꞌ peisá mombetabe ane tiꞌaraheꞌ mebadu maroꞌa. haneꞌi mentimboꞌ i uwai lao mampohidupaꞌá Iesu. 8Topeguruna Iesu to ntániꞌna to i duanga, modiiꞌheꞌ dálá to bukeꞌ bouꞌ lao i wiwi rano. Tiꞌaraheꞌ karaoꞌ hangko i lorena, rekeꞌ-rekeꞌna hangatu peá mete. 9Kamendáuluraꞌ peá i lorena, moitaheꞌ api to tueꞌ ionoꞌ, hai i wongko api ara bouꞌ hai ara woꞌo rótiꞌ.
10Nahángáꞌáheꞌ Iesu, “Ánti mai bahangapa báꞌána bouꞌ to hangko nidálá.” 11Simoꞌ Peturuꞌ mengkaheꞌ i duanga hai modiiꞌ dálána lao i lorena. Dálá iti bukeꞌ hai bouꞌ to mahile: hangatu lima puloꞌna hai tálu báꞌána kahandaꞌraꞌ. Agáiáná kehapiꞌ noꞌonoꞌ kahandaꞌraꞌ, tiꞌara woꞌo mohepaꞌ dálá iti.
12Nauliꞌ Iesu, “Maimokou molabiꞌ.” Tiꞌara ara haweꞌ hadua i oloꞌraꞌ topeguruNa to pebáiꞌ mekuneꞌ i Hia, “HeánáKoꞌ?” láwiꞌ manótó miꞌi i laluraꞌ kaꞌIana mpuꞌu Pueꞌ Iesu. 13Iesu moala miꞌi rótiꞌ haneꞌi Naweꞌiheꞌ, noꞌonoꞌ woꞌo bouꞌ. 14Iti miꞌi katáluna kánina Pueꞌ Iesu mopatongawaꞌ wátáNa i topeguruNaheꞌ mantepuꞌu hangko i katueꞌNa huleꞌ.
Iesu molaluita hai Peturuꞌ
15Karooraꞌ molabiꞌ, Iesu mampolaluitaꞌá Simoꞌ Peturuꞌ, Nauliꞌ, “Simoꞌ ánáꞌna Iohane,#21:15 ánáꞌna Iohane: Tiꞌara Iohane topeguruna Iesu. I lalu bahangapa sura, teukiꞌ ánáꞌna Iona. ba nupokaꞌahiꞌAꞌ melumbuꞌ hangko i pepokaꞌahiꞌraꞌ rángámu deꞌe i Kódóꞌ?”#21:15 ba nupokaꞌahiꞌAꞌ meliu hangko i pepokaꞌahiꞌraꞌ rángámu i Kódóꞌ? Peisá woꞌo ralempónga: ba nupokaꞌahiꞌAꞌ melumbuꞌ hangko i pepokaꞌahiꞌmu?
Nauliꞌ Peturuꞌ, “Toꞌu, Pueꞌ. Nuisánto kakupokaꞌahiꞌMu.”
Nauliꞌ Iesu, “Ane noꞌonoꞌi, nukádipuráheꞌ ánáꞌ dimbáNgkuꞌ.”
16Roo onoꞌ, mekuneꞌ wopiꞌi Iesu i Peturuꞌ karongkánina, “Simoꞌ, ánáꞌna Iohane, ba nupokaꞌahiꞌAꞌ?”
Nauliꞌ Peturuꞌ, “Toꞌu, Pueꞌ. Nuisánto kakupokaꞌahiꞌMu.”
Nauliꞌ Iesu, “Ane noꞌonoꞌi, nukádipuráheꞌ dimbáNgkuꞌ.”
17Hangko ionoꞌ, mekuneꞌ wopiꞌi Iesu i katáluna kánina, “Simoꞌ, ánáꞌna Iohane, ba nupokaꞌahiꞌAꞌ?”
Masusa miꞌi laluna Peturuꞌ láwiꞌ Iesu mekuneꞌ i katáluna kánina ba napokaꞌahiꞌ mpuꞌu. Mewaliꞌ nauliꞌ Peturuꞌ, “Pueꞌ, Nuisá upu-upuna. Nuisá kakupokaꞌahiꞌMu.”
Nauliꞌ Iesu, “Ane noꞌonoꞌi, nukádipuráheꞌ dimbáNgkuꞌ. 18Toꞌu ntepuꞌu laluitaNgkuꞌ deꞌe: i tempómu mani maleheꞌ, nubuku mani mokádipurá wátámu haduduámu,#21:18 nubuku mani mokádipurá wátámu haduduámu - I lalu básá Iunani: io haduduámu mopatakaꞌ pampou i hopeꞌmu. hai molumaokoꞌ iumbá peá peundeꞌámu. Agáiáná ane matoamamokoꞌ, ina mampeweꞌikoꞌ taemu i tauna, ina ratimpukukoꞌ hai raꞌántikoꞌ lao i katoroꞌá to tiꞌara nuꞌundeꞌ.” 19Moliu laluitaNa iti, Iesu mopakanótó noumbá Peturuꞌ ina rapapate bona hangaꞌna Pueꞌ Ala rapomahile.#21:19 Tempóna Iohane moukiꞌ sura deꞌe, Peturuꞌ mate miꞌi rapakuꞌ i kau mombehape. Básá to naukiꞌ Peturuꞌ, 1 Peturuꞌ 4:14-16. Roo onoꞌ, nauliꞌ wopiꞌi Iesu i Peturuꞌ, “Meuláꞌmokoꞌ i Kódóꞌ!”
Iesu mampolaluita i Peturuꞌ kana i topeguruNa to Napokaꞌahiꞌ
20Tempóna Peturuꞌ mehaileꞌ i taleuꞌna, ia moita hadua topeguru to napokaꞌahiꞌ Iesu meuláꞌ i hira. Ia miꞌi to mehoda i hintáiꞌna Iesu tempóraꞌ mandeꞌ pandeꞌ Paska hai mekuneꞌ i Hia, “Pueꞌ, heáná riꞌi to ina mampobaluꞌKoꞌ?”#21:20 Básá Iohane 13:5. 21Kanaitána Peturuꞌ, napekuneꞌ, “Pueꞌ, apa to ina mewaliꞌ i rángángkuꞌ deꞌe?”
22Nauliꞌ Iesu, “Ane Kuꞌundeꞌ bona ia tueꞌ oaꞌ duuꞌKuꞌ haweꞌ i karongkánina, tiꞌara paraluu nuisá! Agáiáná io, meuláꞌ pekoꞌ i Kódóꞌ.”
23Hangko ionoꞌ, tebámbári miꞌi i topeuláꞌna Iesu to ntániꞌna, katiꞌárána ina mate topeguruNa iti. Mole tiꞌara iti to nauliꞌ Iesu, agáiáná node riꞌi, “Ane Kuꞌundeꞌ bona ia tueꞌ oaꞌ duuꞌKuꞌ haweꞌ i karongkánina, tiꞌara paraluu nuisá!”
24Topeguruna Iesu to moita mata upu-upu to mewaliꞌ hai to mopahaweꞌ posabikina, ia miꞌi to moukiꞌ sura deꞌe. Hai taisá katoꞌuna laluita deꞌe.
Kahópóꞌána laluita
25Handaꞌ mani to nabábehi Iesu, agáiáná ane upu-upuna to Nabábehi iti raukiꞌ i lalu sura, rekeꞌ-rekeꞌna humalele duniáꞌ deꞌe tiꞌara gáná rapamboliꞌi sura iti.
اکنون انتخاب شده:
Iohane 21: NTBEP
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Bahasa Behoa Shorter Bible © Indonesian Bible Society, 2015.
