Amarku 6
6
Moarehwi ba Anazarata moa a tla Eyesu
1Eyesu pa la moanwyeotum baŋ a zgi odne Ojayiru nga moa a gre Anazarata osku ba Eyesu a hlu ma. 2Onda Asabat Eyesu a gre anwyeakulu nga a nye moare odlo Ahogbrẽ. Moare nzenze a ba a gno onyenye baŋ nga moa a ka egbregbre nzenze. Moa a zhĩ ma, Eyesu a hwiŋ edgu onyenye he lo ayaŋ? Nga a kpo anyu a hwiŋ edgu okaobmye he lo? A kpo anyu a kpo ayakplo ba egbregbre eka he? 3Aŋa angyiŋ a wo anwye la a sẽ amgbla, anwye Emeri angyiŋ mbo? Moanáŋ angyiŋ a wo Eyakubu, ta la Ojosi, ta la Eyahuda, ta la Esima mbo? Moanáŋ-alashle a wo ahe ka la gi mbo? Okyku eka he moare ba osku ba Anazarata a tla Eyesu. 4Eyesu a nyuŋ mo a lu mi le, Moare ayaŋ a mbo a la a ka arehwĩ ba Ahogbrẽ a hom otum la olbi o wo le moa-osku baŋ, pa la moa-egu baŋ pa la moa-odne baŋ dne a ka ŋa la olbi mbo. 5Eyesu a kpo a gbu baŋ a kpo ayakplo egbregbre osku Anazarata nzenze mbo o wo le a tka moakyeŋ la a no olo fi nga a shaŋ mo. 6Eyesu a ka egbregbre a gre eshri okyku moarehwi ba osku ba Anazarata a wo obmi ba adlidzi ma mbo.
Eyesu a hom moanwyeotum baŋ otsko otum
Eyesu a gre anwye esku pyeŋ la a wo akekaŋ ba obiŋ Egalili nga a nyum oshpa. 7A pla moanwyeotum otsko baŋ a shki nga a shri ekʼpo a da mo eshri egbgabi, nga a gʼba mo aha-haha okyku o da mo a yi anwye esku andandandim a nyum oshpa. 8Eyesu a shĩ mo a lu mi le, O wo bimi e zgi edzi e yi e nyum oshpa le ame e klo ba akyeŋ a mbo a sko emakyeŋ ta la eŋa mbo, o wo le opi o dzi oklo sha. E shri agbrotsa ta la abre, ta la amgbaŋ mbo. 9E ygi ariga akyekyeŋ nga e ghwo akpadga. 10Nga o wo bimi e gbu osku le, e dzu odne oriori bimi e tum ma, e nyiŋ adne mbo. E dzu ma-me o tsa onda bimi e kso. 11Osku bimi e gbu ma, o wo moa a yga gimi mbo le, agimi e dzu mo e zga, nga e ndza abgo bimi nga e yi egimi. Alo ó tsa mo. 12Moanwyeotum nga a gre a yi a nyum oshpa okyku o da moare a ghwo obiŋ odlobi mo. 13Moa a se egbgabi a sku moare. Moa a tsiŋ moare la a no olo awargi eshri nga moa a shaŋ.
Eku ba Eyohana la a kpo abaptisma
14Eyesu a gbu eshko a gre eshri okyku ayakplo egbregbre baŋ a la a kpo. Ehirudu anyuŋ-areŋ a mbo a gno oshpa ayakplo egbregbre ba Eyesu a kpo. Moabze a lu mi le, Eyohana la a kpo abaptisma angyiŋ a bla a kso la esõ. Okyku eka he angyiŋ a la a kpo ayakplo egbregbre he lo. 15Moabze a lu mi le, Are he lo a wo Eliya angyiŋ. Moabze a lu mi le, Are he lo a wo akyeŋ eshki moare ba Ahogbrẽ á hom mo otum obiŋ hi ogbyigbyi.
16Omba ba Ehirudu a gno odlo moare a la a lu nga, a lu mi le, Are he lo a wo Eyohana la a kpo abaptisma aŋa angyiŋ ame e da mo a kplu eshri baŋ. A sa a bla a kso eku. 17Ehirudu angyiŋ a da mo a vu Eyohana a ta aku. Ehirudu a vu ŋa a ta aku eshri Ehirudiya ashe anáŋ Efilibu baŋ a sko a kyu. 18Eyohana a bmi ba Ehirudu a ngʼga ashe lo a kyu mbo, okyku eshi ashe he lo a wo ashe Efilibu anáŋ. 19Okyku eka he esõ e tpi ashe he lo ayi ta la Eyohana, nga a klo o bga ŋa, ambo okyku eyli Ehirudu aŋa a kpo akplokyeŋ mbo. 20Ehirudu a kpo eyli Eyohana okyku eshi a yi Eyohana a wo arehwĩ ba eda edzi nga a wo esesla. Okyku eka he a kpaŋ ŋa nga a kpo ŋa akplokyeŋ abi mbo. Ehirudu a gno oraŋ ta la odlo Eyohana, ambo a klo ŋa mbo.
21Onda ba Ehirudu a kpo abgo olum onda ba moa a mbre ŋa nga, a bzi moandakʼpo la a ri ekʼpo ka la ŋa, pa la moandakʼpo moare la a kpo otum akyuŋ, pa la moandakʼpo ba obiŋ ba Egalili. Olum onda he lo Ehirudiya he lo a hwiŋ ozhẽ ekplo baŋ a klo. 22Onda he lo, anwye-alashle Ehirudiya a gre aku moare a shki ma a la a ri abgo nga, a zhga ara adzadzi egi ayi Ehirudu pa la moahwõ. Moa mvye a gno oraŋ a gre eshri. Ehirudu nga a nyuŋ anwyeshe lo a lu mi le, Ame é shri ekployaŋ a mbo boŋ o vẽ é shri é doŋ. 23Ehirudu a kʼpi ashum a lu mi le, Adlidzi ekployaŋ a mbo boŋ o vẽ, o wo boŋ o klo ogʼba ba oreŋ me a mbo ame é shri é doŋ. 24Anwyeshe a gno eka he nga, a knye a gre a yi a zhĩ anaŋ a lu mi le, Aŋo o klo me a vẽ eshi okro Ehirudu? Anaŋ a tno ma a lu mi le, Ame e klo eshri Eyohana la a kpo abaptisma. 25Anwyeshe lo a knye a ba a gre okro Ehirudu nga a vẽ a lu a mi le, Ame e klo boŋ o kplu eshri Eyohana la a kpo abaptisma o ta amgbalga o shri o da me ohuhuhi. 26Ekplo he lo e tpi Ehirudu esõ ayi nzenze, ambo okyku anzi moazhẽ, o dzu omgbybi baŋ a bli ohwihwim baŋ. 27Okyku eka he a hom are la a kʼpu aku moa a vu moare a ygi ma otum, ma a yi a kplu eshri Eyohana a shri a ba. Are la a kʼpu lo a gre a yi a kplu eshri Eyohana. 28A shri eshri lo amgbalga a da anwyeshe, nga anwyeshe a shri lo a kom anaŋ. 29Omba moanwyeotum ba Eyohana a gno ba moa a kplu Eyohana eshri nga, moa a gre a yi a sko okom baŋ a ngybi.
Eyesu a vgi moarehwi ezbietno akla
30Moanwyeotum la a zgi onyumoshpa a ba okro Eyesu nga moa a lu eka ayakplo moa a kpo a daŋ. 31Moare a ba okro Eyesu ombamba mvye, nga Eyesu pa la moanwyeotum baŋ a hwiŋ anvaŋ ba moa a ri algo mbo. Eyesu a nyuŋ moanwyeotum baŋ a lu mi le, Agimi e da gi e yi agbakyeŋ okyku o da gi e dzu e bʼbu, okyku omba fi. 32Moa a gre amgblami nga a gre agbakyeŋ. 33Moare nzenze a ka omba ba Eyesu pa la moanwyeotum baŋ a yi. Okyku eka he moa a sõ oshyi nga a gre okro moa a yi a sheŋ mo a ta. 34Omba ba Eyesu a zgi amgblami nga a ka eshki moarehwi a shki. Moa a wo ŋa ayiekŋe okyku eshi moa a wo eka ékylu la e wo are la a kpaŋ mo ma mbo. Eyesu a nye mo ayakplo nzenze. 35Olum-ore moanwyeotum a nyuŋ Eyesu a lu mi le, Olum o gbu ogbu a mo, odnekyeŋ o wo ahe mbo. 36Okyku eka he o kyu eshki abgo o da mo a yi agbi ta la anwye esku la a wo osusku ahe, a gbmo algo a ri. 37Eyesu a nyuŋ mo a lu mi le, Agimi e klo algo e da mo a ri. Moa a tno ŋa ma a lu mi le, Agi é yi é gbmo agbrotsa ba Enaira ekʼpoenyi é shri é ba é da mo? 38Eyesu a zhĩ mo a lu mi le, Agbrotsa ahrẽ agimi e wo alo ma? E yi e ka nga e ba e lu e da me. Moa a gre a ka nga, moa a ba a lu mi le, Agbrotsa atno, ta la atsa aha a wo ma.
39Eyesu a lu ma moanwyeotum baŋ a da moare mvye a shki obiŋ asoso awu. 40Okyku eka he moare a shki obiŋ, nga a dzu ele-eluŋ. Eshki-ebze, moare ekʼpoetno a wo ma. 41Ambla ba Eyesu a tslo agbrotsa atno ta la atsa aha, a ka ongyeŋ, a vye Ahogbrẽ a khwo nga a gʼba mo alo. 42Areyaŋ a mbo a taŋ agbrotsa ta la atsa aha lo a wyo gble. 43Moanwyeotum a pla agbrotsa ta la atsa la a ra nga, a bli aksu otsko. 44Moarehwi la a taŋ agbrotsa a wo ezbietno.
Eyesu a dzi ami
45Ebuebu Eyesu a nyuŋ moanwyeotum baŋ ma moa a yi Ebetseda o tsa baŋ a ba. Osku lo o wo eshri osu ba atam Egalili. Eyesu a kyu eshki abgo a da mo a gre. 46Ambla he nga Eyesu a gre akũ-akyeŋ okyku o fa olu. 47Olum-ore omba ba amgblami a wo agʼbaha atam, Eyesu a wo eŋa okrokyeŋ akũ. 48A ka moanwyeotum baŋ a la a tpi amgblami mo la ewu. Omba he lo ogbga ogbu o som mo ayi. La amgbaŋ atra o mbo le amgbaŋ afĩ ba endigiŋ, Eyesu a dzi ami a ba okro mo nga a bre a yi. 49Omba moa a ka ŋa a dzi ami a yi nga, moa a ta enzi angyangyeŋ a lu mi le, E ka amu! 50Omba moa a ka Eyesu eyli e kpo mo. Eyesu a nyuŋ mo a lu mi le, Agimi e shye esõ bimi! Ame angyiŋ. E kpo eyli mbo! 51Eyesu a gre amgblami lo pa la mo a khwo nga, ogbga ogbu o dum. Moanwyeotum baŋ a ka egbregbre a gre eshri nga moa a yi eheŋ-ekyeŋ moa a wo ma mbo. 52Moanwyeotum Eyesu a ka onyenye ba agbrotsa a bmye mbo. O gre mo eshri okaobmye.
Eyesu a shaŋ moalolo obiŋ ba Ajanasarata
53Moa a bmyi atam lo nga moa a ba osku moa a bzi lo Ajanasarata. Moa a dze amgblami mo akaŋ atam. 54Omba ba moa a zgi amgblami, shoshoŋ nga moare a ka a bmye ba alo a wo Eyesu angyiŋ. 55Ambla moare a gno oshpa ba Eyesu a ba a khwo nga, moa a zgi ekro andandandim a ba la moalolo akpakpa moa a lom ma, okyku o daŋ a shaŋ mo. 56Okroyaŋ a mbo ba Eyesu a gre, anwye esku, ta la esku, ta la agbi, ta la ekyku, moa a sko moalolo a kom ŋa ekro he lo, nga moa a vẽ ŋa okyku o daŋ a bmi nga a da moalolo a tka ariga baŋ. Moa la a tka ariga baŋ mvye moa a shaŋ.
اکنون انتخاب شده:
Amarku 6: EGONT74
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Eggon New Testament © United Bible Societies, 1974. Bible Society of Nigeria
