Amarku 5
5
Eyesu a shaŋ alomakyeŋ ba egbgabi e kpo otum ka la ŋa
1Eyesu pa la moanwyeotum baŋ a gre akaŋ etetne ba atam ba Egalili obiŋ ba Egeraseni. 2Ambla ba Eyesu a zgi amgblami nga, alomakyeŋ a zgi engybi a ba a ka ŋa. 3Ogbgabi o kpo otum ta la alom he lo, nga a la a lom engybi eshyẽ. Arekyeŋ a bʼbu ŋa la aslika a gbu mbo. 4Engyi oshushku moa a ta ŋa agbu ba ahwre, adga ta la abgo. Ombayaŋ a mbo a sheŋ agbu ta la aslika moa a ta ŋa, nga a gre areyaŋ a mbo abgo. 5Elelum ta la okyukyku, a la a dzi egi engybi, ta la akukũ, a la a wu okũ nga a ta akhi, nga a la a ta eŋa etsa la ézhim.
6A gyuŋ ple omba baŋ a ka Eyesu, ambo a knye a ba okro Eyesu nga a kʼpu obiŋ egi ayi baŋ. 7A ta enzi angyangyeŋ a lu mi le, Eyesu Anwye Ahogbrẽ ba esesla aŋo o klo eshi pa la me? Ame e vẽ ŋo eshko ba Ahogbrẽ, o wo boŋ o bmi le, o kyu me abgo. 8Alom lo a lu eka he omba ba Eyesu a nyuŋ ogbgabi la o wo ka la ŋa, ma alo o zgi o sku ŋa. 9Eyesu nga a zhĩ alom lo a lu mi le, Eshko boŋ e ri ayi? A tno ma a lu mi le, Eshko me e ri Nzenze. Agi e wo nzenze. 10Alom lo a vẽ Eyesu okyku o daŋ a kyku egbgabi e sku obiŋ lo mbo.
11Osusku ta la okro he lo, moa a la a vgi okóko nzenze akaŋ akũ. 12Egbgabi e vẽ Eyesu e lu mi le, O wo boŋ o bmi le, o da gi e yi e gre egʼba ba okóko. 13Eyesu a bmi nga, egbgabi e zgi e yi e gre egʼba ba okóko ezbieha he lo. Okóko lo o tsu o gre atam nga o kpu.
14Moare la a kpaŋ okóko a knye a gre osku ta la agbi moare nga a da mo oshpa eshri ekplo egbregbre la e kpo. 15Moare a knye a ba okro Eyesu nga moa a ka alom ba egbgabi nzenze e la e kpo otum ka la ŋa, a ygi aknye egʼba nga a dzu obiŋ la eda zhezheŋ. Moare nga a kpo eyli. 16Moare la a ka eka ekplo la e kpo ta la are ba egbgabi e kpo otum ka la ŋa nga ta la okóko, moa a yi a lu a da moahwõ. 17Okyku egbregbre ekplo la e kpo, moare a nyuŋ Eyesu ma a kso a sku obiŋ mo.
18Omba ba Eyesu a gre amgblami nga, alom la a shaŋ he lo, a vẽ Eyesu a lu mi le, O wo boŋ o bmi le ame e klo e yi ka la ŋo. 19Ambo Eyesu a bmi mbo. A tno ŋa ma a lu mi le, Aŋo ó yi pa la me mbo, ambo o bla o yi odne boŋ nga o lu o da moanóŋ eka ba Ahogbrẽ a ka ŋo ayiekŋe nga a kpo a ghwo la ŋo. 20Alom he lo a kso a dzi esku okʼpo ba obiŋ ba Edekapoli nga a lu ekplo ba Eyesu a kpo ka la ŋa a da mo nga moare a ka egbregbre nzenze.
Oshpa ba anwye-alashle ba Ojayiru ta la ashe la a tka oknye Eyesu
21Eyesu a ba akaŋ olum-ore ba atam Egalili. Moare nzenze a ba a shki okro baŋ. 22Ojayiru andakʼpo ba anwyeakulu, omba baŋ a ka Eyesu nga a ba a kʼpu obiŋ egi ayi baŋ. 23La ozgayi a vẽ ŋa a lu mi le, O ka, anwye-alashle me a no ababi, o wo boŋ o bmi le o ba o tka ŋa nga o daŋ a shaŋ. 24Eyesu a kso ka la ŋa, a yi nga moare nzenze a lu mo ma, nga moa a fye ŋa kpate.
25Ashekyeŋ a wo ma la a wo egi ehwõ, o kpo nga o zhiŋ o dzu olo. A no olo eyi otsko. 26A tpi amgbaŋ baŋ ayi mvye a la a wa agum ambo a shaŋ mbo. Olo lo o sa o ta ma-ma angyiŋ. 27A gno oshpa Eyesu, okyku eka he, aŋa a gre eshki lo nga a tspi egi okũ Eyesu. 28A lu esõ baŋ a lu mi le, O wo ame e tka oknye baŋ sha a mbo ame é shaŋ. 29A tka oknye Eyesu nga ebuebu amanzhli baŋ a tspi, nga esõ e gbu ŋa obiŋ okyku eshi a yi baŋ a shaŋ. 30Ekʼpo ba Eyesu a la a shaŋ moare la alo, e tsa ŋa, okyku eka he a zhiŋ ayi a ka moare nga a zhĩ mo a lu mi le, Ayi a tka oknye me? 31Moanwyeotum baŋ a tno ŋa ma a lu mi le, Aŋo o ka ba eshki e wo nzenze mbo? Aŋo o zhĩ eka he, aŋo o kpo anyu o ba o yi are la a tka ŋo? 32Ambo Eyesu a ka eshki tki, okyku o daŋ a ka are la a tka ŋa. 33Ashe he lo a ka a bmye nga a ba egi ayi Eyesu la eyli, la egʼba ezhgara, a ba a kʼpu obiŋ egi ayi baŋ, nga a lu adlidzi a daŋ. 34Eyesu a nyuŋ ŋa a lu mi le, Anwye-alashle me, obmi ba adlidzi boŋ o shaŋ ŋo. O yi ŋo la esõ ekyle.
35Omba ba Eyesu a lu odlo ta la ashe he lo, otum o zgi odne Ojayiru o ba o lu mi ma Ojayiru a kpo Eyesu ewu a daŋ a yi odne baŋ nga mbo, ma anwye baŋ a sheŋ a kpu bgu. 36Eyesu a sko ekplo moa a lu a da lo e dzu ŋa ekplokyeŋ mbo, nga a nyuŋ Ojayiru a lu mi le, O kpo eyli mbo, ambo o bmi ba adlidzi. 37Eyesu a bmi arekyeŋ a dzi ka la ŋa mbo o wo le Ebitru, ta la Eyakubu, ta la Eyohana anáŋ Eyakubu. 38Omba moa a gbu odne Ojayiru nga, moa a ka okro o som ayi la okũ eku. 39Eyesu a gre aku ba anwyeshe lo a lom ma nga a zhĩ mo a lu mi le, Okyku eshi agimi e som okro ayi la okũ eku? Anwye lo akpu mbo. A ndze enu angyiŋ. 40Eyesu a lu odlo a khwo nga, moare a lu odlo ototno eshri baŋ. A da moare mvye a zgi edzi o wo le anaŋ anwyeshe lo, ta la adaŋ sha, pa la moanwyeotum baŋ atra sha a ra a dzu aku lo. 41Eyesu a kom anwyeshe lo obgo nga a lu la olomokyeŋ a lu mi le, Talita kum, o dzu, Ame e lu e doŋ eyi anwyeshe, o kso. 42A kso embambaŋ nga a dzi. Ekplo he lo e dzu egbregbre e gre eshri okro moare, nga e kpo mo akpyki. Eyi anwyeshe he lo e wo eyi otsko sha ayga. 43Eyesu a shĩ mo a lu mi le, E lu e da arekyeŋ mbo, ambo e shri algo e kom anwyeshe he lo e daŋ a ri.
اکنون انتخاب شده:
Amarku 5: EGONT74
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Eggon New Testament © United Bible Societies, 1974. Bible Society of Nigeria
