1 Kōrinto 4
4
Te aŋa o te ⌊ꞌāpōtoro⌋
1E manaꞌu kōrua i a mātou i te nuꞌu haka ꞌite i te ⌊roŋo riva-riva o te ꞌAtua⌋ pa he tāvini nō o te ⌊Kiritō⌋ uŋa mo haka ꞌite i te meꞌe manaꞌu e te ꞌAtua mo aŋa taꞌe haka ꞌite mai ꞌi muꞌa ꞌā. 2Ko ꞌite ꞌana e kōrua: te taŋata ki a ia e vaꞌai ena i te aŋa e haka tano tahi i te meꞌe kī mo aŋa. 3ꞌE a au, ꞌina he tapa atu i te vānaŋa kī e kōrua ꞌe e te tētahi nuꞌu hoki ko tano ꞌā ꞌo kai tano tāꞌaku meꞌe aŋa. ꞌĀtā a au mau nei ꞌā ꞌina he kī i te tano ꞌe i te taꞌe tano o tāꞌaku meꞌe aŋa. 4ꞌE, ka ai atu ꞌina he manaꞌu ōꞌoku he tuhi mai ko aŋa ꞌana a au i te meꞌe taꞌe tano, te haꞌaauraꞌa o te meꞌe era taꞌe ꞌō pē nei ē: ꞌina mau ꞌana pēaha ōꞌoku hape. Te kope mau nō, paꞌi, mo kī i te tano ꞌe i te taꞌe tano o tāꞌaku meꞌe aŋa he Pūꞌoko Haka Tere o tātou ko Ietū Kiritō.
5ꞌO ira, e haka kore te kōrua kī i te tano ꞌe i te taꞌe tano o te meꞌe aŋa e te rua. Ki tiaki tātou ki te hoki iŋa mai o te Kiritō. Māꞌana e haka ꞌite mai i te manaꞌu o te taŋata taꞌe ꞌite e te rua ꞌe he haka aŋi-aŋi mai he aha i manaꞌu ai pē ira. ꞌI rā hora e ture rō ꞌe e haꞌahana-hana rō e te ꞌAtua i te taꞌatoꞌa tano ki te rāua meꞌe i aŋa.
6E te taina, mo te kōrua riva-riva i vānaŋa i haꞌaauraꞌa atu ai au o ruŋa i a māua ko ꞌĀporo mo ꞌite o kōrua mo haka tere nō i a kōrua hai meꞌe hāꞌaki ꞌi ruŋa i te ⌊Pāpaꞌi Moꞌa⌋, ꞌo haka paka kōrua i te kope e tahi ꞌe ꞌo taꞌe haka au i te rua. 7¿ꞌA ꞌai koe i kī i hau rō atu koe ki te rua? ꞌIna e tahi meꞌe ena ꞌāꞌau i taꞌe ai o te ꞌAtua i vaꞌai atu. ꞌE ꞌi te ai pē ira, ¿he aha ia koe e teꞌo-teꞌo ena ꞌe e haka tuꞌu ena pa he meꞌe ena ē: te meꞌe i a koe hai koe mau ꞌā e ai ena?
8Te huru, e manaꞌu ena kōrua ꞌina he meꞌe toe mo ꞌite o ruŋa i te ꞌAtua ꞌe i a kōrua te meꞌe taꞌatoꞌa vaꞌai e te ⌊Vārua Maitai⌋ mo aŋa i tāꞌana aŋa. Te huru takoꞌa, e manaꞌu ena kōrua a kōrua he ꞌariki ꞌe ꞌina e tahi meꞌe haŋa toe mo vaꞌai atu e mātou. ¡Pē hiva ꞌana ꞌō he parautiꞌa he ꞌariki a kōrua mo haka tere o tātou ananake! 9E tuꞌu takoꞌa rō ꞌana pe he meꞌe ena ē: te ꞌAtua ko haka rē ꞌana i a mātou i te ꞌāpōtoro, pa he meꞌe hopeꞌa, haka ūtuꞌa mo mate ꞌi roto i te koro nui-nui e tahi mo mātaꞌi-taꞌi o te merahi ꞌe o te taŋata taꞌatoꞌa. 10E manaꞌu ena te nuꞌu o te ao nei he maꞌa-maꞌa a mātou ꞌo te aŋa ki te Kiritō, ꞌe a kōrua e manaꞌu ena: ꞌo te ai a kōrua o te Kiritō he nuꞌu mārama-rama. Ki te manaꞌu takoꞌa o te nuꞌu o te ao nei he nuꞌu taꞌe pūai a mātou, ꞌe a kōrua e manaꞌu ena he nuꞌu pūai kōrua. Te nuꞌu o te ao e taꞌe haka au rō ꞌana i a mātou, ꞌe ki a kōrua e moꞌa atu ena. 11ꞌĀtā ki ꞌaŋarīnā e ŋaroꞌa rō ꞌana e mātou te maruaki ꞌe te pohe ki te vai. E kore rō ꞌana te mātou kahu mo uru, e tōtōā rō mai ꞌana e te nuꞌu, e kore rō ꞌā te mātou kona mo noho 12ꞌe e rohi-rohi rō ꞌana ꞌi te aŋa iŋa. E taro-taro mai ena e te nuꞌu, hai haꞌamaitai e haka hoki nei e mātou; ꞌe e tute mai ena mo tōtōā, he haꞌaoromaꞌi e mātou. 13E reo-reo ena o ruŋa i a mātou, hai vānaŋa riva-riva e mātou e pāhono ena. ꞌE ꞌātā ki ꞌaŋarīnā, e haꞌariro ena i a mātou e te nuꞌu pa he iŋo-iŋo ꞌe pa he meꞌe hopeꞌa o te taꞌe hauhaꞌa.
14Te meꞌe nei e au e pāpaꞌi atu ena taꞌe mo haka haꞌamā i a kōrua, mo haka tī-tika i te kōrua manaꞌu, pa he ŋā poki haŋa rahi ꞌāꞌaku. 15Ka rahi atu te nuꞌu hāpaꞌo ꞌe hāpī i a kōrua pa he ⌊kiritiano⌋, e tahi mau nō kope pa he matuꞌa tane o kōrua ko au. ꞌĀꞌaku, paꞌi, i haka ꞌite raꞌe atu i te ⌊roŋo riva-riva o ruŋa i a Ietū Kiritō⌋, ꞌe i kī atu mo ⌊haka moe i te manaꞌu⌋ ꞌi ruŋa i a ia mo ai o kōrua ꞌāꞌana. 16ꞌO ira ꞌī a au he ani atu: e haka tano te kōrua manaꞌu ꞌe te kōrua noho iŋa pē au.
17Mo te ŋā meꞌe nei i uŋa atu ena au i a Timoteo mo hāꞌūꞌū atu i a kōrua. A ia pa he poki haŋa rahi ꞌāꞌaku taꞌe haka rē ki te hora hopeꞌa i te aŋa o te ꞌAtua. Māꞌana e haka manaꞌu atu i tōꞌoku haka tere iŋa pa he kope haka moe i te manaꞌu ꞌi ruŋa i a Ietū Kiritō. Tōꞌoku haka tere iŋa, paꞌi, e tano rō ꞌā ki tāꞌaku meꞌe mau nei ꞌā e hāpī e oho nei ki te nūnaꞌa taŋata haka moe i te rāua manaꞌu ꞌi ruŋa i a Ietū o te kona taꞌatoꞌa vari ōꞌoku.
18Ko ꞌite ꞌana a au: tētahi o roto i a kōrua nā e haka paka ꞌana i a rāua ꞌi te meꞌe era e manaꞌu ena e ko hoki atu au e ko uꞌi i a kōrua. 19ꞌE, mo haŋa o te ꞌAtua, e ko roa hia he tuꞌu atu a au. ꞌI rā hora ka uꞌi nei a au: e pūai rō ꞌana a rāua ꞌo he haka kē nō mo vānaŋa te rāua meꞌe. 20Te haka tere iŋa o te ꞌAtua ꞌi roto i te tātou māhatu e ꞌite ena taꞌe hai vānaŋa, hai pūai mau era ꞌā ōꞌona haka huri i te tātou manaꞌu ꞌe i te tātou noho iŋa mo aŋa i tāꞌana meꞌe haŋa. 21¿He aha ia te kōrua meꞌe haŋa: he oho atu ōꞌoku haka ūtuꞌa i a kōrua, ꞌo he oho atu he uꞌi i a kōrua hai koa ꞌe hai haŋa?
اکنون انتخاب شده:
1 Kōrinto 4: rap
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2018, Wycliffe Bible Translators, Inc. All rights reserved.